“Ta Pian Agkayo Onloob ed Tukso”

“Mantultuloy a manbantay tan mantultuloy a manpikasi, ta pian agkayo onloob ed tukso.”​—MATEO 26:​41, NW.

SAY detdet et pirmi​—aliwan singa ed dinanman a detdet ya asagmak la nen Jesu-Kristo, ya Anak na Dios. Asingger lan manampot so bilay to ed dalin. Amoria to ya agla manbayag et sikatoy arestoen, napapatey, tan nipasak ed panamairapan a kiew. Amta to ya amin a desisyon tan kiwas to et mangapekta ed ngaran nen Ama to. Amta met nen Jesus a say bilay ed arapen ya iilaloan na katooan et nadetermina la ed saman. Lapud nipaarap ed amin na sayan pakadetdetan, antoy ginawa to?

² Si Jesus so linma ed hardin na Getsemani kaiba to iray babangatan to. Paborito nen Jesus iman a lugar. Diman et sikatoy inmarawi na daiset ed saray babangatan to. Sanen bukbukor to la, sikatoy kinmerew na biskeg ed mangatatawen ya Ama to, ya imbesngaw toy walad puso to diad masimoon a pikakasi, ya aliwan aminsan labat noagta amitlo. Anggaman ayadyari, ag-impasen nen Jesus a sarag ton arapen a bukor so detdet.​—Mateo 26:36-​44.

³ Natan, sikatayo met so manasagmak na detdet. Diad banda’d gapo na sayan brosyur, siningbat tayo so paneknek a manbibilay itayo la ed unor iran agew na sayan marelmeng a sistema. Ompapalalo iray tukso tan pananesdes na mundo nen Satanas. Saray desisyon tan kiwas na siopaman ed sikatayo a mankuan a manlilingkor ed tuan Dios so mangapekta ed ngaran To tan walaan na aralem ya epekto ed iilaloan tayon bilay diad balon mundo to. Inaro tayo si Jehova. Labay tayoy ‘mansungdo anggad kasampotan,’ balanglan kasampotan na bilay tayo odino kasampotan na sayan sistema, dinanman so unona. (Mateo 24:13) Balet panon tayon napansiansia so inkaganatan tayo tan mantultuloy itayon manbantay?

⁴ Lapud amta ton managmak met na desdes iray babangatan to​—namparan nensaman tan natan​—impaseseg nen Jesus: “Mantultuloy a manbantay tan mantultuloy a manpikasi, ta pian agkayo onloob ed tukso.” (Mateo 26:​41, NW) Anto so kabaliksan na saratan a salita ed sikatayo natan? Anton tukso so aarapen yo? Tan panon kayon ‘makapantultuloy a manbantay’?

Tukson Manggawa na Anto?

⁵ Amin tayo so inagew-agew a nipapaarap ed saray tukso pian onsuko ed “kalot na Diablo.” (2 Timoteo 2:26) Papasakbayan itayo na Biblia a nagkalautlan puntirya nen Satanas iray mandadayew ed si Jehova. (1 Pedro 5:8; Apocalipsis 12:​12, 17) Parad anton gagala? Agto getman pateyen itayo. Aliwan pambiktorya parad si Satanas no ompatey itayon matoor ed Dios. Amta nen Satanas a si Jehova, diad manepeg a panaon To et paolien to iray inaatey.​—Lucas 20:​37, 38.

⁶ Kaliktan nen Satanas a deralen so mablin tuloy nen say peles a bilay tayo​—say katooran tayo ed Dios. Gagawaen nen Satanas so anggaan na nayarian ton paneknekan a sarag to itayon patundaen a mandayew ed si Jehova. Kanian, no nasagyat itayon agmanmatoor​—ya ontunda lan mangipulong ed maong a balita odino italirak iray estandarte na Kristiano​—parad si Satanas et pambiktorya itan! (Efeso 6:11-13) Kanian “say Mananukso” so mangipapatit ed arap tayo na saray pakatuksoan.​—Mateo 4:3.

⁷ Nanduruma ‘iray mapalikdon taktika’ nen Satanas. (Efeso 6:​11, Jewish New Testament) Nayarin tuksoen to itayo diad panamegley na materyalismo, takot, panduaruwa, odino pananap na liket. Balet sakey ed sankaepektiboan iran metodo to et say pakadismaya. Bilang masilib a manag-anamot, amta to a say kaandian na ilalo so mamaletey ed sikatayo pian mainomay itayon natukso. (Uliran 24:10) Nagkalalo la sano ‘adaneldanel’ itayo ed emosyon, tuksoen to itayon onsuko la.​—Salmo 38:8.

⁸ Legan itayon manasingger ed anggaan na kaunoran iran agew, ompatnag ya onloor ni iray sengegan na pakadismaya, tan ag-itayo nipuera ed saratan. (Nengnengen so kahon ya “Arum Iran Sengegan na Pakadismayaan.”) Antokaman so sengegan, say pakadismaya so mamaletey a maong ed sikatayo. Say ‘panganamot ed panaon’ parad espiritual iran obligasyon tayo​—kalaktip lay panagaral na Biblia, iyaatendi ed saray miting na Kristiano, tan pibibiang ed ministeryo​—so nayarin mairap no sikayoy naksawan a maong ed pisikal, mental, tan emosyon. (Efeso 5:​15, 16) Tandaan a kaliktan na Mananukso ya ontunda kayo. Balet aliwa la iyan panaon pian ontayer odino naandi so pankaganatan yo nipaakar ed panaon a pambibilayan tayo la! (Lucas 21:34-36) Panon yon naresistian so tukso tan mantultuloy a manbantay? Konsideraen so apatiran suhestion a makatulong.

“Mantultuloy a Manpikasi”

⁹ Ompapeg ed si Jehova panamegley na pikakasi. Nonoten so ehemplo nen Jesus diad hardin na Getsemani. Lapud pirmin desdes ed emosyon to, antoy ginawa to? Sikatoy kinmerew na tulong ed si Jehova, a masimoon a nampikasi a “say linge’to singa angkakabaleg a tedter na dala a sinmaklayat angga ed dalin.” (Lucas 22:44) Isipen pa itan. Kabisado nen Jesus si Satanas. Naimatonan la nen Jesus manlapud tawen so amin a tukso ya uusaren nen Satanas pian patitan iray lingkor na Dios. Balet, ag-impasen nen Jesus a sarasarag ton talonaan so antokaman a patit na Mananukso. No say ayadyarin Anak na Dios et alikna ton nakaukolan so pampikasi parad tulong tan biskeg a manlapud Dios, mas nakaukolan tayon gawaen itan!​—1 Pedro 2:21.

¹⁰ andaan met a kayari ton pinaseseg iray babangatan to a “mantultuloy a manpikasi,” inkuan nen Jesus: “Say espiritu siempre, et magunaet, balet say laman et maletey.” (Mateo 26:​41, NW) Siopan laman so tutukoyen nen Jesus? Seguradon aliwan say laman to; anggapoy maletey ed ayadyarin laman to bilang too. (1 Pedro 2:22) Balet ta midumaan ed saray babangatan to. Lapud atawir ya ag-inkayadyari tan makasalanan iran tendensia, lalon nakaukolan da so tulong pian naresistian so tukso. (Roma 7:21-24) Satan so rason no akin a pinaseseg to ira​—tan amin a tuan Kristiano a sinmaginonor ed sikara​—a manpikasi parad tulong pian natalonaan so tukso. (Mateo 6:13) Eebatan nen Jehova so ontan iran pikakasi. (Salmo 65:2) Panon? Diad duaran dalan.

¹¹ Unona, tutulongan itayo na Dios pian natebek iray tukso. Saray tukso nen Satanas et singa ira kalot ya akapatit ed ambilunget a dalan. No agmo nanengneng iratan, nayarin nakalotan ka. Diad panamegley na Biblia tan nibase ed Biblia iran publikasyon, iwawalwal nen Jehova iray kalot nen Satanas, pian natulongan itayon napaliisan so pakatukso. Diad inlabas na saray taon, saray niimprintan literatura tan kombension tan saray programa ed asamblea so naynay a mangipapasakbay ed sikatayo ed saray kapeligroan a singa say takot ed too, seksual ya imoralidad, materyalismo, tan arum iran tukso nen Satanas. (Uliran 29:25; 1 Corinto 10:8-11; 1 Timoteo 6:​9, 10) Agkayo ta misalsalamat ed si Jehova ed pamapasakbay to ed sikatayo ed saray patit nen Satanas? (2 Corinto 2:11) Amin na saratan a pasakbay et ebat ed pikakasi yo parad tulong pian naresistian so tukso.

¹² Komadua, eebatan nen Jehova iray pikakasi tayo diad pangiiter to ed sikatayo na biskeg pian natalonaan so tukso. Ibabaga na Salita to: “Say Dios . . . agto kayo paulyan a natukso na onlabas ed nayarian yo; noag ingen pati tukso, manggawa met na dalan a paliisan.” (1 Corinto 10:13) No mantultuloy itayon ompapeg ed sikato, agbalot abuloyan na Dios so alablabas a tukso a mangupot ed espiritual a biskeg tayo a manresisti ed satan. Panon ton ‘gagawaen so dalan pian makapaliis’ tayo ed satan? ‘Iiter to so masanton espiritu to ed saraman so onkerew ed sikato.’ (Lucas 11:13) Satan ya espiritu so ontulong ed sikatayon nanonotan iray prinsipyo na Biblia a mamabiskeg ed determinasyon tayon manggawa na duga tan ontulong ed sikatayon manggawa na makabat iran desisyon. (Juan 14:26; Santiago 1:​5, 6) Ontulong itan ed sikatayon mangipatnag ed saray kalidad a nakaukolan tayo pian natalonaan iray mauges a tendensia. (Galacia 5:​22, 23) Say espiritu na Dios so mamakiwas ni ingen ed saray kapananisiaan a ‘magmaliw a makapabiskeg a tulong ed sikatayo.’ (Colosas 4:​11, NW) Agkayo ta misalsalamat ta eebatan nen Jehova iray pikakasi yo parad tulong ed ontan a maaron paraan?

Magmaliw a Realistiko ed Saray Iilaloan Yo

¹³ TPian mantultuloy ya akabantay, kaukolan tayoy magmaliw a realistiko ed saray iilaloan tayo. Lapud saray detdet ed bilay, amin tayo so onletey no maminsan. Balet nepeg tayon tandaan ya agbalot insipan na Dios a naandi so amin a problema tayo ed bilay diad sayan daan a sistema. Anggan diad panaon na Biblia, saray lingkor na Dios so nipaarap ed saray kairapan, pati panamasegsegang, kairapay-bilay, depresyon, tan sakit.​—Gawa 8:1; 2 Corinto 8:​1, 2; 1 Tesalonica 5:14; 1 Timoteo 5:23.

¹⁴ Walaan itayo met natan na saray problema. Nayarin nipaarap itayo ed panamasegsegang, makasagmak itayo na saray kapagaan ed pinansyal, pipuligesgesan ed depresyon, pansakit, tan panirap ed arum niran paraan. No mamilagron protektaan itayo nen Jehova ed amin a kairapan, agta satan so ikantiaw nen Satanas ed si Jehova? (Uliran 27:11) Talagan aabuloyan nen Jehova iray lingkor to a natukso tan nasubok, diad arum a kaso et anggan diad ipapatey ed lima na saray manamasegsegang.​—Juan 16:2.

¹⁵ Anto sirin so insipan nen Jehova? Singa asalambit la ed inmuna, insipan to a tulongan to itayon resistian so antokaman a tukso a nayarin nipaarap ed sikatayo, daput no sigpot itayon manmatalek ed sikato. (Uliran 3:​5, 6) Diad panamegley na Salita, espiritu, tan organisasyon to, proprotektaan to itayo ed espiritual a paraan, ya ontutulong ed sikatayon nasalimbengan so relasyon tayo ed sikato. Lapud satan a mansiasiansian relasyon, anggano ompatey itayo, manalo itayo. Anggapon balot, anggan say patey, so makaamper ed Dios ed panumang to ed saray matoor a lingkor to. (Hebreos 11:6) Tan diad balon mundo ya asingger la, seguradon sumpalen nen Jehova so amin nin nakekeraan a makapakelkelaw iran sipan to a pamendisyon ed saraman so mangaaro ed sikato.​—Salmo 145:16.

Nodnonoten Iray Isyu

¹⁶ Pian makapansungdo anggad anggaan, nepeg tayon nodnonoten iray importantin isyu a nalalanor ed pangiyaabuloy na Dios ed karelmengan. No bilang ta saray problema tayo et ompatnag ya alablabas tan natukso tayon onsuko la, nepeg tayon nonoten a susuppiaten nen Satanas so manepenepeg ya inkasoberano nen Jehova. Susuppiaten met na Manamalikdo so debosyon tan integridad na saray managdayew ed Dios. (Job 1:8-11; 2:​3, 4) Saraman ya isyu tan say paraan a pinili nen Jehova pian resolbien iratan et mas importante nen say mismon bilay tayo. Panon ya ontan?

¹⁷ Say temporaryon impangiyabuloy na Dios ed kairapan so angiter na pankanawnawa ed arum pian awaten so katuaan. Isipen pa iya: Nanirap a maong si Jesus ta pian nawalaan itayo na bilay. (Juan 3:16) Agta misalsalamat itayo lapud satan? Balet kasin mabulos tayo nin mananos ed kairapan pian say arum ni et makagamor na bilay? Ta pian makapansungdo anggad anggaan, nepeg tayon bidbiren a babaleg a tuloy so kakabatan nen Jehova nen say kakabatan tayo. (Isaias 55:9) Panganggaen to so karelmengan diad panaon a sankaabigan a panolbar ed saray isyu ed ando lan ando tan parad magnayon a pankaabigan tayo. Wala ni kasi arum a paraan a panolbar ed saray isyu? Anggapo so ag-inkahustisya ed Dios!​—Roma 9:14-24.

‘Onasingger ed Dios’

¹⁸ Pian napansiansia so inkaganatan tayo, kaukolan tayoy mansiansian maapit ed si Jehova. Agbalot lilingwanan a gagawaen nen Satanas so anggaan na nayarian to pian deralen so maabig a relasyon tayo ed si Jehova. Labay nen Satanas a panisiaan tayon agbalot onsabi so anggaan tan lapud satan et anggapoy kakanaan na pangipulong ed maong a balita odino manbilay unong ed saray estandarte na Biblia. Balet “sikatoy matila, tan ama na tila.” (Juan 8:44) Nepeg a determinado itayon “sumpaen so Diablo.” Agtayon balot leglemewen so siglaotan tayo ed si Jehova. Simamaaron papasesegen itayo na Biblia: “Singger kayo ed Dios, et sikato so onsingger naani ed sikayo.” (Santiago 4:​7, 8) Panon kayon makaasingger ed si Jehova?

¹⁹ Importante so masimoon a panagdalepdep. Sano ompatnag a pirmi la iray detdet ed bilay, ibesngaw yoy walad puso yo ed si Jehova. No lalon espisipiko kayo, lalon mainomay yon natebek so ebat to ed saray kerew yo. Say ebat et nayarin aliwan naynay ya eksakto ed walad nonot yo, balet no sikatoy kaliktan yon igalang tan panmatooran, sikatoy mangitarya na tulong a nakaukolan yo ta pian matalonan makapansungdo kayo. (1 Juan 5:14) Diad pakakaimano yo ed panangiwanwan to ed bilay yo, sikayoy onapit ed sikato. Importante met so pambasa tan panmorekdek ed kalidades tan daladalan nen Jehova, unong a niparungtal ed Biblia. Say ontan a panagdalepdep so ontulong ed sikayo pian sikatoy nakabat yon maong; mamakiwas itan ed puso yo tan mamaaralem na panangaro yo ed sikato. (Salmo 19:14) Tan satan ya aro, a nagkalalo nen say antokaman ni, so ontulong ed sikatayon resistian so tukso tan mantultuloy a manbantay.​—1 Juan 5:3.

²⁰ Pian mantultuloy a maapit ed si Jehova, importante met a mansiansia itayon maapit ed saray kapananisiaan tayo. Saya so nasingbat ed unor a seksion na sayan brosyur.

SARAY TEPET PARAD PANAGARAL

• Anto so ginawa nen Jesus sanen pirmin nadedetdet lapud manasingger lan pangangga na bilay to, tan anto so impaseseg ton gawaen na saray babangatan to? (Par. 1-4)

• Akin a puntirya nen Satanas iray mandadayew ed si Jehova, tan diad antoran dalan a tutuksoen to itayo? (Par. 5-8)

• Pian naresistian so tukso, akin a nepeg itayon mantultuloy a manpikasi (Par. 9-12), magmaliw a realistiko ed saray iilaloan tayo (Par. 13-15), nodnonoten iray isyu (Par. 16-17), tan ‘onasingger ed Dios’ (Par. 18-20)?

[Kahon ed pahina 25]

Arum Iran Sengegan na Pakadismayaan

Bunigas/edad. No manlilikna itayo na graben sakit odino limitado lay nagagawaan tayo lapud itatakken, nayarin nagonigon itayo lapud ag-itayo makapanlingkor a maong ed Dios.​—Hebreos 6:10.

Asaew a Liknaan. Nayarin naandian itayo na ganas no ngalngali anggapoy onkiwas ed pansasagpot tayon mangipulong ed Salita na Dios.​—Uliran 13:12.

Liknaan ya andiay-kakanaan. Lapud abayag lan namamaltrato, nayarin manisip lay sakey a too a sikatoy ag-aaroen, ya agni ingen aaroen nen Jehova.​—1 Juan 3:​19, 20.

Asakitan a liknaan. No say sakey et pirmin naopendi na kapananisiaan, nayarin sikatoy nagonigon lan maong ya ompan sikatoy natukson agla onatendi ed saray miting na Kristiano odino agla mibiang ed lawak na ministeryo.​—Lucas 17:1.

Panamasegsegang. Arum ya agyo kapananisiaan so nayarin onsumpa, mamasegsegang, odino mamalaw ed sikayo.​—2 Timoteo 3:12; 2 Pedro 3:​3, 4.

[Litrato ed pahina 26]

Papasesegen itayo nen Jesus a “mantultuloy a manpikasi” pian nalabanan so tukso