Matapang tan Matoor si Jonatan

Si Jonatan ya panguloan ya anak nen Arin Saul et matapang ya sundalo. Imbaga nen David ya si Jonatan et mas maples nen say agila tan mas mabiskeg nen say leon. Aminsan, wala ray anengneng nen Jonatan ya sundalo na Filisteo diad palandey. Imbaga tod manag-awit na armas to: ‘Onlusob ta labat no mangiter si Jehova na palatandaan. No ibaga na saray Filisteo ya onasingger tad sikara, aman so palatandaan ya onlusob ta.’ Inyeyag na saray Filisteo: ‘Gali dia, ta manlaban tayo!’ Kanian linma ran dua ed palandey tan tinalo da so 20 ya sundalo.

Lapud panguloan ya anak nen Saul si Jonatan, sikato komon so onsublay ya ari. Balet amta nen Jonatan ya si David so pinili nen Jehova ya onsublay ya ari na Israel. Pero agnanselos si Jonatan. Nagmaliw ya malet a sankaaro si Jonatan tan David. Im-promise da ya protektaan day sakey tan sakey. Inter nen Jonatan ed si David so ilalatop ya kawes to, pati say espada, pana, tan balkes to bilang palatandaan ya sankaaro ira.

Nen tinmakas si David lapud labay ya pateyen nen Arin Saul, linmad sikato si Jonatan tan imbaga to: ‘Pabiskeg moy liknaan mo, agka natatakot. Sikay pinili nen Jehova ya magmaliw ya ari. Amta itan nen amak.’ Labay moy nawalaan na maong ya kaaro ya singa si Jonatan?

Aminpiga ya impeligro nen Jonatan so bilay to pian tulongan so kaaro to. Amta to ya labay ya pateyen nen Arin Saul si David, kanian imbaga tod ama to: ‘Mankasalanan kayo no pateyen yoy David, ta anggapoy ginawa ton mauges.’ Nampasnokan ya maong nen Saul si Jonatan.

Kalabas na pigaran taon, inatey ed guerra si Saul tan Jonatan. Nen inatey lay Jonatan, inanap nen David so anak nen Jonatan ya si Mefiboset. Nen aromog nen David si Mefiboset, imbaga to: ‘Sankaaro kami nen tatay mo tan maomaong ed siak, kanian agka mapaga ta manlapu lad natan, asikasoen ta ka. Manayam kad palasyok tan mangan kad lamisaan ko.’ Agbalot nilingwanan nen David so kaaro ton si Jonatan.