LEKSION 11
Panon ya Makatulong ed Sika Iray Prinsipyo na Biblia?
1. Akin ya kaukolan tayoy giya?
Panon ya makatulong iray prinsipyo na Biblia pian naprotektaan so bilay tayo tan say bilay na arum?—SALMO 36:9.
Mas marunong so Dios nen say sikatayo. Inar-aro to tayo tan iisipen toy pankaabigan tayo. Agtayo ginawa na Dios ya manbilay ya anggapoy panangigiya to. (Jeremias 10:23) Singa sakey ya ugaw ya kaukolan toy panangigiya na atateng to, kaukolan tayon amin so panangigiya na Dios. (Isaias 48:17, 18) Saray prinsipyo na Biblia et regalo na Dios bilang giya tayo.—Basaen so 2 Timoteo 3:16.
Ibabangat tayo na ganggan tan prinsipyo nen Jehova pian magmaliw tayon maliket natan tan no panon tayon naawat iray bendisyon ed arapen ya anggapoy anggaan. Lapud say Dios so nanggawa ed sikatayo, nepeg ya tumboken tayoy panangigiya to.—Basaen so Salmo 19:7, 11; Apocalipsis 4:11.
2. Anto so labay ya ibaga na prinsipyo?
Saray prinsipyo na Biblia et manuna iran katuaan. Saray ganggan balet et parad saray espisipikon situasyon. (Deuteronomio 22:8) Pian natalosan tayo no panon ya usaren so sakey ya prinsipyo ed sakey ya situasyon, kaukolan tayoy mannonot. (Proverbio 2:10-12) Alimbawa, ibabangat na Biblia ya say bilay et regalo na Dios. No iisipen tayo itan ya prinsipyo, magmaliw tayon maalwar tan maasikaso ed bilay tayo tan ed bilay na arum pian naiwasan so aksidente no walad abung, biahe, o trabaho.—Basaen so Gawa 17:28.
3. Anton duaran prinsipyo so sankaimportantian?
Imbagan mismo nen Jesus so duaran sankaimportantian ya prinsipyo. Ipapaamta na unonan prinsipyo so gagala na bilay—kabaten, aroen, tan matoor ya panlingkoran so Dios. Kaukolan tayon nonoten iyan unonan prinsipyo diad amin ya desisyon tayo. (Proverbio 3:6) No unoren tayo iyan prinsipyo, magmaliw tayon kaaro na Dios, nalikna tayoy tuan liket, tan manbilay tayo ya anggapoy anggaan.—Basaen so Mateo 22:36-38.
Say komaduan prinsipyo so giya tayo pian maong so relasyon tayod arum. (1 Corinto 13:4-7) Pian natumbok itan, importante ya aligen tayoy panagtrato na Dios ed totoo.—Basaen so Mateo 7:12; 22:39, 40.
4. Antoy nitulong ed sikatayo na saray prinsipyo na Biblia?
Makatulong iray prinsipyo na Biblia pian manaaroan tan mankakasakey so pamilya. (Colosas 3:12-14) Proprotektaan met na Salitay Dios iray pamilya lapud sakey nin prinsipyo—nepeg ya permanente so panangasawa.—Basaen so Genesis 2:24.
No unoren tayoy bangat na Biblia, naprotektaan tayoy materyal tan emosyonal ya pankamaongan tayo. Alimbawa, mas labay na saray amo iray empleyadon makuli, aliwan matila, tan maunor ed saray prinsipyo na Biblia. (Proverbio 10:4, 26; Hebreo 13:18) Ibabangat met ed sikatayo na Salita na Dios ya mankontento tayo ed no anton talaga so kaukolan ed bilay, tan mas aroen tayoy Dios nen saray materyal ya bagay.—Basaen so Mateo 6:24, 25, 33; 1 Timoteo 6:8-10.
Naprotektaan met so laman tayo no iyaplika tayo ray prinsipyo na Biblia. (Proverbio 14:30; 22:24, 25) Singa bilang, naiwasan iray graben sakit tan aksidente no unoren tayoy ganggan na Dios ed iyinum na alak. (Proverbio 23:20) Agmet ibabawal nen Jehova so iyinum na alak, basta aliwan sobra. (Salmo 104:15; 1 Corinto 6:10) Ontan met, no iyaplika tayo ray prinsipyo na Biblia, aliwan saray gagawaen tayo labat so naaralan tayon asikasoen, anggan saray iisipen tayo. (Salmo 119:97-100) Tua, uunoren na saray tuan Kristiano iray estandarte na Dios lapud makatulong iratan. Balet, manunan uunoren da iratan lapud labay dan igalang si Jehova.—Basaen so Mateo 5:14-16.