“Atenyeg so Panangabagey To”

1-3. (a) Antoy ginawa nen Jesus sanen mikakasin patutulongan ed sikato so duaran mipapayabol a bulag? (b) Anto so kabaliksan na balikas a ‘panangabagey’? (Nengnengen so paimano’d leksab.)

WALAY duaran bulag ya akayurong ed gilig na karsadan asingger ed Jerico. Inagew-agew iran oonla ditan, tan onyuyurong ira ed pasen a dadalanan na totoo pian makapipayabol. Balet, diad sayan agew et walay nagawan manguma-uman ed bilay da.

² Biglan walay nadngel dan sayanggeseng na totoo. Lapud agda nanenengneng so nagagawa, tinepet na sakey ed sikara no akin a maingal iray totoo, tan inkuan da’d sikaton: “Onlalabas si Jesus a Nazareno”! Saya man so unor lan inyakar nen Jesus ed Jerusalem. Balet ta agto bukbukor; dakel so totoon ontutumbok ed sikato. Sanen naamtaan na saray bulag no siopa so ondadalan, sikaray kinmelyaw: “Katawan, kasian mo kami komon, sika anak nen David”! Lapud satan, naalipanesan so totoo ed sikara kanian babanoen da ra, balet, siansian inlulot da. Sikaray agnapatunda.

³ Nadngel nen Jesus so mapmapbaw a kelyaw da anggaman maingal iray totoo. Anto kasi so gawaen to? Dakel so pakagogonigonay nonot tan kapapagaan na puso to. Masulok labat lan sakey simba et mangangga la so bilay to diad dalin. Amta to a sikatoy pairapen tan pateyen diad Jerusalem. Anggaman ontan, agto imbaliwala so mapilit a kerew da. Sikatoy tinmunda tan impatawag to ira. “Katawan, saray mata mi nalukasan komon,” so kerew da. Et atenyeg so ‘panangabagey’ nen Jesus, kanian diniwit to so kamataan da, tan sikaray akanengneng.a Tan sikatoy tampol dan tinumbok.​—Lucas 18:35-43; Mateo 20:29-34.

4. Panon a tinoor nen Jesus so propesiya a ‘sikato so mangasi ed saray makabos tan naukolan’?

⁴ Aliwa labat lan aminpinsan ya angabagey si Jesus. Diad dakel ya inkagawa tan nanduruman kipapasen, si Jesus so apakiwas a maong a mangipatnag na panangabagey. Impropesiya na Biblia a ‘sikatoy mangilagak [odino mangasi] ed saray makabos tan naukolan.’ (Salmo 72:13) Tan sikatoy talagan malikas ed nalilikna na arum. Sikatoy nambulon a tinmulong ed totoo. Say panangabagey to so amakiwas ed sikaton manpulong. Nengnengen tayo no panon ya ipaparungtal na Ebanghelyo so matamoy a panangabagey to diad saray salita tan gawa to, insan tayo aralen no panon tayo met a nipanengneng itan a panangabagey.

Konsiderasyon ed Liknaan na Arum

5, 6. Antoran alimbawa so mangipapanengneng a si Jesus et maempatya?

⁵ Si Jesus et talagan maempatya. Sikatoy makatalos tan masimpatiya ed saramay maniirap. Anggaman agto naeksperiensya so amin a kipapasen da, sankalikna to ed puso to so paniirap da. (Hebreos 4:15) Sanen pinaabig to so liliknaen na bii a 12 taon lan manpaparala, deneskribe to so sakit na bii a “makapagonigon a sakit,” sirin et aaksobien ton satan so nansengegay pirmin gonigon tan irap na bii. (Marcos 5:25-34, NW) Sanen anengneng to so panak-akis di Maria tan saray arum ni lapud impatey nen Lazaro, atenyeg so liknaan to ed ermen da kanian sikatoy agonigon a maong. Anggaman paolien to met lanlamang si Lazaro, ontan lay impakatenyeg na liknaan to ya akatedter iray lua to.​—Juan 11:33, 35.

⁶ Diad sananey ya inkagawa, si Jesus so inasinggeran na sakey ya akating tan akikasi ed sikato: “No labay mo, nayarian mo ak a linisan.” Antoy reaksion nen Jesus, a perpekton too ya agnin balot nansakit? Akaskasian to imay akating. On, “atenyeg so panangabagey to.” (Marcos 1:40-42) Kanian sikatoy nanggawa na sakey a bengatlan nikadkaduma. Amta to ya unong ed Ganggan et marumsis iray akating tan ag-ira nayarin midipong-dipong ed arum. (Levitico 13:45, 46) Anggano agto met la bembenan itan a too et seguradon napaabig to. (Mateo 8:5-13) Balet, denesidi ton iyawat so lima to tan diwiten so akating, tan kuanto: “Labay ko; nalinisan ka.” Et tampol a naandi so kating na laki. Agaylan pililikna so impatnag nen Jesus!

7. Anto so makatulong pian nabayuboan tayo so empatya, tan panon a nipanengneng iyan kalidad?

⁷ Bilang Kristianos, kakaukolanen ed sikatayo so pangalig ed impanengneng nen Jesus ya empatya odino pililikna. Papasesegen itayo na Biblia a ‘mangabagey’ ed arum.b (1 Pedro 3:8) Nayarin mairap tayon talosay nalilikna na saramay papairapen na graben sakit odino depresyon, nagkalalo la no agtayo ni asali itan. Balet, tandaan ya agtayo la kaukolan a nasali ni so sasagmaken na arum pian makapilikna tayo ed sikara. Si Jesus et akilikna ed saray mansasakit anggaman agton balot asali so nansakit. Panon tayo sirin a nabayuboan so empatya? Diad panamegley na maanos ya idengel tayo legan ya ibebesngaw na saray maniirap so nalilikna ra tan say walad kapusoan da. Nayari tayon tepetay inkasikatayo, ‘No siak so walad kipapasen to, anto kasi naliknak?’ (1 Corinto 12:26) No pataremen tayoy inkamalikas tayo ed liknaan na arum, lalo itayon ‘makapangibalap [“mansalita na makaligliwa,” NW] ed saray apunaw ed puso.’ (1 Tesalonica 5:14) No maminsan, aliwa labat lan diad pansalita so paraan pian nibalikas tayo so empatya odino pililikna noag ontan met ed saray lua. ‘Minangis kayo ed saray mannanangis,’ kuan na Roma 12:15.

8, 9. Panon ya impanengneng nen Jesus so konsiderasyon ed liknaan na arum?

⁸ Si Jesus et makonsidera ed totoo tan ed saray nalilikna ra. Nonot yo pa imay inkagawa sanen inyakar da ed sikato so sakey a toon telek tan baer. Lapud nayarin alikas ton mabapbaing so laki, walay ginawa ton agto kaslakan a gagawaen sano mamapaabig: “Inala ton insian a maamot [imay laki] ed saray dakel a katooan.” Sanen siksikara lan dua tan anggapo lay makakanengneng, pinaabig to so laki.​—Marcos 7:31-35.

⁹ Ontan lamet so impanengneng ton konsiderasyon sanen inyakar ed sikato na totoo so sakey a bulag tan kinerew dan paabigen to. “Et inegnaan [nen Jesus] ed lima so bulag, tan sikato so inyakar to ed paway na aldea.” Insan to kalkalnan tinambal so laki. Anganko et pian agnabiglay nonot tan mata na laki ed inkamasnag tan inkakomplikado na kaliberliber to. (Marcos 8:22-26) Agaylay inkamakonsidera nen Jesus!

10. Diad antoran paraan a nipanengneng tayo so konsiderasyon ed liknaan na arum?

¹⁰ Bilang papatumbok nen Jesus, kakaukolanen ed sikatayo so pangipatnag na konsiderasyon ed liknaan na arum. Lapud satan et maalwar itayo ed pananalita tayo, a tatandaan tayon say bengatbengat a pansalita so makapasakit ed arum. (Uliran 12:18; 18:21) Say mapasang, makapainsulto, tan ansakit a pananalita so agmanepeg ed saray Kristiano, a malikas ed nalilikna na arum a totoo. (Efeso 4:31) Sikayoran mamatatken, panon yon nipanengneng so konsiderasyon ed liknaan na arum? Sano manisimbawa kayo, tekepay kamaongan so pananalita yo ta pian napansiansiay dignidad na agagi. (Galacia 6:1) Sikayoran atateng, panon yon nipanengneng so konsiderasyon ed nalilikna na ananak yo? Sano didisiplinaen yo ra, panggunaetan yon gawaen itan diad paraan ya ag-ira nabaingan.​—Colosas 3:21.

Manbulon ya Ontulong ed Arum

11, 12. Antoran salaysay ed Biblia so mangipapanengneng ya agla kaukolan a bagaan ni si Jesus antis ton mangabagey?

¹¹ Agla nakaukolan a bagaan ni si Jesus antis ton mangabagey. Ta say kalidad a panangabagey et pakiwasen to la so sakey pian ontulong. Kanian, agla pankelawan a say matamoy a panangabagey so amakiwas ed si Jesus a manbulon ya ontulong ed arum. Alimbawa, sanen anggapoy naakan na amayamay a totoo ya akaiba to ed loob na taloy agew, agto la inalagar a sikato ni bagaan a saray totoo et narasan odino panonotan a kaukolan toy manggawa na paraan. Oniay inkuan na salaysay: “Si Jesus tinawag to so saray babangatan to ed sikato, tan inkuan to, Kaskasian ko so dakerakel a katooan, lapud akipanayam ira’d siak ed taloran agew, et anggapoy nakan da; et agko labay iran pasempeten a manaayunal, ta ompan onkapuy ira ed dalan.” Insan, diad bunek ton dili et mamilagro ton pinakan so ulop.​—Mateo 15:32-38.

¹² Imanoen pa iyan sananey nin salaysay. Nen 31 C.E., legan a manasingger lay Jesus ed syudad na Nain, walay makapanangnangis ya eksenan naimatonan to. Asabat to so sakey a tulor ya ompapaway ed syudad, nayarin paonla’d asingger a nipukdol a lubok pian iponpon so “bogbogtong ya anak a laki [na sakey a] balo.” Naisip yo ta no panoy ot-ot ya alikna na satan ya ina? Iponpon to la so alenleneg ya anak to, tan anggapoy asawa to a kaambegyaan to komon ed pirmin ermen to. Diad amin na saramay mitutulor, say “anengneng” nen Jesus et samay balo ya inateyan na anak. Atenyeg a maong so liknaan to ed anengneng to, on, “sikato so inabagey to.” Agla kaukolan a pikasian ni si Jesus. Say panangabagey ed puso to so amakiwas la ed sikaton manbulon. Kanian sikatoy “inmasingger tan diniwi’to so lungon,” insan to binilay so balolaki. Antoy sinmublay ya agawa? Agkinerew nen Jesus a mila imay balolaki ed saramay dakel a totoon manbabaroy a kaiba To. Imbes, sikatoy “inyawa’to ed kinen ina to,” diad ontan et makapan-iba ira lamet bilang sakey a pamilya tan naseguron naasikaso so abalon ina.​—Lucas 7:11-15.

13. Panon tayon naalig si Jesus diad pambulon lan ontulong ed saramay mankaukolan?

¹³ Panon tayon naalig so ehemplo nen Jesus? Siempre, agtayo sarag so mamilagron mangiter na tagano odino mamaoli ed inatey. Balet, sarag tayon aligen si Jesus diad pambulon tayon ontulong ed saramay mankakaukolan. Nayarin walay sakey a kaagian tayo ya inmirap a maong odino naandian na trabaho. (1 Juan 3:17) Nayarin kakkaukolan lan apigeren so abung na sakey a balo. (Santiago 1:27) Nayarin walay kabat tayon pamilya a maneermen ed impatey na inad-aro ra tan kaukolan day ligliwa odino praktikal a tulong. (1 Tesalonica 5:11) Sano walaray talagan mankaukolan, agtayo la aalagden a singgeran da itayo ni. (Uliran 3:27) Pakiwasen itayo na panangabagey a manbulon lan ontulong, anggad iyaabuloy na sirkumstansya tayo. Aglilingwanan a say melag labat a kaabigan odino pigaran makaligliwa a salita a nanlapud puso et mapuersa lan makapangipatnag na panangabagey.​—Colosas 3:12.

Panangabagey so Amakiwas ed Sikaton Manpulong

14. Akin ya inyuna nen Jesus so kimey a panangipulong ed maong a balita?

¹⁴ Unong a naaralan tayo ed Seksion 2 na sayan libro, si Jesus so angiletneg na sankaabigan ya ehemplo ed panangipulong na maong a balita. Inkuan to: “Kaukolan ko met ya ipulong . . . so ebanghelyo na panariay Dios ed saray arum a syudad; ta sikato’ya so nibakian ko.” (Lucas 4:43) Akin ya inyuna to iyan kimey? Manuna et lapud panangaro to ed Dios. Balet wala ni sananey a rason: Say impapuson panangabagey to, a satan so amakiwas ed sikaton iter iray espiritual a pankaukolan na arum. Diad amin a paraan na impangipatnag toy panangabagey, anggapo lay mas importante nen say impamenek to ed espiritual a pakakaerasan na arum. Usisaen tayo pa so duaran inkagawa a mangipapabitar ed panmoria nen Jesus ed saray totoon pinulongan to. Say pangonsidera ed saratan so ontulong ed sikatayo a nausisa so dilin motibo tayo ed pibibiang ed panagpulong.

15, 16. Deskribien so duaran inkagawa a mangipaparungtal ed panmoria nen Jesus ed totoon pupulongan to.

¹⁵ Nen 31 C.E., kayari na manga duay taon ya impansagpot a maong nen Jesus ed ministeryo, lalo ton pinalaknab itan, a “niliberliber to ray amin a syudad tan balbaley” na Galilea. Tan atenyeg so puso to ed anengneng to. Oniay report nen apostol Mateo: “Et sanen anengneng to ray dakerakel a totoo, inabagey to ra, lapud maermen tan abuybuyak ira, a singa saray karnero ya anggapoy pastol da.” (Mateo 9:35, 36) Akasian nen Jesus iray ordinaryon totoo. Amta to so pakaskasin espiritual a kipapasen da. Kabat ton sikaray nalalames tan apalpaulyanan na saramay mismon manpastol komon ed sikara, salanti, saray lider na relihyon. Kanian lapud pirmin panangabagey to, makulikulin innabang nen Jesus ed totoo so mensahen mangiiter na ilalo. Anggapo lay mas kakkaukolan da nen say maong a balita na Panarian na Dios.

¹⁶ Naulit lamet itan pigay bulan ed saginonor sanen asingger lay Paskua nen 32 C.E. Diad satan ya inkagawa, nambaloto si Jesus tan saray apostol to, a binaliw day Dayat na Galilea pian manpainawa ed sakey a mareen a pasen. Balet, batik a tinonton na totoo so gilig na dayat tan naunaan da imay baloto. Antoy reaksion nen Jesus? “Sikatoy pinmaway et anengneng to so saray dakel a katooan, tan naabagey to ra, lapu ed singa ra saray karnero ya andian na managpastol; et ginapoan to so nambangat ed sikara na amayamay a bengabengatla.” (Marcos 6:31-34) Dia lamet et “naabagey” nen Jesus so totoo lapud pakaskasi ira ed espiritual. Singa “saray karnero ya andian na managpastol,” sikaray naeerasan ed espiritual tan bukor day mangaasikaso’d inkasikara. Say amakiwas ed si Jesus a manpulong et say panangabagey imbes a basta obligasyon labat.

17, 18. (a) Anto so mamapakiwas ed sikatayon mibiang ed ministeryo? (b) Panon tayon nabayuboan so panangabagey ed arum?

¹⁷ Bilang papatumbok nen Jesus, anto so mamapakiwas ed sikatayon mibiang ed ministeryo? Unong ya anengneng tayo ed Kapitulo 9 na sayan libro, ingganggan ed sikatayo, tan responsabilidad tayo, so manpulong tan manggawa na saray babangatan. (Mateo 28:19, 20; 1 Corinto 9:16) Balet, ag-itayo mibibiang ed sayan kimey lapu labat la’d obligasyon. Say manunan mamapakiwas ed sikatayon ipulong so maong a balita na Panarian nen Jehova et say panangaro ed sikato. Napapakiwas itayo met a manpulong lapud panangabagey ed saramay walaan na duman sisisiaen. (Marcos 12:28-31) Panon tayo sirin a napaaligwas so panangabagey ed arum?

¹⁸ Nakaukolan a mipara’d panmoria nen Jesus so panmoria tayo ed totoo, salanti, “maermen tan abuybuyak . . . a singa saray karnero ya anggapoy pastol da.” Bilbilang et akaromog kayo na pakaskasin abalang a kordero. Lapud anggapoy pastol a mangiwanwan ed sayan kordero diad marika tan maranum a pastolan, sayan pakaskasin pinalsa so abigot tan napgaan. Agta nakasian yo itan a kordero? Agta pambanikelan yon pakanen tan painumen itan? Anggapoy pidumaan na satan a kordero ed dakel a totoon agni akaamta ed maong a balita. Lapud sikaray pinaulyanan na saray palson pastol na relihyon, sikaray naeerasan tan napnapgaan ed espiritual tan anggapoy tudtuan ilalo ra ed arapen. Walad sikatayo so nakaukolan da: say masustansian espiritual a tagano tan say makaparepreskon danudanum na katuaan a naromog ed Salita na Dios. (Isaias 55:1, 2) Sano dalepdepen tayo iray espiritual a pankaukolan na totoon walad kaliberliber tayo, nakasian tayo ira. No singa si Jesus et naaabagey tayo ra, gawaen tayoy anggaay nayarian tayo pian inabang ed sikara so ilalon Panarian.

19. Antoy nagawaan tayo pian natulongan a napakiwas so iyaaralan na Biblia a kualipikado lan mibiang ed panagpulong?

¹⁹ Panon tayon natulongan so arum a natumbok so ehemplo nen Jesus? Bilbilang et labay tayon pasesegen so iyaaralan na Biblia a kualipikado lan mibiang ed panagpulong. Odino labay tayon tulongan so sakey ya inaktibo pian sigpot lamet a mibiang ed panagpulong. Panon tayo iran tulongan? Kaukolan a napakiwas tayo so puso ra. Tandaan, si Jesus et ‘angabagey’ nin inmuna ed saray totoo, insan to ra imbangat. (Marcos 6:34) Kanian no natulongan tayo ran mamayubo na panangabagey, napakiwas so kapusoan dan mangalig ed si Jesus tan manginabang na maong a balita ed arum. Nayarin oniay itepet tayo ed sikara: “Panon ya apaaligwas so bilay mo diad impangawat mo ed mensahe na Panarian? Komusta iramay totoon agni akaamta ed sayan mensahe​—agta kaukolan da met so maong a balita? Panon mo ran natulongan?” Balet, siempre, say sankabiskegan a mamakiwas ed sakey pian mibiang ed ministeryo et say panangaro ed Dios tan say pilalek a panlingkor ed sikato.

20. (a) Anto so nalalanor ed pagmaliw a patumbok nen Jesus? (b) Anto so aralen ed onsublay a kapitulo?

²⁰ Say pagmaliw a patumbok nen Jesus et agto labat la lalanoren so basta pangulit ed saray salita to tan pangalig ed saray ginawa to. Kaukolan ya aligen tayo met so “panagnonot” to. (Filipos 2:5, NW) Kanian, agaylay pisasalamat tayo lapud ipaparungtal ed sikatayo na Biblia so walad nonot tan liknaan nen Jesus kapagno sikatoy mansasalita tan onkikiwas! Diad pangabisado ed “kanonotan nen Kristo,” mas lalo tayon napaaligwas so inkamalikas tan impapuson panangabagey tayo, diad ontan et naalig tayo so impantrato nen Jesus ed kaslakan a totoo. (1 Corinto 2:16) Diad onsublay a kapitulo, aralen tayo so nanduruman paraan na impangipatnag nen Jesus na panangaro nagkalautla ed saray patumbok to.