Anggapoy Makapan-patunda ed Sikara

Walay lakin lupoy ya inagew-agew ya akayurong diad puerta na templo tan mipapayabol. Sakey ya ngarem, anengneng toy Pedro tan Juan ya paloob ed templo. Imbaga tod sikara: ‘Ikdan yo ak pay kuarta.’ Imbaga nen Pedro: ‘Walay iter kod sika ya mas maong nen say kuarta. Diad ngaran nen Jesus, alagey ka tan akar ka!’ Insan impaalagey nen Pedro so laki tan akaakar la! Malikeliket so dakel ya totoon akanengneng ed sayan milagro kanian dinmakel so nagmaliw ya mananisia.

Balet mamapasnok iray saserdote tan Saduceo. Inerel da ray apostol, inawit da rad Sanhedrin ya korte na saray lider na relihyon, tan tinepetan da ra: ‘Siopay angiter ed sikayo na pakapanyari ya paabigen iyan too?’ Imbaga nen Pedro: ‘Say pakapanyari mi et nanlapud si Jesu-Kristo, amay pinatey yo.’ Inyeyag na saray lider na relihyon: ‘Tundaan yo lan ipulong tay tungkol ed si Jesus!’ Balet imbaga na saray apostol: ‘Andi, agkami nayarin ontunda. Kaukolan min ipulong.’

Nen nibulos lay Pedro tan Juan, linma rad saray arum ya disipulo tan imbalita day agawa. Saniiba iran nampikasi, tan kinerew dad si Jehova: ‘Tulongan mo kami komon ya ag-ontakot pian nituloy mi so pagagawam ed sikami.’ Inikdan ira nen Jehova na masanton espiritu to, tan intuloy day nampulong tan nampaabig na saray mansasakit. Dinmakel lan dinmakel so nagmaliw ya mananisia. Mamapasnok iray Saduceo kanian inerel da lamet iray apostol tan impriso da ra. Balet diad saman ya labi, angibaki si Jehova na anghel ya angilukas ed saray puerta na prisoan tan imbaga tod saray apostol: ‘Pawil kayod templo, tan manbangat kayo diman.’

Diad kaimbuasan to, walay angibalita ed Sanhedrin: ‘Akatalak ni imay prisoan, pero anggapo la diman iramay impriso yo! Wadman irad templo, babangatan da ray totoo!’ Inerel da lamet iray apostol tan inawit da rad Sanhedrin. Imbaga na atagey ya saserdote: ‘Ingganggan mi kayo la ya tundaan yon ipulong so tungkol ed si Jesus!’ Balet inmebat si Pedro: “Nepeg min unoren so Dios bilang manuley imbes a saray totoo.”

Mamapasnok ya maong iray lider na relihyon kanian labay da lan pateyen iray apostol. Balet inmalagey so sakey ya Fariseo ya say ngaran to et Gamaliel tan imbaga to: ‘Mannonot kayon maong! Ompan say Dios so kakalabanen yo, ta nayarin sikato so ontutulong ed sarayan lalaki.’ Inunor day imbaga to. Kayari dan nilewet iray apostol, ingganggan da ra lamet ya tundaan da lay manpulong, insan da la ra imbulos. Balet agtinmunda iray apostol. Ag-ira tinmakot tan intuloy dan impulong so maong ya balita, diad templo tan diad kaabungan.