No Antoy Ibabaga na Biblia Nipaakar ed Diborsyo tan Pansian

Iilaloan nen Jehova ya saramay walaan na asawa et mansiansia iran matoor ed sipanan da nen nankasal ira. Sanen kakasalen nen Jehova so unonan laki tan bii, oniay inkuan to: “[Say] laki . . . iyamong toy asawa to, tan magmaliw iran sakey a laman.” Inulit itan nen Jesu-Kristo insan to inyarum: “Sirin, say impankasakey na Dios et agnepeg a pansianen na too.” (Genesis 2:24; Mateo 19:3-6) Kanian parad si Jehova tan Jesus, say panangasawa et legay bilay a relasyon a manampot labat no ompatey so kapareha. (1 Corinto 7:39) Sagradon uksoyan so panangasawa, kanian nepeg tayon tandaan ya seryoson bengatla so diborsyo. Diad tua, kabusol nen Jehova so pandiborsyo ya anggapoy Makasulatan a basiyan.​—Malaquias 2:15, 16.

Anto so Makasulatan a basiyan na diborsyo? Say pikakalugoran tan seksual ya imoralidad. Kabkabusol nen Jehova iratan. (Genesis 39:9; 2 Samuel 11:26, 27; Salmo 51:4) Talagan makapadimla ed sikato so seksual ya imoralidad kanian inyabuloy ton magmaliw itan a basiyan na diborsyo. (Impaliwawa so kabaliksan na seksual ya imoralidad tan no anto ray kaiba ed satan diad Kapitulo 9, parapo 7) Iikdan nen Jehova so inosentin asawa na kanepegan a mandesisyon no kasin agto taynan so nankasalanan ya asawa to odino midiborsyo. (Mateo 19:9) Kanian no mandesisyon a midiborsyo so inosentin asawa, aabuloyan nen Jehova itan. Anggaman ontan, aglabay ya ibaga na satan ya nayari lan kombinsien na Kristianon kongregasyon so anggan siopa ya midiborsyo. Diad tua, wala ray situasyon a nayarin mandesisyon so inosentin asawa ya agto taynan so asawa to, lalo la no talagan magbabawi ed ginawa ton kasalanan. No say sakey et walaay Makasulatan a basiyan a midiborsyo, sikato so mandesisyon ed satan tan nepeg ton awaten so antokaman a resulta na desisyon to.​—Galacia 6:5.

Wala ray Kristiano balet ya lapud grabe la ran situasyon et akisian odino akidiborsyo anggano ag-akagaway seksual ya imoralidad so asawa ra. Diad onia ran kaso, espisipikon ibabaga na Biblia a samay akisian et “mansiansian anggapoy asawa odino mipawilan ed asawa to.” (1 Corinto 7:11) Agnayarin mananap na naasawa o piasawaan to lamet. (Mateo 5:32) Imanoen pa so pigaran grabe a situasyon ya ipapasen na arum a basiyan pian misian.

Ginagalan agpanlegpet ed pamilya. Nayarin manirap a maong so sakey a pamilya lapud ag-ira lelegpeten na asawan laki, ya agto anggan iiter so manunan pankaukolan da anggano sarag to komon. Oniay ibabaga na Biblia: “No walay siopaman ya agto tataryaan . . . iramay membro na pamilya to, impulisay to lay pananisia tan alabas ni nen say toon anggapoy pananisia to.” (1 Timoteo 5:8) No aglabay na asawan laki so manguman, mandesisyon so asawan bii no kasin sikatoy legal a misian pian naprotektaan toy sarili to tan saray anak da. No bilang ta walay reklamo ya aglelegpeten na sakey a Kristianon ama so pamilya to, nepeg itan ya aralen a maong na saray elder. Nayarin nadispelo so sakey no talagan agto labay a legpeten so pamilya to.

Graben panagkabil. Nayarin grabe lan maong so panagkabil na maruksan asawa ya sengegan lay pansakit na asawa to odino napeligro ni ingen so bilay to. No say mangakabil ya asawa et Tasi, nepeg ya amtaen na saray elder no kasin tua so reklamo. Say pinasyan sanok tan panagkabil et sakey a basiyan na pakadispelo.​—Galacia 5:19-21.

Nipepeligro lan maong so espiritualidad. Nayarin say sakey et agla ontutundan manggagaway paraan pian agla makapibiang ed tuan panagdayew so asawa to odino paskaren to ni ingen ya agto la unoren so ganggan na Dios. Diad onian situasyon, mandesisyon so asawa ya napepeligroy espiritualidad to no kasin say legal a pisian so alenleneg a paraan pian ‘naunor to so Dios bilang manuley imbes a saray totoo.’​—Gawa 5:29.

Diad arum nin graben situasyon a singa saraya, anggapoy nepeg a mansugsog odino manpilit ed inosentin asawa a misian odino andi. Anggaman makapangiter na tulong tan Makasulatan a simbawa iray maespiritual a kakaaro tan elder, agda amta so amin a detalye ed situasyon na sanasawa. Si Jehova labat so makaamta ed satan. Siempre, say sakey a Kristianon asawan bii et agto papagalangan so Dios tan say uksoyan na panangasawa no pasobraan to so inkagrabe na problema ran sanasawa pian labat makapisian. Amta nen Jehova no makasarili so motibo to kanian misisian ed asawa to, anggan iyamot to ni itan. Tandaan, “amin a bengatla et mapatpatnag tan sankanengneng na samay sakey a walaan itayoy eebatan.” (Hebreo 4:13) Balet no talagan grabe lay situasyon, anggapoy nepeg a mankritiko ed sakey a Kristiano a nandesisyon a misian no satan lay ultimon solusyon. Diad kaunoran, “amin tayo et onarap ed panangukoman na Dios.”​—Roma 14:10-12.