Prinotektaan na Anghel nen Jehova si Hezekias

Asakop la na Empiryo na Asirya so samploran tribu ya panarian na Israel. Labay nen Senakerib ya ari na Asirya ya isublay ya sakopen so duaran tribu ya panarian na Juda. Sansakey ton sasakopen iray syudad ed Juda. Balet say syudad ya labalabay ton nasakop et say Jerusalem. Ag-amta balet nen Senakerib ya proprotektaan nen Jehova so Jerusalem.

Si Hezekias ya ari na Juda et angiter na dakdakel ya kuarta ed si Senakerib pian agto la lusoben so Jerusalem. Inala nen Senakerib so kuarta, pero linmusob nin siansia kaiba toy dakdakel ya sundalo to. Natatakot ya maong iray totoo ed syudad ta manasingger la ray Asiryano. Balet imbaga nen Hezekias ed totoo: ‘Agkayo natatakot. Mabiskeg iray Asiryano, balet gawaen itayo nen Jehova ya mas mabiskeg nen say sikara.’

Imbaki nen Senakerib so mensahero to, say Rabsases, ya onlad Jerusalem pian kantiawan iray totoo. Inmalagey so Rabsases ed paway na syudad tan inyeyag to: ‘Agkayo natulongan nen Jehova. Agyo papanisiaan si Hezekias. Anggapoy dios ya sarag to kayon iligtas ed sikami.’

Nampikasi si Hezekias ed si Jehova pian amtaen no antoy gawaen to. Imbaga nen Jehova: ‘Agka natatakot ed saray imbaga na Rabsases. Agnasakop nen Senakerib so Jerusalem.’ Insan, akaawat na sulat si Hezekias ya nanlapud si Senakerib, ya say kuan to: ‘Suko ka la. Agto ka sarag ya iligtas nen Jehova.’ Nampikasi lamet si Hezekias: ‘Jehova, ipangasim, iligtas mo kami, pian naamtaan na amin ya sika labat so saksakey ya tuan Dios.’ Imbaga nen Jehova ed sikato: ‘Agmakaloob so ari na Asirya ed Jerusalem. Protektaan koy syudad ko.’

Maniseguro lay Senakerib ya nasakop toy Jerusalem. Balet sakey ya labi, imbaki nen Jehova so anghel to ed nankampoan na saray sundalon Asiryano diad paway na syudad. Pinatey na anghel so 185,000 ya sundalo! Naupot so amin ya mabisbiskeg ya sundalo nen Arin Senakerib. Atalo kanian sinmempet la. Ginawa nen Jehova so im-promise to ya protektaan toy Hezekias tan say Jerusalem. No wadman kad Jerusalem ed saman, mantiwala ka kasi ed si Jehova?