Ag-agew a Singa “Saray Agew nen Noe”
“Say dalin so napno na karawalan . . . sikato so aderal, lapud amin a laman so aneral ed dalan to ed dalin.”—GENESIS 6:11, 12.
1, 2. (a) Diad antoran nengneng na karawalan so kidudungetan na saray Tasi nen Jehova natan? (b) Diad antoran sirkumstansya a saray totoo na Dios so niligliwa na ilalo ed kioli?
KARAWALAN! A singa ed agew nen Noe, ontan met natan, say karawalan so nagmaliw a bungay-sangi ed sankaabungan. Anggan saraman so mikukurang ed tuan Dios, a singa ginawa nen Noe, so aliwan ilwam ed karawalan. Saya so mabiskeg a nitawag ed imano na mundo sanen, nen Hulyo 21 nen katantaon, sakey a Kingdom Hall na saray Tasi nen Jehova ed Sydney, Australia, so ginaygay na sakey a bomba legan na mapublikon paliwawa ed Biblia nipaakar ed katooran ed Dios tan diad pamilya. Sakey a Tasi so inatey. Masulok ya 40 so naospital. Amin na saraya so inmabig la, anggaman arum so apigpiglatan bilang resulta na sayan karuksaan na krimen. Inkomento na sakey a pulis: “Wala so 110 a totoo ed dalem tan milagro ya andian itayo na 110 ya inatey.”
2 Diad arum a pasen na dalin—a singa ed Baybay ya Ireland, Lebanon, tan El Salvador—iyaabawag na saray Tasi nen Jehova so “maong a balita” diad utel na pirmin karawalan. Pigara so inatey, arum legan a mibibiang ed ministeryo. Diad dakel iran dalin say “ag-inilaloan a nagawa,” a singa saray aksidente tan yegyegyeg, so anigway na mablin bilay, a diad saratan et saray totoo nen Jehova so niligliwa na ilalo ed kioli.—Eclesiastes 9:11; 1 Tesalonica 4:13, 14.
3. (a) Anto so nayarin nagawa ed arum a totoo nen Jehova a singa impanengneng na agano niran agawgawa tan diad Lucas 21:16? (b) Anton paseguro so walad sikatayo diad pananalimbeng na Dios legan na “baleg a kairapan”?
3 Agni abayag diad Mexico, 23 Tastasi tan kalimog da so kabiangan na masulok a 5,000 pinatey na makadesyang a yegyeg. Diad Puerto Rico, pitora nin arum so nibilang ed limog na 300 ya akabalang na bilay da diad saray delap tan inkageraygeray. Kasin kabaliksan na saya a si Jehova so sinmaew a manalimbeng ed ariripen to? Sikatayo so aliwan ilwam ed saray aksidente tan desyang. Tan no nipaakar ed panamasegsegang, pinasakbayan nen Jesus iray babangatan to, a kuanto: “Iyan da so arum ed sikayo diad ipapatey.” Nilasus ed saray agagi tayo so inatey diad maruksan taklay nen Nazi Hitler. Amin na saratan so nonoten nen Jehova diad kioli. Anggaman kuan, no say nipasakbay a “baleg a kairapan” so ombasig ed dalin, ipanengneng nen Jehova a nayarian ton iliktar iraman so ontawag ed ngaran to a singa ginawa to ed saray agew nen Noe.—Lucas 21:16-19; Mateo 24:14, 21, 22, 37-39; Isaias 26:20, 21; Joel 2:32; Roma 10:13.
4. Panon so kipareng na saray kaplesan-agew a kipapasen ed saraman so adeskribe ed Genesis 6:11, 12?
4 Nanlapulad 1914 say karawalan so sankagloboan a karuksaan. Sanlasus milyon a totoo so inatey ed saray bakal tan saray desyang ed sayan siglo. Say katooan so binakbak na saray panaghaydyak ed tagey tan diad dayat, saray panagbomba na terorista, palaspas a panagpatey, tan saray pambubusolan ed rasa, tan kekebbiewen na idaraak na armas nuklar. Peteg, saraya so “maatap a panaon” diad “egagel na nasyones, ya agda amta so dalan a pawayan da.” (2 Timoteo 3:1-5, 13; Lucas 21:25) Anggaman kuan, saray totoo nen Jehova natan so manbibilay ed utel na sakey a salot a mangipaparungtal na mas babaleg a kaatapan nen say karawalan, anggaman satan so mabetbet a nisiglaot ed karawalan. Satan so apetsaan ni ed apalabas a masulok a 4,300 taon diad agew nen Noe. Anto’tan?
Pananisia nen Noe ed Utel na Karutakan
5, 6. (a) Panon so intuloy nen Satanas a manutak ed katooan? (b) Diad antoran dalan a si Noe tan say pamilya to so miduma ya aliwan kabiangan na saman a mundo?
5 Manlapud samay impanrebelde ed Eden a manpatuloy, si Satanas a Diablo so masebeg a “mamapalikdo ed interon atooan a dalin.” (Apocalipsis 12:9) Ingganggan nen Jehova so laki tan bii a mangusar ed inter-na-Dios a pakayari ra ed sekso a magalang diad dalem na oksuyan na panangasawa, ta pian “panoen da so dalin” ed nengneng da. (Genesis 1:28; Hebreos 13:4) Balet say Diablo so nandutak ed katooan diad mauges a sekso. Panon? Saray espiritun anak na Dios so akiulop ed Satanas diad impanrebelde. Saraya so nagmaliw a “demonyo,” a si Satanas so “manuley” da. (Lucas 11:15) Tan ed anto so tugyopen na kimey na saray demonyo? Sikara so inmakseb ed dalin, nankinon-too, tan angasawa ed saray magagangganan anak-a-bibii na lalaki. Say nansumpalan so makapakebbiew!
6 Apawala iray misteson ilalak, silalaman iran alan a kapalduan demonyo, kapalduan too. Saraya so Nephilim, manamatey a “Manangipelag” ed katooan, a singa ipapanengneng na kuritan: “Tan say dalin so aderal ed pakanengneng na tuan Dios tan say dalin so napno na karawalan. Sirin anengneng na Dios so dalin tan, nia! sikato so aderal, lapud amin a laman so aneral na dalan to ed dalin.” Say karawalan tan seksual a karutakan so nagmaliw a kasmak a si Noe lambengat so akapangibagaan na: “Pinaneknekan to so inkasikaton andi-kasalanan ed limog na kapolian to. Si Noe so akikurang ed tuan Dios.” Say asawa to, ilalak to, tan saray kaasawaan da—bukbukor da lambengat ed amin a katooan—so angipanengneng na pananisia tan maridios a takot. Mapatnag, say linya na pamilya nen Noe so agdinutakan na seksual a karutakan ed agew to.—Genesis 6:4, 9-12, Ref. Bi., paimanod’leksab.
7. A singa nipanengneng ed agew nen Noe, panon so pangukom nen Jehova ed mauges tan matunong? (Ipareng so Mateo 25:40, 45, 46.)
7 Saman a maruksa, ambagel-ed-sekso, demonistikon mundo so pinunas nen Jehova. Indapo to so baleg a Delap, nilimas to so amin a bengatlan mauges. Saray misteson Nephilim tan mauges a totoo so nitakos ed impakalingwan, bang saray demonyon datin ananak na Dios so akaliktar diad impawil da ed maespiritun ayaman—ya aalagden da so panangukom na Dios ed sikara. Balet walaray niliktar! Asalba si Noe tan say pamilya to. Tan akin? Lapud pananisia ra, a pinabiskeg na saray kimey diad impangipaalagey na biong tan diad impanpulong na inkatunong ed saman a kinondenan mundo.—2 Pedro 2:4, 5.
Totoo Natan, Manalwar!
8. Diad antoran pamaakaran a say agew nen Noe so mangiyanino ed agew tayo?
8 Inretrato na agew nen Noe so agew tayo. Panon so pikabat tayo ed saya? Bueno, impasakbay nen Jesus so miulibay a panaon na karawalan, kaugsan tan inkaandian-na-aro a bilang kabiangan “na tanda” a sikatayo so akatanyareg ed tambib na “baleg a kairapan ya agni agawa nanlapulad gapo na mundo, andi, nisay nagawa lamet.” Inkuanto met: “Nipaakar ed satan ya agew tan oras anggapo so mikabat, . . . noagta say Ama lambengat.” Insan inyarum to: “A singa ed saray agew nen Noe, ontan so kiwawala na Anak na too. Ta unong a diad saraman ya agew sakbay na delap, sikara so nanaakan tan naniinum, saray lalaki so angas-asawa tan saray bibii so akias-asawa, ya anggad agew ya inloob nen Noe ed biong; tan agda inimano ya anggad sinmabi so delap tan intakos toran amin, ontan so kiwawala na Anak na too.”—Mateo 24:3-21, 36-39.
9. Panon so pakapaliis tayo ed destino na saraman so ‘agmangiimano’?
9 On, “agda inimano.” Ingen agnakaukolan a sikayo so magmaliw a singa sikara. Nayarian yon liktaran sano say Katawan a Jesus so nipatnag a manlapud tawen, ya idapo to so panangibales na Dios diad andi-anggaan a paneral ed “saraman so agmikabat ed Dios tan saraman so agmangunor ed maong a balita nipaakar ed Katawan a Jesus.” (2 Tesalonica 1:7, 8) Agyo nakaukolan so magmaliw a singa saray minumundon totoo a say manunan interes da ed bilay et say pamaliket da ed inkasikara, a gegemtanen daray dederlengen a karera odino materyal a kayamanan ya andian na panag-isip ed Dios. Peteg, say “dios da et say eges da.”—Filipos 3:19.
“Gulaen So Mauges”
10, 11. (a) Pian nagamoran so abobon na Dios, antoran bisyo so nepeg a paliisan? (b) Anton ayura so nepeg tayon isulong, tan akin?
10 Diad sarayan kaunoran ya agew, say bilay na dakel a totoo so nisentro ed sekso, walaan odino andian na gungguna ed panamaley. Tan diad dakel ed saraman so walaan na asawa, say diborsyo odino panamultot na panamaley so kaslakan. Agda iimanoen so mabitar a pasakbay na saray babangatan nen Jesus, dakel ed Kakristianoan so nipapaglet ed homoseksualidad. Arum ed saraya so “mangaawat la na nagnap a tumang diad porma na AIDS tan arum iran makaalis a sakit ed sekso. Anggaman kuan, wala so ilalo na kilalaban anggan diad ontan iran totoo. Nodnonoten, sinalita nen Jesus a maapabor iray balangkantis a nilinisan daray bilay da tan anisia ed sikato, a miduma ed saray makinon, agmanagbabawin papangulo na relihyon ed agew to.—Roma 1:26, 27; 2 Pedro 2:9, 10; Judas 6, 7; Mateo 21:31, 32.
11 Anggan siopa ed saray totoo nen Jehova ya arutakan na, odino atukson mibiang ed, imoral iran gawa so nepeg a naliing tan mangisulong ed nagnap ya ayuran itatarya na Dios! (Efeso 6:11-18) Sarayan agew so tuan “singa saray agew nen Noe.” Satan a “managlem a leon,” say Diablo, tan saray mauges a demonyos to so pirmin mankikimey diad pangipuera tan pamatit ed saray ariripen na Dios. Nepeg tayo so ontalindeg a sumpad saratan a kakabusol, putel ed pananisia.—1 Pedro 5:8, 9.
12. Akin ya importante so panumbok ed simbawa na Salmo 97:10?
12 Makapakigtot a singa satan, anggan arum ed saray prominente ed muyongan nen Jehova so naplag ed imoral a gawa, a pati say homoseksualidad, panagsalat na asawa, tan panag-abuso ed ugaw. Nepeg ya imanoen, met, a legan na apalabas a taon, 36,638 totoo so inekal ed Kristianon kongregasyon, dakel ed sikara so diad imoral a gawa. Say organisasyon nen Jehova so nepeg a mansiansian malinis! (1 Corinto 5:9-13) Saya so sakey a panaon pian saray mamatatken na kongregasyon, ministeryal ya ariripen, tan peteg amin ya agagi tayon lalaki tan bibii so ompaliis ed anggan anton sirkumstansya a mangitonton ed imoralidad. Say katooran ed saray estandarte nen Jehova so natumangan, a singa ibabaga na Salmo 97:10: “O sikayoran manangaro ed si Jehova, gulaen yo so mauges. Bantayan toray kamarerwa na matoor ed sikato; sikara so iliktar to a manlapud lima na marelmeng.”
13. Anton maabig a simbawa so inter nen apostol Pablo tan Pedro?
13 Diad sankaganoan, say “baleg a kairapan” so manlinis ed amin na saraman “so makapadimla ed karutakan da.” Agaylan sikatayo so siiimano a nepeg tayon gulaen, on, dimlaen, tan paliisan so minumundon karutakan! Nepeg tayon “ibatikan so pilalawan”! (Apocalipsis 21:8; 1 Corinto 6:9, 10, 18) Si apostol Pedro, kayari na impamasakbay to a sumpad saray apostatan manangisibbuag-na-panduaruwa tan nipaakar ed kapetegan na “agew nen Jehova,” so amilin ed sikatayo diad “saray masanton kimey na ugali tan gawa na maridios a debosyon.” Inyarum to: “Balet walaray balon katawenan tan sakey a balon dalin ya aalagden tayo unong ed sipan to, tan saraya so panayaman na inkatunong. Sirin, inararo, lapud sarayan bengatlan so aalagden yo, gawaen yo so anggaan na nayarian yon naromog ed kaunoran ya andi-matik tan andi-tilol tan diad kareenan.” Agaylan gayaga sirin so pakagamor ed “balon dalin,” a ditan et ‘gawaen [na Dios] so amin a bengatlan balo’ tan malinis!—2 Pedro 3:3-7, 10-14; Apocalipsis 21:1, 4, 5.
Imanoen So Kaaruman ‘Iran Pasakbay ya Ehemplo’
14. Akin a say impanlinis na Delap so temporaryo lambengat?
14 Kayari na impanlinis na baleg a Delap ed dalin diad amin a denidemonyo tan atooan a karutakan, inulit nen Jehova so ganggan ton datin niiter ed si Adan, diad impangikuanto ed si Noe tan saray ilalak to: “Manbunga kayo tan ondakel kayo tan panoen yo so dalin.” (Genesis 9:1) Saya so ginawa ra, 70 “pamilya”—piguratibon ayadyarin bilang—a nilista ed Genesis kapitulo 10. Ingen say katooan so siansia nin maniirap ed saray epekto na kasalanan ya atawir ed si Adan. Tan mapatnag a say impluensya na demonyo so angitonton lamet ed totoon onlereg ed seksual a karutakan.
15. Anto so naaralan tayo diad impangukom na Dios ed Sodoma?
15 Kabekta, say “kaaro” nen Jehova, si Abraham, tan si Lot a kaanakan nen Abraham so nanayam ed Canaan. Pinili nen Lot so onalis ed Distrito na Jordan, a saman so “singa say hardin nen Jehova.” Balet kasin ontan ed moral? Arawin ontan! Say syudad na Sodoma, a nanayaman nen Lot, tan say kabangibang ton Gomorra so atabek na homoseksualidad. Anggapo so anggan samploran totoon matunong a naromog diman. Nisengeg ed sayan rason, intarok nen Jehova ed saraman a syudad “so maptek a pananusa na andi-anggaan ya apuy.” Saraman a marutak a syudad so aglan balot nipawil! Insita nen Jesus so panangukom na Dios ed Sodoma, dingan na saman so agawa “ed saray agew nen Noe,” diad impangidanet to’d pankaukolan tayo a manbantay!—Genesis 13:10; 18:32; Judas 7; Lucas 17:26-30.
16. Anton pakurang na demonyo so mankaukolan ed sikatayo na impasyan pibabakal nipaakar ed pananisia?
16 Agnalingo! Si Satanas tan saray demonyos to so siansia nin mamipisak! Anggaman kuan nibantak la ed piguratibon “abot na makdel a kabilungetan” tan nipuger ed agla pakayarin mangisulong na silalaman a laman, saratan ya espiritun marutak so manggetman manesyang ed totoo, tan nagkalautla’d saray ariripen nen Jehova. (2 Pedro 2:4-6) Andi-duaruwan saray demonyo so angimpluensya ed Canaan diad panggawa na imoral ed si laki ton Noe. (Genesis 9:22-25) Peteg ya inkamayat da so kapikelkelan a nagmaliw a ‘say dalan ed dalin na Canaan,’ ta pian diad kaunoran et sikato so angibuga ed saray manaayam ed sikato. (Levitico 18:3-25) Ontan met, saray demonyo so angisugsug na karutakan ya agamil ed sekso ya amairap ed dakel a pasen. Diad mabiskeg a pibakal ed pananisia, nakaukolan tayon tulakan so anggan anton panangataki na saratan a naplag ya angheles a manadagdag ed totoon ‘manggawa na alablabas a pilalawanan tan diad karutakan ed laman.’—Judas 3, 6, 7.
Manpaalagey a para ed Kipreserba
17. Singa si Noe tan say pamilya to, panon so nayarin pangipanengneng tayo na inkasikatayon aliwan kabiangan na mundo?
17 Nisesengeg ed kaseryosoan na panaon tayo, panon so pakaromog tayo ed dalan na kililiktar? Bueno, panon so inkiliktar nen Noe tan say pamilya to? “Diad pananisia si Noe . . . so angondena ed mundo.” (Hebreos 11:7) Ontan met natan, saray Tasi nen Jehova so “aliwan kabiangan” na marelmeng a mundo. Nagkalalo ni, impatnag tayo so pananisia tayo diad impangidedika tayo na bilay tayo ed si Jehova tan diad inkabautismoan ed danum ta pian magmaliw a babangatan nen Jesu-Kristo.—Juan 17:14, 16; Mateo 28:19.
18. Anto so intipo na impangipaalagey ed biong?
18 Nagkalalo ni, mibibiang itayo ed kimey nen Jehova a para ed sayan agew, sakey ya espiritual a kimey na panagpaalagey ya ididirihe nen Babaleg a Noe, si Jesu-Kristo. Bilang sakey a pasen na kaligenan tan kililiktar, say biong so mangirerepresenta ed espiritual a paraison ipapaalagey nen Jehova ed limog na saray managdayew ed sikato nanlapulad 1919. Sikato so kipapasen na nipawil a mareen a relasyon ed Dios. Satan so oksuyan To a para ed kililiktar na antitipikon pamilya na Babaleg a Noe diad “baleg a kairapan.”—Mateo 24:21; 1 Corinto 3:9, 11; 2 Corinto 12:3, 4; Apocalipsis 7:13, 14.
19. Si Noe, membro na pamilya to, tan say kimey da so angiyanino ed anto?
19 “Aromog nen Noe so panamalangkap ed pakanengneng nen Jehova.” Agaylan maabig ya inretrato to si Jesu-Kristo, ya akipankurang a mapaabeba ed Dios diad dalin, ya agto ginawa so dilin linawa to! (Genesis 6:8; Mateo 17:1, 5; Juan 8:28) Sikaran dua so managpulong na inkatunong—sakey a maabig ya ehemplo na amin a tastasi nen Jehova. Tan maseguro itayo a say asawa nen Noe, ya iyaanino to so nakdaan na alanaan ed dalin natan, et sakey a modelo na panagpasakup. (2 Pedro 2:5; Lucas 4:14-19; Efeso 5:21-24) Sano imanoen tayo so agaylan kabaleg na kimey ed panagpaalagey na biong a kiliktaran, naisip tayo no panon so liket nen masiken a Noe diad inkawalaan to na taloran enerhetikon katulongan ya ilalak a lalaki tan saray kaasawaan da! Matukotukoy a saraya so mangireretrato ed kaplesan-agew ya “baleg ya ulop” a mangisasakbat na baleg ed espiritual a kimey na panagpaalagey legan na kaunoran lan panaon a mamaarap ed antitipikon Delap.—Apocalipsis 7:9, 15.
20, 21. (a) Antoran masnag ya ilalo so manatalaran ed saray managdayew ed si Jehova diad alinisan a dalin? (b) Anton gayaga so naeksperiensia la ya anggan natan?
20 Sano sayan dalin so nalinisan, akaparaan a napasimbalo ed literal a paraiso, saramay inretrato na ilalak nen Noe tan saray mamanugang to so nayarin diad sakey a panaon et manilalak ira ed inkatunong. Insan say milagro na kioli so mangitarok ed kakumpleto na kapano na dalin ed totoo. Amin a mangawat na pribilehyon magmaliw ya “arum a karnero” nen Jesus so nipawil ed inkayadyari, tan diad pakaliktar ed unor a subok kayari na pangiyawat nen Kristo ed Panarian diad si Ama to, saraya so niyabawag a matunong a para ed maandon bilay.—Juan 5:28, 29; 10:16; 1 Corinto 15:24-26; Salmo 37:29; Apocalipsis 20:7, 8.
21 Agaylan gayaga so manatalaran ed saray matoor a managdayew ed si Jehova! Balet say baleg a gayaga so naromog anggan natan diad sigpot-puson pibibiang ed panagpaalagey na modernon-agew a biong a para ed kililiktar. Panon so iyaaligwas na satan a kimey? Say ontumbok a paway tayo so mangiter na ebat.
PANON SO IYEBAT YO?
◻ Panon a saray sakbay-Delap ya agawgawa so mamasakbay ed sikatayo?
◻ Antoran leksion so naagwat tayo a manlapud Mateo 24:37-39?
◻ Akin ya importante so “panggula ed mauges”?
◻ Panon so nayarin pakapibiang tayo ed panagpaalagey na antitipikon biong?
[Kahon ed pahina 19]
SINGA ‘AGEW NEN NOE’—
“40 porsiento lambengat ed saray managbangat na relihyon ed kolehyo . . . so manisian imoral ed aliwan sanasawan laki tan bii a manakdol.”—Saturday Oklahoman & Times, Disyembre 29, 1984
[Kahon ed pahina 20]
Kasin Makana So Prinsipyo na Biblia?
Dinengel na sakey a parin Episkopalyano so serbisyo na ponpon ya impaliwawa na sakey ed saray Tasi nen Jehova. Kayari to, diad imbitasyon na pari, duaran ministro a nanlapud Watch Tower Society so inmatendi ed sakey a diskusyon diad pigaran klero ed Brooklyn Heights, New York City.
Say isyu ed homoseksualidad so tinmalindeg. Impalinew na saray Tasi a saya so isesebel na Biblia tan saray Tasi so mangekal ed saray totoon mangagamil na anggan anton nengneng na imoralidad. (Roma 1:24-27; 1 Corinto 6:9, 10; Judas 7) Tinepet na saray Tasi so talindeg na klero ed sayan pamaakaran tan naawat da so onggendan ya ebat:
Sakey a Kongregasyonal a ministro: “Isipen kon walaan kami na ley na panangekal diad saray totontonen na iglesia mi, balet diad bilay ko, et agko nanonotan so impanumbok mi ed satan a ganggan!”
Say parin Episkopalyano: “No satan a ganggan so tumboken mi, andian kami na membron [natilak].”
Sakey a Katolikon monsenyor: “No satan a ganggan so tumboken mi, andian kami na anggan siopan parin [natilak].”
Anggaman saray komento na sarayan klero so nayarin mangilablabas ed pamaakaran, saray Tasi nen Jehova so maliket nipaakar ed dilin mabiskeg a talindeg da diad pamapasiansia ed kongregasyon a malinis. Sikara so “aliwan kabiangan na mundo.”—Juan 15:19.
[Kahon ed pahina 21]
SINGA ‘AGEW NEN NOE’—
“Nilukas ed Manhattan so publikon eskuelaan a para ed homoseksual iran estudyante ed New York City.” Kuan na maestro: “Kaliktan mi so kaliberliber a saray bakla tan tomboy so agnisilong ed aliwan matatken iran tin-edyer.”—The New York Times, Hunyo 6, 1985
[Kahon ed pahina 22]
SINGA ‘AGEW NEN NOE’—
“Saray membro na Riverside Church nen karuman so angaproba na kampi-ed-baklan totontonen a mangawat ed relasyon a homoseksual a bilang kabiangan na bangat na Kristianon bilay na pamilya.”—New York Post, Hunyo 3, 1985