Armagedon, Pegley Bukig, tan say Biblia

“SAY sentro na interon mapropetikon pasakbay,” kuan nen autor a Hal Lindsey, “et say Estado na Israel.” (The 1980’s: Countdown to Armageddon) Makabaliksan ed ‘senaryon Armagedon’ na saray pundamentalista, sirin, ed pananisia ra a say Dios so walaan na nikadkaduman pidedeneng ed Israel. Sisiaen da, a say Dios, so misalet sano saray kakabusol to so maneral ed sikato.

Say Biblia, anggaman kuan, so mangipapanengneng ya abalang na Judion nasyon so pabor tan pananalimbeng na Dios sanen impulisay da so Anak to, si Jesu-Kristo. (Gawa 3:13, 14, 19) Mabitar ya imbaga nen Jesus a mismo ed sikara: “Say Panarian na Dios so naekal ed sikayo tan niiter ed sakey a nasyon a mamawala na bunga to.”​—Mateo 21:43.

Impulisay a Sigpot?

Saray teologon John F. tan John E. Walvoord (ya akaunan angaonan) so anangsang diad impangikuan da: “Malinlinew ya impanengneng nen Apostol Pablo a saray sipan na Daan a Sipan ed Israel so siansia nin nasumpal. Insulat nen Pablo, ‘Itepet ko sirin, Kasin impulisay na Dios so katooan to? Andin balot!’ (Roma 11:1; NIV.)” Sinmaew ira, anggaman kuan, a mangaon ed kabiangan na satan a bersikulo: “Ta siak met so sakey ya Israelita, ed bini nen Abraham, ed tribu nen Benjamin.” Anto so labay nen Pablo ya ibaga ed saya?

Agsinisia nen Pablo a saray Israelitas bilang sakey a nasyon so siansia nin walaan na nikaduman pasen ed Dios, ta imbalikas na apostol so “baleg a kaermenan tan agmanundan sulit ed puso [to]” nisengeg ed inkaawet da ed saray kaabigan na Dios. (Roma 9:2-5) Diad Roma 9:6 inyarum nen Pablo: “Anggaman ontan, sikato so aliwan singa say salita na Dios [ed si Abraham] so sinmaew. Ta aliwan amin a nanlapud [silalaman] ya Israel so peteg ya ‘Israel.’ ” Imanoen so ibabaga nen Pablo: a lapud impulisay na saray Judios si Kristo, sikara so ag-impasen na [Dios] ya Israel! Say alanaan a kongregasyon na saray patumbok nen Jesu-Kristo so peteg ya “Israel” natan, say instrumenton diad panamegley to et bendisyonan na Dios so amin a katooan.​—1 Pedro 2:9; Galacia 3:29; 6:16; Genesis 22:18.

Say Dios, anggaman kuan, so ag-angipulisay ed saray Judion totoo bilang indibidual, ta impalinew nen Pablo: “Ta siak met so sakey ya Israelita.” On, saray indibidual ed dalem na Judion nasyon, a singa si Pablo, so nayarin magmaliw a kabiangan na espiritual ya Israel no awaten da si Kristo. “Nakdaan” lambengat, melag ya ulop, so nampilin manggawa na ontan.​—Roma 11:1, 5.

Arapen a Kakumberte

Arum, anggaman kuan, so manatalaran ed dramatikon kauman na puso ed biang na amin a Judio ed laman. “Say baleg a kairapan, ya ontumbok ed liket na Iglesia,” so ibabaga na sakey a pundamentalistan managsulat, “et sikato so paraan na kakumberte na Israel [ed Inkakristiano].” Makapasagyat, imbaga nen Pablo ed Roma 11:25, 26: “Say inkaepel na liknaan so agawa ed kabiangan diad Israel ya anggad say nagnap a bilang na totoo na amin a nasyones so linmoob, tan diad sayan pamaakaran et amin ya Israel so nilaban.”

Kasin ipapasakbay nen Pablo so arapen ya interamentin kakumberte na saray Judios? Panon ya ontan, lapud sikaton mismo et impanengneng to ya nakdaan lambengat na saray Judios so mangawat ed si Kristo? (Roma 11:5) Tua, imbaga nen Pablo ya naeksperiensia na saray Judios so espiritual a “kaepel na saray liknaan” ya anggad “say nagnap a bilang” na Gentiles so onloob ed Kristianon kongregasyon.a Anggaman ontan, impanengneng nen Griegon eskolar a si Richard Lenski a say salita dia ya “anggad” so agnakaukolan a manutukoy ed saginonor a kakumberte. (Ipareng so usar na “anggad” diad Gawa 7:17, 18 tan Apocalipsis 2:25.) Peteg a sasalitaen nen Pablo a saray pakalikna na silalaman a Judios so mansiansian ‘epel’ ya anggad kasampotan. Say Dios, anggaman kuan, so sikakabat ya angumpleto “ed nagnap a bilang” na espiritual ya Israel (144,000) diad impangitarok to’d Gentiles ed Kristianon kongregasyon. “Tan diad sayan nengneng [aliwan diad kapasimbalo ed puso na Judion nasyon] et amin ya [espiritual] ya Israel so nilaban.”

Pangayarian ed Insipan a Dalin​—“Ed Ando lan Ando”

Anto, anggaman kuan, so nipaakar ed dalin a kawalaan na Estado na Israel? Kasin say Dios so walaan na nikaduman interes ed satan? Dakel, a singa say Protestantin teologon si William Hurst, so nanisip na ontan. Inkuan nen Hurst: “Anggapoy gisgis na dalin ed tapew na dalin so mas lalon inanap odino mas lalon inimano na sosyedad na nasyones nen say dalin na saray Judios.” Mangaaon ed Genesis 13:14, 15, pinanonotan to itayo ya insipan na Dios a sayan dalin so iter to ed bini nen Abraham “ed ando lan ando.”​—King James Version.

Kasin si Jehovan Dios sirin so naobligan manalimbeng ed dalin na Israel a manlapud ilubak? No ontan, nayarin mabitabitar so “Armagedon” ed Pegley Bukig. Anggaman kuan, imbaga labat na Dios ed si Abraham a say ilalak to so manayam ed sayan dalin, aliwan diad ando lan ando, noagta “ag-ageteran” a panat na panaon.b (Genesis 13:14, 15) Diad impangipulisay ed si Jesu-Kristo, abalang da so amin a pankayarian ed sayan dalin​—tan say pananalimbeng na Dios.

Armagedon​—Iner?

Diad Apocalipsis 16:14, 16 ipapanengneng na Biblia a say pinuyanan na demonyon propaganda so mangitonton ed saray papangulo na mundo “ed bakal na baleg ya agew na Dios a Makapanyarin-amin.” Inyarum to: “Tan tinipon toran impankakasakey ed pasen a tinawag ed Hebreo na Har-Magedon.” Agta ipanengneng na saya a say ultimon bakal et diad Pegley Bukig? Andi, lapud anggapo so heograpikon pasen ya atawag na “Har-Magedon” (literal, “Palandey na Megido”). Diad saray panaon na Biblia, wala so syudad ed Pegley Bukig ya atawag na Megido. Sikato so walad patar a nipanengneng ed apis na sayan paway. Diad asingger ed Megido dakel iran nikadkaduman bakal so agawa. Balet anggapo so palandey diman. Say “Har-Magedon,” odino “Armagedon,” so sirin sakey a simbolikon pasen. Simbolo na anto?

Ipapapengneng na propesiya nen Ezequiel a say Armagedon so naganoan diad panangataki na baleg ya armada ed “Israel.” Saray manangataki so ipapangulo nen ‘Gog na Magog,’ a saray sundalo to so dinmupag a nanlapud “sankaarawian iran pasen na baybay.” Siopa so sayan “Gog”? Matalek ya ibaga na saray pundamentalistan teologo a si Hal Lindsey (a singa met saray arum): “Wala lambengat so sakey a nasyon ed ‘sankaarawian a baybay’ na Israel​—say U.S.S.R.” Kinanonotan to met a saramay manitibukel na “puersa militar” nen Gog (a tinawag na Meshech, Tubal, Persia, Etiopia, Put, Gomer, tan Togarma ed Biblia) et saray alyados na Sobyet, a say manuna et saray Arabon nasyones.​—Ezequiel 38:1-9, 15.

Saray nilistan nasyon a kamuyong nen Gog, anggaman kuan, so aliwan nikaduman bantog ed eksena na mundo ed agew nen Ezequiel. Say kasumpalan na propesiya so nagawa sirin ed “kaunoran a kabiangan na saray taon,” sano saray tradisyonal a kakabusol na kadaanan ya Israel so naandi la ed mangaraldalin ya eksena. (Ezequiel 38:8) Sirin, say buragas tan arawin “dalin na Magog” so agmangiretrato ed prominente tan aliwan sikato so arawin Unyon Sobyet.

Siopa, sirin, so manaayam ed ‘arawin’ dalin, tan masebeg a mibubusolan ed saray totoo na Dios? Diad Apocalipsis 12:7-9, 17, onebat so Biblia: “Tinmerak so bakal ed tawen: Si Miguel tan saray angheles to so akibakal ed dragon . . . Ontan la so inkibantak na baleg a dragon, say daan ya uleg, say sakey ya atawag na Diablo tan Satanas.” Panoy inkiwas nen Satanas diad inkibantak to a nanlapud tawen diad nipabpaabeban maespiritun ayaman? Kuan na Biblia: “Tan say dragon so sinmanosanok ed bii [mangatatawen a muyongan na Dios], tan linman akibakal ed saray nakekeraan na bini to, a manusumpal ed saray ganggan na Dios tan manggagawa ed kimey na panagtasi ed si Jesus.”

Si Satanas, sirin, so “Gog.” Diad pigamplon taotaon, si Satanas tan saray demonyon armada to so akibakal a sumpad nakdaan na espiritual ya Israel​—say alanaan a Kristianon kongregasyon. (Galacia 6:16) Sarayan Kristianos so nikayat ed interon sankadalinan; sikara so anggapo ed arum a sentron pasen a nayarin dugpaan na saray nanmumuyong a sundalo ed Pegley Bukig. Balet a singa impropesiya nen Ezequiel, sikara so “manaayam ed kaligenan” ed leksab na pananalimbeng na Dios. (Ezequiel 38:11) Say kaplesan-agew a silalaman ya Israel a niliktub na saray managbusol a kakaabay tan manasagmak na akindalem a gonigon diad pulitika tan sosyal, so mairap a sikato so “manaayam ed kaligenan.”

Say Biblia, anggaman kuan, so mangipanengneng a say eksena na mundo so managmak na biglan kauman. Say “Babilonia a Baleg,” say sankamundoan ya imperyo na palson relihyon, so managmak na biglan kadederal. (Apocalipsis, kapitulo 18) Diad kadesyang na palson relihyon, saray nakekeraan a tuan Kristiano so singa ompatnag a mainomay a deralen, tan si Satanas, odino “Gog,” so manggetman maneral ed sikara. Nengnengen ton diad leksab na impluensya na demonyo “et saray arari na interon panaayaman a dalin” so natipon a mankakasakey “diad bakal na baleg ya agew na Dios a Makapanyarin-amin” ed Har-Magedon.​—Ezequiel 38:12-16; Apocalipsis 16:14, 16.

Say “Har-Magedon” so, sirin, aliwan sakey a melag a pasen ed Pegley Bukig. Noag ingen, sikato so sankamundoan a kipapasen. Say interon mundo so napankakasakey diad isusumpa ed si Jehovan Dios tan ed saray tastasi to. (Isaias 43:10-12) Say masebeg a panangataki nen Satanas ed saray tuan Kristianos​—aliwan say pambabakal na nasyones ed sakey a pasen ed Pegley Bukig​—so managdag ed Dios a mibakal diad pangiyagel to ed katooan to!​—Ezequiel 38:18-23; Zacarias 2:8.

Saray tuan Kristianos natan so manggagawa sirin na mas nen say basta mamalpalabas a panagbantay ed Pegley Bukig. Say manunan imano ra et say pangipaarap ed totoo ed no anto so peteg ya ibabaga na Salita na Dios ed sayan onsasabin bakal. Agamoran na saray Tasi nen Jehova so sankamundoan a pakatongtongan diad andi-takot a pangipapasabi ra ed sayan mensahe diad kaabungan na totoo. Anggaman kuan, nayarin sikayo so mankelaw no akin a say Dios na aro so mangitarok ed ontan a bakal. Kasin satan so posiblen naliktaran? Saray onggendan a paway na Say Panag-Bantayan so mangisalaysay ed sarayan mismon tepetepet.

[Saray Paimano ed Leksab]

[Litrato ed pahina 5]

Kasin saray kaplesan a nagagawa ed Pegley Bukig so mangipapasi-ngayew na Armagedon?

[Litrato ed pahina 6]

Kasin say Jerusalem so tombok na saray nagawa a mangipaarap ed Armagedon?