Panangasawa​—Regalo na Maaron Dios

1, 2. (a) Anto ray nayarin naisip tayo no walay balon kasal, tan akin? (b) Anto ran tepet so aralen tayo ed sayan kapitulo?

KASIN labalabay moy mibansal? Dakel so malabay ta malikeliket itan ya okasyon. Balibali kawes na saray mankasal. Tan sankanengneng ed lupa da ya malikeliket ira! Anggad layag so imis da ta diad sayan agew et onggapo so balibalin arapen da.

² Balet diad panaon tayo, panduaruwaan la na totoo no kasin ombayag so relasyon na saray sanasawa. Siempre, labay tayon maong so pansumpalan na saray balon kasal, balet agtayo naiwasan ya isipen: ‘Magmaliw ira kasin maliket? Kasin ombayag so ulopan da?’ Akadepende itan ed sanasawa, no kasin manmatalek ira ed Dios tan unoren da ray bilin to. (Basaen so Proverbio 3:5, 6.) Kaukolan dan gawaen itan pian mansiansia rad panangaro na Dios. Aralen tayo natan so ebat na Biblia ed sarayan apatiran tepet: Anto ray rason no akin ya mangasawa? No miasawa ka, siopay pilien mo? Panon kan makapanparaan ed pangasawam? Tan antoy makatulong ed sanasawa pian mansiansia ran maliket legay bilay?

ANTO RAY RASON NO AKIN YA MANGASAWA?

3. Akin ya agmakatunongan no mangasawa ka lapu labat ed ataptapew a rason?

³ Panisiaan na arum ya kaukolan day mangasawa o miasawa pian onliket so bilay da. Aliwa kunon kompleto so bilay mo no anggapoy asawam. Aliwan tua ‘tan! Si Jesus et anggapoy asawa to. Imbaga to ni ingen ya say inkabalolaki tan inkamarikit et sakey a regalo tan impaseseg to itan ed siopaman a sarag day mansiansian single. (Mateo 19:11, 12) Imbaga met nen apostol Pablo so kaabigan na pansiansian single. (1 Corinto 7:32-38) Pero, agmet imbaga nen Jesus tan Pablo ya sebel so mangasawa. Diad tua, say pangisebel ed pangasawa o piasawa et kaibad saray “bangabangat na saray demonyo.” (1 Timoteo 4:1-3) Balet siempre, talagan mas dakel so panaon na saray single diad panlingkor ed si Jehova ta anggapoy tanton makaabala ed sikara. Kanian agmakatunongan no mangasawa ka lapu labat ed ataptapew a rason, odino lapud sinugsogan ka na arum.

4. Akin ya maabig a pundasyon so malet ya relasyon na sanasawa parad panagpamilya?

⁴ Balet, talaga kasin wala ray makatunongan a rason no akin ya mangasawa o miasawa so sakey? On wala. Say panangasawa et regalo met na maaron Dios tayo. (Basaen so Genesis 2:18.) Kanian walay maong ya niiter na satan tan panlapuan itan na liket. Singa bilang, maabig a pundasyon so malet ya relasyon na sanasawa parad panagpamilya. Kaukolan na saray ananak so atateng ya mamabaleg, mangaro, mandisiplina, tan mangigiya ed sikara. (Salmo 127:3; Efeso 6:1-4) Balet, aliwan satan labat so rason no akin ya mangasawa so sakey.

5, 6. (a) Unong ed Eclesiastes 4:9-12, anto ray pankaabigan na malet ya pankakaaro? (b) Panon a mipara so ulopan na sanasawa ed taloran tili a lubir?

⁵ Imanoen so pinagkateman teksto ed sayan kapitulo, pati say konteksto: “Mas maong ni duara nen say sakey ta walaan ira na maabig a tumang ed pansasagpot da. Ta no natumba so sakey ed sikara, sikatoy ipaalagey na kaiba to. Balet anto kasi nagawa no atumba may sakey tan anggapoy mangipaalagey ed sikato? Niarum ni, no manabay ya ondukol so duara, napetangan ira, balet panon a napetangan so sakey no bukbukor to? Tan nayarin say sakey et nadaeg to imay manbukbukor, balet sikatoy sarasarag a taloen na duaran saniba. Tan say taloran tili a lubir et mairap a napultot.”​—Eclesiastes 4:9-12.

⁶ Sayan teksto et ontutukoy ed pankakaaro. Siempre, malet ya sankaaro iray sanasawa. Ipapanengneng na sayan teksto ya say ontan ya ulopan et panlapuay pantutulongan, ligliwa, tan proteksion. Mas mabiskeg so ulopan na sanasawa no aliwa labat ya sikaran dua so kaiba ed sipanan da. Natalosan tayo ed samay teksto ya nayarin napultot so duaran tili a lubir. Balet no taloran tili, mas matibay. Say ulopan na sanasawa et singa taloran tili ya lubir no say mas importante ed sikara et say panggawa ed panlabayan nen Jehova. Kaiba si Jehova ed ulopan da kanian matibay itan.

7, 8. (a) Anton bilin so insulat nen Pablo parad saray andian na asawa ya lalabanan day pilalek da ed sekso? (b) Antoy realistikon ibabaga na Biblia nipaakar ed panangasawa?

⁷ Sakey ni, saray sanasawa labat so naikdan na karapatan ya nawalaay seksual a relasyon. Tan satan et mangiter na liket ed sikara. (Proverbio 5:18) Say sakey ya single et nayarin siansia nin lalabanan toy mabiskeg ya pilalek ed sekso anggano “linmampas lad taon na kalangweran to.” No agto itan nakontrol, nayarin makagaway marutak odino imoral. Oniay impaisulat nen Jehova ed si Pablo parad saray andian na asawa: “No ag-ira makatepel, mangasawa ra, ta magmaong ni mangasawa nen say ondalang ed pampilpilalek.”​—1 Corinto 7:9, 36; Santiago 1:15.

⁸ Antokaman so rason no akin ya mangasawa so sakey, nepeg a sikatoy realistiko. Singa insulat nen Pablo, “saramay mangasawa et nawalaan na kairapan ed laman da.” (1 Corinto 7:28) Wala ray problema na sanasawa ya anggapo ed saray single. Kanian no mandesisyon kan mangasawa o miasawa, panon mon nabawasan so problema pian mas maliket kayo? Say sakey a paraan et pilim ya maong so piasawaan mo.

PANON KAN MAKAPILI NA MAONG YA ASAWA?

9, 10. (a) Panon ya inyilustra nen Pablo so peligro na piasawa ed agmananisia? (b) Antoy maslak a pansusumpalan na saramay akiasawa ed agmananisia?

⁹ Impaisulat nen Jehova ed si Pablo so importantin prinsipyo a nepeg ya iyaplika ed pampili na asawa: “Agyo aabuloyan a sikayo tan saray agmananisia et maniba ed sakey a pako.” (2 Corinto 6:14, paimano ed leksab) Say inusar dia nen Pablo ya ilustrasyon et imbase to ed panagdalus. No panibaen ed saksakey a pako so duaran ayep ya mandumaan so kabaleg tan biskeg da, nairapan iran dua. Ontan met ed sanasawa. No mikasakey so Tasi ed aliwan Tasi, seguradon wala ray tensyon tan agpantatalosan. No say sakey et labay toy mansiansia ed panangaro nen Jehova balet say sakey et anggapoy pibabali to, mandumaan so prayuridad da, kanian dakel so onlesan problema. Atan so rason no akin ya binilin nen Pablo iray Kristiano ya miasawa ira “dia labat ed Katawan.”​—1 Corinto 7:39.

¹⁰ No maminsan, iisipen na arum ya single a Kristiano ya mas maong ni mangasawa o miasawa ed aliwan Tasi nen say maermen ira ta bukbukor dad bilay. Wala ray angibaliwala ed bilin na Biblia tan akiasawa ra ed agmanlilingkor ed si Jehova. Makapaermen so nansumpalan da. Akiasawa rad too ya agda nakaistoryaan ed saray sankaimportantian a bengatla ed bilay. Kanian mas maermen ni ra natan nen say nen anggapo ni asawa ra. Makapaliket ta nilibon single a Kristiano so manmamatalek tan manguunor ed bilin na Dios. (Basaen so Salmo 32:8.) Anggano labay day miasawa, determinado ran mansiansian single anggad wala lay naalmo dan mandadayew ed si Jehova a Dios.

11. Antoy makatulong ed sika diad pampilim na piasawaan mo? (Nengnengen so kahon ya “Antoy Anapen Ko ed Magmaliw ya Asawak?”)

¹¹ Siempre, aliwan amin ya lingkor nen Jehova et automatikon magmaliw ya maong ya asawa. No labay moy mangasawa o miasawa, say anap mo et samay napibagayan moy ugali to, parehoy plano yo ed espiritual, tan inad-aro yon dua so Dios. Dakel so artikulo tan publikasyon ya intarya na matoor tan makabat ya aripen nipaakar ed sayan tema, tan maabig no aralen mo iratan a simbawa ya nanlapud Biblia tan ipikasim ya niyaplikam iratan. Natulongan ka na saratan diad panggawam ed sayan importantin desisyon.a​—Basaen so Salmo 119:105.

12. No nipaakar ed panangasawa, antoy niyugali ed dakel a bansa, tan anton alimbawa ed Biblia so makatulong?

¹² Diad dakel a bansa, saray ateng so manpipili na asawaen na anak da. Panisiaan da ya mas marunong tan eksperiensyado iray atateng kanian sikara so mandesisyon. Maslak et marakep met so pansusumpalan da, singa met ed panaon na Biblia. Pakaaralan na atateng natan imay ginawa nen Abraham ya imbaki toy aripen to pian mananap na asawa nen Isaac. Aliwan say kuarta tan marakep a panagbilay so importante ed si Abraham. Say importante ed sikato et makalmo na biin mandadayew ed si Jehova ya magmaliw ya asawa nen Isaac.b​—Genesis 24:3, 67.

PANON KAN MAKAPANPARAAN ED PANGASAWAM?

13-15. (a) Panon ya makatulong so Proverbio 24:27 ed balolakin labay to lay mangasawa? (b) Panon ya makapanparaan so sakey a marikit no labay to lay miasawa?

¹³ No desidido ka lan mangasawa, tepetan moy sarilim, ‘Talaga kasin akaparaan ak la?’ Say ebat et aglabat akadepende ed no antoy naliliknam nipaakar ed panangaro, sekso, tan pakawalaan na kaiba odino ananak. Imbes, nepeg mon isipen iray espisipikon responsabilidad na asawan laki odino bii.

¹⁴ Say sakey a balolaki ya manaanap na asawaen to et kaukolan ton nonoten iyan prinsipyo: “Iplanom so kimey mod paway, tan iparaan moy amin a bengatla diad uma; insan ipaalagey moy abung mo.” (Proverbio 24:27) Antoy labay ya ibaga na satan? Nensaman, no say sakey a laki et labay toy manpamilya, tepetan to ni sarili to, ‘Kasin sarag ko lan bilayen so asawak tan saray magmaliw ya ananak mi?’ Kaukolan toy mantrabaho odino ondalus. Ontan met natan. No iisipen na sakey a laki so mangasawa, kaukolan ya sikatoy akaparaan parad saray responsabilidad to. Basta sarag na laman to, kaukolan toy mantrabaho. Ibabaga na Biblia a say laki ya agto niiter so materyal, emosyonal, tan espiritual ya pankaukolan na pamilya to et alabas ni nen say toon anggapoy pananisia to!​—Basaen so 1 Timoteo 5:8.

¹⁵ Say sakey a marikit ya labay toy miasawa et kaukolan ya akaparaan met parad saray ambelat a responsabilidad to. Nabasa ed Biblia iray makapadinayew ya gagawaen tan kualidad na asawan bii pian natulongan toy asawa to tan naasikaso toy pamilya ra. (Proverbio 31:10-31) No apurado lan mankasal so balolaki tan marikit anta agni ra akaparaan ed saray responsabilidad da, makasarili ira lapud agda nononoten so pankaabigan na naasawa da. Balet manuna ed amin, saramay mannononot ya mangasawa o miasawa et nepeg ya amta dan iyaplika iray prinsipyo na Dios ed bilay da.

16, 17. Anto ran prinsipyo ed Biblia so nepeg ya dalepdepen na saramay manplaplanon mangasawa o miasawa?

¹⁶ Kaibad pamparaan so pandalepdep ed saray responsabilidad ya inter na Dios ed asawan laki tan asawan bii. Kaukolan ya natalosan na laki so responsabilidad to bilang ulo na Kristianon pamilya. Anggano sikatoy ulo, agnepeg ya manari-arian. Imbes, nepeg ton aligen so pangidadaulo nen Jesus ed kongregasyon. (Efeso 5:23) Ontan met, nepeg ya natalosan na bii so mapagalang ya responsabilidad to bilang asawa. Kasin akaparaan ya manpasakop ed “ganggan na asawa to”? (Roma 7:2) Sikatoy manpapasakop la ed ganggan nen Jehova tan Kristo. (Galacia 6:2) Balet no miasawa, naaruman so pampasakopan to, say autoridad na asawa to. Kasin akaparaan ya onsuporta tan manpasakop ed autoridad na agperpekton laki? No andi, mas maabig no agla miasawa.

¹⁷ Niarum ni, nepeg ya akaparaan so asawan laki tan bii ya iter so espisyal ya pankaukolan na balang sakey. (Basaen so Filipos 2:4.) Insulat nen Pablo: “Kada asawan laki ed sikayo et nepeg ton aroen so asawa to a singa ed dilin laman to; ontan met, say asawan bii et nepeg a walaan na aralem a respeto ed asawa to.” Diad panangigiya na Dios, atebek nen Pablo ya say laki et nepeg ton nalikna so aralem ya respeto na asawa to. Tan say bii et nepeg ton nalikna ya sikatoy inad-aro na asawa to.​—Efeso 5:21-33.

18. Akin ya kaukolan ya kontrolen na saninaro so liknaan da?

¹⁸ No ontan sirin, say piinaroan et aliwan panaon pian manliket labat so saninaro. Panaon itan pian naaralan na balolaki tan marikit no panon dan tratoen so sakey tan sakey, tan no talagan ituloy day manpakasal. Panaon met itan ya nepeg dan kontroley sarili da! Siempre, natural labat ya labay dan ipalikna so panangaro da ed sakey tan sakey. Balet kaukolan dan kontroley liknaan da ta ompan natukso ran gawaen so para labat ed sanasawa. No talagan inaro day sakey tan sakey, paliisan day panggawa na makaderal ed relasyon da ed Dios. (1 Tesalonica 4:6) Kanian no wala lay inarom, kontrol moy sarilim. Parad pankaabigan mo itan a kualidad, mangasawa ka man odino andi.

ANTOY GAWAEN YO PIAN LEGAY BILAY SO PANIBA YO?

19, 20. No nipaakar ed panangasawa, antoy papanisiaan na saray Kristiano ya duma ed opinyon na dakel a totoo? Iyilustra.

¹⁹ No labay na sanasawa ya legay bilay so paniba da, nepeg ya natatalosan day impansipanan da. Diad saray nobela tan pelikula, mabetbet ya diad sampot et mankasal so bida pian say istorya et happy ending. Balet diad tuan bilay, say pankasal et gapoan ni labat na relasyon ya inggagala nen Jehova ya legay bilay. (Genesis 2:24) Makapaermen balet ta aliwan ontan so opinyon na totoo natan. Diad arum a kultura, ibabaga dan say pankasal et singa pambuknol na duaran singer. Agda seguro naiisip ya dugaruga itan ed papanisiaan na dakel a totoo natan nipaakar ed pankasal. Akin? Ta no malet so impangibuknol, nayarin ombayag met itan. Balet mainomay mo met ya ukbaren no labay mo.

²⁰ Parad dakel a totoo, temporaryo labat so piasawa. Maganggano day mangasawa o miasawa ta isipen dan napenek na satan so pankaukolan da, tan iisipen da met ya mainomay labat so misian no nairapan la ra. Balet tandaan ya inkompara na Biblia so ulopan na sanasawa ed lubir. Say lubir ya uusaren ed saray barko et matibay tan agnapultot anggano walay makmaksil a bagyo. Ontan met ed panangasawa. Gagala na Dios ya ag-itan napultot. Tandaan imay imbaga nen Jesus: “Say impankasakey na Dios et agnepeg a pansianen na too.” (Mateo 19:6) Agmon balot lilingwanan itan no mangasawa o miasawa ka. Labay kasin ibaga na satan a pabelat so panangasawa? Andi.

21. Antoy nepeg ya nengnengen na sanasawa ed sakey tan sakey, tan antoy makatulong ed sikaran nagawaan itan?

²¹ Kaukolan ya positibo so nengnengen na sanasawa ed sakey tan sakey. Maliket tan balibali so ulopan da no say nengnengen da et say maong ya ugali tan nagagawaan na balang sakey. Posible kasi itan anggano aliwan perpekto so asawam? On. Ta si Jehova ya mismo et say kamaongan tayo so nenengnengen to anggano ag-itayo perpekto. Intepet na salmista: “No saray lingo so babantayan mo, O Jah, siopa kasi so makaalagey?” (Salmo 130:3) Ontan met so nepeg ya gawaen na sanasawa. Nepeg ya say kamaongan na balang sakey so nengnengen da tan mabulos iran manperdonaan.​—Basaen so Colosas 3:13.

22, 23. Akin ya maong ya alimbawa si Abraham tan Sara ed saray sanasawa natan?

²² No kapigan ombabayag so ulopan na sanasawa, diman da met mas nalikna so liket tan panamendisyon na Dios. Nabasa ed Biblia so ulopan na sanasawan si Abraham tan Sara nen matatken la ra. Siempre, wala met iray naeksperiensya dan problema tan subok. Nen masulok ya 60 lay taon nen Sara, tinaynan dan dua nen Abraham so komportablin abung da diad mayaman ya syudad na Ur tan nanayam irad tolda diad nakekera iran taon na bilay da. Anggano mairap, nampasakop nin siansia si Sara ed inkaulo na asawa to. Talagan nibaga ya si Sara et kapanoan tan katulongan nen Abraham lapud nirespeto tan sinuportaan to ray desisyon to. Tan aliwan kunkunwari so pampapasakop to. Anggan diad nonot to labat et tinawag ton katawan so asawa to. (Genesis 18:12; 1 Pedro 3:6) Nanlapud puso so respeto tod si Abraham.

²³ Siempre, aliwan naynay ya parehoy panlabayan nen Abraham tan Sara. Aminsan et walay suhestion nen Sara ya lapud satan et “naermenan a maong” si Abraham. Balet lapud sinimbawa nen Jehova si Abraham, mapaabeba ton dinengel so asawa to. Bilang resulta, abendisyonan so pamilya da. (Genesis 21:9-13) Dakel so naaralan na saray sanasawa natan ed alimbawa nen Abraham tan Sara, anggan saramay abaybayag lan sanasawa.

24. Antoy gawaen na sanasawa pian napagalangan day Dios a Jehova, tan akin ya importante itan?

²⁴ Diad Kristianon kongregasyon, dakel so maliket ya sanasawa​—rerespetoen a maong na asawan bii so asawa to, inad-aro tan papagalangan na asawan laki so asawa to, tan mantutulongan ira pian niyuna da ed bilay da so panlabayan nen Jehova. Kanian no manplaplano kan mangasawa o miasawa, pilim ya maong so asawaen mo, manparaan kan maong, tan gawam so anggaay nayarian mo pian mareen tan malet so ulopan yo. No ontan so gawaen yo, napagalangan yoy Jehova tan mansiansia kayo ed panangaro to.