KAHON 1B
Karga na Ezequiel
Say libro na Ezequiel et nayarin apagen ya singa onia:
KAPITULO 1 ANGGAD 3
Nen 613 B.C.E., sanen manaayam ed Babilonia si Ezequiel kaiba na arum nin Judio ya inawit diman, anengneng to ray pasingawey nen Jehova tan naikdan na asainmin ya manpropesiya ed saray Judion manaayam ed abay na ilog Kebar.
KAPITULO 4 ANGGAD 24
Manlapud 613 anggad 609 B.C.E., impasabi nen Ezequiel iray propesiya ya dakel ed saratan et nipaakar ed panangukom ed Jerusalem tan ed saray rebelden totoo ditan ya mandadayew ed idolo.
KAPITULO 25 ANGGAD 32
Nen 609 B.C.E., ginmapo so unor ya inlusob na Babilonia ed Jerusalem. Manlapu lad saman, aliwa lan say Jerusalem so angipaarapan nen Ezequiel na mensahe na pangukom noagta diad saray akapaliber ya kalaban a nasyon—say Ammon, Edom, Ehipto, Moab, Filistia, Sidon, tan Tiro.
KAPITULO 33 ANGGAD 48
Nen 606 B.C.E., sanen aderal lay Jerusalem tan say templo ya nilasus kilometro so kaarawi to ed Babilonia, ginmapon nampokus si Ezequiel ed mensahe ya mangiter na ilalo—say makapaliket ya pangipawil ed dugan panagdayew ed si Jehova a Dios.
Say baleg ya parte na libro na Ezequiel et insulat base ed impantutumbokan na saray agawa tan base ed topic. Saray propesiya nipaakar ed kaderal na Jerusalem tan say templo so akaunan nisulat insan sinmublay iray dakel ya propesiya nipaakar ed pangipawil ed dugan panagdayew. Duga labat itan, ta ipapatnag na saray propesiya nipaakar ed pangipawil ya anggapo lay panagdayew ed templo.
Ontan met, saray propesiya nen Ezequiel nipaakar ed saray akapaliber ya kalaban ya nasyon (kapitulo 25 anggad 32) et walad pegley na saray mensahe to nipaakar ed panangukom ed Jerusalem tan saray propesiya nipaakar ed pangipawil ed dugan panagdayew. Oniay komento na sakey ya iskolar ed saray mensahe na panangukom ya impaarap nen Ezequiel ed saray nasyon: “Dugaruga so impanguman na sarayan mensahe manlapud sanok na Dios anggad pangipanengneng Toy panangasi ed saray totoo To, ta say panusa To ed saray kalaban na totoo To et kaiba ed pangiliktar To ed sikara.”