“Lalo la a Tuloy, Agkomon Naumas so Aro yo ed Sakey tan Sakey”

“Say anggaan na ganaganay bengatla manasingger. . . . Lalo la a tuloy, agkomon naumas so aro yo ed sakey tan sakey.”​—1 PEDRO 4:​7, 8.

AMTA nen Jesus ya importantin tuloy iray unor laran oras to a kaiba iray apostol to. Amta to so walad arapen da. Walaan ira na baleg a kimey a sumpalen, balet sikaray gulaen tan pasegsegangen, a singa sikato. (Juan 15:18-20) Diad saman ya unor a labi a kaiba to ira, aminpiga to iran pinanonotan a “manaaroan [ira ed] sakey tan sakey.”​—Juan 13:​34, 35; 15:​12, 13, 17.

² Si apostol Pedro, a wadman ed saman a labi, so akatebek ed kaimportantian na satan. Diad inlabas na saray taon, diad pansusulat to antis a tuloy na kaderal na Jerusalem, indanet nen Pedro so kaimportantian na aro. Sinimbawa to iray Kristiano: “Say anggaan na ganaganay bengatla manasingger. . . . Lalo la a tuloy, agkomon naumas so aro yo ed sakey tan sakey.” (1 Pedro 4:​7, 8) Makabaliksan a tuloy iray salita nen Pedro parad saraman so manbibilay legan na “saray kaunoran ya agew” na sayan peles a sistema na bengabengatla. (2 Timoteo 3:1) Anto so ‘agnaumas ya aro’? Akin ya importantin nawalaan itayo na ontan a panangaro ed arum? Tan panon tayon nipatnag a walaan itayo na ontan ya aro?

‘Agnaumas ya Aro’​—Anto Itan?

³ Ipapasen na dakel a say aro et sakey a liknaan a nepeg a nipatnag ed natural a paraan. Balet agbasta tutukoyen nen Pedro so dinanman a klase na aro; say tutukoyen to et samay sankatalonggaringan a klase. Say salitan “aro” diad 1 Pedro 4:8 et patalos na Griegon salita ya a·gaʹpe. Satan a termino so mankabaliksan na andi-siblet ya aro ya igigiya, odino uuleyan, na prinsipyo. Ibabaga na sakey a reperensya: “Say agape ya aro so nayarin gangganen lapud ag-itan nibase a manuna ed emosyon noagta ed determinasyon a mangitonton ed ikiwas.” Lapud walaan itayo na atawir a tendensian magmaliw a masiblet, kaukolan tayo iray panonot pian nipatnag so panaaroan, a gawaen itan unong ed saray maridios a prinsipyo.​—Genesis 8:21; Roma 5:12.

⁴ Agkabaliksan na saya a manaaroan itayo lapud obligasyon itan. Say a·gaʹpe et walaan na inkaligsa tan liknaan. Inkuan nen Pedro a nepeg tayoy ‘nawalaan na agnaumas [diad literal, “onnatnat”] ya aro ed sakey tan sakey.’a (Kingdom Interlinear) Anggaman ontan, mankaukolan na sagpot so ontan ya aro. Nipaakar ed Griegon salita a nipatalos ya “agnaumas,” ibabaga na sakey ya iskolar: “Ipapabitar na satan so ideyan pakanatnat na saray masel na sakey ya atleta diad pangiyupot toy biskeg to ed sampot lay lumba.”

⁵ Say aro tayo sirin et aliwan limitado labat ed mainomay a gawaen odino limitado labat ed pigaran totoo. Kakaukolanen na Kristianon aro so “panginatnat” ed panangaro tayo anggan sano mairap itan a gawaen. (2 Corinto 6:11-13) Mabitar a sayan klase na aro et kaukolan tayon bayuboan tan pankimeyan, a singa say sakey ya atleta et nepeg ton ipasal tan paaligwasen iray dunong to. Importante a walaan itayo na ontan a panaaroan. Akin? Lapud taloran rason.

Akin a Nepeg Itayon Manaaroan?

⁶ Unona, “[lapud] say aro kien na Dios.” (1 Juan 4:7) Si Jehova, say Lapuan na sayan alay abig a kalidad, so inmunan angaro ed sikatayo. Ibabaga nen apostol Juan: “Dia ed saya nipatnag so aro na Dios ed sikatayo, a say Dios imbaki to ed mundo so Anak ton bogbogtong, pian manbilay itayo ed panamegley to.” (1 Juan 4:9) Say Anak na Dios so “imbaki” a magmaliw a too, manumpal ed ministeryo to, tan ompatey ed panamairapan a kiew​—ya amin na saya so agawa ta “pian nagamoran tayo so bilay.” Panon itayon onkiwas ed sayan baleg ya impangipatnag na Dios ed aro to? Ibabaga nen Juan: “No say Dios ontan so impangaro to ed sikatayo, nepeg met a manaaroan so sakey tan sakey ed sikatayo.” (1 Juan 4:11) Imanoen ya insulat nen Juan, “No say Dios ontan so impangaro to ed sikatayo”​—aliwa labat a sika noagta sikatayo. Say punto et malinew: No inaro na Dios iray kapara tayon managdayew, sirin nepeg tayo met iran aroen.

⁷ Komadua, nagkalautlan importante a manaaroan itayo natan ta pian ontulong ed saray agagi tayo a mankaukolan lapud “say anggaan na ganaganay bengatla manasingger.” (1 Pedro 4:7) Manbibilay itayo ed ‘maatap a panaon.’ (2 Timoteo 3:1) Saray kipapasen ed mundo, natural iran kalamidad, tan isusumpa so mangitatarok na kairapan ed sikatayo. Diad silong na mairap iran sirkumstansya, kaukolan tayoy lalon onapit ed sakey tan sakey. Say agnaumas ya aro so mamaelet ed pankakasakey tayo tan mamakiwas ed sikatayo pian “wala so dili a panagpaga ed sakey tan sakey.”​—1 Corinto 12:​25, 26.

⁸ Komatlo, kaukolan tayoy manaaroan lapud agtayo labay a “palongkitan so Diablo” a manganamot ed sikatayo. (Efeso 4:27) Si Satanas so aliston mangusar ed ag-inkayadyari na saray kapananisiaan tayo​—saray kakapuyan, kakulangan, tan kalilingoan da​—a mangigapol ed sikatayo. Kasin say bengatbengat ya impansalita odino agmaabig ya inkiwas na kapananisiaan so sengegan la na agtayo pilimog ed kongregasyon? (Uliran 12:18) Andi no walaan itayo na agnaumas ya aroan ed sakey tan sakey! Say ontan ya aro so ontulong ed sikatayon napansiansia so kareenan tan pankakasakey diad panlingkor ed Dios a “benebenek.”​—Sofonias 3:9.

No Panon Yon Nipatnag a Manaaroan Kayo

⁹ Nepeg ya onggapo ed abung so pangipatnag na panaaroan. Inkuan nen Jesus a saray tuan babangatan to so nepeg a nabidbiran lapud panaaroan da ed sakey tan sakey. (Juan 13:​34, 35) Say aro so nepeg a napatnagan met ed loob na pamilya aliwan diad kongregasyon labat​—ed baetan na sanasawa tan ed baetan na atateng tan ananak. Aliwan magenap a nalikna so panaaroan na saray membro na pamilya; nepeg tayon ibesngaw itan ed makapabiskeg a paraan.

¹⁰ Panon a nipanengneng na sanasawa so panaaroan da? Say asawan laki a peteg a mangaaro ed asawa to so mangipatnag ed satan panamegley na saray balikas tan gawa to​—diad publiko tan diad pribada​—a sikatoy papablien to. Rerespetoen toy dignidad na akulaw to tan makonsidera ed saray kanonotan, panmoria, tan liknaan to. (1 Pedro 3:7) Iyuuna toy pankaabigan na akulaw to nen say dilin pankaabigan to, tan gagawaen toy anggaan na nayarian to a mangitarya na materyal, espiritual, tan emosyonal a pankaukolan na akulaw to. (Efeso 5:​25, 28) Say asawan bii a talagan mangaaro ed masiken to et panengnengan toy “aralem a respeto,” anggan no maminsan et agnagawaan na masiken to iray iilaloan to. (Efeso 5:​22, 33) Susuportaan toy masiken to tan mapasakop ed sikato, ya agto onkekerew na agmakatunongan a bengatla, noagta mikokoopera ed sikato diad pangitultuloy dan pangiyapasakey ed espiritual iran bengatla.​—Genesis 2:18; Mateo 6:33.

¹¹ Atateng, panon yon nipanengneng so aro ed ananak yo? Say inkamabulos yon mantrabaho pian walay materyal a panustuni ed sikara so paneknek na panangaro yo. (1 Timoteo 5:8) Balet aliwa labat a tagano, kawesen, tan ayaman so nakaukolan na ananak. Pian ombaleg ira a mangaaro tan manlilingkor ed tuan Dios, kaukolan day espiritual a panangipasal. (Uliran 22:6) Kabaliksan na satan so pangiyeskedyul ed panagaral na Biblia bilang sankapamilyaan, pibibiang ed ministeryo, tan iyaatendi ed saray miting na Kristiano. (Deuteronomio 6:4-7) Say pagmaliw a regular ed saratan ya aktibidades so mankaukolan na baleg a sakripisyo, nagkalautla ed sarayan maatap a panaon. Say panagpaga tan saray sagpot yo ed pangasikaso ed espiritual iran pankaukolan na ananak yo so panangipatnag na aro, lapud ta talagan ipapatnag yo ya interesado kayo ed magnayon a pankaabigan da.​—Juan 17:3.

¹² Importante met ya ipanengneng na atateng so panangaro diad pangasikaso ed emosyonal iran pankaukolan na ananak da. Saray ugugaw so magmainomay a naimpluensyaan na makapuy; nakaukolan day napaseguroan na panangaro yo lapud ugaw ni ira. Ibaga yo ed sikaran inaro yo ira, tan ipatnag yoy baleg a panangaro yo ed sikara, lapud say ontan a panangipatnag na aro et mangipaseguro ed sikaran papablien tan makanakana ira. Ikdan ira na maaro tan puron komendasyon, ta satan so pakapatnagan ya iimanoen tan papablien yo iray sagpot da. Disiplinaen yo ira tekep na aro, lapud say ontan a panangorehi et pakapatnagan ya interesado kayo ed pagmaliwan da. (Efeso 6:4) Amin na saratan a maabig a panangipatnag na panangaro so ontulong ed pangiletneg na maliket tan maap-apit a pamilya a lalon akaparaan pian naresistian iray pakadetdetan ed sarayan kaunoran ya agew.

¹³ Say aro so mamakiwas ed sikatayon palabasen iray kakulangan na arum. Tandaan a sanen sisimbawaen nen Pedro iray managbasa to a nawalaan na ‘agnaumas ya aro ed sakey tan sakey,’ sikatoy angiter na rason no akin ya importantin tuloy iya: “Ta say aro, dakel so sakoban ton kasalanan.” (1 Pedro 4:8) Say ‘panakbong’ ed saray kasalanan et agto kabaliksan so ‘panakbong’ ed saray seryoson kasalanan. Saratan so ireport a tampol tan asikasoen na saray responsable ed kongregasyon. (Levitico 5:1; Uliran 29:24) Aliwan maaro​—tan aliwan makasulatan​—no abuloyan iray graben managkasalanan a mantultuloy a mamasakit odino mamiktima ed saray inosente.​—1 Corinto 5:9-13.

¹⁴ Diad maslak iran kipapasen, saray kalilingoan tan kakulangan na saray kapananisiaan tayo et angkelag labat a pamaakaran. Amin tayo so nagapol ed salita odino gawa no maminsan, a manismaya odino mamasakit ni ingen ed sakey tan sakey. (Santiago 3:2) Kasin tampol tayon itongtong iray kakapuyan na arum? Say ontan a kagagawa so mamalesa labat na agpantatalosan ed loob na kongregasyon. (Efeso 4:1-3) No uuleyan itayo na aro, agtayo “ikayat so lingo” na kapara tayon managdayew. (Salmo 50:​20, NW) No panon a say masilya tan pintura et sakbongan toy abakabak a dingding, sakbongan met na aro iray ag-inkayadyari na arum.​—Uliran 17:9.

¹⁵ Say aro so mamakiwas ed sikatayon ontulong ed saraman so peteg a mankaukolan. Legan ya onloloor iray kipapasen ed kaunoran iran agew, nayarin walaray panaon a saray kapananisiaan tayo so mankaukolan na materyal odino pisikal a tulong. (1 Juan 3:​17, 18) Alimbawa, kasin walay sakey a membro na kongregasyon tayo a maniirap ed pinansyal odino naandian na trabaho? Ompan makapangiyopresi itayo na daiset a materyal a tulong, no iyabuloy na saray sirkumstansya tayo. (Uliran 3:​27, 28; Santiago 2:14-17) Kasin say ayaman na maedad lan balo et kaukolan lan apigeren? Diad ontan et manboluntaryo tayo lan ontulong a manggawa ed satan.​—Santiago 1:27.

¹⁶ Say panangipatnag tayoy panangaro ed arum et aliwan limitado labat ed saraman so manaayam diad asingger ed sikatayo. No maminsan et walaray nabalitaan tayon lingkor na Dios ed arum a daldalin a biktima na saray maksil a bagyo, yegyeg, odino sibil a panggugulo. Nayarin sikaray mankakkaukolan na tagano, kawesen, tan arum iran bengatla. Aliwan importante no duma so rasa odino etnikon grupo ra. Walaan itayo na ‘aro ed impanaagi.’ (1 Pedro 2:17) Kanian, singa ed inmunan-siglo iran kongregasyon, magunaet tayon suportaan iray inorganisan panangitarya na tulong. (Gawa 11:27-30; Roma 15:26) Sano ipatnag tayo so aro ed amin na saratan a paraan, napaelet tayo so bedber na pankakasakey tayo ed sarayan kaunoran ya agew.​—Colosas 3:14.

¹⁷ Say aro so mamapakiwas ed sikatayon inabang so maong a balita na Panarian na Dios ed arum. Konsideraen so ehemplo nen Jesus. Akin a sikatoy nampulong tan nambangat? “Naabagey” to iray karaklan lapud pakaskasin kipapasen da ed espiritual. (Marcos 6:34) Sikaray imbaliwala tan imbalang na palso iran relihyoson managpastol, a nepeg komon ya angibangat ed sikara na espiritual a katuaan tan angiter komon na ilalo ed sikara. Kanian, lapud sikatoy apakiwas ed aralem, impapuson panangaro tan panangabagey, niligliwa nen Jesus so totoo panamegley na “ebanghelyo na panariay Dios.”​—Lucas 4:16-21, 43.

¹⁸ Natan met et dakel a totoo so nibabaliwala, nibabalang ed espiritual, tan andian na ilalo. No singa si Jesus et sensitibo itayo ed espiritual iran pankaukolan na saraman so agni mikabat ed tuan Dios, diad ontan et napakiwas itayo na aro tan panangabagey ya inabang ed arum so maong a balita na Panarian na Dios. (Mateo 6:​9, 10; 24:14) Lapud antiktikey lan panaon a natitilak, lalon maganat la natan so pangipulong ed sayan manangisalbay-bilay a mensahe.​—1 Timoteo 4:16.

“Say Anggaan na Ganaganay Bengatla Manasingger”

¹⁹ Tandaan, oniay introduksion na simbawa nen Pedro a manaaroan ed sakey tan sakey: “Say anggaan na ganaganay bengatla manasingger.” (1 Pedro 4:7) Agla mabayag et sayan marelmeng a mundo so salatan na matunong a balon mundo na Dios. (2 Pedro 3:13) Sirin, aliwa lan panaon natan pian manpaleen ni. Pinasakbayan itayo nen Jesus: “Manlikas kayo ed inkasikayo ompan saray puso yo napano ed inkasiba, tan panagbuek, tan saray kapagaan ed sayan bilay, et onsabi ed sikayo ed kasanlilikna so saman ya agew a singa sakey a patit.”​—Lucas 21:​34, 35.

²⁰ Nagkalalo ed amin sirin et “mantultuloy [itayon] manbantay,” magmaliw ya alerto no iner la so kawalaan tayo ed ilalabas na panaon. (Mateo 24:​42, NW) Manalwar tayo sirin ed antokaman iran tukso nen Satanas a mangisuawi ed sikatayo. Agtayon balot abuloyan iyan andian na aro a mundo a manebel ed sikatayo ed panangipatnag tayoy panangaro ed arum. Nagkalalo ed amin, lalon onapit tayo ed tuan Dios, si Jehova, a say Mesianikon Panarian to so magano lan manumpal ed maglorian gagala to ed sayan dalin.​—Apocalipsis 21:​4, 5.

[Paimano ed leksab]

SARAY TEPET PARAD PANAGARAL

• Anton panamatanir a simbawa so inter nen Jesus ed saray babangatan to, tan anto so pakapatnagan ya atebek itan nen Pedro? (Par. 1-2)

• Anto so ‘agnaumas ya aro’? (Par. 3-5)

• Akin a nepeg a manaaroan itayo? (Par. 6-8)

• Panon yon nipatnag ya aaroen yo so arum? (Par. 9-18)

• Akin ya aliwa lan panaon natan pian manpaleen ni, tan anto so nepeg a determinado tayon gawaen? (Par. 19-20)

[Litrato ed pahina 29]

Say maap-apit a pamilya so lalon akaparaan a manalona ed saray pakadetdetan ed sarayan kaunoran ya agew

[Litrato ed pahina 30]

Say aro so mamakiwas ed sikatayon ontulong ed saraman so peteg a mankaukolan

[Litrato ed pahina 31]

Say panginabang na maong a balita na Panarian na Dios ed arum et panangipatnag na aro