Labay nen Jehova ya Malinis Iray Totoo To

1-3. (a) Akin et seseguroen na sakey ya ina ya malinis so anak to? (b) Akin ya labay nen Jehova ya malinis iray totoo to?

IMADYIN mo pay sakey a maaron ina ya papalesan toy anak to antis ya onlad eskuelaan. Seseguroen to ya nanames so anak to, tan malinis tan maayos so kawes to. Importante iya pian arawi ed sakit so ugaw tan nanengneng na arum ya sikatoy aasikasoen na atateng to.

² Labay nen Aman Jehova ya malinis itayo. (Salmo 18:26) Amta to ya parad pankaabigan tayo so pagmaliw ya malinis. Tan no malinis itayo, napagalangan tayoy Jehova.​—Ezequiel 36:22; basaen so 1 Pedro 2:12.

³ Antoy labay ya ibaga na pagmaliw ya malinis? Tan akin ya parad pankaabigan tayo itan? Legan tayon eebatan irayan tepet, nayarin wala ray nanengneng tayo ya nepeg tayon umanen ed sarili tayo.

AKIN ET NEPEG YA MALINIS ITAYO?

4, 5. (a) Akin et nepeg ya malinis itayo? (b) Antoy naaralan tayo ed saray ginawa nen Jehova nipaakar ed panmoria to ed kalinisan?

⁴ Naaralan tayoy magmaliw a malinis diad mismon alimbawa nen Jehova. (Levitico 11:44, 45) Kanian say manunan rason no akin ya nepeg a malinis itayo et lapud labay tayon ‘aligen so Dios.’​—Efeso 5:1.

⁵ Dakel so naaralan tayo ed saray ginawa nen Jehova nipaakar ed panmoria to ed kalinisan. Nanggawa si Jehova na nanduruman cycle pian nalinisan so dagem tan danum tayo. (Jeremias 10:12) Isipen pay dakdakel ya paraan ya lilinisan na dalin so sarili to, anggano dudutakan itan na totoo. Singa bilang, denesinyo nen Jehova iray mabilay a pinalsa ya tatawagen a mikrobyo, ya nanengneng labat panamegley na microscope lapud kamelag da. Wala ray mikrobyo ya sarag dan linisen iray makasamal ya dutak. Makapakelaw itan ya proseso. Uusaren ni ingen na saray sientista so arum ya mikrobyo pian ekalen so epekto na polusyon.​—Roma 1:20.

6, 7. Panon ya ipapanengneng na Ganggan ya inter ed si Moises a nepeg ya malinis iray mandadayew ed si Jehova?

⁶ Nanengneng tayo met so kaimportantian na pagmaliw a malinis diad samay Ganggan ya inter nen Jehova ed saray Israelita panamegley nen Moises. Singa bilang, nepeg ya malinis ed pisikal iray totoo pian awaten nen Jehova so panagdayew da. Diad Agew na Pananakbong, nepeg ya mamiduan manames so atagey a saserdote. (Levitico 16:4, 23, 24) Tan antis ya mangiyapay so arum ya saserdote, nepeg dan urasan so lima tan sali ra. (Exodo 30:17-21; 2 Awaran 4:6) Diad arum iran situasyon, patey so dusa na agpangunor ed saray ganggan nipaakar ed kalinisan.​—Levitico 15:31; Numeros 19:17-20.

⁷ Diad panaon tayo ey? Diad samay Ganggan ya inter ed si Moises et dakel so naaralan tayo nipaakar ed saray estandarte nen Jehova. (Malaquias 3:6) Malinew ya ipapanengneng na satan ya nepeg a malinis iray mandadayew ed si Jehova. Ag-anguman iray estandarte nen Jehova. Anggad natan et iilaloan nin siansia nen Jehova ya malinis iray mandadayew ed sikato.​—Santiago 1:27.

ANTOY KABALIKSAN NA PAGMALIW A MALINIS?

8. Diad anto ran paraan ya nepeg a malinis itayo?

⁸ Parad si Jehova, say pagmaliw a malinis et aglabat basta pansiansiaen ya malinis so laman, kawes, tan abung tayo. Nepeg ya malinis so interon bilay tayo. Kaibad satan so panagdayew, kondukta, tan kanonotan tayo. On, pian malinis itayo ed pakanengneng nen Jehova, nepeg ya malinis itayo ed amin ya aspekto na bilay tayo.

9, 10. Antoy kabaliksan na malinis ya panagdayew?

⁹ Malinis ya panagdayew. Agtayo nayarin mibiang ed palson relihyon diad anggan anton paraan. Nen inawit ed Babilonia iray Israelita, apaliberan ira na totoon mibibiang ed imoral ya paganon relihyon. Impropesiya nen Isaias ya onsempet ed Israel iray Israelita tan ipawil da so dugan panagdayew. Oniay imbaga nen Jehova ed sikara: “Paway kayo ditan, agyo didiwiten iray marutak! Paway kayo ed sikato, mansiansia kayon malinis.” Say panagdayew da ed Dios et agnayarin nalaokan na bangat, kagagawa, odino kustombre na palson relihyon na Babilonia.​—Isaias 52:11.

¹⁰ Papaliisan met na saray tuan Kristiano natan so palson relihyon. (Basaen so 1 Corinto 10:21.) Diad interon mundo, dakel ya kabkabat a tradisyon, kustombre, tan doktrina so akabase ed saray palson bangat na relihyon. Singa bilang, diad dakel a kultura, manisia iray totoo ya wala kunoy onsian ed laman tayo no ompatey tayo tan tuloytuloy ya mabilay, tan dakel a kustombre so imbase ed satan ya bangat. (Eclesiastes 9:5, 6, 10) Saray ontan ya kustombre et nepeg ya paliisan na saray Kristiano. Nayarin piliten itayo na pamilya tayo ya mibiang ed saratan. Balet lapud labay tayon ipasen itayo nen Jehova ya malinis, agtayo labay so mibiang anggano piliten da tayo.​—Gawa 5:29.

11. Antoy kabaliksan na malinis ya kondukta?

¹¹ Malinis ya kondukta. Pian ipasen itayo nen Jehova ya malinis, nepeg tayon paliisan so amin a klase na seksual ya imoralidad. (Basaen so Efeso 5:5.) Diad Biblia, ibabaga ed sikatayo nen Jehova ya nepeg tayon ‘ibatikan so seksual ya imoralidad.’ Malinew ton imbaga ya saramay manggagaway imoralidad tan agmagbabawi et “agda natawir so Panarian na Dios.”​—1 Corinto 6:9, 10, 18; nengnengen so Kaaruman ya Impormasyon 22.

12, 13. Akin et nepeg ya malinis so kanonotan tayo?

¹² Malinis ya kanonotan. Kaslakan ya gagawaen tayo iray iisipen tayo. (Mateo 5:28; 15:18, 19) No malinis so iisipen tayo, malinis met so ikiwas tayo. Siempre, aliwa itayon perpekto kanian no maminsan et wala ray aliwa ya onseksek ed isip tayo. No nagawa itan, nepeg ya ipulisay tayon tampol iratan. Ta no andi, diad ilabas na panaon et aliwa lan malinis so puso tayo. Ompan labay tayo lan aktual ya gawaen iray lanang tayon iisipen. Kaukolan sirin ya panoen tayoy isip tayo na malinis iran kanonotan. (Basaen so Filipos 4:8.) Kanian nepeg tayon paliisan iray imoral odino marawal ya panagligliwaan. Maalwar tayon pilien no antoy basaen, bantayan, tan pantongtongan tayo.​—Salmo 19:8, 9.

¹³ Pian mansiansia itayo ed panangaro na Dios, nepeg ya malinis so panagdayew, kondukta, tan kanonotan tayo. Balet importante met ed si Jehova ya malinis itayo ed pisikal.

PANON ITAYON MAGMALIW A MALINIS ED PISIKAL?

14. Akin ya importante so pansiansian malinis ed pisikal?

¹⁴ No pansiansiaen tayon malinis so laman tan kaliberliber tayo, nagunggonaan itayo pati saray totoon walad kaliberliber tayo. Balibali liknaan tayo, tan labalabay itayo na arum. Balet wala ni mas importantin rason no akin ya kaukolan ya malinis itayo ed pisikal. No malinis itayo, napapagalangan tayoy Jehova. Isipen pa iya: No walay ugaw ya lanang a marutdutak, ompan nabalaw moy atateng to. Ontan met, no agtayo asikasoen so sarili tayo tan agtayo mansiansian malinis, ompan balawen na totoo si Jehova. Imbaga nen Pablo: “Agkamin balot pansesengegay pakagapolan, pian anggapoy nabalaw ed ministeryo mi; balet diad amin a paraan et irerekomenda mi sarili mi bilang ministro na Dios.”​—2 Corinto 6:3, 4.

15, 16. Antoy gawaen tayo pian mansiansia itayon malinis ed pisikal?

¹⁵ Say laman tan kawes tayo. Nepeg ya kabiangan na inagew-agew a rotina tayo so panlinis tayod sarili tayo. Singa bilang, regular tayon manames, anggad posible et inagew-agew. Kaukolan ya mangusar tayoy sabon no manuras tayoy lima antis tayon manluto odino mangan, tan lalo la no kayari tayon manirit, mangusar na kasilyas, odino manbemben na marutak. Singa melag labat ya bengatla so panuras na lima, balet importante itan pian ag-onkayat so bakterya tan sakit. Nisalba ni ingen na satan so bilay. No anggapoy kasilyas odino poso negro tayo, wala nin siansia iray dugan paraan pian nibantak tayoy dutak tayo. Saray Israelita nensaman et anggapoy kasilyas tan poso negro da, kanian ikokotkot dad dalin so dutak da, ya arawi ed kaabungan na totoo tan ed panaasolan na danum.​—Deuteronomio 23:12, 13.

¹⁶ Saray kawes tayo et agkaukolan ya marakdakep, mabmabli, odino uso. Balet kaukolan ya masimpit tan malinis iratan. (Basaen so 1 Timoteo 2:9, 10.) Labay tayon say itsura tayo et lanang ya mangigalang ed si Jehova.​—Tito 2:10.

17. Akin et labay tayon pansiansiaen ya malinis so abung tan kaliberliber tayo?

¹⁷ Say abung tan kaliberliber tayo. Inerman so panaayaman tayo, lilinisan tayoy abung tayo. Seseguroen tayo met ya malinis so kotse, motor, bisikleta, odino anggan anton luluganan tayo, lalo la no uusaren tayo itan ed piaral odino pampulong. Sakey ni, no manpupulong itayo et ipapaamta tayo ed arum so nipaakar ed bilay diad malinis ya paraison dalin. (Lucas 23:43; Apocalipsis 11:18) Nanengneng ed itsura na abung tan kaliberliber tayo ya natan ni labat et manpaparaan tayo lan manayam ed satan ya malinis a balon mundo.

18. Akin et labay tayon malinis so pasen ya pandadayewan tayo?

¹⁸ Say pasen ya pandadayewan tayo. Ipapanengneng tayon importante ed sikatayo so kalinisan no pansiasiansiaen tayon malinis so pasen ya pantitiponan tayo, balanglan diad Kingdom Hall odino diad pasen na asemblea tayo. Diad unaan ya iyakar na totoo ed Kingdom Hall, say maslak ya naiimano da et say kalinisan na satan. Napapagalangan si Jehova lapud satan. Bilang membro na kongregasyon, sarag tayon amin so ontulong ed panlinis na Kingdom Hall tan pansiansiaen itan ya maayos.​—2 Awaran 34:10.

ITUNDA IRAY MARUTAK YA KAGAGAWA

19. Antoy nepeg tayon paliisan?

¹⁹ Anggano ag-akalista ed Biblia so amin ya mauges a kagagawa ya nepeg tayon paliisan, nabasa ditan iray prinsipyo ya makatulong ed sikatayon natalosan no antoy nalilikna nen Jehova ed saratan. Agto labay ya mansigarilyo itayo odino naadik itayo ed alak o druga. No kaaro itayo na Dios, paliisan tayo iratan. Akin? Lapud rerespetoen tayo so regalo a bilay. Saratan ya kagagawa et manpatikey na bilay, panlapuan na sakit, tan makaapekto ed saray totoo ed kaliberliber tayo. Say rason na dakel a totoo no akin ya sasalien dan itunda irayan makapuy ya kagagawa et pian ondukey so bilay da. Balet, bilang kakaaro nen Jehova, walay sankaabigan ya rason tayo no akin ya itunda tayo iratan​—say panangaro tayo ed Dios. Oniay imbaga na sakey ya kabataan a bii: “Diad tulong nen Jehova, alinisan koy bilay ko tan nitundak iray pakakaadikan ko. . . . Agko nagawaan iraman ya pananguman no diad sarilin biskeg ko labat.” Pantongtongan tayo so limaran prinsipyo na Biblia ya makatulong ed sakey ya itunda iray mapeligron kagagawa.

20, 21. Anto ran kagagawa so imbaga nen Jehova ya paliisan tayo?

²⁰ “Inad-arok ya agagi, lapud walad sikatayo irayan sipan, linisan tayoy sarili tayo ed amin a karutakan na laman tan espiritu pian magmaliw itayon lalon masanto legan tayon tatakotan so Dios.” (2 Corinto 7:1) Labay nen Jehova ya paliisan tayo iray marutak ya kagagawa ya makaderal ed isip tan laman tayo.

²¹ Say sakey ya ambelat a rason no akin ya “linisan tayoy sarili tayo ed amin a karutakan” et abitlad 2 Corinto 6:17, 18. Ibabagad sikatayo nen Jehova: “Agyo la didiwiten so marutak a bengatla.” Insan to insipan: “Awaten ta kayo. Tan siak so magmaliw ya ama yo, tan sikayoy magmaliw ya ananak kon lalaki tan bibii.” On, no paliisan tayo so antokaman ya mandutak ed sikatayo, aroen itayo nen Jehova a singa panangaro na sakey ya ama ed ananak to.

22-25. Anto ran prinsipyo na Biblia so makatulong ed sikatayo ya arawian iray marutak ya kagagawa?

²² “Arom si Jehova a Dios mo ed interon pusom tan interon kamarerwam tan interon nonot mo.” (Mateo 22:37) Saya so sankaimportantian ed amin ya ganggan. (Mateo 22:38) Kanepegan nen Jehova so kompleton panangaro tayo. Panon tayon nipanengneng so kompleton panangaro ed sikato no wala ray gagawaen tayon mamatikey na bilay tayo odino maneral ed utek tayo? Nepeg tayon gawaen so anggaay nayarian tayon respetoen so bilay ya inter to ed sikatayo.

²³ “[Si Jehova] so mangiiter ed amin a totoo na bilay tan linawa tan amin a bengatla.” (Gawa 17:24, 25) No inikdan ka na kaarom na sakey ya espisyal a regalo, kasin ibantak mo itan odino deralen mo? Say bilay et espisyal ya regalon inter nen Jehova. Talagan aapresyaen tayo itan ya regalo. Kanian labay tayon usaren so bilay tayo diad paraan ya mangigloria ed sikato.​—Salmo 36:9.

²⁴ “Arom so kaparam a too a singa ed sikan dili.” (Mateo 22:39) Aliwan sarili tayo labat so naapektoan ed saray marutak ya kagagawa. Naapektoan met iray totoon nakakaiba tayo, saray totoon inar-aro tayo. Singa bilang, nayarin nawalaan na graben sakit so sakey a too no walay kaiba tod abung ya mansisigarilyo tan nasusungap toy asewek na satan. Kanian no itunda na sakey iray mauges ya kagagawa, ipapanengneng ton inaro to ray totoon akapaliber ed sikato.​—1 Juan 4:20, 21.

²⁵ “Itultuloy mo ran panonotan a manpasakop tan ontulok irad saray gobierno tan autoridad.” (Tito 3:1) Diad dakel a bansa, sebel so nawalaan odino mangusar na druga. Lapud igaganggan itayo nen Jehova ya respetoen iray gobierno, uunoren tayo iray ontan ya ley.​—Roma 13:1.

26. (a) Antoy nepeg tayon gawaen pian awaten nen Jehova so panagdayew tayo? (b) Akin ya say pansiansian malinis ed pakanengneng na Dios so sankaabigan ya paraan na kabibilay?

²⁶ No labay tayoy magmaliw a kaaro nen Jehova, ompan wala ray pananguman ya kaukolan tayon gawaen. Nepeg ya onkiwas ti lan tampol. Aliwan naynay ya mainomay ya itunda so marutak ya kagagawa, balet nasarag tayo itan! Insipan nen Jehova ya tulongan to itayo. Imbaga to: “Siak si Jehova a Dios mo, say mangibabangat ed sika pian nagunggonaan ka, say mangiwawanwan ed sika diad dalan a nepeg mon panakaran.” (Isaias 48:17) No gagawaen tayoy anggaay nayarian tayon mansiansian malinis, makaseguro tayo ya napapagalangan tayoy Dios tayo.