Dengelen So Ibabaga na Espiritu ed Saray Kongregasyon
Say impormasyon ed pahina 13 ya angga ed 24 so nipresenta ed saray Madibinon Inkahustisya ed Kumbensyon Distrito na saray Tastasi nen Jehova legan na 1988 bilang manangilukas iran paliwawa na simposyum ya apauloan na “Say Aturon Panaon So Asingger La.”
“Komon ta saman so walaan na layag so ondengel ed ibabaga na espiritu ed saray kongregasyon.”—APOCALIPSIS 3:22.
1. Antoran salita ed Apocalipsis so maong a balita ed sayan aliwan maliket a panaon, tan anto so “propesiya” tan “say aturon panaon” a tinukoy to?
PIGARAN taon lan apalabas sakey a sosyologo ed Estados Unidos so nankomento a saray totoo ed satan a dalin so walaan na ontan lan kawayangan balet ta anggapo so magenap a liket. Saray totoo, inyarum to, “so akaromog a say liket so pinmuslit ed sikara. Say paraison insipan dan mismo so nansumpal a kaapaan.” Nisengeg ed saya, saray salita nen apostol Juan ed Apocalipsis 1:3 so maong a balita, lapud ibabaga to ed sikatayo no panon so pakaromog ed liket. Insulat nen Juan: “Maliket iman so manbasan maksil tan saraman so ondengel ed saray salita na sarayan propesiya, tan saraman so manumpal ed saray bengatlan nisulat ditan; lapud say aturon panaon so asingger la.” Say “propesiya” a tutukoyen to so sakey a nikurit ed libro na Apocalipsis. Tan “say aturon panaon” so panaon sano sayan propesiya ed Apocalipsis so nasumpal. Saray salita nen Juan so walaan na aralem a kabaliksan ed sikatayo natan.
2. Anto so nayarin morekdeken nen Juan legan a say inmunan siglo so manasingger ed panampot?
2 Masulok ya 60 taon sakbay na impangisulat na libro na Apocalipsis, si Juan so presente ed Pentecostes sanen niletneg so alanaan a Kristianon kongregasyon. Natan, nen 96 K.P., saman a kongregasyon so binmulaslas a manlapud datin 120 membro ed sakey a baleg, internasyonal ya organisasyon. Balet ta walaray problema. A singa impasakbay nen Jesus, Pablo, tan Pedro, saray apostasya tan sekta so onggagapon ompatnag, tan si Juan so nanmorekdek ed no anto so itatarya na arapen.—Mateo 13:24-30, 36-43; Gawa 20:29, 30; 2 Pedro 2:1-3.
3. Diad anto a say pasingawey ya anengneng nen Juan tan nikurit ed Apocalipsis so sakey a garantiya?
3 Isipen so liket to, sirin, sanen inawat to so “sakey a puyan nen Jesu-Kristo, ya inter na Dios ed sikato, pian ipanengneng ed saray ariripen to so bengabengatlan agawa ed magano.” (Apocalipsis 1:1) Diad sakey a serye na masnag iran pasingawey, anengneng nen Juan a saray gagala nen Jehova so nepeg a nasumpal tan say panagsungdo na saray matoor a Kristiano so makapakelaw a natumangan. Inawat to met iray mensahe a nanlapu ed si Jesus a para ed pitoran kongregasyon; saraya, ed epekto, so pinal a direktan simbawa nen Jesus ed saray Kristianos sakbay na isabi To ed gloria na Panarian.
Saray Pitoran Kongregasyon
4. (a) Anto so responsabilidad na saray matoor a Kristianon kongregasyon? (b) Anto so tinukoy na katuaan a saray alanaan a mamatatken so anengneng a singa pitoran bibitewen ed kawanan a lima nen Kristo?
4 Sarayan pitoran kongregsyon na saray alanaan a Kristiano so nirepresenta bilang pitoran kandelero, tan saray alanaan a mamatatken ed dalem da so nirepresenta a bilang pitora a bibitewen ed kawanan a lima nen Kristo. (Apocalipsis 1:12, 16) Diad sayan malinew a retrato, anengneng nen Juan a saray matoor a Kristianon kongregasyon so nepeg a manangitarok na liwawa, singa aliwawaan iran kandelero ed abilungetan a mundo. (Mateo 5:14-16) Say impangegna nen Jesus ed saray mamatatken ed kawanan a lima to so angipanengneng ya itotonton toray mamatatken, iwawanwan tan uuleyan to ra.
5. Diad siopa so nipaarapan ed agew nen Juan na saray mensahe ed pitoran kongregasyon?
5 Imbaga nen Jesus ed si Juan: “Say anengneng mo so isulat mo ed sakey a lukot tan ipawit mo ed saray pitoran kongregasyon, diad Efeso tan diad Smyrna tan diad Pergamo tan diad Tiatira tan diad Sardis tan diad Piladelpia tan diad Laodicea.” (Apocalipsis 1:11) Sarayan kongregasyon so peteg a wala ed agew nen Juan, tan maseguro itayo a sanen asumpal nen Juan ya insulat so Apocalipsis, kada kongregasyon so akaawat na sakey a kopya. Balet imanoen so imbaga na Dictionary of the Bible nen Hastings nipaakar ed Apocalipsis: “Mairap ed anggan dinan iran arum a libro ed B[alon] S[ipan] ya ontanlan apekderan ed koma-2 sig[lo].” Kabaliksan na saya a say libro na Apocalipsis so naamtaan tan binasa na aliwa lambengat na saray Kristianos ed pitoran kongregasyon noagta diad saray dakerakel nin arum a nanlabay a manaral ed salita na propesiya. Peteg, say simbawa nen Jesus so para ed amin ya alanaan a Kristianos.
6, 7. (a) Kapigan so manunan aplikaan na saray salita ed Apocalipsis, tan panon so pikabat tayo ed saya? (b) Siopa natan so inrepresenta na pitoran bibitewen tan saray pitoran kongregasyon?
6 Balet sarayan mensahe ed saray pitoran kongregasyon so walaan na malalaknab ya aplikasyon. Diad Apocalipsis 1:10, imbaga nen Juan: “Diad panamegley na puyan et siak so sinmabi ed agew na Katawan.” Sayan bersikulo so sakey ya importantin tombok diad pangilukas na pakatalos ed Apocalisis. Ipapanengneng to ya onaplikan manuna ed “agew na Katawan,” a ginmapo sanen si Jesus so nagmaliw ya Ari nen 1914. Sayan pakatalos so pinekderan na saray mensahe nen Jesus ed saray pitoran kongregasyon. Diad saratan et naromog tayoray balikas a singa saraya ed Pergamo: “Siak so onsabi ed sika a magano.” (Apocalipsis 2:16; 3:3, 11) Kayari na 96 K.P., si Jesus so ag ‘sinmabi’ ed anggan anton nikadkaduman dalan ya anggad sikato so nitrono bilang Ari nen 1914. (Gawa 1:9-11) Insan, diad kasumpalan na Malaquias 3:1, sikato so ‘sinmabi’ lamet nen 1918, sanen sikato so sinmabi ed templo nen Jehova a mangukom ya ununa ed sankaabungan na Dios. (1 Pedro 4:17) Sikato so ‘onsabi’ a maminsan ni, diad asingger ya arapen, sano “itarok to so panangibales ed saraman so agmikabat ed Dios tan saraman so agmanguunor ed maong a balita nipaakar ed Katawan a Jesus.”—2 Tesalonica 1:7, 8; Mateo 24:42-44.
7 Diad sayan kaisipan, natalosan tayo a saray pitoran kongregasyon so mangireretrato ed amin a kongregasyon na saray alanaan a Kristianos kayari na 1914, tan saray pitoran bibitewen so mangirerepresenta ed amin ya alanaan a mamatatken ed saratan a kongregasyon. Nagkalalo ni, saray mamatatken a kabiangan na “arum a karnero” so, diad kinatnat, wala met ed kawanan a lima na panangontrol nen Jesus. (Juan 10:16) Tan say simbawa ed saray pitoran kongregasyon so onaplika ed prinsipyo dia ed amin a kongregasyon na saray totoo na Dios natan ed sankamundoan, a pati saraman so tinibukel na saray Kristianos a walaan na mangaraldalin ya ilalo.
8. Anton kipapasen so aromog nen Jesus sanen sikato so linman maninspeksion ed saray mangibabagan Kristianos nen 1918?
8 Sanen si Jesus so sinmabin maninspeksion ed saray mangibabagan Kristianos nen 1918, aromog ton saray alanaan a Kristianos ed dalin so manbabanikel a manusumpal ed saray salita na propesiya. Nanlapulad 1870 et sikara so mamapasakbay ed totoo diad kaimportantian na taon 1914. Sikara so apairap a tuloy diad saray lima na Kakristianoan legan na inmunan guerra mundial, tan nen 1918 et say kimey da so singa la tinmunda sanen saray mangipapangulon opisyales na Watch Tower Society so nipriso ed saray palson panamakasalanan. Balet saray eksperiensia ra ed saman a panaon so sinmimbang ed saray propesiya ed Apocalipsis diad makapakelaw a sukat. Tan say determinasyon dan pangimano ed saray salita nen Jesus ed saray pitoran kongregasyon so angipabidbir ed sikara ya anggapoy duaruwa a bilang say alenleneg a manangitarok-liwawan Kristianos ed sayan abilungetan a mundo. Natan, sayan nakdaan so manitibukel na Juan a klase a manbibilay a makanengneng tan mibibiang ed saray kasumpalan ed dakel iran kabiangan na Apocalipsis.
Konseho tan Komendasyon
9, 10. Say kasumpalan na antoran salita nen Jesus so angitarok na baleg a liket ed modernon-agew a Kristianos? Ipaliwawa.
9 Diad Apocalipsis 3:8, imbaga nen Jesus ed kongregasyon ed Piladelpia: “Kabat koray gawam—nia! impasen ko ed arap mo so sakey a lukas a puerta, ya anggapo so makapangikaput—pian sika so walaan na melag a pakayari, tan sinumpal mo so salitak tan agmo imburi so ngaran ko.” Mapatnag, saray Kristianos ed Piladelpia so aktibo, tan natan et nilulukas ed sikara so sakey a puerta na pankanawnawa.
10 Say modernon-agew a kapetegan na sayan mensahe so nanggawa ed saray totoo na Dios a malikeliket. Kayari na makasubsubok ya eksperiensia ra nen 1918, sikara so nipawil ed espiritual, tan nen 1919 et nilukasan nen Jesus so sakey a puerta na pankanawnawa ed sikara. Sikara so nanakar a linmoob ed satan a puerta sanen inawat da so kimey a pangipulong ed maong a balita na Panarian ed amin a nasyones. Lapud say espiritu nen Jehova so wala ed sikara, anggapo so makaamper ed sayan kimey, tan saray alanaan a Kristianos so walaan na baleg a pribilehyon manumpal na baleg a kabiangan na tanda ed kiwawala nen Jesus. (Mateo 24:3, 14) Bilang nansumpalan na matoor a kimey na panagpulong da, saray nakekeraan na 144,000 so atawag tan alanaan, tan say “baleg ya ulop” so atipon ed baleg a bilang. (Apocalipsis 7:1-3, 9) Agaylan gayaga so intarok na saya ed saray totoo na Dios!
11. Panon so panasali na saray sektariano a maneral ed organisasyon nen Jehova diad agew nen Juan, tan panon so impanggawa ra na ontan ed dilin agew tayo?
11 Kasin wala so anggan siopan makasamsam na sayan gayaga ed sikara? On. Alimbawa, saray mamatatken ed Pergamo, anggaman ed maabig a rekord na panagsungdo, so ag-akayarin nantultuloy a mamunas ed bangat na sekta nen Nicolaus ed kongregasyon. (Apocalipsis 2:15) Say sektarianismo so onlalaganap. Miulibay, diad sarayan kaunoran ya agew, arum iran sinansakey so nanapostata tan sinali ran dutakan so organisasyon nen Jehova. Saray mamatatken bilang intero so nanresiste ed sikara, balet, makapaermen, wala ra so apalikdo. Komon ta agtayon balot abuloyan iray apostata a manamsam na gayaga tayo!
12. (a) Anto so impluensya na sakey a Balaam tan sakey a Jezebel? (b) Kasin sinali nen Satanas ya iparungtal so sakey a Balaam odino sakey a Jezebel ya impluensya diad dalem na Kristianon kongregasyon ed modernon panaon?
12 Pinasakbayan nen Jesus so kongregasyon ed Pergamo a sumpa ed saraman so “mangitatandoro ed bangat nen Balaam.” (Apocalipsis 2:14) Anto ’yan bangat? Sakey ed Pergamo so manederal ed saray Kristianos diman diad parehon nengneng na impaneral nen Balaam ed saray Israelitas ed kalawakan; diad pamapaseseg ed sikaran “mangan ed saray bengatlan imbagat ed saray talintao tan manggawa na pilalawanan.” (Numeros 25:1-5; 31:8) Pinasakbayan nen Jesus so kongregasyon ed Tiatira a sumpad “satan a biin Jezebel.” Sayan bii met so mangibabangat ed saray Kristianos a “manggawa na pilalawanan tan mangan ed saray bengatlan imbagat ed saray talintao.” (Apocalipsis 2:20) Kasin sinali nen Satanas ya iparungtal so sakey a Balaam odino sakey a Jezebel ya impluensya ed Kristianon kongregasyon natan? Peteg a ginawa to, diad kalaknab a ngalngalin 40,000 ed sakey a taon so adispelosip, maslak et nisesengeg ed imoralidad. Agaylan sakey a trahedya! Namparan saray singa-Balaam a lalaki tan singa-Jezebel a bibii so nanrebelde ed saray mamatatken tan sinali ran deralen so kongregasyon. Komon ta resistian tayo so ontan a marutak iran impluensya ed amin a biskeg tayo!—1 Corinto 6:18; 1 Juan 5:21.
13. (a) Deskribien so impambusol nen Jesus ed inkamalainem-em. (b) Akin a saray taga Laodicea so malainem-em, tan panon so pakapaliis tayo ed sayan kakapuyan?
13 Diad Apocalipsis 3:15, 16, imbaga nen Jesus ed kongregasyon ed Laodicea: “Kabat koray gawam, a sika so aliwan ambetel nisay ampetang. Kaliktan ko komon a sika so ambetel odino andi et ampetang. Sirin, lapud sika so malainem-em tan aliwa kan ampetang nisay ambetel, iyula taka ed sangik.” Agaylan grapikon salaysay na pambusol nen Jesus ed inkamalainem-em! Intultuloy to: “Ikuan mo: ‘Siak so mayaman tan agamoran ko so kayamanan tan agko la nakaukolan so antokaman.’” On, say materyalismo so anukso ed saray Kristianos ed Laodicea. Sikara la so napnek-ed-inkasikaran dilin agmananginenen. Balet imbaga nen Jesus ed sikara: “Agmo amta a sika so makapasinagem tan pakaskasi tan duka tan bulag tan labos-lakseb.” (Apocalipsis 3:17) Kasin labay tayo so magmaliw a “makapasinagem tan pakaskasi tan duka tan bulag tan labos-lakseb” ed pakanengneng nen Jesus? Siempre andi! Sirin gawaen tayo ed anggaay nayarian tayo so pilaban a sumpad pagmaliw a materyalistiko odino malainem-em.—1 Timoteo 6:9-12.
Mansungdo ya Angga ed Anggaan
14. (a) Antoran kairapan so nipaarapan na kongregasyon ed Smyrna? (b) Antoran modernon kasimbangan so wala diad saray eksperiensia na Smyrna?
14 Say kongregasyon ya aliwan malainem-em et say Smyrna. Diad sarayan Kristianos, imbaga nen Jesus: “Kabat koray kairapan mo tan inkadukam—balet sika so mayaman—tan say ayew na saraman so mangibagan sikara a mismo so Judios, tan ingen et andi balet ta sikara so sakey a sinagoga nen Satanas. Ag-ontakot ed saray bengatlan magano lan sagmaken mo. Nia! Say Diablo so mantultuloy a mangibantak ed arum ed sikayo ed pangawan pian sikayo so sigpot a niiyan ed subok, tan pian nawalaan kayo na kairapan ed samploran agew.” (Apocalipsis 2:8-10) Agaylan saya so mipara ed eksperiensia na saray Kristianos natan! Saray modernon Kristianos, namparan alanaan tan arum a karnero, so nansungdo met ed masebeg ya isusumpa a manlapud “sinagoga nen Satanas” natan, say Kakristianoan. Manlapud ununan guerra mundial ya anggad natan, nilibulibon lalaki, bibii, tan ugugaw so pinekpek, impriso, pinairap, pinasoot, odino pinatey diad agda pangikumpromiso ed katooran da.
15, 16. (a) Panon so pakapanliket na saray alanaan a Kristianos anggaman manasagmak na panamasegsegang? (b) Antoran nikaduman tumang so manalagar ed arum a karnero ya ontulong ed sikaran magmaliw a maliket met?
15 Kasin saray ontan ya eksperiensia so mangitarok na liket? Andi ed inkasikaran dili. Balet singa saray apostoles, saray matoor a Kristianos a mansungdo ed saray subsubok so makaeksperiensia na aralem a makindalem a gayaga dia ed “kibilang dan makana ed kibabaingan nisesengeg ed ngaran [nen Jesus].” (Gawa 5:41) Tan sikara so mansiansian maliket ed antokaman a gawaen na kakabusol da ed sikara lapud amta ra a say aturon panaon so asingger la diad katumangan na katooran da, tan say tumang so tuan abalbaleg. Imbaga nen Jesus ed saray Kristianos ed Smyrna: “Paneknekan mo so inkasikan matoor ya angga ed patey, tan iter ko ed sika so balanget na bilay.” (Apocalipsis 2:10) Tan diad saraman so wala ed Sardis et imbaga to: “Say manalo so nakawesan na amputin akinpaway iran kawes; tan agkon balot punasen so ngaran to a manlapud libro na bilay.”—Apocalipsis 3:5.
16 Tua, sarayan sipan so onaplikan espesipiko ed saray alanaan a Kristianos, a papanonotan to ra ed premyo na imortal a mangatatawen a bilay a manatalaran ed sikara. Balet saraman so kabiangan na arum a karnero so apabiskeg met ed sarayan salita. Si Jehova so walaan na sakey a tumang ya imparaan ed sikara met, daput no sikara so magunaet tan mansungdo. Sikara so walaan na maglorian ilalo diad panawir na andi-anggaan a bilay ed sakey a paraison dalin ed leksab na Panarian diad saray lima nen Kristo. Ditan et naromog da so Paraiso a sinmaew ya aromog na saray totoo na sayan mundo.
17. Diad antoran salita so impanampot nen Jesus ed kada mensahe, tan anto so kabaliksan na saray salita to ed sikatayo natan?
17 Sinampotan nen Jesus so kada mensahe to ed saray kongregasyon ed saray salita: “Komon ta saman so walaan na layag so ondengel ed ibabaga na espiritu ed saray kongregasyon.” (Apocalipsis 3:22) On, nepeg tayon dengelen tan unoren iray salita na Manunan Pastol. Nepeg tayon paliisan so karutakan tan apostasya, tan nepeg tayon pansiansiaen so seseg tayo. Diad pakaawat tayo ed tumang so mandepende ed satan. Tan sano imanoen tayo so malaknab ya impormasyon ed Apocalipsis, sikatayo so nagkalalon determinado a manggawa na ontan.
Saray Tatak na Lukot
18. (a) Anto so inawat nen Jesus ed mangatatawen a korte? (b) Anto so kabaliksan na impankabayo na saray talora a managkabayo ed Apocalipsis 6 diad katooan a manbibilay natan?
18 Diad saray kapitulo 4 tan 5, alimbawa, anengneng nen Juan so makapakelaw a pasingawey na mangatatawen a korte nen Jehova. Say Kordero na Dios, si Jesu-Kristo, so wadtan, tan inawat to so sakey a lukot a walaan na pitoran tatak. Diad kapitulo 6, nilukasan nen Jesus so anemira ed saray pitoran tatak, a sakey-sakey. Sanen nilukas so ununa, anengneng so sakey ya akakabayo ed sakey a kabayon amputi. Niiter ed sikato so sakey a balanget tan onkabayo a “manalo tan manumpal ed pananalo to.” (Apocalipsis 6:2) Saya si Jesus, say balobalon abalangetan ya Ari. Sanen inggapo to so pananalo, maarin inkabayo nen 1914, say agew na Katawan so ginmapo. Sanen nilukas so ontumbok a taloran tatak, talora nin kabayo a pati saray akakabayo so pinmatnag. Saraya so makapakigtot ya inkipatnag, ya irerepresenta ra so pambabakal na too, eras, tan patey diad panamegley na salot tan arum iran sengegan. Pepekderan da so baleg a propesiya nen Jesus a say mangatatawen a kiwawala to ed maarin pakayari so tandaan ed dalin na angkakabaleg a bakal, eraeras, salsalot, yegyeg, tan arum niran desyang. (Mateo 24:3, 7, 8; Lucas 21:10, 11) Peteg, saray Kristianos so nepeg a mangimano ed saray salita nen Jesus ed pitoran kongregasyon pian sikara so makapansungdo ed ontan a panaon.
19. (a) Kaleganan na kiwawala nen Kristo, anton tumang so niiter ed saray matoor ya alanaan a Kristianos ya inatey la? (b) Anton makapakebbiew iran nagawgawa so niyanino diad inkilukas na komanem a tatak, a mangitonton ed anton tepet?
19 Diad impangilukas ed komaliman tatak, sakey ya agawa ed agnanengneng ya espiritun ayaman so niparungtal. Saray alanaan a Kristianos ya inatey nisesengeg ed pananisia ra so kada sakey et naikdan na amputin kawes. Mapatnag, unong a say kiwawala nen Kristo natan so sakey a kapetegan, say mangatatawen a kioli so ginmapo. (1 Tesalonica 4:14-17; Apocalipsis 3:5) Insan say komanem a tatak so nilukas, tan “say dalin,” mangaraldalin a sistema na bengabengatla nen Satanas, so ayegyeg diad panamegley na baleg a yegyeg. (2 Corinto 4:4) “Say tawen” na atooan a pananguley ed leksab na panangontrol nen Satanas so alukot a singa sakey a daan a lukot, ya akaparaan lan ibantak. Saray akebbiew, rebelyoson totoo so onkelyaw dia a pakaskasi ed saray batobato: “Pelag kayo ed sikami tan iyamot yo kami a manlapud lupa na samay Sakey ya akayurong ed trono tan manlapud sanok na Kordero, lapud say baleg ya agew na sanok da so sinmabi, tan siopa so makayarin ontalindeg?”—Apocalipsis 6:13, 14, 16, 17.
20. Siopa so makayarin ontalindeg legan na baleg ya agew na sanok nen Jehova tan ed Kordero?
20 Tan siopa so makayarin ontalindeg? Akin, satan a tepet so inebatan la nen Jesus. Saramay “ondengel ed ibabaga na espiritu ed saray kongregasyon” so ontalindeg ed satan a baleg ya agew na sanok. Tan diad pamekder ed saya, intuloy nen Juan ya aralen so panagtatak ed saray unor a kabiangan na 144,000 tan say panagtipon na sakey a baleg ya ulop a manlapud amin a nasyones pian makaliktar “ed baleg a kairapan.” (Apocalipsis 7:1-3, 14) Balet natan et sikato la so panaon diad kalukasan na komapiton tatak na lukot tan nipapanengneng so kaaruman iran dramatikon pasingawey ed si Juan tan, diad panamegley to, diad sikatayo natan. Say ontumbok ya artikulo so manalaysay na arum ed saraya.
Kasin Nanonotan Yo?
◻ Anto so siglaotan nen Jesus tan saray mamatatken ed kongregasyon?
◻ Antoran problema so nipaarap ed saray mamatatken ed Pergamo tan Tiatira, tan panon a saray miulibay a problema so angapekta ed saray kongregasyon natan?
◻ Anton seryoson lingo so agawaan na kongregasyon na Laodicea tan panon so pakapaliis tayo diad pakapanggawa na miulibay a lingo natan?
◻ Panon a saray Kristianos so nakaukolan a mansungdo ed sayan koma-20 siglo, tan antoran sipan nen Jesus so tinmulong ed sikaran manggawa na ontan?
◻ Panon so pakapaliis tayo ed inkapakaskasi tan kaandian-na-ilalo a naeksperiensia na saray nasyones ed Armagedon?
[Saray litrato ed pahina 16]
Arum ed saray matoor a Kristianos ya apairap ed saray kampo na panangipangawan na Nazi
[Credit Line]
DÖW, Vienna, Austria