Pegley Bukig​—Pasen na Armagedon?

“LEGAN a say laslasan na mundo so mamapaarap ed ultimon oras na pipupuligesgesan, say importantin syudad a bantayan et aliwan say Nueba York, Moscow, Paris, Peking, odino Cairo. Say syudad a bantayan et say Jerusalem!” Ontan so inyabawag nen Teologon John F. tan John E. Walvoord ed libro ran Armageddon, Oil and the Middle East Crisis.

Peteg a dakel so nanenerbyos ed Jerusalem tan ed saray nagugulon pasen a kawalaan to. Kuan na Times ed London, “Say Pegley Bukig so magmamaliw a lalon makapakigtot.” Arum so napapagaan a say arapen a banggaan na E.U.-Sobyet so ngalngalin agnapaliisan. Nen Enero 1984, say relasyon na manlalaslasan iran pakayari so kinmapuy a say Bulletin of the Atomic Scientists so atenyeg ed bantog a “relo na agew-na-desyang” (simbolo ed kinaasingger na mundo ed nuklar a kadederal) a mamaarap ed taloran minutos sakbay na pegley labi. Inkuan na Bulletin: “Akaalagey itayo la sirin ed nansangaan na kadederal, diad puerta na sakey a panaon na pambanggaan, sakey a panaon sano say epel a simplisidad na puersa a mangikigtot ya onsalat ed anggan dinan nin arum a porma na diskurso ed baetan na saray mabibiskeg a pakayari. Saya so makapakebbiew ya arapen.”

Saray ondarakel a bilang na pundamentalistan managpulong, teologo, tan saray ebanghelista ed TV, anggaman kuan, so nanliket ed sarayan nagagawa. Say ombibiskeg a gutgutan ed Pegley Bukig so mangiiter na kapanisia ed makapakebbiew iran pasakbay da a say Armagedon so magano lan nagawa ed satan a lugar! Tan diad pangipaknol da na serena ed saray libro, palpaliwawa, tan saray produksion na telebisyon, tinipon da so agaylan karakel na onggendan.

Sarayan komentarista so mankukolkol ed eksakton pansusuldongan na saray nagawa. Ingen say tipikon ‘senaryon Armagedon’ so singa onia: Say igapo na ‘pambilang a mamaarap ed agew-na-desyang,’ kuan da, et say inkiletneg na Estado na Israel. Liknaen da sirin a say natatawag na kibayes na emosyon so mabitabitar. Unong ed sikara, agla mabayag et saray tuan Kristianos so biglan naandipat ed dalin​—a sikara so nasingkat ed tawen. Legan na ontumbok a pitoran taon na “kairapan,” dakel iran ebanghelista so angipasakbay ni a say nasyon na Israel so nakumberte ed Inkakristiano. Kaslakan ed rasa na too, anggaman kuan, so nipasen a nitarok ed leksab na orasyon na sakey a karismatikon diktador (say “Antikristo”) a mangitonton ed samploran nasyon a manmumuyong. Anggan say Israel, sisiaen da, so midasig met ed sikato. Ingen say panmumuyong na saray Arabon nasyones tan saray arum ni, ya impangulo na Rusya, so surprisan onlubak ed Israel. Sayan ilubak so mamilagron amperen na Dios, so kuan na sarayan pundamentalista. Say ontumbok ed magano, anggaman kuan, et say sananey a panangatakin manlapud “Antikristo,” a sikato so mamaterak na sigpot-a-bakal ed Pegley Bukig​—Armagedon.

Angangko ta saya so singa makatangguyor ed arum. Tutal, tuan impasakbay na Biblia so katipon na saray nasyones ed bakal na “Armagedon.” (Apocalipsis 16:14-16, King James Version) Balet kasin ipapanengneng na Biblian peteg a sayan ebento so nagawa ed Pegly Bukig? Tan anto so kakanaan na pasen ed sayan bakal?

[Antikey a Paimano ed pahina 3]

“ARMAGEDON”​—anto so kabaliksan na sayan ngaran ed Biblia? Niparungtal ed kada panaon diad makabaliksan ya apis, sakey a panggegendanan na pakaaralan iran artikulo ed sayan tema so ompatnag ed apatiran paway The Watchtower ed Enero tan Pebrero 1985. Nailaloan a sarayan Makasulatan a salaysay so manligliwa ed sikayo diad pikakabat ed no anto so peteg ya ARMAGEDON.