Binmisita si Gabriel ed si Maria

Walay marikit ya kanayon nen Elizabet ya tagad syudad na Nazaret diad Galilea. Say ngaran to et Maria. Si Maria et akisipan lan mikasal ed si Jose ya karpentero. Nen anem bulan lan malukon si Elizabet, nampanengneng si anghel Gabriel ed si Maria. Imbaga to: ‘Maabig ya agew, Maria. Pinaboran kan maong nen Jehova.’ Ag-atalosan nen Maria no antoy labay ya ibaga nen Gabriel. Kanian imbaga nen Gabriel: ‘Manlukon ka tan mangiyanak ka na laki, tan say ingaran mod sikato et Jesus. Sikatoy magmaliw ya Ari tan anggapoy anggaan na Panarian to.’

Imbaga nen Maria: ‘Panon ak ya manlukon, ta agak akiakdol ed siopaman ya laki?’ Imbaga nen Gabriel: ‘Anggapoy imposible ed si Jehova. Usaren na Dios so masanton espiritu to kanian manlukon ka. Say kanayon mon si Elizabet et nanlukon met anggano akulaw la.’ Insan imbaga nen Maria: ‘Siak so biin aripen nen Jehova. Nagawa komon ed siak tay imbagam.’

Linma si Maria ed syudad ya panaayaman di Elizabet diad lugar ya mapalandey. Nen imbano nen Maria si Elizabet, alikas nen Elizabet ya ginmalaw so baby ed eges to. Lapud akaawat na masanton espiritu si Elizabet, imbaga to: ‘Maria, benendisyonan kan maong nen Jehova. Kagalangan ko ya pinasyar ak na ina na Katawan ko.’ Imbaga nen Maria: ‘Idaydayew koy Jehova diad interon pusok.’ Taloy bulan ya nanayam si Maria ed abung di Elizabet, insan la sinmempet ed Nazaret.

Nen naamtaan nen Jose ya malukon si Maria, agto la labay ya pakasalan. Balet walay anghel ya nampanengneng ed sikato diad kugip to. Imbaga na anghel: ‘Jose, agka natatakot ya pakasalan si Maria. Anggapoy ginawa ton mauges.’ Kanian pinakasalan nen Jose si Maria tan inawit to lad abung to.