No Panon So Pakapikabat Tayo ed Dios

ARUM a totoo so manisia a say Dios so wala ed amin a pasen, presente ed saray bibitewen tan planeta, diad kabunlalakaw, diad payak na manok, diad bulong na dika. Anggaman kuan, ibabangat na Biblia a say Dios, bilang sakey a Persona, so walaan na pihon pasen. Inkuan nen makabat ya Arin Solomon diad pikakasi ed Dios: “Nepeg mo met so ondengel a manlapud katawenan, say niletneg a pasen na ayaman mo.” Tan diad libro na Biblia ya Isaias, say Dios a mismo so naaon a mangibabaga: “Saray katawenan so tronok.”​—1 Arari 8:49; Isaias 66:1.

Anggaman say Dios a mismo so aliwan presente ed palsa to, saray kaugalian a personalidad to so nisindag ditan. Kuan nen apostol Pablo ed Roma 1:20: “Saray agnanengneng a kalidad to so mabitar a nanengneng a manlapud inkapalsa na mundo, lapud sikara so atebek ed panamegley na saray bengatlan agawa, anggan diad maandon pakayari tan inka-Dios to.” Say salmista David so mipadparan angisulat: “Saray katawenan so mangiyaabawag ed gloria na Dios; tan diad gawa na saray lima to so ipapaliwa na liwang. Sakey agew ed kayari na sananey ya agew et gawaen to so salitan ompaway, tan sakey a labi ed kayari na sananey a labi et ipatnag to so pikakabat.”​—Salmo 19:1, 2.

On, ontangay ed mabitewen a labi tan umamengen ed sankasikmat so abalbaleg a kakabatan tan pakayarin nakaukolan diad pamalsa tan panamasiansia ed talba tayo! (Ipareng so Isaias 40:26.) Peteg, say palsa so sakey ya agnaupotan a subol na impormasyon nipaakar ed personalidad na Dios. Tan agbalot nagnap a natebek na too so abalbaleg a pantasin ipaknol to nipaakar ed saray kalidad tan atributos na Dios. Say libro na Job so mangipapanonot ed sikatayo: “Nia! Saraya so mapaway a kabiangan na saray dalan to, tan agaylan esaes na sakey a bengatla so nadngel ed sikato!” (Job 26:14) Wala so karaanan a balikas na Sueko: ‘Say katawan so babaleg nen saray kimey to.’ Matukoy, no say palsa so baleg, say Dios so nepeg ya abalbaleg; no say palsa so mangipaparungtal na kakabatan, say Dios so nepeg a lalon makabat; no say palsa so mangipaparungtal na biskeg, say Dios so nepeg a lalon mabiskeg!

Say Biblia​—Libro na Dios

Sirin say palsa so mangipaparungtal na malaem ya impormasyon nipaakar ed Dios. Anggaman kuan, kasin say panaral ed palsa so mangibaga ed sikayo ed ngaran na Dios? Kasin iparungtal to no anto so gagala a walad benegan na palsa odino no akin ya aabuloyan to so karelmengan? Saray ebat ed saratan a tepet so mankaukolan na mas nen say panaral ed materyal iran gawa na Dios. Mapalar, anengneng na Dios a say ontan ya impormasyon nipaakar ed sikato so nidatak ed Biblia.

Ditan et say Dios so agbalot nipresenta a bilang sakey ya abstrakto, agnaisalaysay a katudioan odino sakey a lawas-presentin puersa o pakayari. Diad Gawa 3:19 et nabasa tayo so nipaakar “ed persona nen Jehova.” Sanen say Anak to, si Jesu-Kristo, so apaoli a manlapud saray inaatey, ibabaga na Biblia a sikato so linmoob ed tawen a mismo pian ompatnag ed arap “na persona [literal, “lupa”] na Dios.” (Hebreos 9:24, Kingdom Interlinear) Peteg, agbalot tinawag nen Jesus so Dios a sakey a Baleg a Puersa, Lawas a Katudioan, odino anggan anton arum ya abstrakton termino sanen sikato so angipaliwawa nipaakar ed sikato odino nampikasi ed sikato. Diad kasuniyan, mabetbet a sikato so tinawag to na mangatatawen ya Ama, sakey a terminon mangipaparungtal na aralem ya inkamaapit to ed Dios.​—Mateo 5:48; 6:14, 26, 32.

Say Dios sirin so aliwan sakey ya andian-na-ngaran a “Bengatla” noagta ingen sakey a Persona a walaan na sakey a ngaran. Ibabaga na Salmo 83:18: “Pian saray totoo et nakabatan da a sika, a say ngaran mo et Jehova, sika lambengat so Sankatageyan ed amin a dalin.” Tua, uusaren met na Biblia iray titulo odino saray manangipaliwawan termino a para ed Dios: “Makapanyarin-amin,” “Ari ed ando lan ando,” “manangilaban,” “Pastol,” “Kadaanan na saray Agew,” “manangasikaso,” “Baleg a Managbangat,” “Baleg a Managgawa,” “Dampay.” (Rut 1:20; 1 Timoteo 1:17; Isaias 43:11; Salmo 23:1; Daniel 7:9, 13, 22; 1 Pedro 2:25; Isaias 30:20; 54:5; Deuteronomio 32:4) Saray ontan a termino, anggaman kuan, so mangipapatnag na malaknab a nengneng na personalidad na Dios, a singa say inkamakapanyarin-amin to, say maaron panangimano to ed saray totoo to, tan say agnatukor a kakabatan to.

Lapud say Dios so sakey a Persona, sikato met so walaan na saray labay tan aglabay​—anggan saray liknaan. Ibabaga na Biblia ed sikatayo so panangaro to ed totoo (1 Arari 10:9), manliket ed saray kimey to (Salmo 104:31), gulaen to so panagtalintao (Deuteronomio 16:22), tan nasakitan diad karelmengan. (Genesis 6:6) Diad 1 Timoteo 1:11 et sikato ni so atawag “na maliket a Dios.”

Pikabat ed Dios a Maapit

Tua, anggapo so kanonotan na toon malugar a tuloy a mangarga ed interon kipatnag na personalidad na Dios. “O agaylan kaaralem na kayamanan tan kakabatan tan pikakabat na Dios! Agaylan agnausisa so panangukom to tan agnasuysuy iray dalan to! Ta ‘siopa so mikabat ed kanonotan nen Jehova, odino siopa so nagmaliw a managsimbawa to?’” (Roma 11:33, 34) Anggaman kuan, para ed sakey a walaan na pananisia, say Dios so peteg a singa anggan dinan ya arum a persona. Ibabaga na Biblia ed sikatayo a si Noe so “akapanakar ed tuan Dios,” a singa no si Jehova so wala ed mismon dikingan to. (Genesis 6:9) Say Dios so petepeteg met ed si Moises a singano sikato so “makakanengneng ed Sakey ya agnanengneng.” (Hebreos 11:27) Tan diad si Abraham et nibaga a sikato so “kaaro nen Jehova.”​—Santiago 2:23.

Siempre, personal ya imparungtal na Dios so inkasikato ed si Noe, Abraham, tan ed si Moises. ‘Bueno, no iparungtal na Dios so inkasikato ed siak ed ontan a personal a nengneng,’ nayarin ikuan na arum, ‘nayarin sikato met so petepeteg ed siak.’ Nonoten, anggaman kuan, a si Noe, Abraham, tan Moises so andian na Biblia. Agda kabat so nipaakar ed si Jesu-Kristo nisay ed amin na saray dinosenan propesiya a sinumpal to. Bilang nansumpalan, amin ya imparungtal nen Jesu-Kristo nipaakar ed Dios so agda kabat. Diad leksab na ontan iran kipapasen, nakaukolan tan manepeg ed Dios so panggawa ed ontan a direktan panangipatnag to na inkasikato.

Natan, anggaman kuan, sikatayo so walaan na Biblia tan say pakatebek ed saray siglo na kasumpalan na saray propesiya na Biblia. Sikatayo so walaan na saray rekord na Ebanghelyo ed bilay, kimkimey, tan saray salita nen Jesu-Kristo. Tan inkuan nen Pablo: “Diad sikato [Kristo] so panayaman na amin a kagnapan na madibinon kalidad.” (Colosas 2:9) On, sikatayo so wala ed kipapasen a mangamta ed Dios diad inkamaapit ya aliwan posibli ed saray agew na patriarka. Agta saya so abalbaleg a manumang ed katuaan ya agto imparungtal so inkasikaton direkta ed sikatayo?

Say Panagbasa ed Biblia So Mangitarok ed Sikatayo a Maapit ed Dios

Nabasa tayo ed Santiago 4:8: “Onasingger ed Dios, tan sikato so onasingger ed sikayo.” Diad pambasa ed Biblia, sikatayo so makaasingger ed Dios. Balet panon? Para ed sakey a bengatla, diad pamasa na sakey a kabiangan na Biblia ed kada agew, naaralan yoray balon walewaleng tan atributos na personalidad to. Legan a basaen mo, a naulit-ulit ya ontunda tan tepetan mo so inkasika: ‘Anto so naaralan ko nipaakar ed Dios diad sayan bersikulo odino kabiangan?’ Niarum ni, nayarian mon ipikasi so espiritu na Dios ya onkiwas a bilang “mananulong” diad pakatebek mo tan diad iyasingger mo ed Dios.​—Juan 14:26.

“Inapresyak so pakakagamor na magmaong a pakatalos ed si Jehova a bilang sakey a persona,” so imbaga na sakey a Kristianon bii ya amasa ed Biblia a manlapud apis ya anggad apis. Sikato so sakey ya estudyante ed Watchtower Bible School of Gilead, a mangipapasal ed saray misioneron nibabaki ed interon mundo. Anton metodo na panagaral ed Biblia so nanausar ed sayan eskuelaan? Impaliwawa na sakey ed saray instruktor: “Inggapo mi ed sakey a proyekto na panaral ed interon Biblia a bilang sakey a grupo. Sakupen mi so 10 ya anggad 15 pahina a kada agew, ya amin . . . na saray estudyante so manggawa na panagsukimat tan panangiter na komento ed singbatan. No naabet mi so mairap a bersikulo, imanoen mi (1) so konteksto, (2) saray sirkumstansya na panaon ed inkisulat, tan (3) say kabaliksan na saray manunan salita ed teksto. Mabetbet ya itepet mi, ‘Anto so ibaga na saya ed sikami nipaakar ed si Jehova tan saray kalidad to?’ Aromog min naynay a nibabaga ed sikami so bengatla nipaakar ed sikato.”

Anggaman nayarin andian kayo na pribilehyo na panagaral ed Biblia a pormal ed sayan eskuelaan, arum ed sarayan metodo na panagaral so nayarin epektibon maong ed sikayo tan diad pamilya yo. Alimbawa, diad limog na saray Tasi nen Jehova et kaugalian so panaral na pigaran kapitulo na Biblia a kada simba diad saray miting na kongregasyon da. Akin ya agtumboken iyan eskedyul na panagbasa ed Biblia a bilang pamilya? Nagkalalo ni, say Watch Tower Society so mangipapalapag na saray katulongan ed panagsukimat a singa say Aid to Bible Understanding tan say New World Translation Reference Bible, ya ontulong ed sikayo diad saray mairap a pasen ed Biblia.a Say maparanay a programa na panagbasa ed Biblia so mamabiskeg a tuloy na apresasyon yo ed personalidad nen Jehova.

Nayarin pilien yo met so sakey a kabiangan na Biblia a walaan na partikular a pakasagyatan ed sikayo. No, alimbawa, pilien yo, so panaral na 17 bersikulo ed Salmo 86, naromog yo so nayarin 15 awawey ed personalidad na Dios: Sikato so maong, akaparaan a mamerdona, daakan ed maaron-panangasi, mabulos a mangebat ed pikakasi, agnaparengan ed limog na saray dirios, agnaparaan a bilang manamalsan komikomey, sakey a soberanon manuley, sakey a managgawa na makapakelaw iran bengatla, manangiliktar a manlapud patey, mapangasi, masayaksak, matantan ya onsanok, daakan ed inkamatua, katulongan, tan managligliwa. Anton magmaong a kalat so onwala ed sikayo diad panalin mangaral nipaakar ed Amalsa yo?

Saray Baleg a Gungguna diad Pikakabat ed Dios

Say pakadampot ed pantok a kalat tayo a bilay ya andi-anggaan so sakey lambengat a gungguna diad pikakabat ed Dios. (Juan 17:3) Niarum ni, wala so pankaukolan na pakawalaan na inagew-agew a kaiban manatalima ed sikayo tan sikato so singa agnagiing a dampay. (Salmo 18:31) Sanen alikna nen Arin David a sikato so niliktub na saray kakabusol tan abelatan ed saray problema, aromog to a say Dios so alenleneg a peteg a katulongan. Kanian inkuanto: “Ipasakbat mo ed si Jehova so awit mo, tan sikato a dili so mamabiskeg ed sika. Agton balot abuloyan so matunong a nagalaw.”​—Salmo 55:22.

Sika, met, so makapanggayaga ed ontan a relasyon ed Dios no ilugar mo lambengat so panaon diad pikabat ed sikato. Aliwan mairap a tuloy. Ibanikel so sagpot diad pamasa ed Salita to. Milimog ed saraman so saray bilay da so mangipaparungtal a kabat da so Dios, a singa saramay angitarok ed sika na sayan palapagan. Ontawag ed si Jehova diad pikakasi. Ta say Dios so aliwan bengatlan aliwan-personan puersa a sikato so telek ed saray ey-ey yo. Sikato so sakey a mabilay a Dios tan “Dumerengel na pikakasi.” Tan “no sikato so anapen yo, sikato a mismo so naromog yo.”​—Salmo 65:2, 1 Awaran 28:9.

[Paimano ed Leksab]

[Litrato ed pahina 5]

Personal ya impatnag na Dios so inkasikato ed si Noe, Abraham, tan Moises

[Litrato ed pahina 7]

Say palsa so agnaupotan a subol na impormasyon nipaakar ed personalidad na Dios