“Inaral To so Katutulok”

1, 2. Akin a naliliketan so sakey a maaron ama sano naimatonan ton ontutulok ed sikato so ilalak to, tan panon a nipapatnag na ontan a liknaan so nalilikna nen Jehova?

TANTANDAGAN na sakey ya ama so ugaw nin ilalak to a migagalaw ed saray kakaaro to. Kabebekta, say bola a panggagalawan da et kinmubpaw ed paway na sular anggad tinmolin ed karsada. Mansinayang a ninengneng itan na ugaw. Sakey ed saray kakaaro to so angibagan batiken to itan ed karsada. Balet, manpeyeng so ugaw, tan inkuan ton “agnayari, manpasnok si tatay ko.” Manimis so ama to.

² Akin ya aliketan imay ama? Lapud binilin toy ilalak ton ag-oonlan bukor ed karsada. Tan diad intulok na ugaw, anggano agto amtan mamanbantay so ama to, naamtaan na ama a nanaaralan na ilalak to so katutulok tan say resulta et mas arawi’d peligro so ugaw. Ontan met so nalilikna na mangatatawen ya Ama tayo a si Jehova. Amta na Dios a pian makapansiansia itayon matoor tan nanengneng tayoy marakdakep ya arapen ya intarya to parad sikatayo, kaukolan tayoy manmatalek tan ontulok ed sikato. (Uliran 3:​5, 6) Lapud satan, imbaki to’d sikatayo so sankaabigan ed amin na saray totoon managbangat.

3, 4. Panon a ‘naaral nen Jesus so katutulok’ tan ‘agawan ayadyari’? Iyilustra.

³ Onia so imbaga na Biblia a makapadinayew a bengatla nipaakar ed si Jesus: “Anggan sikato so Anak, inaral to so katutulok lapu ed saray bengatlan intepel to; tan sanen agawa ya ayadyari, nagmaliw a sikato so nanggawa na andi-anggaan a kilalaban ed saray amin ya ontulok ed sikato.” (Hebreos 5:​8, 9) Sayan Anak so manbibilay la ed tawen ed loob na agnakalkulan dukey na panaon. Naimatonan to so insunggay nen Satanas ontan met na saray arum nin anghel, balet sayan panguloan ya Anak so agbalot akinonong ed sikara. Matukotukoy ya inmaplika ed sikato iyan pinuyanan a propesiya: “Agak masunggay.” (Isaias 50:5) Kanian, panon nin onaplika ed sayan sigpot lan matulok ya Anak iray salitan “inaral to so katutulok”? Panon a ‘gawaen nin ayadyari’ so sakey ya ayadyari lan pinalsa a singa sikato?

⁴ Konsideraen pa iyan ilustrasyon. Sakey a sundalo so walaay balatyang ya espada. Anggaman agnin balot itan nausar ed impilaban, talagan polido so inkapanday tan balibali inkagawa na satan. Balet, insalat to itan ed espada a gawa’d mas matibay a metal tan mas anawet a balatyang. Sayan kasalat ya espada et nausar lan impilaban tan apaneknekan a talagan matibay. Agta makabat so ginawa ton impangisalat? Mipadpara, anggapoy pakabalawan na samay impatnag nen Jesus a katutulok antis a linma diad dalin. Balet, kayari inyakar to’d dia, sigpot a duma lay kalidad na katutulok to. Satan so asali la, mas pinmutel, tan apekderan lapud saray subok, ya agton balot naeksperiensya ed tawen.

5. Akin ya importantin tuloy so katutulok nen Jesus, tan anto so singbaten tayo ed sayan kapitulo?

⁵ Say katutulok so makana ed misyon nen Jesus diad iyakar to ed dalin. Bilang “unor ya Adan,” si Jesus so linma dia pian gawaen so ag-agawaan na inmunan ateng tayo, salanti, say pansiansian matulok ed si Jehova a Dios, anggan sano nasusubok. (1 Corinto 15:45) Balet, aliwan paspasaray so katutulok nen Jesus. Sikatoy interon nonot, interon puso, tan interon kamarerwa a tinmulok. Tan maliket ton ginawa itan. Mas importante ni ingen ed sikato so panggawa ed linawa na Ama to nen say pangan! (Juan 4:34) Antoy ontulong ed sikatayo pian naalig tayoy katutulok nen Jesus? Usisaen tayon unona no anto ray amakiwas ed sikato. Say pamayubo ed saratan so ontulong ed sikatayon napaliisan so tukso tan nagawaan so linawa na Dios. Insan tayo repasoen so pigaran tumang na pangalig tayo ed katutulok nen Kristo.

Saray Amakiwas ed si Jesus ya Ontutulok

6, 7. Antoray pigara ed saray amakiwas ed si Jesus ya ontulok?

⁶ Say katutulok nen Jesus et manlalapu ed puso to. Unong a naamtaan tayo la ed Kapitulo 3, si Kristo so mapaabeba ed puso. Inkatangas so sengegan na pamubusol na totoo ed katutulok, bangta say kapaabebaan so ontulong ed sikatayo pian mabulos ya ontulok ed si Jehova. (Exodo 5:1, 2; 1 Pedro 5:5, 6) Niarum ni, apakiwas si Jesus ya ontulok unong ed no antoy aaroen tan bubusolen to.

⁷ Nagkalalo ed amin, inaro nen Jesus so mangatatawen ya Ama to, si Jehova. Sayan panangaro et mas detalyadon nasingbat ed Kapitulo 13. Say ontan a panangaro so lapuan na maridios a takot nen Jesus. Diad tua, ontan lay kabaleg na panangaro, tan kaaralem na panamagalang to ed Ama ton si Jehova, kanian Sikatoy antakot ton napaermen. Say maridios a takot nen Jesus so sakey a rason no akin a dinengel iray pikakasi to. (Hebreos 5:7) Satan met a takot ed si Jehova so manunan mangiwanwan ed si Jesus diad panuley to bilang Mesianikon Ari.​—Isaias 11:3.

8, 9. Unong ya impropesiya, antoy nalilikna nen Jesus nipaakar ed inkatunong tan karelmengan, tan panon ton impatnag iratan a liknaan?

⁸ Lalanoren met na pangaro ed si Jehova so pamusol ed saray kabusol to. Singa bilang, imanoen pa iyan propesiya a parad Mesianikon Ari: “Sika aroen mo so inkatunong, tan gulaen mo so kabaglan. Kanian say Dios mo, pinuyokan to ka na larak na inkaliket a pinaatagey to ka nen saray ibibam.” (Salmo 45:7) Saray atukoy dian ‘ibiba’ nen Jesus et saray arum nin arari diad kapolian nen Arin David. Sanen alanaan si Jesus, mas walay rason to a manliket a maong nen say siopaman ed sikara. Akin? Lapud mas baleg so tumang to nen say sikara, tan say inkaari to et magnayon tan mas makagunggona. Sikatoy atumangan lapud say amakiwas ed sikaton tuloken so Dios ed amin a bengatla et say panangaro to ed inkatunong tan panggula to ed karelmengan.

⁹ Panon ya impatnag nen Jesus so nalilikna to nipaakar ed inkatunong tan karelmengan? Singa bilang, antoy reaksion nen Jesus sanen tinulok na papatumbok to so bilin to ed panagpulong tan bilang resulta et sikaray abendisyonan? Sikatoy aliketan a maong. (Lucas 10:1, 17, 21) Tan antoy alikna nen Jesus ed inkarebelde na saray totoo ed Jerusalem ya aminpigan sinmunggay tan angipulisay ed maaron impanulong to? Ninangisan to itan ya inkarebelyoso ra. (Lucas 19:41, 42) Talagan aralem so panangaro nen Jesus ed maabig a kondukta tan pirmi panggula to ed mauges.

10. Antoran liknaan so kaukolan tayon pankimeyan no nipaakar ed matunong tan mauges iran gawa, tan antoy ontulong ed sikatayon nagawaan itan?

¹⁰ Say pandalepdep ed saray liknaan nen Jesus so ontulong ed sikatayo a nausisa iray mismon motibo tayo ed itutulok ed si Jehova. Anggaman ag-itayo ayadyari, sarag tayon pankimeyan so impapuson panangaro ed saray maabig a gawa tan pirmin pambusol ed mauges a kondukta. Kaukolan tayoy manpikasi ed si Jehova, a patulongan ed sikato pian naalig tayo so nalilikna to tan say Anak to. (Salmo 51:10) Ontan met, kaukolan tayon paliisan so antokaman a mamaletey ed ontan a liknaan. Importante a maalwar tayon pilien iray panagligliwaan tan pilimogan tayo. (Uliran 13:20; Filipos 4:8) No pankimeyan tayoy nawalaan na motibo a mipara’d si Kristo, agmagmaliw a pormalidad labat so katutulok tayo. Gawaen tayo so duga lapud labalabay tayon gawaen itan. Paliisan tayoy manggawa na mauges, aliwan lapud antakot tayoy naerel, noag lapud talagan kabusol tayo itan.

“Anggapoy Ginawa Ton Kasalanan”

11, 12. (a) Antoy agawa ed si Jesus diad kagapo ni labat na ministeryo to? (b) Panoy unonan impanukso nen Satanas ed si Jesus, tan antoray masilib a taktikan inusar to?

¹¹ No nipaakar ed panggula to ed kasalanan, si Jesus so asubok kagapo ni labat na ministeryo to. Kayari inkabautismoan to, sikatoy ag-angan ed loob na 40 agew tan labi leleg ton walad kalawakan. Kayarin tuloy na satan a peryodo, sikatoy tinukso nen Satanas. Imanoen pa no panoy inkasilib na Diablo.​—Mateo 4:1-11.

¹² Unona et inkuan nen Satanas: “No sika so anak na Dios, iganggan mo a sarayan bato et magmaliw iran tinapay.” (Mateo 4:3) Anto tay nalilikna nen Jesus kayari andukey ya impan-ayunal to? Say mabitar ya inkuan na Biblia et sikatoy “narasan.” (Mateo 4:2) Kanian inanamot nen Satanas so inkakkaerasan nen Jesus, a seguradon ginagala to nin inalagar so inkapkapuy na laman To. Tan, imanoen pay makantiaw a balikas nen Satanas a: “No sika so anak na Dios.” Anta amta la nen Satanas a si Jesus so “panguloan ed amin a pinalsa.” (Colosas 1:15) Balet, siansian ag-inabuloyan nen Jesus a sikatoy nasagyat nen Satanas ya onsugnar. Amta nen Jesus ya aglinawa na Dios ya usaren toy pakapanyari to parad sinisiblet iran gagala. Kanian impulisay to itan, a mangipapanengneng labat a sikatoy mapaabeban nanmatalek ed pananustini tan panangidirehi nen Jehova.​—Mateo 4:4.

13-15. (a) Anto so komadua tan komatlon tukso nen Satanas ed si Jesus, tan panoy inkiwas nen Jesus? (b) Panoy pakaamta tayo a lawas alerto si Jesus sumpad saray tukso nen Satanas?

¹³ Diad komaduan impanukso nen Satanas, inyakar to si Jesus ed toktok na templo. Insan, masilib ton pinikewet so Salita na Dios pian tuksoen si Jesus a manpasikat diad itaboy to, diad ontan et sikatoy sampaten na saray anghel. No nanengneng na dakerakel a totoo ed templo itan a milagro, wala ni kasi makapangitepel a manuppiat a si Jesus so insipan a Mesias? Tan no awaten na totoo si Jesus bilang Mesias lapud ontan a panagpasikat, agta napaliisan la nen Jesus so dakel ya irap tan gulo? Nayarin ontan. Balet amta nen Jesus a say linawa nen Jehova et gawaen na Mesias so kimey to diad mapaabeban paraan, ya agtatangguyoren so totoo a manisia ed sikato panamegley na saray pakelaw. (Isaias 42:1, 2) Diad saya et aglamet sinunggay nen Jesus si Jehova. Sikatoy ag-alagyat ed pagmaliw a bantog.

¹⁴ Komusta balet so tukso a pagmaliw a makapanyari? Diad mikatlon tukso nen Satanas, inyopresi ton iter ed si Jesus so amin a panarian na mundo, no ondakmomo si Jesus ed si Satanas anggan maminsan labat. Kasin ninonot to ni so opresi nen Satanas? Onia so ebat to: “Arawi ka dia Satanas”! Insan to ni inkuan: “Ta walan nisulat, Sika igalang mo naani so Dios a Katawan mo, tan sikato labat so panlingkoran mo.” (Mateo 4:10) Anggapon balot so antokaman a makaingganyo ed si Jesus a mandayew ed sananey a dios. Anggapoy niyopresi na sayan mundo a pakapanyari odino pakauley a makatangguyor ed sikaton onsunggay.

¹⁵ Kasin sinmuko lay Satanas? Sikatoy tinmaynan diad impangiganggan nen Jesus. Balet, inkuan na Ebanghelyo nen Lucas a say Diablo so “linma la tan nanalagar na pankanawnawan panukso to lamet.” (Lucas 4:13, Maung a Balita) On, makalmo si Satanas na arum nin pankanawnawa a suboken tan tuksoen si Jesus anggad kasampotan. Ibabaga na Biblia ed sikatayo a si Jesus so “tinukso ed amin [a pamaakaran].” (Hebreos 4:15) Kanian lawas alerto si Jesus; tan nepeg ya ontan itayo met.

16. Panon a tutuksoen nen Satanas iray lingkor na Dios natan, tan panon tayon nipulisay iray panisilib to?

¹⁶ Mantutultuloy a tutuksoen nen Satanas iray lingkor na Dios natan. Makapaermen ta mabetbet lan magmainomay itayon puntiryaen lapud agtayo ayadyari. Masilib ya aanamoten nen Satanas so tendensia tayon mansiblet, onkinon, tan mangagum ed pakapanyari. Nayari ni ingen a bansag ya anamoten nen Satanas iratan ya amin, diad panamegley na tukso a materyalismo! Importante a sagpaminsan et matuan usisaen tayo so inkasikatayo. Maabig no dalepdepen tayo iray ibabaga na 1 Juan 2:15-17. Legan tayon gagawaen itan, nayarian tayon tepetay inkasikatayo no kasin ombebetel lay panangaro tayo ed mangatatawen ya Ama tayo lapu ed pilpilalek na laman ed sayan sistema na bengabengatla, pampirawat ed materyal iran kayarian, tan say pilalek a pandinayewen so arum. Agtayo lilingwanan a magano lan mangangga iyan mundo, pati say manuley na saya, si Satanas. Ipulisay tayo iray panisilib ton sagyaten itayo a mankasalanan! Komon ta gawaen tayon inspirasyon so Katawan tayo, lapud “anggapoy ginawa ton kasalanan.”​—1 Pedro 2:22.

“Gawaen Ko Lawas so Saray Bengatla a Makapaliket ed Sikato”

17. Antoy panmoria nen Jesus nipaakar ed katutulok ed Ama to, ingen antoy nayarin ikatunongan na arum?

¹⁷ Lalanoren na katutulok so mas nen say basta ipaliis ed kasalanan; si Kristo et sinumpal ton amin so ganggan na Ama to. Oniay inyabawag to: “Gawaen ko lawas so saray bengatla a makapaliket ed sikato.” (Juan 8:29) Sayan katutulok so angipagamor ed si Jesus na agaylan liket. Balet ta, nayarin ikatunongan na arum ya agmairap ed si Jesus so ontulok. Nayarin inisip da a say kaukolan to labat a tuloken et si Jehova, ya ayadyari, bangta sikatayo et kaslakan lan kaukolan tayoy ontulok ed saray aliwan perpekton totoo a walaan na autoridad. Balet, say katuaan to et matulok si Jesus ed anggan aliwan perpekton totoo a walaay autoridad.

18. Bilang kalangweran, anton ehemplo na katutulok so impanengneng nen Jesus?

¹⁸ Legan ya ombabaleg si Jesus, sikatoy nampasakop ed aliwan perpekto a toon atateng to, a si Jose tan Maria. No ikompara’d maslak ya ugugaw, seguradon mas nanengneng toy kalilingoan na saray ateng to. Kasin sikatoy nanrebelde, a pinalakbatan toy inter na Dios a betang to tan binagaan to ra no panoy pangasikaso ed pamilya? Imanoen no antoy inkuan na Lucas 2:51 nipaakar ed 12 años a si Jesus: “[Sikatoy] matulotulok ed sikara.” Diad onian katutulok et sikatoy angipanengneng na ekselentin ehemplo parad saray Kristianon kalangweran, a manggugunaet ya ontulok ed atateng da tan mangipapanengneng na galang a kanepegan da.​—Efeso 6:1, 2.

19, 20. (a) Anton nikaduma tan mairap iran situasyon so inarap nen Jesus no nipaakar ed katutulok ed aliwan perpekton totoo? (b) Akin a nepeg a magmaliw a matulok iray Kristiano natan ed saramay mangidadaulo ed sikara?

¹⁹ No nipaakar ed katutulok ed aliwan perpekton totoo, si Jesus so nipaarap ed saray mairap a situasyon ya agbalot asagmak na saray tuan Kristiano natan. Isipen pa labat so nikadkaduman panaon a nambilayan to sanen wadiad dalin. Diad saman et say Judion relihyoson sistema na bengabengatla, pati say templo ed Jerusalem tan saray saserdote ditan, ya abayag lan aabobonan nen Jehova, et magano to lan ekalen tan salatan na Kristianon kongregasyon ya uksoyan. (Mateo 23:33-38) Sakey ni, diad saman et dakel ed saray lider na relihyon so mangibabangat na saray katilaan ya inala ed Griegon pilosopiya. Diad templo et kasmak lay karelmengan kanian tinawag itan nen Jesus a “balaong na matatakew.” (Marcos 11:17) Kasin lapud satan et agla linma si Jesus ed templo tan saray sinagoga? Andi! Uusaren nin siansia nen Jehova iratan ya uksoyan. Anggad agni kinmiwas tan nanggawa na saray pananguman so Dios, si Jesus so matulok a linma ed saray piesta ed templo tan sinagoga.​—Lucas 4:16; Juan 5:1.

²⁰ No si Jesus et matulok anggaman ontan iray sirkumstansya, agmas nagkalalon nepeg a mansiansian matulok iray tuan Kristiano natan! Lapud diad tua et say pambibilayan tayon panaon et mas maabig a tuloy, salanti, panaon a nipawil lay tuan panagdayew ya abayag lan impasakbay. Ipapaseguro ed sikatayo na Dios ya agton balot abuloyan si Satanas a maneral ed nipawil lan totoo to. (Isaias 2:1, 2; 54:17) Tua, walaray kalilingoan tan ag-inkayadyari ed loob na Kristianon kongregasyon. Balet kasin ibaraan tayo iray kakapuyan na arum ed agtayo itulok ed si Jehova, ya ompan agtayo la miaral odino magmaliw itayo lan makritiko ed saray mamatatken? Andin balot! Noag ingen et impapuso tayon susuportaan iramay mangidadaulo ed kongregasyon. Matulok itayon miaaral tan miaasamblea, tan iyaaplika tayo ray Makasulatan a simbawa ditan.​—Hebreos 10:24, 25; 13:17.

21. Panoy inkiwas nen Jesus sanen sikatoy dedesdesen na totoo ya ag-ontulok ed Dios, tan saya so mangipapanengneng na anton ehemplo parad sikatayo?

²¹ Agbalot inabuloyan nen Jesus so totoo, anggan saray kakaaro ton maabig so intension da, a mangamper ed sikaton tuloken si Jehova. Singa bilang, sinali nen apostol Pedro a kombinsien so Katawan to ya agto la kaukolan so manirap tan ompatey. Mapekder ya impulisay itan nen Jesus, lapud anggaman maabig so intension nen Pedro, lingo balet so simbawan kasian nen Jesus so inkasikato. (Mateo 16:21-23) Natan, mabetbet lan kaukolan ya arapen na saray patumbok nen Jesus iray kakanayon da ya anggapo met so intension dan manggawa na makapuy, balet ta tatangguyoren da ran ag-ontulok ed saray ganggan tan prinsipyo na Dios. Singa saray patumbok nen Jesus nen inmunan siglo, nakaukolan a mapekder tayon ‘unoren so Dios, nen saray totoo.’​—Gawa 5:29.

Saray Tumang no Aligen so Katutulok nen Kristo

22. Inebatan nen Jesus so anton tepet, tan panon?

²² Sanen inarap nen Jesus so ipapatey, asubok so katutulok to ed sankagrabian a paraan. Legan na saman ya unor tan mauddiem ya agew, sigpot ton ‘naaral so katutulok.’ Ginawa to so linawa na Ama to, aliwan say linawa to. (Lucas 22:42) Diad satan, sikatoy angiletneg na naspot a rekord na integridad. (1 Timoteo 3:16) Sikatoy nagmaliw ya ebat ed sakey ya abayag lan tepet: Kasin napansiansia na perpekton too so katooran ed si Jehova, anggan sano nasusubok? Ag-itan agawaan nen Adan, tan ontan met nen Eva. Insan, sinmabi si Jesus, nambilay, inatey, tan inareglo to iray bengabengatla. Say sankatalonggaringan ed amin a pinalsa nen Jehova so angiter na sankabiskegan ya ebat. Sikatoy tinmulok anggan nalalanor ed satan so pirmin pansakripisyo to.

23-25. (a) Panon a misiglaotan so katutulok ed integridad? Iyilustra. (b) Anto so tema ed onsublay a kapitulo?

²³ Say integridad tan sigpot-puson debosyon ed si Jehova so nipatnag panamegley na katutulok. Lapud tinmulok si Jesus, apansiansia to so integridad to tan agunggonaan so interon katooan. (Roma 5:19) Daakan a tinumangan nen Jehova si Jesus. No tuloken tayo so Katawan tayo, si Kristo, tumangan itayo met nen Jehova. Say katutulok ed Kristo so mansumpal ed “andi-anggaan a kilalaban”!​—Hebreos 5:9.

²⁴ Sakey ni, say integridad et tumang la a mismo. Inkuan na Uliran 10:9: “Say manakar a matunong [“ed integridad,” NW] manakar a matalek.” No say integridad et iyaliling ed baleg a mansyon a gawa ed primera klasen laryo, say kada laryo et nikompara ed sakey a gawan katutulok. Singano anggapoy kuenta na laryo no saksakey, balet walay betang tan kana na balang sakey ed saratan. Tan sano pantatapewan la iratan, nipaalagey so sakey a bengatlan baleg so balor to. Sano tugyopen iray gawan katutulok, a naaruman lan naaruman diad ilalabas na saray agew tan taon, makapaalagey itayo na marakdakep ya abung a gawa’d integridad tayo.

²⁵ Walay sananey nin kalidad ya ipapanonot ed sikatayo na say inkamatulok ed loob na andukey a panaon​—say panagsungdo. Satan ya aspekto na ehemplo nen Jesus so tema ed onsublay a kapitulo.