Uley na Dios​—Sankaabigan

SAY awaran na saray gobierno so manggawan mapatnag a saray ag-ayadyarin totoo so agmanepeg a makapangagamil na pakayari ed arum a totoo. A singa imbaga nen Lord Acton na Inglatera: “Say pakayari so manggetman mamikelkel tan say absoluton pakayari so mamikelkel ya absoluto.” Sirin, a singa ibabaga na Biblia: “Inuleyan na too so too ed kasakitan to.”​—Eclesiastes 8:9.

Diad gapo, inter nen Jehova a Dios ed too so panguley ed saray ayayep balet aliwan diad saray arum a totoo. Imbaga na Dios ed inmunan pinalsa ton Anak ed katawenan: “Manggawa ita na too ed indengan ta, unong ed nengneng ta, tan sikara so manuley ed sira na dayat tan saray mantekkiab a pinalsa ed katawenan tan saray ayayep ya amo tan amin a dalin tan amin ya onggagalaw ya ayep ya onggagalaw ed tapew na dalin.” (Genesis 1:26) Say Manamalsa na too so Manuley to. Panon, sirin, so ontan ya impanguman?

Nanlapulad impanrebelde na too ed hardin na Eden, sikato so nantultuloy ya angipulisay ed Dios bilang Manuley to. (Genesis, kapitulo 3) Saya so mapatnag ed kadaanan ya Israel, sakey a nasyon a pinili na Dios a kayarian to. Sanen kinerew na saray Israelitas so sakey a toon ari, imbaga nen Jehova ed si propeta to a Samuel: “Aliwan sika so impulisay da, noagta siak so impulisay da ed kipapasen ya ari ed sikara.”​—1 Samuel 8:7.

Say pananguley na Dios ed saray Israelitas so sankamapalangkapan. Diad panamegley na representante ton Moises, sikara so inikdan nen Jehova na sakey a kodego na ganggan ya angipanengneng na maaron panangimano ed pankaabiganan da. Sinalimbengan to ra a manlapud dakerakel a sakit tan inyalibansa to so panangimano ed saray mamatatken, saray babalo, tan saray ulila. Kinaukolan na Ganggan so pamagalang ed kayarian na arum tan inkanapampiyaan diad saray negosyo. Kinondena to so panangiduma, palson panagtasi, tan panagpasuksok. Say uley na Dios so tuan maptek tan matunong.

Insipan nen Jehova ya uleyan so aliwa lambengat ya Israel noagta ed amin a katooan. Manlapud makasalanan a totoo et ekalen to so pakayarin manuley ed arum a totoo tan sayan pakauley so iter to ed bogbogtong ya Anak to. Diad impangipasakbay ed saya, imbaga na Dios ed propesiya nen Ezequiel: “Peteg ya agmagmaliw a kayarian na siopaman ya anggad onsabi iman so walaan na legal a pankanepegan, tan satan so iter ko ed sikato.”​—Ezequiel 21:27.

Diad si Jesu-Kristo so angiteran na Dios ed legal a pankanepegan a manuley ed katooan bilang representante na inkasoberano nen Jehova. Lapud say Panarian na Dios ed panamegley nen Kristo so sankaabigan a paraan diad panuley ed amin a katooan, imbangat nen Jesus iray dumerengel to a mangipikasi ed satan. “Nepeg yo so manpikasi, sirin, ed onia,” kuan nen Kristo: “Ama min wala ed katawenan, napasantos komon so ngaran mo. Onsabi komon so panarian mo. Nagawa komon so linawam, unong ed tawen, ontan met ed dalin.”​—Mateo 6:9, 10.

Diad nengneng na impantrato nen Jesus ed totoo, impanengneng to no anton klase na manuley so pagmaliwan to. Peteg a si Kristo so walaan na panangabagey, ta “diad impakanengneng to ed ulop et sikato so akalikna na panangabagey, lapud sikara so kinatatan tan imbantak a singa karneron andian na pastol.” (Mateo 9:36) Impanengneng nen Jesus so aralem a panangaro ed saray patumbok to sanen inkuanto: “Ikdan takayo na sakey a balon ganggan, a manaarowan so balang sakey tan sakey ed sikayo; unong a singa impangarok ed sikayo, a sikayo met so manaarowan ed balang sinansakey.” (Juan 13:34) Inaro ton tuloy so totoo ya inter to so bilay to bilang sakey a dondon. Satan a bagat so nanggawan posibli a para ed saraman so mangawat ed satan a nabulos ed kasalanan, sakit, tan anggan diad patey.​—1 Juan 2:1, 2; Apocalipsis 21:1-4.

Ipapasakbay to no panon a say uley na Dios ed panamegley nen Jesu-Kristo so maptek, matunong, tan mareen, si propeta Isaias so apuyanan a mangisulat: “Nianak so sakey ya ugaw ed sikatayo, niiter ed sikatayo so sakey ya anak a laki; tan say maprinsipen uley to so wala ed tapew na abala to. Tan say ngaran to so natawag na Makapakelaw a Mananimbawa, Makapanyari a Dios, Maandon Ama, Prinsipe na Kareenan. Diad inkadaakan na maprinsipen uley tan diad kareenan et anggapo so anggaan, diad trono nen David tan diad panarian to ta pian iletneg ton malet tan pabiskegen to ed panamegley na inkaalas tan diad panamegley na inkatunong, manlapud natan ya angga ed panaon ya andi-geter. Say mismon seseg nen Jehova na saray ehersito so manggawa ed saya.”​—Isaias 9:6, 7.

Saray mangaraldalin a representante na uley na Dios so singa saray lalakin mangisisindag natan ed saray maaron kalidad nen Jesus bilang manangasikaso ed tuan Kristianon kongregasyon. Aliwan singa saray maruksan klero, sarayan lalaki so mangipapanengneng na maaron panagpaga ed pulok, a singa ginawa nen Jesu-Kristo. Nipaakar ed ontan iran maridios a lalaki, insulat nen propeta Isaias: “Nia! Sakey ya ari so manuley ed inkatunong a mismo; tan no nipaakar ed saray piprinsipe, sikara so manuley a bilang piprinsipe ed inkaalas a mismo.” (Isaias 32:1) Saray ontan a representante na pananguley na Dios so manserbi met ed saray madibinon intereses ed balon mundo.​—Salmo 45:16.

Asingger La So Baleg a Pansalat!

Sakbay ya onsalta so Panarian na Dios diad agnalabanan a pananguley ed katooan, nepeg a nagawa so baleg a pansalat. Sayan pansalat so mangekal ed saray ketegan na nasyon. Imbes a saray dakerakel a manggugutgutan iran gobierno na too, wala so saksakey a matunong a mangatatawen a gobiernon mamakasakey ed katooan bilang sakey a totoon manbilay ed kareenan. Diad impangipasakbay ed saya, insulat nen propeta Daniel: “Diad saray agew na saratan ya arari et say Dios na tawen so mangiletneg na sakey a panarian ya aglan balot naderal. Tan say panarian a mismo so agniiter ed anggan siopan arum a totoo. Mekmeken to tan panganggaen to so amin na sarayan panarian [gobierno na totoo], tan sikato a mismo so ontalindeg ed panaon ya andi-geter.”​—Daniel 2:44.

Say uley na Dios so alenleneg ya ebat ed saray problema na gobierno ya aarapen na katooan natan. Say kipapasen a kawalaan na totoo natan so mangekebbiew ed mismon kiwawala ra! Tan anggapo so peteg a solusyon na too. Makabat, sirin, so pangimano ed solusyon na Biblia tan onnengneng ed arapen a dingan na talek diad panaon ya aliwa lan arawi sano saray maptek-impampuson totoo so manggayaga ed leksab na agnaangatan tan mabenditon uley na Dios.

[Litrato ed pahina 6]

“Sakey ya ari so manuley ed inkatunong a mismo”