Mansiansian Maapit ed si Jehova
“Mansiansian malet ed pikakasi.”—ROMA 12:12.
1. Anto so linawa nen Jehova nipaakar ed pikakasi, tan anton panamaseseg so inter nen apostol Pablo nipaakar ed panagpikasi?
SI Jehova so “Dios a mangiter na ilalo” ed amin a matoor a totoo to. Bilang say “Dumerengel na pikakasi,” sikato so ontalineng ed saray kerew da parad tulong pian nagamoran so magayagan ilalo ya inggeter to ed arap da. (Roma 15:13; Salmo 65:2) Tan diad panamegley na Salita to, say Biblia, papasesegen ton amin iray ariripen to ya onasingger ed sikato kapiganman a labay da. Sikato so lawas wadtan, a mankaliktan a mangawat ed sankaaraleman iran kapagaan da. Diad tua, papasesegen toran “mansiansian malet ed pikakasi” tan “manpikasin andi-tunda.”a (Roma 12:12; 1 Tesalonica 5:17) Linawa nen Jehova ya amin a Kristianos so naynay ya ontawag ed sikato diad pikakasi, ya ibaga ed sikato so amin a walad puso ra tan gawaen itan ed ngaran na inadaron Anak to, si Jesu-Kristo.—Juan 14:6, 13, 14.
2, 3. (a) Akin a sinimbawa itayo na Dios a “mansiansian malet ed pikakasi”? (b) Anton pamaseguro so walad sikatayo a labay na Dios a sikatayo so manpikasi?
2 Akin ya inter na Dios ed sikatayo iyan simbawa? Lapud saray desdes tan responsabilidad ed bilay so mangiter a tuloy na pakabelatan ed sikatayo a nalingwanan tayo la so manpikasi. O nayarin manalona iray problema ed sikatayo tan sengegan itan na itunda tayon manliket ed ilalo tan ontundan manpikasi. Lapud sarayan bengatla, nakaukolan tayoray panonot a mamaseseg ed sikatayon manpikasi tan mamaapit ed sikatayo ed subol na tulong tan ligliwa, si Jehova a Dios tayo.
3 Insulat na babangatan a Santiago: “Asingger kayo ed Dios, et sikato so onasingger naani ed sikayo.” (Santiago 4:8) On, say Dios so aliwan tanton atagey nisay arawin tuloy pian denglen toray balikas tayo ed sikato, anggaman ed ag-ayadyarin atooan a kipapasen tayo. (Gawa 17:27) Niarum ni, sikato so agmanangiduma odino agmapaga. Ikuan na salmista: “Saray mata nen Jehova wala ra ed matunong a too, tan saray layag to akalukas ira ed saray akis da.”—Salmo 34:15; 1 Pedro 3:12.
4. Panon a niyilustra so inka-atentibo nen Jehova ed pikakasi?
4 Mangiimbita si Jehova na pikakasi. Nayarin ipareng tayo iya ed sakey a pantitipon a ditan et dakel a totoo so mantotongtong. Wadman ka, ya ontatalineng ed tongtongan na arum. Say betang mo et singa sakey a manangobserba. Ingen wala so inmasingger ed sika, imbaga to so ngaran mo, tan impaarap iray salita to ed sika. Saya so angala na imanom ed nikaduman dalan. Mipadpara, say Dios so lawas atentibo ed totoo to, inerman so kawalaan da. (2 Awaran 16:9; Uliran 15:3) Kanian tatalinengen toray balikas tayo, a sikato so manalimbeng tan interesado ed sikara, a singa onman. Anggaman ontan, sano ontawag tayo ed ngaran na Dios ed pikakasi, natangguyor so imano to, tan sikato so akaarap natan ed sikatayo ed malinew a dalan. Diad panamegley na saray pakayari to, naimano tan natalosan ni ingen nen Jehova so agnibalikas a kerew na too a niamot ed puso tan kanonotan to. Paseguroan itayo na Dios a sikato so onapit ed amin na sisimoon ya ontawag ed ngaran to tan mantultuloy ya onapit ed sikato.—Salmo 145:18.
Onkiwas Unong ed Gagala na Dios
5. (a) Anto so ipanengneng na konsehon “mansiansian malet ed pikakasi” nipaakar ed saray pikakasi tayo? (b) Panon ya ebatan na Dios iray pikakasi?
5 Say konseho a mansiansian malet ed pikakasi so mangipanengneng a si Jehova no maminsan et mangiyabuloy ed sikatayon mantultuloy a manpikasi nipaakar ed sakey a pamaakaran sakbay ya ompatnag so ebat to. Nayarin sikatayo ingen so onsawan onkerew ed Dios parad abobon o maaron-kaabigan ya ompatnag a nakakaukolan balet ta namamantine. Kanian, kekerewen nen Jehova a Dios ya agtayo onsuko ed antokaman a kilingan noagta mantultuloy a manpikasi. Nepeg tayon mantultuloy ya onkerew ed sikato nipaakar ed saray kapagaan tayo, a matalek a respetoen to so pikakasi tayo tan kapeten iray tuan kaukolan tayo, aliwan simplin no anto so inkatunongan tayo. Andi-duaruwan simbangen nen Jehova a Dios iray kerew tayo unong ed gagala to. Alimbawa, arum so nayarin nalanor ed kerew tayo. Nayarin iyolibay tayo so pamaakaran ed sakey ya ama a say ilalak to et onkerew ed sikato na bisikleta. Kabat na ama a no mangaliw na bisikleta parad satan ya ilalak, say sananey ya ilalak to so malabay met a nawalaan. Lapud say sakey ya anak et ugaw ni pian nawalaan na bisikleta, desidien na ama ya agmangaliw ed saman a partikular a panaon. Diad mipadparan dalan, diad liwawa na gagala to tan panangipanaon ed saray bengatla, say mangatatawen ya Ama tayo so mandeside no anto so tuan sankaabigan parad sikatayo tan parad arum.—Salmo 84:8, 11; ipareng so Habacuc 2:3.
6. Anton ilustrasyon so inter nen Jesus nipaakar ed pikakasi, tan anto so ipanengneng na pansiansian malet ed pikakasi?
6 Makatantanda so ilustrasyon ya inter nen Jesus nipaakar ed pankaukolan na saray babangatan to a “lawas manpikasi tan ag-ontunda.” Sakey a balo, ya ag-akaawat na inkahustisya so nansiansia ed kerew to ed sakey a toon ukom ya anggad diad kaunoran et akaawat na inkahustisya. Inyarum nen Jesus: “Sirin, maseguro, a say Dios agto kasi isingil iray pinili to?” (Lucas 18:1-7) Say pansiansian malet ed pikakasi so mangipanengneng na pananisia tayo, panagmatalek tayo ed si Jehova, inkamabulos tayon mansiansian maapit ed sikato tan onkerew, ya ipalima ed sikato so pansumpalan.—Hebreos 11:6.
Saray Ehemplo ed Pansiansian Maapit ed si Jehova
7. Panon tayon aligen so pananisia nen Abel ed pansiansian maapit ed si Jehova?
7 Napno so Biblia na saray salaysay ed saray pikakasin imbalikas na ariripen na Dios. Saraya so “nisulat a kibangatan tayo, ta pian lapu ed anos tan lapu ed panamaligliwa na saray Kasulatan wala so ilalo tayo.” (Roma 15:4) Napabiskeg so ilalo tayo diad pangonsidera ed pigaran ehemplo na saramay nansiansian maapit ed si Jehova. Angibagat si Abel na naabobonan a bagat ed Dios, tan anggaman anggapo so pikakasin nikurit, andi-duaruwan sikato so nanpikasi ed si Jehova a say bagat to et naabobonan. Ikuan na Hebreos 11:4: “Lapud pananisia si Abel so angisaklang ed Dios na bagat a marakdakep nen si Cain, et lapu ed satan a pananisia niiter ed sikato so tasi a sikato so matunong.” Kabat nen Abel so sipan na Dios ed Genesis 3:15, balet no ipareng ed kabat tayo la natan, dagdaiset so kabat to. Ingen, si Abel so kinmiwas unong ed pikakabat a walad sikato. Ontan met natan, arum ed saramay balobalo nin interesado ed katuaan na Dios so andian ni na dakel a pikakabat, balet sikara so manpikasi tan mangusar a maong ed pikakabat a walad sikara, a singa ginawa nen Abel. On, kinmiwas ira unong ed pananisia.
8. Akin a maseguro itayo a si Abraham so nansiansian maapit ed si Jehova, tan anton tepet so nepeg ya itepet tayo ed inkasikatayo?
8 Sananey a matoor ya aripen na Dios et si Abraham, “say ama na amin a walaan na pananisia.” (Roma 4:11) Natan, nagkalalon nakaukolan tayo so mabiskeg a pananisia, tan nakaukolan tayo so manpikasi a tekep na pananisia, a singa ginawa nen Abraham. Ikuan na Genesis 12:8 a sikato so angipaalagey na altar “ed si Jehova tan ginmapon ontawag ed ngaran nen Jehova.” Amta nen Abraham so ngaran na Dios tan inusar to itan ed pikakasi. Panapanaon a sikato so sisisimoon a nansiansian malet ed pikakasi, ya ontatawag “ed ngaran nen Jehova ya andi-anggaan a Dios.” (Genesis 13:4; 21:33) Ontatawag si Abraham ed Dios diad pananisia a sikato so akabkabatan. (Hebreos 11:17-19) Say pikakasi so tinmulong ed si Abraham a nansiansian nangayagan tuloy ed ilalo ed Panarian. Kasin tutumboken tayo so ehemplo nen Abraham ed pansiansian malet ed pikakasi?
9. (a) Akin a saray pikakasi nen David so ontanlan makagungguna ed saray totoo na Dios natan? (b) Anto so nayarin resulta ed panagpikasi tayo a singa ginawa nen David pian mansiansian maapit ed si Jehova?
9 Si David so matalona no nipaakar ed pansiansian malet ed pikakasi, tan saray salmo to so mangiyilustra no anto so nepeg a kargaen na saray pikakasi. Alimbawa, manepeg ya ipikasi na ariripen na Dios iray bengatla a singa say kilalaban tan kililiktar. (Sal 3:7, 8; 60:5), panangiwanwan (Sal 25:4, 5), salimbeng (Sal 17:8), kaperdona na saray kasalanan (Sal 25:7, 11, 18), tan sakey a puron puso (Sal 51:10). Sanen alikna nen David ya apairap, sikato so nampikasi: “Pagayagam so kamarerwa na aripen mo.” (Sal 86:4) Sikatayo so mipadparan manpikasi parad gayaga ed puso, a kabat tayon pilalek nen Jehova a mangayaga itayo ed ilalo tayo. Nansiansian maapit si David ed si Jehova tan nampikasi: “Say kamarerwak so maapit a tinmunbok ed sika; say limam a kawanan ampopoen toak.” (Sal 63:8) Kasin sikatayo so mansiansian maapit ed si Jehova, a singa ginawa nen David? No ontan so gawaen tayo, sikato so mangidepensa met ed sikatayo.
10. Anton makapuy iran kanonotan so walan aminsan ed si salmistan Asap, balet anto so amoria to?
10 No sikatayo so mansiansian maapit ed si Jehova, kaukolan tayon onarawi ed iyibeg ed mauges lapud malukak tan marteyalistikon panagbilay. Aminsan et alikna nen Asap ya anggapoy kana na panlingkor ed si Jehova, ta say mauges et “walaran naynay ed kainomayan.” Siansian atebek to a say katunongan to so aliwa tan say mauges so walad “andanglel a paspasen.” Atalosan to ya anggapo so magmaong nen say pansiansian maapit ed si Jehova, tan imbalikas to so inkasikato ed Dios ed sayan dalan: “Wala ak a lanang ed sika; sika intabin moak ed limak a kawanan. Ta, nia! saraman so arawi ed sika natawtaw ira. . . . Bangbalet ta maong ed siak, so ondere ed abay na Dios. Inyan ko so panagmatalek ko ed Soberanon Katawan a Jehova, pian nipaamtak so amin a gawagawam.” (Salmo 73:12, 13, 18, 23, 27, 28) Imbes ya onibeg ed malukak a panagbilay na mauges, totoon andian na ilalo, aligen tayo komon si Asap ed pansiansian maapit ed si Jehova.
11. Akin a si Daniel et maabig ya ehemplo ed pansiansian maapit ed si Jehova, tan panon tayon naalig?
11 Nansiansian malet ed pikakasi si Daniel, anggan ed arap na kapeligroan ed loob na ongib na saray leon lapud ag-intulok ed opisyal iran panameget ed pampikasi. Balet “inbaki [nen Jehova] to so anghel to tan pinepet toray sangi na saray leon,” ya angiliktar ed si Daniel. (Daniel 6:7-10, 22, 27) Abendisyonan a maong si Daniel diad impansiansian malet ed pikakasi. Kasin mansiansia itayo met a malet ed pikakasi, nagkalautla sano nidunget ed isusumpa ed panagpulong tayo na Panarian?
Si Jesus, Uliran Tayo
12. (a) Diad gapo na ministeryo to, anton alimbawa so inletneg nen Jesus nipaakar ed pikakasi, tan panon a makagungguna iya ed saray Kristianos? (b) Anto so iparungtal na modelon pikakasi nen Jesus nipaakar ed pikakasi?
12 Nanlapulad gapo na mangaraldalin a ministeryo to, ipanengneng na rekord a si Jesus et mabetbet a nanpikasi. Say mapikasin awawey to legan ya abautismoan so angiletneg na maabig ya ehemplo parad saramay manpabautismo ed danum ed modernon panaon. (Lucas 3:21, 22) Say sakey so makapanpikasi parad tulong na Dios pian sumpalen so isisimbolo na bautismo ed danum. Tinulongan met nen Jesus iray arum ya onasingger ed si Jehova diad pikakasi. Diad sakey ya okasyon sanen si Jesus so manpipikasi ed sakey a pasen, sakey ed saray babangatan so nankuan ed sikato kasumpal to: “Katawan ibangat mo kamin manpikasi.” Insan insalaysay nen Jesus so kaslakan a kabkabat a modelon pikakasi, a say alasir na saray tema et mangipanengneng a say ngaran tan gagala na Dios so niyuna. (Lucas 11:1-4) Kanian, diad saray pikakasi tayo et nakaukolan tayon pansiansiaen so panmoria tan inkasimbang, ya agmangikaindan ed “nagkalalon importanti iran bengatla.” (Filipos 1:9, 10) Siempre, walara so panaon na nikadkaduman pankaukolan o sano nakaukolan ya ibaga so espesipikon problema. Singa si Jesus, nayarin onasingger iray Kristiano ed Dios diad pikakasi pian onkerew na biskeg diad panumpal ed pigaran asainmin o pian natalonaan so partikular iran subok o kapeligroan. (Mateo 26:36-44) Diad tua, sayakupen na personal iran pikakasi so ngalngali amin a nengneng na bilay.
13. Panon ya impanengneng nen Jesus so kaimportantian na pangipikasi ed arum?
13 Diad panamegley na maabig ya ehemplo to, impanengneng nen Jesus so kaimportantian na panagpikasi ed biang na saray arum. Amta ton gulaen tan pasegsegangen daray babangatan to, a singa met sikato. (Juan 15:18-20; 1 Pedro 5:9) Sirin, sikato, so kinmerew ed Dios ya “ilaban tora ed mauges.” (Juan 17:9, 11, 15, 20) Tan diad pakaamta ed nikadkaduman subok a walad arapan nen Pedro, imbaga to ed sikato: “Ingen inpikasi taka, pian say pananisiam ag-onkulang.” (Lucas 22:32) Agaylan makagungguna no mansiansia met itayo a malet ed panagpikasi parad saray agagi tayo, a nonoten iray arum ya aliwan saray dilin problema tan interes tayo!—Filipos 2:4; Colosas 1:9, 10.
14. Panon tayon amta a si Jesus et nansiansian maapit ed si Jehova ed interon mangaraldalin a ministeryo to, tan panon a sikato so naalig tayo?
14 Diad interon ministeryo to, si Jesus so nansiansian malet ed pikakasi, a nansiansian maapit a tuloy ed si Jehova. (Hebreos 5:7-10) Say apostol Pedro, diad Gawa 2:25-28 et angaon ed Salmo 16:8 tan inusar to ed Katawan a Jesu-Kristo: “Ta inkuan nen David nipaakar ed sikato, ‘Sankanengneng kon lawas si Jehova ed arap ko; ta wala ed nikawanan ko pian agak naani nagalaw.” Nagawaan tayo met itan. Makapanpikasi tayo ed Dios ya onapit ed sikatayo, tan nipanengneng tayo so talek tayo ed si Jehova diad lawas sinononot ed kiwawala to. (Ipareng so Salmo 110:5; Isaias 41:10, 13.) Insan arawian tayo so amin a nengneng na gonigon, ta tulongan itayo nen Jehova, tan agtayon balot natawtaw.
15. (a) Nipaakar ed anto ya agtayon balot onsaew a mansiansian malet ed pikakasi? (b) Anton panalwar so niiter nipaakar ed pisasalamat tayo?
15 Agtayon balot komon onsaew a mangibalikas na pisasalamat ed si Jehova ed amin a kamaongan to ed sikatayo, on, “say alablabas ya agkanepegan a panangasi na Dios,” ya ilaktip to so regalo na Anak to a bilang dondon bagat ed saray kasalanan tayo. (2 Corinto 9:14, 15; Marcos 10:45; Juan 3:16; Roma 8:32; 1 Juan 4:9, 10) On, diad ngaran nen Jesus, “lawas misalamat ed amin iran bengatla diad Dios tan Ama tayo.” (Efeso 5:19, 20; Colosas 4:2; 1 Tesalonica 5:18) Nepeg ya alwaran tayo so pisasalamat tayo a niwala ed sikatayo ya ag-onapseng lapud sikatayo so okupadon tuloy ed bengatlan andi ed sikatayo odino ed personal iran problema tayo.
Ipasakbat ed si Jehova Iray Awit Tayo
16. Sano arum a pakabelatan so mangonigon ed sikatayo, anto so nepeg tayon gawaen?
16 Say seet ed panpikasi so mangipanengneng na aralem a debosyon tayo. Sano ontawag itayo ed Dios, say epekto ed sikatayo so maong anggan sakbay na isabi ebat manlapud sikato. No wala so pakabelatan a mangogonigon ed saray kanonotan tayo, sikatayo so makapansiansian maapit ed si Jehova diad itumbok ed konseho: “Paawit mo ed Jehova so awit mo et sikato benbenan to ka.” (Salmo 55:22) Diad pangipasakbat ed amin na saray awit tayo—kapagaan, kaaburidoan, kadismayaan, takot, tan arum nira—ed Dios, a tekep na sigpot a pananisia ed sikato, naawat tayo so deen na puso, “say deen na Dios a talonaan to so amin a pakatalos.”—Filipos 4:4, 7; Salmo 68:19; Marcos 11:24; 1 Pedro 5:7.
17. Panon tayon nagamoran so deen na Dios?
17 Kasin onsabin tampol so deen na Dios? Anggaman makaawat tayon tampol na daiset ya inawa, say inkuan nen Jesus nipaakar ed panagpikasi parad masanton espiritu so tua met ed saya: “Kerew kayo et naitdan kayo; mananap kayo et makaromog kayo; ontoktok kayo et nalukasan ed sikayo.” (Lucas 11:9-13) Lapud say masanton espiritu so tulong diad pangipulisay ed kapagaaan, nakaukolan tayo so mansiansian malet ed ikerew na deen na Dios tan tulong to nipaakar ed saray awit tayo. Maseguro tayo a diad maseet a panagpikasi, naawat tayo so pilalek ya inawa tan deen na puso.
18. Anto so gawaen nen Jehova parad sikatayo no agtayo amta no anto so pihon ipikasi tayo ed sakey a situasyon?
18 Balet panon no agtayo pihon amta so ipikasi tayo? Saray akindalem ya eyey tayo so mabetbet a mansiansian agnibalikas lapud agtayo nagnap a natalosan so situasyon tayo, o sikatayo so agmaseguro no anto so iparungtal ed si Jehova. Dia a nayarin mamegley so masanton espiritu parad sikatayo. Insulat nen Pablo: “Tan ontan met lamlamang, say espiritu tulongan to met so kakapuyan tayo ta agtayo amta no panon so panpikasi tayo unong na nepeg tayo noag say espiritun mismo so onkerew parad sikatayo ed agnibalikas a paningel.” (Roma 8:26) Panon ya ontan? Wala ed Salita na Dios iray impuyan a propesiya tan pikakasi a tukoy ed situasyon tayo. Abuloyan ton mamegley iraya parad sikatayo, a singa onman. Awaten torayan bengatlan ipipikasi tayo no kabat tayo lambengat so kabaliksan to ed kipapasen tayo, tan matukoy a saratan so sumpalen to.
Mantultuloy so Pikakasi tan Ilalo
19. Akin a mantultuloy ed ando lan ando so pikakasi tan ilalo?
19 Say panagpikasi ed mangatatawen ya Ama tayo so mantultuloy ed ando lan ando, nagkalautla nipaakar ed pisasalamat ed balon mundo tan amin iran bendisyon to. (Isaias 65:24; Apocalipsis 21:5) Makapantultuloy tayo met a manliket ed ilalo, ta say arum a nengneng na ilalo so mansiansia ed ando lan ando. (Ipareng so 1 Corinto 13:13.) Anto iran balon bengatla so itarok nen Jehova sano sikato so anggapo la ed silong na dilin-ganggan na agew a Sabaton a pampainawa ed dalin, agtayo anggan naisip. (Genesis 2:2, 3) Diad inkamaando, sikato so walaan na maaro iran surpresa parad totoo to, tan say arapen so walaan na engranden bengatla parad sikara diad dalan na panggawa na linawa to.
20. Anto so nepeg a determinasyon tayo, tan akin?
20 Tekep na ontan a makapasagyat ya ilalo ed arapen tayo, komon ta amin tayo so mansiansian maapit ed si Jehova diad pansiansian malet ed pikakasi. Agtayon balot komon ontunda a misalamat ed mangatatawen ya Ama tayo ed amin iran bendisyon tayo. Diad dugan panaon saray ilaloan tayo so sigagayagan nagamoran, ya anggan diad labas na isisipen o iilaloan tayo, ta si Jehova so “manggawa na ontanlan daakan nen saray amin a nayarian tayo a kerewen odino nonoten.” (Efeso 3:20) Sirin, nipaakar ed saya, iter tayon amin so dayew tan gloria tan pisasalamat ed si Jehova a Dios tayo ed inkamaando, say “Dumerengel na pikakasi”!
[Paimano ed leksab]
a Unong ed Webster’s New Dictionary of Synonyms, “Say mansiansian malet so lawas manutukoy ed narayrayew a kalidad; mangisuheri itan na namparan agpakadismaya ed isaew, panduaruwa, o saray kairapan, tan mapekder o maseet a pangegemtan ed sakey a gagala odino sakey a kimey.”
Panon so Pangebat Yo?
◻ Akin a sikatayo so mansiansian malet ed pikakasi?
◻ Anto so naaralan tayo nipaakar ed sakbay-Kristiano iran ehemplo na pikakasi?
◻ Anto so ibangat ed sikatayo na ehemplo nen Jesus nipakar ed pikakasi?
◻ Panon tayon ipasakbat ed si Jehova iray awit tayo tan ed anton pansumpalan?
[Litrato ed pahina 17]
Nansiansian malet ed pikakasi si Daniel anggaman ed panagtaktakot ed kibantak ed ongib na saray leon