Panon Inkamakabaliksan Iray Pikakasi Yo?
“Siak so tinmawag ed interon pusok. Ebatan moak, O Jehova.”—SALMO 119:145.
1, 2. (a) Anton parabolo nen Jesus so manasalaysay ed pikakasi? (b) Anton konklusyon so inagwat nen Jesus a manlapud saray duaran pikakasi, tan anto so nepeg ya ipanengneng na saya ed sikatayo?
ANTON nengneng na saray pikakasi so dengelen na Manamalsa, si Jehova a Dios? Sakey a parabolon imbaga nen Jesu-Kristo so mangipanengneng na sakey ed saray manunan kipapasen pian dengelen na Dios iray pikakasi. Imbaga nen Jesus a duaran lalaki so manpipikasi ed templo diad Jerusalem. Sakey so ginalgalang a maong a Pariseo, say sananey so minudmoran managsingil na buis. Nampikasi so Pariseo: “O Dios, misalamatak ed sika ta aliwa ak a singa saray arum a totoo, . . . odino anggan singa sayan managsingil na buis. Siak so manaayunal a mamiddua ed sakey simba, iiter ko so kakaplo ed amin na saray bengatlan wala ed siak.” Balet say abebbeban managsingil na buis so “nandugal ed pagew to, a kuanto, ‘O Dios, kasian moak a sakey a makasalanan.’”—Lucas 18:9-13.
2 Nankomento ed sarayan duaran pikakasi, inkuan nen Jesus: “Ibagak ed sikayo, Sayan too [say managsingil na buis] so anempet ed abung ton nansumpal a lalon matunong nen saman a too [say Pariseo]; lapud balang sakey a mangipaatagey na inkasikato so napaabeba, balet say mangipaabeba na inkasikato so nipaatagey.” (Lucas 18:14) Malinlinew, impanengneng nen Jesus a say basta manpikasi ed mangatatawen ya Ama tayo so aliwan magenap. No panon so pampikasi tayo—say awawey na kanonotan tayo—so importante met.
3. (a) Isita so arum iran manunan totontonen a manguuley ed pikakasi. (b) Antoran porma so nayarin gawaen na pikakasi?
3 Peteg a say pikakasi so sakey a mabmabli, ambelat, seryoson pribilehyo, tan amin ya apakabatan-a-maong a Kristianos so mikabisado ed saray manunan totontonen a manguley ed satan. Saray pikakasi so nepeg a nipaarap ed sakey a tuan Dios, si Jehova. Sikara so nepeg a nibaga ed ngaran na Anak to, si Jesu-Kristo. Pian naawat, sikara so nepeg a niyapay ed pananisia. On, “siopaman ya onasingger ed Dios so nepeg a manisian sikato so wala.” Nagkalalo ni, saray pikakasi na sakey so nepeg a mitukoyan ed linawa na Dios. (Hebreos 11:6; Salmo 65:2; Mateo 17:20; Juan 14:6, 14; 1 Juan 5:14) Tan manlapud Makasulatan iran ehemplo, naaralan tayo a saray pikakasi so nagawa ed porma na panagdayew, pisasalamat, pikekerew, tan suplikasyon.—Lucas 10:21; Efeso 5:20; Filipos 4:6; Hebreos 5:7.
Saray Ehemplo na Makabaliksan a Pikakasi
4. (a) Antoran ehemplo na makabaliksan a pikakasi so inter nen Moises tan Josue? (b) Antoran ehemplo so inter nen David tan Arin Hezekias? (c) Anton kaslakan ya ugali so wala ed sarayan pikakasi?
4 Sano saray ambelat a problema so arapen, saray seryoson desisyon so nakaukolan, saray graben lingon agawaan, odino saray bilay tayo so niiyan ed kaatapan, saray pikakasi tayo so nagkalautlan nagawan magunaet tan magmaliw a makabaliksan. Lapud saray Israelitas so tinmunganga ed kayari impakadngel da ed negatibon report na samploran aliwan matoor ya espiya, imbaga nen Jehova ed si Moises a saray totoo so makanepegan a napunas. Diad sakey a magunaet a makabaliksan a pikakasi, kinerew nen Moises ed si Jehova a sayan aksion so agto gawaen lapud say ngaran To so nalalanor. (Numeros 14:11-19) Sanen atalo so Israel ed Ai lapud inkaagum nen Acan, imbesngaw nen Josue so sankabiskegan a pikekerew met diad letnegan na ngaran nen Jehova. (Josue 7:6-9) Dakel ed saray salmo nen David so wala ed porma na magunaet iran pikakasi, say partikular a manunan ehemplo et say Salmo 51. Say pikakasi nen Arin Hezekias ed samay panaon na inlubak na Arin Senakerib na Asiria ed Juda so sananey a maabig ya ehemplo na makabaliksan a pikakasi, tan lamet say ngaran nen Jehova so nalalanor.—Isaias 37:14-20.
5. Walaan itayo na anto niran arum ya ehemplo na makabaliksan a pikakasi ya imbaga na pigaran ariripen nen Jehova?
5 Say libro na Saray Tagleey so nayarin nibaga ya andukey, magunaet a pikakasi nen Jeremias a nisesengeg ed katooan to, lapud si Jehova so naulit-ulit ya angipaarapan ed satan. (Saray Tagleey 1:20; 2:20; 3:40-45, 55-66; 5:1-22) Si Esdras tan si Daniel so angiyapay met na magunaet tan makabaliksan iran pikakasi a nisesengeg ed saray totoo to, ya impatua so kaugsan na nasyon tan kinmerew ira na panamerdona. (Ezdras 9:5-15; Daniel 9:4-19) Tan makapanseguro itayo a say pikakasi nen Jonas legan a sikato so wala ed eges na baleg a sira so magunaet tan makabaliksan.—Jonas 2:1-9.
6. (a) Inter nen Jesus ed sikatayo so antoran ehemplo na makabaliksan a pikakasi? (b) Anton manunan katuaan so nakaukolan pian nagawan makabaliksan iray pikakasi tayo?
6 Sakbay na impanpili to ed saray 12 apostoles, sanlabin si Jesus so nampikasi ta pian komon say linawa nen Ama to so nagawa diad panggawa na panagpili. (Lucas 6:12-16) Wala met so makabaliksan a pikakasi nen Jesus ed samay labi na inkitapat to, a singa nikurit ed Juan kapitulo 17. Amin na sarayan pikakasi so mangiter na sankabitaran a pantasi ed maabig a relasyon ed si Jehova a panggagayagaan na saraman so mangibabalikas ed saratan. Andi-duaruwa, saya so nepeg a manunan sengegan ed saray pikakasi tayo no sikara so magmaliw a makabaliksan. Sikara so nakaukolan a magunaet tan makabaliksan pian sikara so ‘mabiskeg’ ed si Jehova a Dios.—Santiago 5:16, The Jerusalem Bible.
Saray Kaleteyan Nisesengeg ed Atooan ya Ag-inkayadyari
7. Antoran tepet so nayarin itepet tayo ed inkasikatayo nipaakar ed saray pikakasi tayo?
7 A singa naimano, diad leksab na saray magonigon a kipapasen a saray pikakasi tayo so nayarin nagkalautlan magunaet tan makabaliksan. Balet anto so nipaakar ed inagew-agew iran pikakasi tayo? Kasin sikara so mangiter na ebidensya na ampetang, a nalikna tayo so maapit a siglaotan ed mangatatawen ya Ama tayo, si Jehova a Dios? Nibaga a maong: “Say pikakasi so nepeg a mankabaliksan na bengatla ed sikatayo no kabaliksan da so antokaman ed Dios.” Kasin iikdan tayoray pikakasi tayo na panag-isip a kanepegan da tan seguroen a sikara so peteg a manlalapu ed piguratibon puso tayo?
8. Saray pikakasi tayo so nayarin walaan na antoran kaleteyan nisesengeg ed atooan ya ag-inkayadyari?
8 Mainomay a saray pikakasi tayo so onkapuy ed sarayan pamaakaran. Lapud atawir ya ag-inkayadyarin liknaan, saray kapusoan tayo so magmainomay a mamalikdo ed sikatayo, a maneral ed saray pikakasi tayo ed saray kalidad a nepeg da. (Jeremias 17:9) Likud, diad maslak a kipapasen, no sikatayo so ontunda tan manisip sakbay a manpikasi, nayarin naromog tayon say tendensya et saray pikakasi tayo so magmaliw a mekanikal, parepareho, pawilpawil. Odino nayarin naulit-ulit, a mangipanonot ed saman so imbaga nen Jesus nipaakar ed agmanepeg a dalan ‘a pampipikasi na totoo na nasyones.’ (Mateo 6:7, 8) Odino saray pikakasi tayo so nayarin managlawi labat ed saray inkalapagan imbes a diad saray pihon pamaakaran odino totoo.
9. Antoran arum a pakakulabotan so nayarin onlesa no nipaakar ed saray pikakasi tayo, tan anto so andi-duaruwan sakey a rason ed sarayan pakakulabotan?
9 No maminsan et nayarin nalikna tayon sikatayo so manggaganat ed saray pikakasi tayo. Balet imanoen so obserbasyon: “No sikayo so okupadon tuloy a manpikasi, sikayo so okupadon tuloy.” Agtayo labay ya ipatlep iray pigaran salita tan basta ulit-ulit kada sikatayo so manpikasi, nisay nakaukolan ed sakey a Tasi nen Jehova so pamasa ed pikakasi to, a singa dia ed mapublikon asamblea. Andi-duaruwan amin na sarayan pakakulabotan so onlesa, nayarin diad kabiangan, manlapud katuaan ya agtayo nanengneng si Jehova a Dios ed pisikal, say Sakey a pampipikasian tayo. Anggaman kuan, sikato so agtayo nailaloan a napaliket ed ontan iran pikakasi, nisay sikatayo so nagunggunaan diad pangibaga ed saratan.
Pananalona ed Saray Kakapuyan
10. (a) Anton awawey so mangitapat na kakulangan na apresasyon ed kaimportantian na pikakasi? (b) Anton Makasulatan ya inkagawa so naimano?
10 Nayarian tayon alwaran iray akauna ran pakakulabotan diad kalaknab ya apresyaen tayo so kaimportantian na inagew-agew iran pikakasi tayo tan nawalaan na maabig a relasyon ed mangatatawen ya Ama tayo. Nisengeg ed sakey a bengatla, say ontan ya apresasyon so ontulong ed sikatayon manbantay a sumpad pangganat ed saray pikakasi tayo a singano nakaukolan tayon gamoran iray lalon importantin bengatla. Anggapo so mas lalon importante nen say pitongtong ed Sankatalbaan a Soberano, si Jehova a Dios. Tua, nayarin walaray okasyon sano say panaon so limitado. Alimbawa, sanen tinepetan nen Arin Artaxerxes si Nehemias a kupador to, “Anto so sayan aanapen mo ya iligen?” Si Nehemias ‘so tampol a nampikasi ed Dios na katawenan.’ (Nehemias 2:4) Lapud aalagden na ari so tampol ya ebat, agla nayarin dukeyan nen Nehemias ed ontan a pikakasi. Balet nayarin sikatayo so maseguro a saman so makabaliksan tan nanlapud puso to lapud tampol a saman so inebatan nen Jehova. (Nehemias 2:5, 6) Nilikud ed ontan iran mataltalag ya okasyon, anggaman kuan, nakaukolan ya ilugar tayo so panaon diad saray pikakasi tayo tan paulian iray arum a bengatlan manalagar. No saray pikakasi tayo so manggaganat, agtayo nagnap a naapresya so kakanaan na pikakasi.
11. Anto so sananey a pakakulabotan a nakaukolan tayon bantayan, tan anton maabig ya ehemplo so inletneg nen Jesus ed sayan pamaakaran?
11 Sananey a pakakulabotan a nakaukolan tayon paliisan et say pangulit-ulit ed saray inkalapagan. Saray ontan a pikakasi so onsaew a manggawa na hustisya ed mablin pribilehyo na pikakasi. Diad modelon pikakasi to, si Jesus so angiletneg na maabig ya ehemplo ed sikatayo diad sayan pamaakaran. Sinalambit to so pitoran mabitar iran kerew: talora so nipaakar ed pananalona na inkatunong, sakey so diad saray inagew-agew a nakakaukolan tayo ed pisikal, tan talora ed espiritual a pankaabigan tayo.—Mateo 6:9-13.
12. Si Pablo so angiter na antoran maabig ya ehemplo no nipaakar ed pagmaliw ya espesipiko ed saray pikakasi tayo?
12 Si apostol Pablo met so angiletneg ed sikatayo na maabig ya ehemplo ed sarayan pamaakaran. Kinerew to a sikato so ipikasi na arum ‘pian say pakayari na pansalita a tekep na tepel so niiter komon ed sikato.’ (Efeso 6:18-20) Sikato so espesipiko ed saray dilin pikakasi to a nisesengeg ed arum. “Saya so itultuloy kon ipipikasi,” kuan nen Pablo, “pian say aro yo so ondaak komon a lalonlalo a tekep na suston pikakabat tan nagnap a pakatebek; pian naseguro yo komon iray lalon importantin bengatla, ta pian sikayo komon so andi-tilol tan agmagmaliw a kagapolan na arum ya anggad agew nen Kristo, tan napano kayo komon na matunong a bunga, salanti diad panamegley nen Jesu-Kristo, diad gloria tan dayew na Dios.”—Filipos 1:9-11.
13. Panon so pangibaga tayo na makabaliksan iran pikakasi no nipaakar ed nanduruman nengneng na serbisyo tayo ed si Jehova?
13 On, saray pikakasi tayo so nepeg a managlawi ed saray espesipikon bengatla, tan saya so mankaukolan na panisip tayo ed saray pikakasi tayo. (Ipareng so Uliran 15:28.) Legan a wala ed lawak na ministeryo, nayarin kerewen tayo ed Dios so aliwa lambengat a bendisyon to ed saray sagpot tayo noagta ontan met ed kakabatan, taktika, malaknab-impanpuso, kawayangan ed panagsalita, odino tulong ed antokaman a kaleteyan a nayarin misasalet ed inkaepektibo tayo ed panagtasi. Nagkalalo ni, agta nakerew tayo ed Dios ya iwanwan to itayo ed saraman so nanaerasan tan napepegaan ed inkatunong? Sakbay na pampaliwawa ed publiko odino arum a parte ed Tipon ed Panagserbi odino diad Teokratikon Eskuelaan na Ministeryo, nayarian tayon kerewen ed si Jehova so panayam a siyayaman na masanton espiritu to ed sikatayo. Akin? Ta pian komon et sikatayo so nawalaan na talek tan inkasimbang, a nayarin mansalita tekep na gunaet tan kumbiksion, diad ontan et mangitarok na galang ed ngaran na Dios tan mamabiskeg ed agagi tayo. Amin na saray ontan a pikakasi so makatangguyor met ed pakawalaan na suston kipapasen na nonot sano mansalita.
14. Anto so nepeg ya awawey tayo nipaakar ed silalaman a kakapuyan a mairap a talonaan?
14 Kasin walaan itayo na silalaman a kaleteyan a mibabakal ed espiritualidad tayo tan singa mairap a talonaan? Labay tayon saglawien itan ya espesipiko ed saray pikakasi tayo. Tan arawi ed kadismaya, sikatayo komon so agbalot onkesaw a mapaabeba tan magunaet ya onkerew ed Dios a tulongan to itayo tan perdonaen. On, diad leksab na ontan iran sirkumstansya, labay tayo so onasingger ed si Jehova a singa sakey ya ugaw ya onasingger ed ama to sano wala ed gonigon, anggaman panon kabetbet so pampikasi tayo ed Dios nipaakar ed parehon kaleteyan. No sikatayo so masimoon, si Jehova so ontulong ed sikatayo tan namoria tayon sikatayo so pinerdona to. Diad leksab na ontan iran sirkumstansya, sikatayo so makaagwat na ligliwa a manlapud panangipatua nen apostol Pablo a sikato so walaan na problema.—Roma 7:21-25.
Saray Tulong Diad Panangiyapay na Makabaliksan Iran Pikakasi
15. Diad anton awawey na kanonotan so nepeg ya iyasingger tayo ed si Jehova a Dios diad pikakasi?
15 Pian saray pikakasi tayo so tuan makabaliksan, nepeg a pambanikelan tayon ekalen so amin a walad paway iran konsiderasyon tan iyapasakey ed katuaan a sikatayo so onaasingger ed arapan na Baleg a Dios, si Jehova. Nakaukolan tayo so onasingger ed sikato a tekep na aralem a respeto, ya apresyaen so inkamakapakelaw to. A singa imbaga nen Jehova ed si Moises, anggapo so toon makanengneng ed Dios tan manbilay. (Exodo 33:20) Sirin nakaukolan tayo so onasingger ed si Jehova a tekep na manepeg a kaumildian tan kauyamoan, a sikato so sakey a punton indanet nen Jesus diad parabolo to ed Pariseo tan say managsingil na buis. (Miqueas 6:8; Lucas 18:9-14) Si Jehova so nepeg a petepeteg ed sikatayo. Nepeg a nawalaan itayo na parehon awawey na kanonotan a singa wala ed si Moises. “Sikato so nantultuloy ya agnagiing a singa nanenengneng so Sakey ya agnanengneng.” (Hebreos 11:27) Saray ontan ya ugali so mangitarok na pantasi a sikatayo so walaan na maabig a relasyon ed mangatatawen ya Ama tayo.
16. Anton biang so gawaen na kapusoan tayo diad pangibalikas na makabaliksan iran pikakasi?
16 Saray pikakasi tayo so magmaliw met a makabaliksan no sikatayo so onasingger ed si Jehova a tekep na saray puson napno na aro tan lugor ed sikato. Alimbawa, agaylan apresasyon ed si Jehova a Dios tan panangaro ed sikato so imbalikas nen salmista David ed Salmo 23 tan 103! Anggapoy suppiat ed kiwawala na maabig a relasyon nen David ed Baleg a Pastol to, si Jehova a Dios. Diad Teokratikon Eskuelaan na Ministeryo, sikatayo so nasimbawan mansalita a tekep na ligsay-liknaan tan petang. Saya so nagkalautla a kipapasen sano sikatayo so manbabasa na kasulatan tan nagkalalo sano sikatayo so manpipikasi ed mangatatawen ya Ama tayo. On, labay tayon liknaen so singa alikna nen David sanen nampikasi: “Gawaen moak a mikabat ed saray dilin daladalan mo, O Jehova; ibangat moak ed saray dilin basbas mo. Gawaen moak a manakar ed katuaan mo tan ibangat moak, lapud sika so Dios na kilalaban ko.” Ontan met a mangipatnag ed no panon so nepeg tayon liknaan et saray salita na sananey a salmista: “Siak so tinmawag ed interon pusok. Ebatan moak, O Jehova.”—Salmo 25:4, 5; 119:145.
17. Panon so gawaen tayo pian saray pikakasi so agmagmaliw a naulit-ulit?
17 Pian saray pikakasi so mansiansian makabaliksan tan ag-ira magmaliw a naulit-ulit, maong no pandurumaen tayo so karga na kaisipan da. Say teksto na Biblia a para ed agew odino arum a Kristianon palapagan a babasaen tayo so nayarin mangiter na ontan a kaisipan. Say tema na leksion ed Panag-Bantayan, diad paliwawa ed publiko, odino diad asamblea odino diad kumbension ya aatendian tayo so manserbi ed ontan a gagala.
18. Pian saray pikakasi tayo so lalon makabaliksan, anto so nayarin gawaen tayo diad pananumbok ed saray salita na Biblia tan ehemplo?
18 Pian natulongan itayon makagamor a nagkalalo ed nengneng na pikakasi tan nagawan makabaliksan iray pikakasi tayo, maong so panguman ed pisikal a posisyon tayo. Para ed mapublikon pikakasi, gendagendat ya idakmomo tayoray kauloan tayo. Balet para ed lalon personal a pikakasi, arum et aromogan dan maabig so italimukor ed arap nen Jehova sano manpipikasin sinansakey odino bilang sakey a pamilya lapud aromogan da a say posisyon so manangguyor ed pakawalaan na mapaabeban awawey na kanonotan. Diad Salmo 95:6 et sikatayo so apaseseg: “O onloob ka, mandayew itayo tan ondakmomo; ontalimukor ed arap nen Jehova a Managgawa tayo.” Si Solomon so tinmalimukor sanen isasaklang to so pikakasi to diad dedikasyon ed templo nen Jehova, tan ginawa nen Daniel ya ugali so italimukor sano manpikasi.—2 Awaran 6:13; Daniel 6:10.
19. Saramay walaan na responsabilidad a para ed saray mapublikon pikakasi so maabig no nawalaan na antoran katuaan ed kanonotan?
19 Nisesengeg ed kaimportantian na pikakasi, saray aturon mamatatken so nepeg a mangusar na maabig a panangukom nipaakar ed no siopa so tawagen dan mangisaklang na mapublikon pikakasi a para ed kongregasyon. Say bautismadon lakin mangilalaman ed kongregasyon so nepeg a sakey a matatken a Kristianon ministro. Say pikakasi to so nepeg a mangiparungtal a sikato so walaan na maabig a relasyon ed Dios. Tan saramay napribilehyoan a mangisaklang na ontan iran pikakasi so nepeg a manisip ed karengel, lapud sikara so aglabat manpipikasi a para ed inkasikara noagta ontan met ed interon kongregasyon. Tano andi, panon na interon kongregasyon so pikasakey diad pangikuan na “Amen” diad sampot na pikakasi? (1 Corinto 14:16) Siempre, para ed amin a makayarin manbaga na makabaliksan ya “Amen,” nepeg a sikara so ontalineng ya atentibo, ya agda abuloyan so kanonotan dan manyatawyataw noagta tuan gawaen da so pikakasi ran kayarian. Sananey a salita na panalwar a nayarin niarum et lapud saray ontan a pikakasi so nisasaklang ed si Jehova a Dios, sikara so nepeg ya ag-usaren a bilang baraan diad pampulong ed saray ontatalineng odino diad pangipresenta na bengatlan puron personal ya ideya.
20. Lapud saray makabaliksan a pikakasin imbalikas a maksil so mangipanabang na bendisyon ed dumerengel, anton suhestion so agawa?
20 Sano saray pikakasi tayo a nibalikas a maksil so tuan makabaliksan, ipabtang da so bendisyon ed saray dumerengel. Lapud onia, saray sanaasawa tan saray pamilya so maabig a kada agew et nawalaan na panagpikasin mankakasakey. Diad satan, say sakey a too, a singa say ulo na pamilya, so mansalita a para ed arum odino para ed amin.
21. Pian saray pikakasi tayo so magmaliw a makabaliksan, anto so sananey a pamaakaran a mankanepegan na pangimano?
21 Pian saray pikakasi so tuan makabaliksan, wala ni so sananey a pamaakaran a mankanepegan na imano tayo. Saya so katuaan a nepeg tayon pitukoyan no nipaakar ed saray pikakasi tayo, a kabaliksan na saya so anto? A sikatayo so manbilay a tukoy ed saray pikakasi tayo tan kimeyan so ipipikasi tayo.
Panon So Iyebat?
◻ Anto so arum ed saray makabaliksan a pikakasin nikurit ed Kasulatan?
◻ Lapud atooan ya ag-inkayadyari, panon a saray pikakasi tayo so walaan na kaleteyan?
◻ Panon so pakatalona tayo ed arum a kaleteyan ed saray pikakasi tayo?
◻ Anto so arum a katulongan ed pangisaklang tayo na makabaliksan iran pikakasi?