LEKSION 6

Antoy Pag-asa na Saray Inatey?

1. Antoy maong a balita ya nagawa ed saray inatey?

Si Lazaro a binilay lamet et inabet na agagi ton si Marta tan Maria

Nen akasabi si Jesus ed Betania ya asingger ed Jerusalem, apatiran agew lan inatey so kaaro ton si Lazaro. Linma si Jesus ed angiponponan ed si Lazaro, kaiba to ray agagi nen Lazaro ya si Marta tan Maria. Tinumbok ira na dakel a totoo. Kasin naimadyin moy liket nen Marta tan Maria, nen binilay nen Jesus si Lazaro?—Basaen so Juan 11:21-24, 38-44.

Amta la nen Marta so maong a balita ya nagawa ed saray inaatey. Amta to ya bilayen nen Jehova iray inaatey pian manbilay lamet diad dalin.—Basaen so Job 14:14, 15.

2. Antoy nagawa ed sakey ya too no inatey la?

Sanen pinalsay Adan, tan sanen inatey — Imbaga na Dios ed si Adan: “Lapud dabok ka, ompawil ka ed dabok.”—GENESIS 3:19.

Say too et gawa ed dabok. (Genesis 2:7; 3:19) No ompatey tayo, anggapoy imortal ya kamarerwa ya onekal ed laman tayo. Pati say utek tayo et ompatey tan naandi ya amin so karga na nonot tayo. Kanian nen binilay si Lazaro, anggapoy inistorya ton agawa ed sikato nen inatey, ta anggapo lay amta na inatey.—Basaen so Salmo 146:4; Eclesiastes 9:5, 6, 10.

Kasin paparusaan na Dios ed apoy iray inaatey? Ibabaga na Biblia ya anggapo lay amta na inatey, kanian malinew ya say doktrinan impierno et aliwan tua tan dederalen toy reputasyon na Dios. Diad tua et kabusol to so ideyan parusaan so totoo ed apoy.—Basaen so Jeremias 7:31.

Bantayan so video ya Anto so Kipapasen na Saray Inatey?

3. Kasin sarag tayo nin nakatongtong so inatey?

Agla makasalita tan agla makarengel iray inatey. (Salmo 115:17) Pero wala ray mauges ya anghel ya manpapanggap ya sikara imay inatey, insan ira mitongtong ed totoo. (2 Pedro 2:4) Ibabawal nen Jehova ya mitongtong tayod inatey.—Basaen so Deuteronomio 18:10, 11.

4. Siopa ray bilayen?

Say toon binilay lamet diad Paraiso et naaralan toy nipaakar ed Dios. Insan ontulong ed pambangat ed arum met ya inmolid bilay.

Minilyon ya inatey a totoo so napaoli o bilayen diad dalin. Wala met iray ombilay ya agda akabat so tuan Dios, tan wala met iray akagawa na mauges.—Basaen so Lucas 23:43; Gawa 24:15.

Saramay bilayen et bangatan tungkol ed Dios, ibangat met ira no panon dan unoren si Jesus tan ipanengneng dan manisia irad sikato. (Apocalipsis 20:11-13) Manbilay ya anggapoy anggaan diad dalin iray napaoli no manggawa ira na maong.—Basaen so Juan 5:28, 29.

5. Lapud walay pag-asa na saray inatey, antoy naaralan mon kualidad nen Jehova?

Nagmaliw ya posible so pag-asa ya ombilay iray inatey nen imbaki na Dios so Anak to ya ompatey parad sikatayo. Ipapanengneng na saya ya si Jehova et maaro tan agnaparaan so kaabigan to. No bilayen iray inatey, siopa so labalabay mon nanengneng?—Basaen so Juan 3:16; Roma 6:23.

Parad kaaruman ya impormasyon, nengnengen so kapitulo 6, 7, tan 10 na libron Anto so Peteg ya Ibabangat na Biblia?