Abilay so Ugaw ya Bii!

Anengneng nen Jairo ya pinaabig nen Jesus so biin manpaparala. Seguradon natulongan met nen Jesus so anak to, anggano amta nen Jairo ya ‘nayarin inatey la so anak ton bii.’ (Mateo 9:18) Wala ni kasi nagawaan?

Legan ya kakatongtongen nen Jesus imay biin pinaabig to, wala ray sinmabin lalaki ya nanlapud abung nen Jairo tan inkuan da: “Inatey lay anak mo! Akin et abalaen mo ni so Managbangat?”​—Marcos 5:35.

Talagan makapaermen iman! Si Jairo ya rerespetoen a maong ed lugar da et anggapoy nagawaan to. Inatey so saksakey ya anak to. Balet nen nadngel iman nen Jesus, nilingaw toy Jairo tan pinaseseg to: “Agka natatakot, ipatnag mo labat so pananisiam.”​—Marcos 5:36.

Akilay Jesus ed abung nen Jairo. Asabian dad man so agulo ya totoo. Manak-akis tan manugaog ira lapud graben ermen. Linmoob si Jesus tan oniay makapabiglan imbaga to: “Ag-inatey so ugaw noagta nanaugip labat.” (Marcos 5:39) Nen nadngel na totoo iya, inelekan day Jesus. Amta dan inatey la may ugaw. Balet diad panamegley na pakapanyari ya inter na Dios, ipanengneng nen Jesus ya posiblin nabilay lamet iray inaatey a singa pamangon ed sakey ya naugip.

Pinapaway nen Jesus iray totoo nilikud ed si Pedro, Santiago, tan Juan, tan say atateng na ugaw. Impila to ra ed akarukolan na ugaw. Binembenan toy lima na ugaw, tan inkuan to: “‘Talitha cumi,’ a no ipatalos et mankabaliksay: ‘Ugaw a bii, bangon ka!’” (Marcos 5:41) Tampol ya binmangon tan nanakar so ugaw. Imadyin mo pay agaylan liket nen Jairo tan say asawa to! Pian napaneknekan ya talagan mabilay so ugaw, imbaga to ya pakanen da.

Diad apalabas, binagaan nen Jesus iramay pinaabig to ya agda iyiistoryad arum so ginawa tod sikara, tan ontan met so imbaga tod atateng na ugaw. Balet, imbalita itan na malikeliket ya atateng to tan arum ni diad “saman ya interon lugar.” (Mateo 9:26) Eksayted ka met kasin mangibalita no nanengneng mon napaoli lad bilay iray inad-arom? Saya so komaduan impamaoli nen Jesus.