Say Insipan ya Ugaw

Nansiansia si Jose tan Maria ed Betlehem imbes ya ompawil ed Nazaret. Nen komawalon agew nen Jesus, sikatoy sinegat, base ed Ganggan na Dios ed Israel. (Levitico 12:2, 3) Diad saman da met kaslakan ya ngangaranan so sakey ya ugaw a laki. Say inngaran dad anak da et Jesus, unong ya imbaga nen anghel Gabriel.

Masulok lan sakey bulan so linmabas, tan 40 agew la nen Jesus. Iner so pangawitan ed sikato na atateng to? Diad templo ed Jerusalem, ya pigaran kilometro so kaarawi to ed panaayaman da. Based ganggan, kalabas na 40 agew manlapud pananak na sakey ya ina et kaukolan toy mangiyakar ed templo na apay parad panaglinis.​—Levitico 12:4-8.

Ontan so ginawa nen Maria. Sikatoy angawit na duaran angkelag ya ontitikyab a manok bilang apay. Makala tayoy ideya ed saya no antoy kipapasen na panagbilay nen Jose tan Maria. Base ed Ganggan, sakey a kilaw a kalakian a karnero tan sakey a sibong a malapati so nepeg ya iyapay. Balet no agnayarian na ina so mangiyapay na kalakian a karnero, naabuloyan a mangiyapay na duaran sibong a malapati odino duaran palekpek. Ontan so situasyon nen Maria, kanian ontan so inyapay to.

Diad templo, inmasingger so sakey ya masiken ed si Jose tan Maria. Say ngaran to et Simeon. Impaamta na Dios ed sikaton antis ya ompatey, nanengneng toy insipan nen Jehova ya Kristo, odino Mesias. Diad sayan agew et inggiya na masanton espiritu si Simeon diad templo, tan anengneng tod man si Jose tan Maria kaibay melag nin anak da. Inala nen Simeon so ugaw tan ineba to.

Legan ton sankaeba si Jesus, akisalamat ed Dios, ya inkuan to: “Soberanon Katawan, aabuloyan mo la natan so aripen mo ya ompatey a mareen unong ed imbagam, lapud anengneng ko lan mismo so usaren mon mangiliktar ya intaryam ed arapan na amin a totoo, sakey a liwawa a mangekal na sakbong ed saray nasyon tan kigloriaan na totoom ya Israel.”​—Lucas 2:29-32.

Mandinayew si Jose tan Maria ed sayan arengel da. Benendisyonan ira nen Simeon tan imbaga tod si Maria ya say ugaw et “pansengegan na pakatumba tan ibangon lamet na dakel a totoo ed Israel” tan say ermen, ya singa makdem ya espada et nalikna nen Maria.​—Lucas 2:34.

Walay sakey nin wadman ed saman ya agew. Si Ana, 84 años ya propetesa. Sikatoy lanang ya wadman ed templo. Diad saman ya oras, inasinggeran toy Jose, Maria, tan say ugaw nin Jesus. Akisalamat si Ana ed Dios tan inistorya toy nipaakar ed si Jesus diad amin ya ondengel.

Isip mo pa labat so liket nen Jose tan Maria ed saraman ya agawa ed templo! Seguradon mas akombinse ira ya say anak da so Insipan na Dios.