Mamatatken—Tratoen So Pulok na Dios ed Inkamatamoy!
“Nagmaliw kami a mauyamo ed pegley yo, a singano sakey a manangumponin ina a managano ed saray dilin anak to.”—1 TESALONICA 2:7.
1. Akin a kada matoor a Tasi nen Jehova so manliknan maligen?
SI Jehova so Baleg a Pastol. Mangitatarya na daakan ed saray malakarneron ariripen to tan intonton to ra “ed saray basbas na inkatunong” nisesengeg ed masanton ngaran to. Sirin, saraman so manggagawa ed linawa to so nakaukolan ya ag-ontakot ed mauges tan makaasingger ira ed maabagey a Dios da a para ed ligliwa. Peteg, kada matoor a Tasi nen Jehova so walaan na maabig a rason a manliknan maligen diad maaron panangasikaso na Dios.—Salmo 23:1-4.
2. Bilang sindag na gloria na Dios, antoran kalidad so impanengneng nen Jesus?
2 Si Jesu-Kristo “so sinag na gloria [na Dios] tan say dugarugan manangilaman ed inka-dios to.” (Hebreos 1:1-4) Sirin si Jesus, say Maabig a Pastol, so naynay a mangipapatnag na aro tan panangabagey. (Juan 10:14, 15) Singa bilang, diad sakey ya inkagawa et “anengneng to so baleg ya ulop, balet ta sikato so atenyeg ed panangabagey ed sikara lapud sikara so singa karnero ya andian na pastol. Tan inggapo to so pangibangat ed sikara na dakel iran bengatla.”—Marcos 6:34.
3. (a) Singa si Jehova a Dios tan si Jesu-Kristo, saray Kristianon katambayan-a-papastol so nepeg a mangipanengneng na antoran kalidad? (b) Anton simbawa tan pasakbay so inter nen apostol Pablo ed saray manangasikaso?
3 Amin a Kristiano so nepeg a ‘mangalig ed Dios tan mantultuloy a manakar ed aro a singa impangaro nen Kristo ed sikara.’ (Efeso 5:1, 2) Sirin sikara so nepeg a maaro tan maabagey. Nagkalautlan saya so tua ed saray katambayan-a-papastol na pulok na Dios. Imbaga nen apostol Pablo: “Imanoen yo so inkasikayo tan ed amin a pulok, ya anuroan na masanton espiritu ed sikayo a manangasikaso, pian pastolan so kongregasyon na Dios, a sinaliw to ed dala na dilin Anak to. Kabat ko a kayari na itaynan ko et saray masesebeg a lubo so onloob ed limog yo tan agda piarapan so pulok ed inkamatamoy tan manlapud limog yo a mismo et ontalindeg so totoo tan mansalita na pikewet a bengatla pian tangguyoren daray babangatan ya ontumbok ed sikara.”—Gawa 20:28-30.
4. (a) Sinmabi panaon, anto so agawa diad pananumpal ed pasakbay nen Pablo ed Gawa 20:29, 30? (b) Antoran tepet so mankanepegan natan na panangimano?
4 Sinmabi panaon, saray apostatan “masesebeg a lubo” so pinmatnag tan “agda akiarapan so pulok ed inkamatamoy.” Agaylan sikatayo so maliket a saray mamatatken ed limog na saray Tasi nen Jehova so agmangaagamil na ontan ya inkasebeg! Ingen, anton nengneng na panagtrato so nailaloan na saray kapananisiaan a naawat a manlapud sarayan tinuro-na-espiritun manangasikaso? Tan panon so pangipanengneng na saratan a tinuro na inkamatamoy no nipaakar ed saray karnero nen Jehova?
Agpakatawan ed Pulok
5. (a) Panon so mabetbet a pantatrato na saray minumundon papangulo ed saray uuleyan da? (b) Panon so impangipanengneng nen Jesus a say inkaruksa so andian na pasen ed limog na saray patumbok to?
5 Nailaloan tayon manepeg a saray Kristianon mamatatken so mantrato ed sikatayo diad maabagey a dalan. Sikara so aliwan singa saray minumundon manuley, a mabetbet a pakatawan ed saray uuleyan da. Singa bilang, nibalita a say Prankisan arin Carlomagno (a nanuley nen 768-814 K.P.) “so amaskar ed saray Saxon, ed leksab na ot-ot na patey, a mangawat na bautismo, a kinondena ed sankabiskegan a dusa iray manamuyak na Kuarisma, tan diad amin a pasen et insandi ra so puersa diad panangguyor.” (The History of the Christian Church, nen Willian Jones) Say inkasebeg so andian na pasen ed limog na saray patumbok nen Jesus, lapud inkuanto: “Amta yo a saray manuley na pagano so impakatawan ed sikara, tan saray baleg a lalaki ra so nanduksa ed sikara. Aliwan ontan ed limog yo, noagta siopaman a malabay a magmaliw a baleg ed limog yo so nepeg a magmaliw ya aripen yo, tan siopaman a malabay a mamemben na ununan pasen ed limog yo so nepeg a magmaliw ya aripen yo, a singa say Anak na Too so agsinmabi pian alagaren, noagta pian manalagar ed arum a totoo, tan pian iter to so bilay to a panondon ed dakerakel nin arum.”—Mateo 20:25-28, An American Translation.
6. (a) No nipaakar ed saray mamatatken, antoran manunan katuaan so ombitar? (b) Say kongregasyon so walaan na rason a manilalo ed antoran mamatatken, tan panon so nepeg a panmoria na sarayan lalaki ed inkasikaran dili?
6 Say sakey a Kristianon laki a ‘manadampot ed sakey ya inkabetang na manangasikaso so manpilalek ed maabig a kimey.’ (1 Timoteo 3:1) Sano saya so konsideraen tayo tan say simbawa nen Jesus a kapkapangisita, sarayan manunan katuaan so ombitar: (1) Saray Kristianon mamatatken so nepeg ya agmamairap ed arum; (2) saraman so manasakbat na responsabilidad ed limog na saray patumbok nen Jesus so nepeg a magmaliw ya ariripen da, aliwan kakatawan da; tan (3) saray lalakin manadampot ed inkabetang na sakey a manangasikaso so nepeg ya onnengneng ed satan a bilang “maabig a kimey,” aliwan bilang sakey a nitandoron posisyon. (Uliran 25:27; 1 Corinto 1:31) Say terminon “matatken” so agmangipaatagey ed anggan siopan too ed tagey na arum iran managdayew ed si Jehova. Imbes, say kongregasyon so walaan na rason ed panilalo ya amin na saray mamatatken so matatken ed espiritual, eksperiensiado, tan mapaabeban lalaki a mangipangulo ed sagradon serbisyo. Peteg, saray mamatatken so nepeg a manmoria ed inkasikara a bilang abeban ariripen nen Jehova a Dios, si Jesu-Kristo, tan saray kaparan Kristianos.—Roma 12:11; Galacia 5:13; Colosas 3:24.
7. (a) Panon so nepeg a pangiyaplika na saray mamatatken ed 2 Corinto 1:24 diad pidedeneng ed arum? (b) Anto so nepeg a gawaen na mamatatken nipaakar ed saray instruksion a nanaawat a manlapud Mananguley ya Ulop?
7 Say mapaabeban pampaaripen a nisesengeg ed arum so natural a mameget ed sakey a matatken diad panalin “pakatawan” ed sikara. Tan agaylan maabig a saray manangasikaso tayo so mangipapatnag na awawey a miulibay ed si Pablo! Imbaga to ed saray Kristianos ed Corinto: ‘Sikami so aliwan kakatawan na pananisia yo, noagta sikami so kakimeyan a nisesengeg ed gayaga yo.’ (2 Corinto 1:24) No ontan sirin, saramay mangaagamil na maaron panangasikaso so agmamabelat ed saray kapananisiaan diad saray agnakaukolan iran atooan a regulasyon. Imbes, saray manangasikaso ed limog na saray Tasi nen Jehova so uleyan na Makasulatan a prinsipyo tan mangisaklang na mapangasi, makatulong a serbisyo. Ipanengneng da met so aralem a panangigalang ed pulok na Dios diad aliston pangiyaplika ed saray instruksion a naawat a manlapud Mananguley ya Ulop na saray Tasi nen Jehova.—Gawa, kapitulo 15.
8. Anto so awawey nen Pablo ed saray kapananisiaan, tan panon so pangapekta na saya ed saray koma-20 siglon mamatatken?
8 Lapud si Pablo so walaan na matamoy a panangigalang ed pulok na Dios, nayarian ton ibaga ed saray Kristianos ed Tesalonica: “Sikami so magmaliw a mauyamo ed limog yo, a singano sakey a manangumponin ina a managano ed saray dilin anak to. Sirin, lapud walaan na matamoy a panangaro ed sikayo, sikami so aliketan a maong a mangipanabang ed sikayo, aliwa lambengat ed maong a balita na Dios, noagta ontan met ed saray dilin kakamarerwa mi, lapud sikayo so nagmaliw ya inararo mi.” (1 Tesalonica 2:7, 8) Si Pablo so kinmiwas a singa ginawa na sakey a manangumponin ina, ya inaro toray anak ton tuloy ya inyuna to so intereses da ed saray intereses to a walaan na matamoy a panangimano ed sikara. Agaylan saya so manenyeg ed saray koma-20 siglon mamatatken a mantrato ed pulok na Dios diad inkamatamoy!
Saray Sengegan na Pakalemewan tan Pakainawaan
9. Antoran sirkumstansya na kaplesan-agew a totoo nen Jehova so nipasakbay ed Isaias 32:1, 2?
9 Ituturo to so sayan agew na uley na Panarian nen Jesu-Kristo, impasakbay nen propeta Isaias a sakey ya ari so “manuley ed inkatunong a mismo” tan “saray prinsipe” so manuley “ed inkaalas a mismo.” Sirin, saray mamatatken ed kaplesan-agew a teokratikon organisasyon so mangiimaton ed saray intereses na niletneg a mangatatawen a Panarian—maprinsipen serbisyo a peteg! Diad sarayan responsablin lalaki, onaplika so kaaruman nin mapropetikon salita nen Isaias: “Kada sakey so nepeg a magmaliw ya amotan a pasen a manlapud dagem tan sakey a pasen na siruman a manlapud bagyo, singa saray agus na danum ed amagan dalin, singa anino na baleg a bato ed naklangan a dalin.”—Isaias 32:1, 2.
10. Kada matatken ed limog na saray Tasi nen Jehova so nepeg a sengegan na anto?
10 Aliwan singa saray manamairap a relihyoson papangulo na Kakristianoan, saray mamatatken ed limog na saray Tasi nen Jehova so sengegan na pakalemewan tan pakainawaan. Bilang ulop na mamasiken, iyalibansa ra so kareenan, kaulimekan tan kaligenan ed limog na totoo nen Jehova. Sinansakey, balang matatken so makatulong ed sayan maabig a kipapasen diad pantrato ed pulok na Dios a tekep na inkamatamoy.
Tekep na Inkahustisya tan Inkatunong
11. (a) Anton inkalapagan a kipapasen a wala ed limog na inmunan-siglon Kristianos so matalona ed karaklan na kongregasyon na saray Tasi nen Jehova natan? (b) Saray manangasikaso so walaan na anton responsabilidad ed kongregasyon, tan akin?
11 Anggaman saray problema so linmesa ed arum iran inmunan-siglon Kristianon kongregasyon, say inkalapagan a kipapasen da so wala ed kareenan, pankakasakey, tan gayaga. (1 Corinto 1:10-12; 3:5-9; Efeso 1:2; Santiago 2:1-9; 3:2-12; 4:11, 12; 1 Juan 1:3, 4) Wala met so maabig ya espiritual a kipapasen diad maslak a kongregasyon na saray Tasi nen Jehova natan lapud bendisyon na Dios, panangipangulo nen Kristo, tan say matoor a kimey na saray aturon manangasikaso. Pian nipaseguro so kareenan ed kongregasyon, pankakasakey, tan gayaga, sarayan lalaki so onkekerew na madibinon tulong tan magunaet a pambabanikelan dan pansiansiaen so organisasyon na Dios a malinis, diad moral tan espiritual. (Isaias 52:11) Say aliwan malinis ya organisasyon so agbalot magmaliw a mareen tan magayaga, tan peteg ya agnawalaan na panangabobon na Dios tan bendisyon. Sikato so “dalisay a tuloy ed saray mata a makanengneng ed mauges,” ya abuloyan to so gawan-mauges. (Habacuc 1:13) Diad limog na arum a bengatla, sirin, saray mamatatken so nailaloan a mangasikaso ed saray pamaakaran na hudisyal diad maptek, Makasulatan a nengneng. Balet antoray arum a sengegan a nonoten sano bebembenan so ontan iran kaso?
12. Anggaman saray mamatatken so agkinaukolan ya onnengneng ed personal a kurakurang ya agmanusumlang ed saray ganggan odino prinsipyo na Biblia, anto so nepeg a nagawa unong ed Galacia 6:1?
12 Diad sakey a bengatla, ed saray kason manasaglawi ed personal a pansisiblangan, nayarin posibli ed saray sinansakey so pangareglo ed pamaakaran a pribada. (Mateo 18:15-17) Lapud saray mamatatken so aliwan ‘kakatawan na pananisia tayo,’ sikara so agnailaloan ya onnengneng ed puron personal a kurang ya agmanaglawi ed saray seryoson impakasumlang ed ganggan odino prinsipyo na Biblia. Siempre, no wala so ebidensyan say sakey a too so akagawa na “lingon kundang sakbay a sikato so sikakabat ed satan,” saraman so walaan na espiritual a kualipikasyon so “manalin mametek ed ontan a too diad espiritu na kaumildian.”—Galacia 6:1.
13. Panon so pangipanengneng na Kasulatan a saray mamatatken so nepeg ya onkiwas lambengat diad ebidensya na gawan-mauges, aliwan diad dengeldengel?
13 Saray mamatatken so manserbi “ed inkaalas a mismo,” naynay ya agmanangiduma. Sirin sikara so nepeg ya onkiwas ed ebidensya na gawan mauges, aliwan diad dengeldengel lambengat. Insimbawa nen Pablo: “Ag-awaten so panamakasalanan a sumpad sakey a masiken, nilikud lambengat ed panamatua na duara odino taloran tastasi.” (1 Timoteo 5:19) Unong ed estandarte nen Jehova, diad kadaanan ya Israel et say sakey a toon pinakasalanan na makapatey a kasalanan so nakaukolan ya iyan ed ipapatey ‘diad sangi na duara odino taloran tasi, aliwan sakey.’ Nagkalalo ni, say akusado so mapatnag a walaan na pankanawnawan mangarap ed saray manangakusa to, tan no say ebidensya so magenap, ‘say lima na saray tastasi so ununa ed amin et ondapo ed sikato a mangyan ed sikato ed ipapatey.’—Deuteronomio 17:6, 7.
14. (a) Anto so lingon sinalin ginawa nen Diotrepes? (b) Ilaloan na Dios so anto ed saray mamatatken sano sikara so mamebemben na hudisyal iran pamaakaran?
14 Nepeg a wala so maabig a letnegan ed Kasulatan diad hudisyal ya aksion. Agaylan sikatayo so maliket a saray manangasikaso ed kongregasyon so aliwan singa si makinon a Diotrepes nen inmunan siglo K.P.! Sililingon sinali ton “ablogen ed kongregasyon” iraman so manpirawat a mangawat a sipaparawes ed saray managbiahen agagi. Saya tan arum iran makapuy a gawa so agla impasen nen apostol Juan ya anleglemew noagta amasakbay: “No siak so onsabi, nonoten ko iray gawa to.” (3 Juan 9, 10) Sirin, say kaplesan-agew a hudisyal a komite so nepeg a maseguron wala so letnegan ed Biblia ed anggan anton aksion na panagdispelosip a gawaen da.a Siempre, ilaloan na Dios iray Kristianon mamatatken a magmaliw a maptek diad pidedeneng ed arum. Peteg, saramay mangipapakurang ed kurakurang na mangaraldalin ya organisasyon nen Jehova so nepeg a “makayarin lalaki, matakot ed Dios, napanmatalkan a lalaki.”—Exodo 18:21.
15. Anton betang so kiwasan na pikakasi diad saray hudisyal a bista?
15 Kada Kristianon hudisyal a komite so onkerew na tulong nen Jehova diad impapuson pikakasi. Say piarap ed sakey ya agin laki odino sakey ya agin biin akusado ed seryoson gawan-mauges so nepeg a nalukasan ed pikakasi. Diad tua, manepeg so pampikasi ed anggan anton panaon legan na diskusyon ya onlesa so partikular a pankaukolan ed tulong na Dios.—Santiago 5:13-18.
16. Diad anton nengneng so nepeg a pangikondukta na saray mamatatken na hudisyal iran bista, tan akin?
16 Kabat na mamatatken a say sakey a kapananisiaan ya akusado ed gawan-mauges so sakey a “karnero” ed pulok na Dios tan nepeg a tratoen ed inkatamoy. (Ipareng so Ezequiel 34:7-14.) Nakaukolan na literal a karnero so matamoy a panangasikaso, lapud sikara so mabaing a pinalsan mandedepende ed pastol da diad kasalimbengan. Sirin, kumusta so piguratibon karnero ed lokal a kongregasyon? Andi-duaruwan nalikna ra so kaligenan diad panangasikaso na Baleg a Pastol, si Jehova a Dios, tan say Maabig a Pastol, si Jesu-Kristo. Balet saray katambayan-a-papastol na pulok so nepeg ya onkiwas ed saray dalan ya ontulong ed akindalem a kareenan tan liknaan na kaligenan na saray malakarneron ariripen nen Jehova. No sakey kan Kristianon katambayan-a-pastol, sirin, kasin saray agagim a lalaki tan bibii so manliknan maligen tan mareen diad panangasikasom? Tua, saray mamatatken so nepeg a mangitandoron mapekder ed saray ganggan tan prinsipyo na Biblia. Balet sikara so Makasulatan a nakaukolan a miarap ed karnero diad maaron dalan tan mangimaton ed hudisyal iran bista diad kalmada, mauksoy, mapangasi, makonsideran nengneng.
17. Antoran Makasulatan iran punto so nepeg a lawas nonoten na mamatatken, nagkalautla ed kaleganan na saray hudisyal a bista?
17 Lapud ag-ayadyari, “sikatayon amin so nagapol a maminpigapiga” ed ibaga tayo. (Santiago 3:2) Balang sakey ed sikatayo so mankaukolan na panangasi na Dios tan diad “mananakbong a bagat” nen Kristo. (1 Juan 1:8–2:2; Salmo 130:3) Sirin nepeg a moriaen na sakey a Kristianon katambayan-a-pastol so inkasikato a mapaabeba. Nepeg ton nonoten met iray salita nen Jesus: “A singa unong a labay yon gawaen na totoo ed sikayo, ontan met so gawaen yo ed sikara.” (Lucas 6:31) Nagkalautlan sayan simbawa so onaplika kaleganan na saray hudisyal a bista. Saray kualipikado ed espiritual a lalaki so nepeg a manalin mametek ed nalilingon Kristiano ‘diad espiritu na kaumildian, unong a sikara ed balang sinansakey so onnengneng ed inkasikara, ompan sikara met so natukso.’—Galacia 6:1; 1 Corinto 10:12.
18. (a) Anto so nayarin pansumpalan no saray mamatatken so mantrato ed arum a sipapasang kaleganan na saray hudisyal a bista? (b) Nisesengeg ed Marcos 9:42, sumpad panggawa na anto so nepeg a bantayan na saray mamatatken tan arum iran Kristianos?
18 No saray mamatatken so mantrato a sipapasang ed saray arum kaleganan na saray hudisyal a bista, saya so nayarin mansumpal a makadesyang ed saratan a sinansakey. Balet anggaman agnansumpal ed emosyonal odino pisikal ya inkasakitan, nayarin onwala so graben espiritual a kasakitan, tan saray kualipikasyon na manangasikaso so nasuppiat met. (Ipareng so Santiago 2:13.) Sirin, legan na saray hudisyal a bista tan diad amin a panaon, saray mamatatken so nepeg a mapangasi tan manalwar ya agda nigapol so arum. Siempre, amin a Kristianos so mangagamil na alwar ed sayan pamaakaran, lapud imbaga nen Jesus: “Siopaman a mangigapol ed sakey ed sarayan ankekelag a mananisia, magmaong ed sikato so pangisabit to na gilingan a singa saman so papatleken na sakey ya asno diad liber na beklew to tan sikato a peteg so ibuntok ed dayat.” (Marcos 9:42) Say walad tapew a gilingan so abalbaleg a say biskeg na sakey ya ayep so gendagendat a nakaukolan a mamatelek ed satan, tan anggapo so nibuntok ed dayat ed ontan a belat ed liber na beklew to so makaliktar. Peteg, sirin, say sakey a matatken so nepeg a manalwar ya agmakapangigapol a nayarin mansumpal ed maandon espiritual a kasakitan to tan anggan siopan sinansakey a nigapol to.—Filipos 1:9, 11.
Itultuloy ya Ipanengneng So Matamoy a Panangasikaso
19. Anton simbawa so inter nen Pedro ed saray kapara ton mamatatken, tan anto so pisiglaotan na manepeg ya ikiwas ed satan diad saray iilaloan da?
19 Impanengneng nen apostol Pedro no panon so pangipastol na saray kapara ton manangasikaso ed pulok sanen insulat to: “Pastolan so pulok na Dios ya aasikasoen yo, aliwan napilpilit, noagta mabulbulos; nisay diad aro ed sinasaol a pananubo, noagta magunaet; nisay pakatawan ed saraman so tawir na Dios, noagta magmaliw ya uliran na pulok. Tan sano say manunan pastol so nipatnag, mangawat kayo na ag-onkupas a balanget na gloria.” (1 Pedro 5:2-4) Dia lambengat ed pangiyaplika ed ontan a simbawa tan diad pangipatnag na matamoy a panangasikaso ed pulok na Dios a nagamoran na saray alanaan a manangasikaso so mangatatawen a tumang da bilang imortal ya espiritun pinalsa tan saray mamatatken a walaan na mangaraldalin ya ilalo so makaawat na maandon bilay ed onsabin sankagloboan a Paraiso.
20. (a) Panon so nepeg a piarap na saray Kristianon katambayan-a-papastol ed saray kapananisiaan da? (b) Panon so liknaan yo ed maabig-ehemplon serbisyo tan matamoy a panangasikaso na saray maaron mamatatken?
20 Namparan si Jehova a Dios tan si Jesu-Kristo so maaro, maabagey a Papastol. Kanian manwarin saray Kristianon katambayan-a-papastol so mapekder a mangitandoro ed saray madibinon estandarte, sikara so manepeg a mangipanengneng na aro tan panangabagey diad pidedeneng ed saray malakarneron kapananisiaan da. Segurado, amin na saray matoor a Tastasi nen Jehova so mangapresyan tuloy ed maabig-ehemplon serbisyo na ontan iran dilin-managsakripisyon mamatatken a mamabantay na nimatalek ed sikara tan tatratoen da so pulok na Dios ed inkatamoy. Say ontan ya apresasyon, dingan na manepeg a respeto, so nipanengneng diad pagmaliw a matulok ed saraman so mangipapangulo ed sikatayo.
[Paimano ed leksab]
a Say sakey a too so nayarin mangiyapelo ed sakey a desisyon na impandispelosip ed sikato no sisiaen ton wala so agawan seryoson lingo ed panangukom.
Anto So Kanonotan Yo?
◻ Panoy impangipanengneng nen Jesus a say inkaruksa so andian na pasen ed limog na saray patumbok to?
◻ Anto so nepeg a gawaen na saray mamatatken sano saray instruksion so naawat a manlapud Mananguley ya Ulop?
◻ Unong ed Isaias 32:1, 2, saray mamatatken so nepeg a sengegan na anto?
◻ Panoy pangipanengneng na Kasulatan a saray mamatatken so nepeg ya ag-onkiwas ed dengeldengel lambengat?
◻ Panon so nepeg a pantrato na saray Kristianon katambayan-a-papastol ed pulok?
[Litrato ed pahina 16]
Say impapuson pikakasi so makanakana sano miarap so hudisyal a komite ed sakey a kapananisiaan