Ag-ira Tinmalimukor

Kalabas na panaon manlapu nen akugip nen Arin Nabucodonosor imay estatua, sikatoy nampagawa na baleg ya balitok ya imahen. Impaalagey to itan ed patar na Dura tan impatawag to iray atagey ya opisyal ed Babilonia, kaibay Sadrac, Mesac, tan Abednego pian mantitipon ed arap na imahen. Insan ingganggan na ari: ‘No narengel yoy tanol na trumpeta, arpa, tan arum ni ran panagtogtog, talimukor kayon tampol ed estatua! Say ag-ontalimukor et ibuntok ed mandarlang ya hurno.’ Ontalimukor kasi ed estatua so taloran Hebreo, odino si Jehova labat so dayewen da?

Insan ingganggan la na ari ya patogtogen so musika. Tinmalimukor iran amin tan nandayew irad estatua puera labat si Sadrac, Mesac, tan Abednego. Wala ray akanengneng ed sikara tan indalem da rad ari: ‘Aramay taloran Hebreo, agda labay so mandayew ed estatua ya ginawam.’ Impatawag ira nen Nabucodonosor tan imbaga to: ‘Ikdan ta kayo na sakey nin pagkakataon ya mandayew ed estatua. No agkayo ontalimukor, ibuntok ta kayo ed hurno. Anggapoy dios ya sarag to kayon iligtas.’ Imbaga da: ‘Agmi la kaukolan so sakey nin pagkakataon. Sarag kamin iligtas na Dios mi. Balet anggano agto kami iligtas, O ari, agkami mandayew ed estatua ya ginawam.’

Nampasnok si Nabucodonosor. Imbaga tod saray bataan to: ‘Papetang yoy hurno ya maminpito nen samay dati!’ Insan to ingganggan iray sundalo to: ‘Taker yo irayan lalaki, tan ibuntok yo rad hurno!’ Lapud ampetapetang so hurno, inatey ya tampol iray sundalo nen akaasingger ira ditan. Nibuntok ed apoy so taloran Hebreo. Balet nen ninengneng nen Nabucodonosor so hurno, walay apatiran lalaki ya manaakar ed apoy, aliwan talora. Ataktakot so ari kanian tinepetan to ray opisyal to: ‘Di ba, talora labat ya lalaki so imbuntok tayod apoy? Akin et apatiray nanenengneng ko ey? Singa anghel imay sakey!’

Inmasingger si Nabucodonosor ed puerta na hurno tan inyeyag to: ‘Paway kayo, sikayo ran lingkor na Sankatagyan ya Dios!’ Mankelaw so amin ya akanengneng ed si Sadrac, Mesac, tan Abednego legan iran ompapaway ed hurno, ta anggapoy agawad sikara. Ag-apoolan so laman, buek, tan kawes da, tan aliwa ni ingen ya maasyot so angob da.

Imbaga nen Nabucodonosor: ‘Talagan makapanyari so Dios nen Sadrac, Mesac, tan Abednego. Angibaki na anghel to pian iligtas ira. Anggapo so dios ya makapipara ed Dios da.’

Sika ey, labay mon aligen so taloran Hebreo? Si Jehova labat kasi so dayewen mo anggan antoy nagawa?