Itultuloy a Paliisan so Patit na Inkaagum

“Manbantay kayo a sumpad agum ed amin a nengneng, ta anggan sano say sakey a too so walaan na dakel nen say magenap, say kayamanan to so agmangiter ed sikato na bilay.”​—LUCAS 12:15, The New English Bible.

1. Akin a say pasakbay nen Pablo a sumpad inkaagum so nipanpanaon?

MANBIBILAY itayo ed sakey a mundon mandadayew ed materyal ya aligwas. Saray interes ed komersyo so pirmin manasagyat ed inkaagum na totoon manpayaman. Say aligwas so mabetbet a susukaten ed kabaleg na kayamanan. Sirin, saray dakel a pasakbay na Biblia a sumpad inkaagum tan saray misiglaotan a bisyo na kaagapan so nipanpanaon. (Colosas 3:5; 1 Timoteo 6:10) Unong ed diksionaryo, say agum tan agap so manulop ed elemento na “pakawalaan odino pangipanengneng na mabiskeg a pilalek ed kaykayarian tan ilautla’d materyal a kayarian.” Say agum so seryoson singa pilalawanan odino panagtalintao, ta impasakbay nen Pablo: “Tundaan yo so miulop ed siopaman a tatawagen na agi a sikato so managlawan odino toon maagum odino managtalintao odino managpabanday odino managbuanges odino managpatubo, agkayo anggan miaakan ed satan a too.”​—1 Corinto 5:11; Efeso 5:3, 5.

2. Antoran pasakbay so inter nen Jesus tan si Jehova ed sikatayo a sumpad kaagapan?

² Pinasakbayan nen Jesus iray patumbok to: “Manbantay a sumpa ed amin a nengneng na kaagapan.” (Lucas 12:15) Tan si Jehovan mismo so angisakup na sakey a ganggan a sumpad sayan bisyo ed saray Samploran Ganggan: “Agmo pipilaleken so abung na kaparam a too. Agmo pipilaleken so asawa na kaparam a too, nisay aripen ton laki nisay aripen ton bii nisay baka to nisay asno to nisay antokaman a kayarian na kaparam a too.”​—Exodos 20:17; Roma 13:9.

Anggapo So Makapan-isiisi

3. Panon a say inkaagum so tinmalona ed si Eva tan diad saginonor ed saray Israelitas?

³ Say katuaan so, anggapo so mamalukak na panagbantay to a sumpad agum tan inkaagap. Sanen nankasalanan si Eva ed hardin na Eden, saman so lapud agum: “Anengneng na bii a say kiew so maong a tagano tan saman so bengatlan kalikaliktan na mata, on, say kiew so kalikaliktan a nengnengen.” (Genesis 3:6) Diad sakey ya inkagawa ed kalawakan, impanengneng na saray Israelitas so makapadimlan inkaagum. Sanen, diad ebat ed saray reklamo ra nipaakar ed impakawalaan da lambengat na mana a kanen, intarya nen Jehova so daakan a pugo, kinmiwas iran singa masisiba tan sikara so adusa na ansakit.​—Numeros 11:4-6, 31-33.

4. Antoran arum a maawaran ya ehemplo so mangipanengneng ed kaatapan na inkaagum?

⁴ Saginonor, diad bakal ed Jerico, agum so anagdag ed si Achan a manakew na pilak tan balitok tan angkablin kawes a manlapud saray sinamsam ed syudad. (Josue 7:20, 21) Say agum so anagdag ed si Gehazi, katulongan nen Eliseo, a manalin onggamor na pinansyal a manlapud mamilagron inkatambal na kating nen Naaman. (2 Arari 5:20-27) Si Arin Ahab so sananey a toon maagum. Inabuloyan toy Jezebel, say paganon asawa to, a mangiplano ed ipatey nen Nabot, say kaabay to, ta pian nakayarian to so ubasan nen Nabot. (1 Arari 21:1-19) Kaunoran, si Judas Iscariote, a sakey a membro na maapit ya ulop nen Jesus, so siaagum ya angusar ed posisyon to a mantakew ed pundo. Tan say agum so angitonton ed sikato a mangitapat ed si Jesus diad 30 piraso na pilak.​—Mateo 26:14-16; Juan 12:6.

5. Anto so naaralan tayo ed eksperiensia na nanduruman nengneng na totoo a naplag ed patit na inkaagum?

⁵ Amin na sarayan maagum so adusa. Balet kasin naimano yo so nanduruman nengneng na totoo a naplag ed patit na agum? Si Eva so sakey ya ayadyarin bii a nanayam ed Paraiso. Si Achan tan saray Israelitas so personal ya akatasi ed saray milagro nen Jehova. Si Ahab so sakey ya ari, angangko ta sikato so sankayamanan a too ed dalin. Si Gehazi tan si Judas so abendisyonan na mayaman ya espiritual a pililimog tan atagey a pribilehyo na serbisyo. Ingen sikaran amin so nagmaliw a maagum. Sirin anggan siopa​—anggaman mayaman, anggaman atagey so pribilehyo to ed serbisyo, odino antokaman so eksperiensia to​—so nayarin napelag ed sayan patit. Agpankelawan ya impasakbay nen Jesus: “Manbantay a sumpad amin a nengneng na kaagapan”!​—Lucas 12:15.

6. Anto so nakaukolan pian napaliisan tayo so patit na inkaagum?

⁶ Balet panon so panggawa tayo ed satan? Dia lambengat ed dangka tan pirmin panangusisa. Say agum so onggapo ed puso. Pian napaliisan so patit na agum, nakaukolan tayon usisaen iray kapusoan tayo a naynay pian nengnengen no ompapatnaglan onlalamut so agum. Tulongan itayo na Biblia a manggawa na ontan. Panon? Para ed sakey a bengatla, inkurit to so imbaga nen Jesus tan saray babangatan to nipaakar ed agum. Sano usisaen tayo ratan a komento, isuhiri ra so saray manangusisan tepet a nepeg tayon itepet ed inkasikatayo pian nengnengen no iner so talindeg tayo ed pamaakaran na inkaagum.

Panangusisa ed Motibo Tayo

7. Panon a say ebat nen Jesus ed toon alanor ed sakey a kolkolan ed tawir so ontulong ed sikatayon mangusisa ed inkasikatayo?

⁷ Say pasakbay nen Jesus a sumpad kaagapan so pinakiwas na sakey a kerew na sakey ed saray dumerengel to: “Managbangat, ibagam ed agik ya iyapagan toak na tawir.” Inmebat si Jesus: “Too, siopa so anuro ed siak ya ukom odino manangapag ed sikayon totoo.” (Lucas 12:13, 14) Insan intuloy to so mamasakbay a sumpad kaagapan. Aglabay nen Jesus so nalanlanor diad pankokolkol nipaakar ed saray materyal a bengatla, nisesengeg ed saray importantin espiritual a kimey a nilaan to dia a sumpalen. (Juan 18:37) Balet sayan tongtongan so mangisusuhiri na manangusisa ran tepet a nayarian tayon itepet ed inkasikatayo. Singa bilang no sikatayo so andi ed partikular a pankaukolan, balet nalikna tayon walaan na pankanepegan ed bengatlan pankokolkolan a kayarian o kayamanan, odino ed sakey a pankokolkolan a tawir. Diad anton kalaknab so pilaban tayo pian manalo ed kaso? Panon kabaleg so isakripisyo tayon serbisyo ed si Jehova odino say relasyon tayo ed agagi pian nagamoran so impasen a kanepegan tayo?​—Uliran 20:21; 1 Corinto 6:7.

8. Panon tayon paliisan so pagmaliw a singa saray eskribas a sinalambit nen Jesus ed Lucas 20:46, 47?

⁸ Imanoen so sananey a komento nen Jesus. Pinasakbayan toray patumbok to: “Manlikas kayo ed saray eskribas a . . . mangakmon ed kaabungan na babalo.” (Lucas 20:46, 47) Agaylan maruksan panangipatnag na inkaagum! Saray Kristianos, siempre, so naobligan mangasikaso ed saray babalo, ya aliwan manabsab ed sikara. (Santiago 1:27) Anggaman kuan, singa bilang no kabat yo so sakey a balon angawat na baleg a kuartan paseguro, tan nakaukolan yo so kuartan magangganat. Kasin say ununan kanonotan yo et say iyasingger ed balo a liknaen yon sikato so sankainomayan a tangguyoren, odino sikato so mankanepegan ya ontulong lapud ‘akaawat na baleg a kuarta’? Odino ipasen a sikayo la so akautang na kuarta, tan natan et problema yo la so manbayar. Kasin liknaen yon patunongen so agla pambayar ed balo, lapud sikato so ‘agla tanton nagonigon,’ odino angangko lapud isipen yon ‘sikato so peteg ya agla mankaukolan na kuarta’? Nepeg a sikatayo so maalwar diad agpanisip ed saray prinsipyon napuliwes sano arapen tayoray problema ed pinansyal.

9. Panon so nayarin kapelag tayo ed patit na ‘pangidayew ed saray personalidad nisesengeg ed dilin pankaabigan tayo’?

⁹ Dineskribe met nen Judas so nengneng na nayarin pangalotan na agum ed sikatayo. Sinalita to so nipaakar ed totoon sinmurob ed Kristianon kongregasyon tan dederalen da diad inkaagum da tan diad malukak a kondukta ra, “a mansumpal a tila ed alenleneg ya akankayarian tan Katawan tayo, si Jesu-Kristo.” (Judas 4) Ontan met, sikara so “mangidadayew ed saray personalidad nisesengeg ed dilin pankaabigan da.” (Judas 16) Agtayo labay so magmaliw a singa satan. Balet imanoen: Kasin naromog tayo so inkasikatayon lablabayen so pangusar na panaon ed saray mayaman a Kristianos tan agmangiiter na malaem ya imano ed saray pobre ed kongregasyon? No ontan, kasin ilaloan tayo so mangungguna ed arum a dalan? (Ipareng so Gawa 20:33; 1 Tesalonica 2:5.) No ipanengneng tayo so inkamaparawes ed saray responsablen totoo ed organisasyon, kasin satan so gagawaen tayo nisesengeg ed aro odino lapud iilaloan tayo so arum a pribilehyo a nitumang? No tua so saginonor, angangko sikatayo, met, so ‘mangidadayew ed saray personalidad nisesengeg ed dilin pankaabigan tayo.’

10. Diad antoran dalan a posibli so pananubo ed pinansyal a manlapud panagdayew tayo ed si Jehova? No saya so gawaen tayo, siopan ehemplo so aaligen tayo?

¹⁰ Sakey ya inkipatnag na agum ya amasanok ed si Jesus a tuloy et samay sanen “aromog [to] ed templo iraman so mansasaliw na baka tan karnero tan malapati tan saray managsalat na kuarta ed saray yurongan da.” Say seseg ed abung nen Jehova so nanggawa’d sikaton mangablog ed saraya diad templo tan imbelyaw to: “Tundaan yon gagawaen so abung nen Amak a sakey ya abung na panaglakowan!” (Juan 2:13-17) Kasin walaan itayo na mipadparan seseg? Sirin maabig so pangitepet tayo ed inkasikatayo: Kasin itongtong ko so pamaakaran na negosyo ed Kingdom Hall? Kasin iyalibansak so kurang na negosyo ed limog na saray kaparak a Kristianos lapud diad kipapasen dan espiritual ya agagi et mairap ed sikara so pangikuan na andi? Kasin uusaren ko so dakel a kaarok ed muyongan diad pamalaknab na negosyok? Peteg, ag-itayo komon siaagum a manggawa na pananubo ya ipoonan so relasyon ed agagi tayo.

11. Antoran Kristianon prinsipyo so ontulong ed sikatayo a mamasiansia ed maptek ya awawey sano ikurang tayo so negosyo ed arum?

¹¹ Kasin labay ya ibaga na satan a saray Kristianos so aglan balot makapantongtong ed negosyo? Andi. Noagta wala so sakey a panaon tan pasen nipaakar ed negosyo, tan sananey a panaon tan pasen na panagdayew. (Eclesiastes 3:1) Anggaman kuan, sano saray Kristianos so manmuyong ed negosyo, agdan balot lilingwanan iray prinsipyo na Biblia. Sano mipakna so sakey a Kristiano ed negosyo, agto nepeg ya anapen so legal iran pakabaraanan pian makalukpos ed moral ya obligasyon to. (Mateo 5:37) Nisay sikato so magmaliw a mapasang odino benggatibo no nalugi so negosyo tan naperdi so kuarta to. Insulat nen apostol Pablo ed saray taga Corinto: “Peteg, sirin, kabaliksan ton amin so katalo ed sikayo no sikayo so mandadaleman ed balang sinansakey. Akin ya agyo la nitepel a sikayo so nasaol? Akin ya agyo la abuloyan so inkasikatayo a nalames?” (1 Corinto 6:7) Kasin nayarian yo, nisesengeg ed kongregasyon, a pilien so pakalames imbes a sikayo so ondunget ed korte?

12. Antoran prinsipyo na Biblia so ontulong ed saraman so mannenegosyo pian napaliisan so patit na inkaagum?

¹² Anggan siopan Kristianon mannenegosyo so nakaukolan a manalwar a tuloy. Natan dakel iran kurang na negosyo so mauge-uges, ingen say sakey a Kristiano so agnayarin onkiwas na ontan. Agton balot nepeg a lingwanan a sikato so sakey a babangatan nen Kristo. Agto labay a sikato so natawag na masaol odino managgawa na pikelkel ya agamil. (Ipareng so Uliran 20:14; Isaias 33:15.) Tan agton balot lilingwanan so pasakbay nen Jesus a sumpad panggawa ed kayamanan a sakey a dios, odino say pasakbay nen Juan a sumpad “pilalek na laman tan pilalek na mata tan mapangtan nengneng na panagbilay na sakey.” (1 Juan 2:16; Mateo 6:24) Bilang sakey a Kristianon negosyante, kasin natulakan yo so tukso na iyapelo ed inkaagum na sakey a too ta pian naparakel so lako? Odino kasin sikayo so mipandanggo ed kakulangkulangan da odino inkakinon da pian napalaknab yo so negosyo yo? Kasin ikiwas yo so sekular a trabaho yo ed nengneng ya agyo labay a tongtongen si Jehova ed satan diad pikakasi yo?​—Mateo 6:11; Filipos 4:6, 7.

13, 14. (a) Anton inkasimbang so nepeg a pansiansiaen na saray mayaman a Kristianos? Tan saraman so aliwan mayaman? (b) Panon a say pikakasi ed Uliran 30:8 so ontulong ed sikatayon mangaral na inkamakatunongan ed pamaakaran na kayamanan?

¹³ Kaunoran, insulat nen Pablo ed si Timoteo: “Saraman so manpilalek ya onyaman so napelag ed tukso tan patit tan dakel a kakulangkulangan tan makapasakit iran pilalek, ya angipalereg ed saray totoo ed kagegeba tan kadederal.” (1 Timoteo 6:9) Aliwan kasalanan so pagmaliw a mayaman, anggaman saray kayamanan so mangitarok na dili ran problema tan tuktukso. (Mateo 19:24-26) Say kaatapan et say ‘pampilalek ya onyaman.’ Alimbawa, inkuan na sakey a matatken: “Say problema so mabetbet ya onlesa sano say sakey a too so onnengneng ed mayaman a Kristianon agi to tan kuanto: ‘Akin ya agak nagmaliw a singa ontan?’”

¹⁴ Isisimbawa na Biblia: “Komon say nengneng na panagbilay yo so bulos diad aro ed kuarta, legan a sikayo so napenek ed kaplesan iran bengatlan. Ta inkuanto: ‘Agtakan balot taynanan nisay kaindanan.’” (Hebreos 13:5) No sika so mayaman, kasin satan so moriaen mon sakey a langkap, bengatlan nayarian mon usaren diad serbisyo ed si Jehova? Diad sakey ya okasyon, imbaga nen Jesus ed sakey a toon walad kalangweran a mayaman a no labay to so ontumbok ed sikato, nakaukolan ton ibunog so amin a kayamanan to. No satan so imbaga nen Jesus ed sika, kasin pilien mo so pamasiansia ed kayamanan mo odino tumboken mo si Jesus? (Mateo 19:20-23) No sika so aliwan mayaman, kasin sika so kontento ed satan? Kasin napaliisan mo so patit na kaagapan? Kasin mabulos kan manmatalek ed sipan nen Jehova: “Agtakan balot taynanan nisay kaindanan”?​—Nengnengen met so Uliran 30:8.

Magmaliw a Mayaman ed Dios

15, 16. (a) Anton ilustrasyon so inusar nen Jesus diad pamabiskeg na simbawa to nipaakar ed kaagapan? (b) Anto so manunan problema na samay too ed parabolo nen Jesus?

¹⁵ Sanen pinasakbayan nen Jesus iray dumerengel to a “manbantay a sumpad amin a nengneng na kaagapan,” intuloy ton imbaga so nipaakar ed sakey a dumaralos a saray uma to so nanbunga na daakan. Say too so ginmapon nankatunongan ed inkasikato, a kuanto, ‘Anto so gawaen ko, natan ta andian ak la na pangikargaan ed saray naanik?’ Kanian inkuanto, ‘Saya so gawaen ko: Igebak iray kamalir ko tan mangipaalagey ak na babaleg, tan ditan ko isempen so amin ya ilik ko tan amin a bengatlan maabig; tan ikuan ko ed kamarerwak: “Kamarerwa, walaan ka na dakel a maabig iran bengatla a tinipon ed dakel iran taon; manpainawa ka, mangan ka, oninum ka, manliket ka.”’ Anggaman kuan, diad saman a mismon labi, say too so inatey. Amin na saray tinipon ton kayamanan so ag-akatulong ed sikato. Insampot nen Jesus: “Ontan so toon mantipon na kayamanan ed inkasikato ingen ta aliwan mayaman ed Dios.”​—Lucas 12:16-21.

¹⁶ Kasin saman a too so akagawa na mauges a kasalanan, a singa say alabas a panagpatubo odino panagtakew? Ag-ibabaga na parabolo. Ingen, sikato so walaan na problema. Sikato so nanmatalek ed kayamanan to a para ed maligen ya arapen tan nilingwanan to so bengatlan mas importante: say pagmaliw a “mayaman ed Dios.” Eksakton ontan lapud saray Kristianos so manggagawa ed relasyon da ed Dios a sikato so sankaimportantian a bengatla ed bilay da a papaliisan da so patit na inkaagum tan sirin aliwa ran kabiangan na mundo.​—Juan 17:16.

17. Panon so panmoria na sakey a Kristianon asimbang ed problema na panag-anap na pambilay?

¹⁷ Aminsan ya insimbawa nen Jesus: “Agkayon balot mapaga tan kuan yo, ‘Anto so kanen mi?’ odino, ‘Anto so inumen mi?’ odino, ‘Anto so isulong mi?’ Ta amin na saraya so bengatlan magunaet ya aanapen na nasyones.” (Mateo 6:31, 32) Tua, amin tayo so nidudunget ed parehon problema ya “aarapen na nasyones.” Maslak ed sikatayo so nakaukolan a mankimey na impasya pian manbilay diad panaliw ed saray nakaukolan a bengatlan kanen, inumen, tan isulong. (2 Tesalonica 3:10-12) Ingen agtayo labay ya abuloyan iratan a manalona ed pagmaliw tayon “mayaman ed Dios.”

18. Panon a say talek ed si Jehova so ontulong ed sikatayon makapaliis ed patit na inkaagum?

¹⁸ Si Jehova so subol na amin a kayamanan. (Gawa 14:15, 17) Insipan to so nikaduman pangasikaso ed saray ariripen to. Inkuan nen Jesus: “Kabat na mangatatawen ya Ama yo a nakaukolan yo so amin na sarayan bengatla. Itultuloy yo, sirin, ya anapen ya ununa so panarian tan say inkatunong to, tan amin na sarayan bengatla so niyarum ed sikayo.” (Mateo 6:32, 33; Salmo 37:25) Kasin sikayo so manisia ed satan a sipan? Kasin sikayo so matalek a satan so sumpalen nen Jehova? Kasin sikayo so napenek ed saray itarya nen Jehova? No ontan, nayarian yon paliisan so patit na inkaagum. (Colosas 3:5) Say serbisyo yo ed si Jehova tan say relasyon yo ed sikato so naynay a walad unaan, tan say interon dalan na bilay yo so mangipatnag na pananisia yo ed sikato.

Kasin Nanonotan Yo?

◻ Antoran nengneng na totoo so inapekto na inkaagum?

◻ Panon so pakapambantay tayo a sumpad inkaagum?

◻ Panon so pangipatnag no maminsan na agum ed inkasikato?

◻ Antoran tepet so ontulong ed sikatayon makanengneng no kasin papaliisan tayo so patit na inkaagum odino andi?

◻ Anto so baleg a salimbeng a sumpad inkaagum?

[Antikey a Paimano ed pahina 17]

Sano mannegosyo, saray Kristianos so agbalot mangilingwan ed saray prinsipyo na Biblia