Say “Kioli tan say Bilay”

Manlapud Perea et sinmabi Jesus diad ketegan na Betania, sakey a baryo a manga taloran kilometro ed bukig na Jerusalem. Maneermen ed saman so agagi nen Lazaro a si Maria tan Marta lapud impatey na agi ra. Dakel so linman nanligliwa ed sikara.

Insan walay angibagad si Marta a nitan lay Jesus, kanian nanapuran angabet ed sikato. Imbaga nen Marta ed si Jesus no antoy apat agew da lan nononoten nen agi to: “Katawan, no wadia ka labat, agkomon inatey so agik.” Agto labay ya ibagan anggapoy ilalo nen Marta. Inkuan to, “Amtak ya anggan antoy kerewen mod Dios et iter iratan ed sika na Dios.” (Juan 11:21, 22) Pakalikna to et nayarian ni nen Jesus a tulongan so agi to.

Inmebat si Jesus: “Say agim et onoli.” Inisip nen Marta a say tutukoyen nen Jesus et say kioli ed dalin diad arapen, say ilalo nen Abraham tan arum nin inaatey. Tan panisiaan to a seguradon nagawa iya: “Amtak a sikatoy onoli diad kaunoran ya agew.”​—Juan 11:23, 24.

Balet diad saman a bekta et sarag a paolien nen Jesus so agi ra. Impanonot tod si Marta a sikatoy inikdan na Dios na pakayari ed patey, ya inkuan to: “Say mangipapanengneng na pananisia ed siak, anggano ompatey et ombilay lamet; tan balang sakey a mabilay tan mangipapanengneng na pananisia ed siak et aglan balot ompatey.”​—Juan 11:25, 26.

Aglabay ya ibaga nen Jesus ya aglan balot ompatey iray disipulo to. Anggan sikato et kaukolan ya ompatey, a singa imbaga tod saray apostol to. (Mateo 16:21; 17:22, 23) Idadanet nen Jesus a say pangipanengneng na pananisia ed sikato et manresultad andi-anggaan a bilay. Parad dakel, naawat da itan sano napaoli ira. Balet, saray matoor a manbibilay ed anggaan na sayan mundo et nayarin agda la natawayay patey. Antokaman so nagawa, amin a mangipapanengneng na pananisia ed sikato et seguradon manbilay ya andi-anggaan.

Balet apat agew lan inatey si Lazaro, kanian sarag kasin paolien nen Jesus, ya angibagan, “Siak so kioli tan say bilay”? Tinepetan nen Jesus si Marta: “Manisia kad saya?” Inyebat to: “On, Katawan, manisia ak a sika so Kristo ya Anak na Dios, samay onsabi ed mundo.” Lapud pananisia nen Marta a walay gawaen nen Jesus ed saman ya agew, sikatoy nanapuran sinmempet tan imbaga tod agi to: “Wadia lay Managbangat tan patatawag to ka.” (Juan 11:25-28) Tampol ya tinmaynan ed abung si Maria, insan tinmumbok met so arum, ta inisip dan say laen to et diad lubok nen Lazaro.

Balet, si Jesus so nila nen Maria tan nanakis ed salian to, tan inulit to iramay nibaga la na agi to: “Katawan, no wadia ka labat, agkomon inatey so agik.” Sanen anengneng nen Jesus a manakis si Maria tan saray totoo, sikatoy naney-ey, agonigon, tan akaakis. Lapud satan et atenyeg so liknaan na saray onnenengneng. Balet wala ray nantepet: ‘No ayarian nen Jesus ya ilukas so mata na bulag a too, agta nayarian to met komon ya amperen so ipatey nen Lazaro?’​—Juan 11:32, 37.