Apocalipsis ya Inawat nen Juan

Legan ya akapriso si apostol Juan diad isla na Patmos, walay 16 ya pasingawey ya nantutumbokan ya impanengneng nen Jesus ed sikato tungkol ed saray nagawad arapen. Naamtaan ed sarayan pasingawey no panon ya napasanto so ngaran nen Jehova, no panon ya onsabi so Panarian to, tan no panon ya nagawa so linawa to diad dalin a singa diad tawen.

Diad sakey a pasingawey, anengneng nen Juan ya si Jehova et akayurong ed marakdakep ya trono to ed tawen, tan apaliberan na 24 ya mamatatken ya akasulong na amputin kawes tan wala ray balitok a korona ed ulo ra. Wala ray kirmat tan tanol na karol ya manlalapud trono. Akatalimukor so 24 ya mamatatken diad arapan nen Jehova tan mandadayew irad sikato. Diad sakey nin pasingawey, anengneng nen Juan so sakey a baleg ya ulop na totoo ya nanlapud amin ya bansa, lahi, tan lenguahe, tan mandadayew irad si Jehova. Papastolan ira na Kordero ya si Jesus tan iyaakar to rad saray subol na danum na bilay. Insan diad sakey nin pasingawey, anengneng nen Juan ya si Jesus et Ari la tan ginmapo lan manuley ed tawen kaiba iray 24 ya mamatatken. Diad sinmublay ya pasingawey, anengneng nen Juan ya akilaban si Jesus ed dragon ya si Satanas tan ed saray demonyo to. Pinalayas ira nen Jesus ed tawen tan imbantak to ra diad dalin.

Insan walay balibalin anengneng nen Juan. Anengneng to so Kordero tan say 144,000 ya akaalagey diad Palandey Sion. Walay anengneng to met ya anghel ya ontitikyab ed paliber na dalin, ya ibabaga tod totoo ya takotan day Dios tan idayew da.

Diad sinmublay ya pasingawey, anengneng nen Juan ya walay agawan guerra ya say tawag et Armagedon. Diad satan ya guerra, tinalo nen Jesus tan saray sundalo to so mauges ya mundo nen Satanas. Diad sampot ya pasingawey, anengneng nen Juan ya wala lay pankakasakey na amin ya walad tawen tan wadiad dalin. Dineral la nen Jehova si Satanas tan amin ya ilalak nen Satanas. Amin ya walad tawen tan wadiad dalin et mangigagalang ed masanton ngaran nen Jehova, tan sikato labat so dadayewen da.