Prinotektaan nen Jehova si Jesus

Diad sakey ya lugar ed bandad bukig na Israel, manisia iray totoo ya sarag iran igiya na saray bitewen. Sakey ya labi, wala ray lalakin tagad Bukig ya akanengneng na singa maliwliwawan bitewen diad tawen. Onaalis-alis itan kanian tinumbok da, ya anggad akasabi rad Jerusalem. Ditan et nantepet-tepet irad totoo: ‘Kulaan to may ugaw ya magmaliw ya ari na saray Judio? Linma kami dia pian sikatoy igalang mi.’

Nen naamtaan nen Herodes ya ari na Jerusalem so tungkol ed ugaw ya magmaliw ya balon ari, aburidon maong. Tinepetan to ray manunan saserdote: ‘Iner so pangiyanakan ed sayan ari?’ Imbaga dad sikato: ‘Imbaga na saray propeta ya sikatoy iyanak ed Betlehem.’ Kanian impatawag nen Herodes iray lalakin tagad Bukig tan imbaga tod sikara: ‘La kayod Betlehem tan anap yo yan ugaw. Insan kayo ompawil dia tan ibaga yod siak no iner so kulaan to ta labay ko met ya igalang.’ Balet, mantitila si Herodes.

Inmalis lamet imay “bitewen.” Tinumbok da itan anggad Betlehem. Insan tinmunda ed petek na sakey ya abung. Linmoob ira tan anengneng day Jesus kaiba toy ina to ya si Maria. Tinmalimukor ira ed arap na ugaw tan inikdan day regalo ya balitok, olibano, tan mira. Si Jehova kasi so angibaki ed sarayan lalaki pian anapey Jesus? Andi.

Diad saman ya labi, imbaga nen Jehova ed si Jose diad sakey a kugip: ‘Labay ya pateyen nen Herodes si Jesus. Awit mod Ehipto si Maria tan say ugaw. Diman kayo ni manayam anggad ibagak ed sika ya sarag yo lay ompawil.’ Linman tampol ed Ehipto si Jose tan say pamilya to.

Insan imbaga nen Jehova ed saramay lalakin tagad Bukig ya agla ra ompapawil ed si Herodes. Nen naamtaan nen Herodes ya agla ra ompawil, mamapasnok ya maong. Lapud agto naanap si Jesus, ingganggan to ya pateyen so amin ya ugaw a lalaki ed Betlehem ya kataonan nen Jesus. Maong labat ta wala lad Ehipto si Jesus kanian aligtas.

Kalabas na panaon, inatey si Herodes. Imbaga nen Jehova ed si Jose: ‘Sarag yo lay ompawil ta inatey lay Herodes.’ Kanian pinmawil lay Jose, Maria, tan Jesus diad Israel, tan nanayam irad syudad na Nazaret.