“Mandayew Kad Dios”

1, 2. (a) Anton isyu so aarapen tayon amin? (b) Antoy imbaga na matoor ya anghel nen sasalien nen Juan ya dayewen?

NEPEG ya ebatan na kada sakey ed sikatayo so sakey ya importantin tepet: Siopa so dayewen ko? Nayarin ibaga na dakel ya mairap iyan isyu tan komplikado ta amayamay so pampilian. Balet diad tua, malinew tan simpli labat so pampilian. Balanglan si Jehova a Dios odino si Satanas a Diablo so dayewen tayo.

² Labalabay nen Satanas ya sikato so dayewen. Lalon apatnagan itan nen tinukso toy Jesus. Singa apantongtongan ed Kapitulo 1 na sayan publikasyon, inopresian nen Satanas si Jesus na baleg ya premyo​—say pakauley ed amin ya panarian ed dalin. Antoy labay na Diablo ya kasalat? “Mandayew kad siak a maminsan,” so imbaga tod si Jesus. (Mat. 4:9) Midumaan imay anghel ya angipasabi na mensahe ed si apostol Juan ta agto labay ya sikatoy dayewen. (Basaen so Apocalipsis 22:8, 9.) Nen sasalien nen Juan ya dayewen so anghel, oniay imbaga na mapaabeban espiritun anak na Dios: “Agmo itan gagawaen!” Imbes ya ibaga ton ‘Mandayew kad siak,’ imbaga na anghel, “Mandayew kad Dios.”

3. (a) Antoy gagala na sayan publikasyon? (b) Anto natan so konsideraen tayo?

³ Say gagala na sayan publikasyon et pian pabiskegen so determinasyon tayon gawaen so imbaga na satan ya anghel—nepeg ya si Jehova labat so dayewen tayo. (Deu. 10:20; Mat. 4:10) Repasoen tayon magano iray naaralan tayo nipaakar ed dugan panagdayew diad saray propesiya tan pasingawey ya anengneng nen Ezequiel. Insan, diad tulong na Kasulatan, onnengneng itayo ed arapen sano amin ya too ed dalin et onarap ed unor a subok—say subok ya pakaamtaan no siopa so manbilay tan makanengneng ed permanentin kipawil na dugan panagdayew ed si Jehova.

Taloran Tema ya Indanet ed Libro na Ezequiel

4. Anto ray taloran tema ya indanet ed libro na Ezequiel?

⁴ Ibabangat ed sikatayo na libro na Ezequiel ya say dugan panagdayew et aliwa labat ya basta pormalidad. Kakaukolanen na satan ya (1) si Jehova labat so dayewen tayo, (2) mansiansia tayon nankakasakey ed malinis a panagdayew, tan (3) ipanengneng tayoy panangaro ed arum. Konsideraen tayo no panon ya sarayan taloran tema et nidanet ed saray propesiya tan pasingawey ya apantongtongan ed sayan publikasyon.

Unonan tema: Si Jehova labat so dayewen

5-9. Anto la ray naaralan tayo nipaakar ed pangiter ed si Jehova na dayew a kanepegan to?

⁵ Kapitulo 3:a Diad samay makapadinayew a pasingawey ya si Jehova et apaliberan na rainbow tan akalugan ed tagey na saray mabiskeg ya espiritun pinalsa, naaralan tayo so sakey ya importantin katuaan—say Makapanyarin-amin ya Dios labat so makanepegan ed panagdayew tayo.​—Eze. 1:4, 15-28.

⁶ Kapitulo 5: Agaylan makapabigla ya nanengneng ed pasingawey ya adutakan so templo nen Jehova! Ipapaimano na pasingawey ya anggapoy akaamot ed si Jehova. Nanenengneng to iray ag-inkamatoor ya gagawaen na saray totoo to anggano ag-iratan nanengneng na arum ya too, singa nen nandayew irad saray idolo. Sikatoy nasasakitan lapud saratan ya gagawaen da tan dudusaen to iray manggagawad saratan.​—Eze. 8:1-18.

⁷ Kapitulo 7: Saray panangukom ed saray akapaliber a nasyon ya ‘nanludlurey’ ed Israel et prueba ya dudusaen nen Jehova iramay mauges so impantrato dad saray totoo to. (Eze. 25:6) Balet wala met so naaralan tayo ed impiulop na Israel ed saratan a nasyon​—nepeg ya si Jehova so manunan panmatooran tayo. Agtayon balot iyaabeba iray estandarte tayo pian mibagay ed saray kakanayon tayo ya agmandadayew ed si Jehova; tan agtayo manmatalek ed kayamanan odino ikompromiso so neutralidad tayo diad pangiter tayoy suporta ed gobierno na too ta si Jehova labat so nepeg ya dapagan tayo.

⁸ Kapitulo 13 tan 14: Diad samay pasingawey nipaakar ed templo ya walad atagtagey a palandey, naaralan tayo ya nepeg tayoy manbilay base ed saray atagey ya estandarte nen Jehova, ya bibidbiren tayo ya sikatoy mas atagey nen say amin nin dirios.​—Eze. 40:1–48:35.

⁹ Kapitulo 15: Say deskripsion na propesiya nipaakar ed Israel tan Juda ya singa ra paabang a bibii et mangipanonot ed sikatayo ya makapadimla ed si Jehova so espiritual a pikakalugoran.​—Eze., kap. 16, 23.

Komaduan tema: Mansiansian nankakasakey ed malinis a panagdayew

10-14. Panon a nidanet ya kaukolan tayoy mansiansian nankakasakey ed malinis a panagdayew?

¹⁰ Kapitulo 8: Saray propesiya ya mangipropromisan patalindegen nen Jehova so “sakey a managpastol” ya mangasikaso ed saray totoo To et mangidadanet ya kaukolan tayoy mankimey a nankakasakey tan walaay kareenan diad panangidaulo nen Jesus.​—Eze. 34:23, 24; 37:24-28.

¹¹ Kapitulo 9: Saray propesiya nen Ezequiel nipaakar ed kibulos na totoo na Dios ed impakaaripen dad Babilonia tan kipawil dad dalin da et walaan na mensahe parad saramay labay dan napaliket si Jehova. Saray tuan mandadayew ed si Jehova et nepeg ya onarawi tan mansiansian arawi ed makapuy ya impluensya na palson relihyon. Anggano nanlapu tayod nanduruman relihyon, kabibilay, tan kultura, nepeg tayon pansiansiaen so pankakasakey ya pakabidbiran ya sikatayo so totoo na Dios.​—Eze. 11:17, 18; 12:24; Juan 17:20-23.

¹² Kapitulo 10: Nidanet so tema na pankakasakey diad pasingawey nipaakar ed imbilay na amagaan a pukepukel. Baleg so pribilehyo tayon nakaiba ed nipawil a grupo na saray alinisan a mandadayew ed Dios ya nankakasakey a mankikimey bilang armada!—Eze. 37:1-14.

¹³ Kapitulo 12: Lalon nidanet so pankakasakey diad samay propesiya nipaakar ed impankasakey na duaran bislak. Talagan makapabiskeg na pananisia ya nanengneng tayon susumpalen na saray alanaan tan na arum a karnero itan ya propesiya! Anggano manbibilay tayod mundon naapag na pambubusolan ed relihyon tan politika, mansiasiansia tayon nankakasakey lapud panangaro tan katooran.​—Eze. 37:15-23.

¹⁴ Kapitulo 16: Say pasingawey nipaakar ed lakin de-awit na panagkargaay tinta tan saray lalakin de-awit na armas ya panagmekmek et mangiiter na seryoson pasakbay​—saraman labat so kabiangan lad dugan panagdayew ed si Jehova no onggapo lay “baleg a kairapan” so namarkaan parad kililiktar.​—Mat. 24:21; Eze. 9:1-11.

Komatlon tema: Ipanengneng so panangaro ed arum

15-18. Akin et nepeg tayon itultuloy ya ipanengneng so panangaro, tan panon tayon nagawaan itan?

¹⁵ Kapitulo 4: Naaralan tayod pasingawey nipaakar ed apatiran mabilay a pinalsa iray kualidad nen Jehova, ya say manuna et panangaro. No mansasalita tan onkikiwas tayo diad maaron paraan, papaneknekan tayo ya si Jehova so Dios tayo.​—Eze. 1:5-14; 1 Juan 4:8.

¹⁶ Kapitulo 6 tan 11: Lapud panangaro na Dios, sikatoy anuro na saray managbantay a singa si Ezequiel. Say Dios et aro, kanian agto labay a walay naderal no panganggaen to la so uley nen Satanas diad dalin. (2 Ped. 3:9) Pribilehyo tayon ipatnag met so panangaro na Dios diad panumpal tayod responsabilidad tayon suportaan so kimey na managbantay ed panaon tayo.​—Eze. 33:1-9.

¹⁷ Kapitulo 17 tan 18: Amta nen Jehova ya dakel so agmalabay ya mangawat ed panangasi to tan salien dan upoten iray matoor ya mandadayew ed sikato. Say panangaro so mamakiwas ed si Jehova ya protektaan iray matoor a totoo to no atakien ira nen “Gog ed dalin na Magog.” Say panangaro so mamakiwas ed sikatayon pasakbayan so dakel a totoo anggad posible ya deralen nen Jehova iray mamapairap ed totoo to.​—Eze. 38:1–39:20; 2 Tes. 1:6, 7.

¹⁸ Kapitulo 19, 20, tan 21: Say panangaro nen Jehova ed saray totoo et mapatpatnag ed pasingawey nipaakar ed onaagus ya danum a mangiiter na bilay tan samay nipaakar ed impangapag ed dalin. Idedeskribe na sarayan pasingawey iray resulta na sankabalegan ya impangipanengneng nen Jehova na panangaro to, say impangiter tod bilay na Anak to pian naperdona iray kasalanan tayo tan nawalaan tayo na perpekton bilay bilang kabiangan na pamilya na Dios. Sakey ed saray sankaabigan a paraan ya nipanengneng tayoy panangarod totoo et say pangibagad sikara nipaakar ed sayan marakdakep ya arapen ya imparaan nen Jehova parad saray walaan na pananisia ed Anak to.​—Eze. 45:1-7; 47:1–48:35; Apo. 21:1-4; 22:17.

Sakey a Makapadinayew a Pangipanengneng na Inkamapaabeba Kayari na Sanlibon Taon ya Uley

19. Antoy gawaen nen Jesus legan na Sanlibon Taon ya Uley to? (Nengnengen met so kahon ya “Say Unor a Subok.”)

¹⁹ Legan na Sanlibon Taon ya Uley nen Jesus, bilayen to lamet so binilyon a totoo tan paandien to so ermen ya nanlapud sakey a “kabusol, say patey.” (1 Cor. 15:26; Mar. 5:38-42; Gawa 24:15) Say history na too et singa sakey ya istoryan makapaermen a maong. Balet legan ya papaolien nen Jesus so kada henerasyon, buralen toy makapaermen ya istorya tan ikdan to na pankanawnawa iray napaoli ya nawalaan na mas marakep ya istorya. Base ed dondon bagat, ekalen to so amin ya mauges ya epekto na sakit, guerra, tan eras. Aliwa labat a satan, tulongan to tayo met ya naekal so sengegan na paniirap tayo—say kasalanan ya atawir tayod si Adan. (Roma 5:18, 19) Sigpot ya ‘deralen nen Jesus iray kimey na Diablo.’ (1 Juan 3:8) Antoy nagawa kayari na satan?

20. Panon ya ipanengneng nen Jesus tan say 144,000 so makapadinayew ya inkamapaabeba? Ipaliwawa. (Nengnengen so litrato ed gapo na kapitulo.)

²⁰ Basaen so 1 Corinto 15:24-28. No perpekto lay bilay na amin a totoo tan nagmaliw lan Paraiso so dalin a singa gagala nen Jehova manlapu lad gapo, ipanengneng nen Jesus tan saray 144,000 a kaiba ton manuley so makapadinayew ya inkamapaabeba; iyawat da lad si Jehova so Panarian. Mabulos tan mareen dan iyawat so autoridad ya walad sikara ed loob na sanlibon taon. Amin ya agawaan na Panarian et mansiansiad andi-anggaan.

Say Unor a Subok

21, 22. (a) Antoy itsura na mundo kayari na sanlibon taon? (b) Akin et ibulos nen Jehova si Satanas tan saray demonyo?

²¹ Insan walay nikadkaduman gawaen nen Jehova ya mangipanengneng na baleg a talek to ed saray sakop tod dalin. Ibulos toy Satanas tan saray demonyo ed kaaralman ya kawalaan da ed loob na sanlibon taon. (Basaen so Apocalipsis 20:1-3.) Duman maong so mundon nanengneng da ed samay dati ran amta. Sakbay na Armagedon, dakel a totoo so imbalang nen Satanas tan aderal so pankakasakey na totoo lapud pambubusolan tan panaglabi. (Apo. 12:9) Balet kayari na sanlibon taon, amin a totoo et mandadayew lad si Jehova bilang nankakasakey a pamilya ya manaaroan. Say dalin et sakey lan mareen a Paraiso.

²² Akin et ibulos nen Jehova si Satanas tan saray demonyo ed satan a malinis ya pasen anta mauge-uges iran kriminal? Lapud dakel ed saray mabilay kayari na sanlibon taon et datin agmandadayew ed si Jehova tan agnin balot asubok so katooran da. Kaslakan ed sikara et inatey ya agda akabat si Jehova, insan ira apaoli ed Paraiso. Aglabat ira inikdan nen Jehova na bilay noagta inter to met so amin ya pankaukolan dad pisikal tan espiritual. Anggapoy mauges ya makaimpluensya ed sikara, puro maong a totoo labat. Amin ya nakaulop da et totoon mangaaro tan manlilingkor ed si Jehova. Nayarin iyakusa nen Satanas imay inyakusa tod si Job​—manlilingkor labat ira ed Dios lapud proprotektaan tan bebendisyonan To ra. (Job 1:9, 10) Kanian antis ya permanentin isulat nen Jehova iray ngaran tayo ed libro na bilay, ikdan to tayoy pankanawnawan pruebaan ya talagan matoor tayod sikato bilang Ama tan say Soberanon Dios tayo.​—Apo. 20:12, 15.

23. Anton isyu so arapen na kada indibidual?

²³ Diad antikey a panaon, naikday pankanawnawa si Satanas ya tuksoen iray totoo pian ontunda ran manlingkor ed Dios. Anton subok so arapen na totoo? Seguradon arapen na kada indibidual imay isyu ya inarap met nen Adan tan Eva​—balanglan awaten na indibidual so estandarte nen Jehova, suportaan toy uley To, tan dayewen to, odino manrebelde ed si Jehova tan suportaan toy Satanas.

24. Akin et tinawag ya Gog tan Magog iray rebelde?

²⁴ Basaen so Apocalipsis 20:7-10. Imanoen ya saramay manrebelde kayari na sanlibon taon et tinawag a Gog tan Magog. Ipatnag da iray ugali a mipara ed saramay rebelde ya impropesiya nen Ezequiel a mangataki ed totoo na Dios legan na baleg a kairapan. Saman a grupo na totoo, say “Gog ed dalin na Magog,” et nanlapud nanduruman nasyon ya onsusumpad uley nen Jehova. (Eze. 38:2) Mipara, saray manrebelde kayari na Sanlibon Taon ya Uley na Kristo et adeskribe bilang ‘saramay nasyon.’ Makapainteres iyan deskripsion. Akin? Lapud legan na Sanlibon Taon, anggapo lay nanduruman uley; amin a totoo et sakop la na saksakey a gobierno, say Panarian na Dios. Kabiangan itayo la ed sakey ya espiritual a nasyon. Lapud tinawag irayan rebelde ya Gog tan Magog tan lapud adeskribe ira ya ‘saramay nasyon,’ ipapanengneng na propesiya ya nayarian nen Satanas ya deralen so pankakasakey na arum a totoo na Dios. Siempre, anggapoy puersaen ya ondapag ed si Satanas. Kada perpekton indibidual so mandesisyon.

25, 26. Pigaray ondapag ed si Satanas, tan antoy nagawad sikara?

²⁵ Pigaray ondapag ed si Satanas? Say karakel na saramay manrebelde et “singa buer ed dayat.” Aglabay ya ibaga na sayan balikas ya karaklan ed saray totoo so manrebelde. Panon tayon amta? Imanoen so promisa na Dios ed si Abraham. Imbaga nen Jehova ed si Abraham ya saray ilalak to et magmaliw a singa “saray buer ed gilig na dayat.” (Gen. 22:17, 18) Balet, say bilang na ilalak to et nagmaliw ya 144,001. (Gal. 3:16, 29) Anggan dakel met itan, melmelag labat itan no ikomparad bilang na amin a totoo. Ontan met, say bilang na saray ondapag ed si Satanas et nayarin dakel met, balet melag labat itan no ikomparad bilang na saray ondapag ed si Jehova. Agnasarag na sarayan rebelde ya deralen iray matoor a lingkor nen Jehova.

²⁶ Saray mibiang ed panrebelde et tampol a deralen. Kaiba ray Satanas tan saray demonyo ya naandi la ed andi-anggaan​—anggapo lay ilalo ran nabilay lamet. Say nanonotan labat ed sikara ya pakaaralan tayo et saray makapuy a desisyon da tan saray resulta na saratan a desisyon.​—Apo. 20:10.

27-29. Antoy manatalaran ed saramay manmatoor ed unor a subok?

²⁷ Balet, saramay manmatoor ed unor a subok et permanentin isulat so ngaran da ed “libro na bilay.” (Apo. 20:15) Insan, bilang nankakasakey a pamilya, iter la na amin a matoor ya ananak nen Jehova so panagdayew ya kanepegan to.

²⁸ Isip mo pa itan ya arapen. Manatalaran ed sika so bilay ya makapaliket iray kimey tan makapabiskeg so pankakaaro. Sika tan saray inarom et aglan balot manirap. Onarap kad si Jehova ya anggapo lay kasalanan mo kanian agmo la kaukolay manamegley. Amin ya totoo et makapikaaro lad Dios ya anggapoy makasbel. Tan say sankaimportantian ed amin, perpekto lan gawaen so dugan panagdayew diad tawen tan diad dalin. Talagan nipawil la so dugan panagdayew!

²⁹ Kasin wadman ka pian nanengneng mo itan ya balibalin panaon? Sarag to no itultuloy mon iyaplika so taloran naaralan mo ed libro na Ezequiel—si Jehova labat so dayewen, mansiansian nankakasakey ed malinis a panagdayew, tan ipanengneng so panangaro ed arum. Wala ni sakey ya importantin naaralan tayo ed saray propesiya nen Ezequiel. Anto itan?

“Naamtaan Da a Siak si Jehova”

30, 31. Antoy kabaliksan na balikas ya “naamtaan da a siak si Jehova” ed saray (a) mamubusol ed sikato? (b) totoo to?

³⁰ Diad interon libro na Ezequiel, aminpiga ya abitla so balikas ya “naamtaan da a siak si Jehova.” (Eze. 6:10; 39:28) Diad saray mamubusol ed Dios, satan a balikas et mankabaliksan na guerra tan patey. Aglabat ira napilitan a bidbiren si Jehova, noagta naamtaan da met so kabaliksan na sankatagyan a ngaran to—“Pagmamaliwen To.” Si “Jehova na saray armada” et magmaliw a “makapanyarin sundalo” ya milaban ed sikara. (1 Sam. 17:45; Exo. 15:3) Balet atrasado la ya natalosan da iyan importantin katuaan nipaakar ed si Jehova: Anggapoy makaamper ed sikato diad panumpal tod gagala to.

³¹ Diad saray totoo na Dios, say balikas a “naamtaan da a siak si Jehova” et mankabaliksan na kareenan tan bilay. Pagmaliwen itayo nen Jehova ya perpekton ananak to a mangipapanengneng ed saray kualidad to, ya singa samay gagala tod sikatayo manlapu lad gapo. (Gen. 1:26) Diad tua, si Jehova et nagmaliw lan maaron Ama tayo tan Managpastol ya manproprotekta ed sikatayo. Tan sikatoy magano lan magmaliw ya Ari tayo tan taloen to iray kalaban to. Antis ya onsabi itan ya agew, komon ta ipapuso tayo so mensahe nen Ezequiel. Pruebaan tayo diad saray ibabaga tan gagawaen tayo ed kada agew ya amta tayo no siopa si Jehova tan no antoy kabaliksan na ngaran to. Insan no onggapo lay kadederal diad baleg a kairapan, agtayo ontakot. Imbes, itangwa tayoy ulo tayo ta amta tayon asingger lay kililiktar tayo. (Luc. 21:28) Legan tayon aalagaren itan, komon ta tulongan tayo iray totoo ed anggan iner a pasen ya amtaen tan aroen so saksakey a Dios a makanepegan na dayew, say Dios a sankatagyan so ngaran to​—si Jehova.​—Eze. 28:26.