Kasin Onkiwas Kayo ed Panangaro nen Jesus?
“Say aro nen Kristo pasooten to kami.”—2 CORINTO 5:14.
1. Panon so nayarin paneskribe ed aro nen Jesus?
TUA, agaylan makapakelaw so aro nen Jesus! Sano nonoten tayo so agnadeskriben impanirap to legan ya intarok to so dondon, a diad atan labat a nagamoran tayo so andi-anggaan a bilay, maseguron saray puso tayo so napakiwas tekep na panamabli ed sikato! Si Jehova a Dios tan si Jesus a mismo so inmuna. Sikara so angaron inmuna ed sikatayo, legan a sikatayo so makasalanan. (Roma 5:6-8; 1 Juan 4:9-11) Say pangamta ed “aro nen Kristo,” ya insulat nen apostol Pablo, “so manalonggaring ed pikakabat.” (Efeso 3:19) Peteg, say aro nen Jesus palumbasan to so akademikon pikakabat. Onlabas ed antokaman nin anengneng odino naeksperiensia na totoo.
2. Anto so agmakaamper ed panangaro nen Jesus ed sikatayo?
2 Diad impansulat ed saray Kristianos ed Roma, intepet nen Pablo: “Siopa so mangisian ed sikatayo ed aro nen Kristo? Kasin say kairapan o say kaermenan o say panamasegsegang o say eras o say kalakseban o say kaatapan o say kampilan?” Anggapo ed saratan a bengatla so makapangiyarawi ed si Jesus diad pangaro ed sikatayo. “Kumbinsido ak,” intuloy nen Pablo, “ya anggan say patey nisay bilay nisay angheles nisay gob-gobierno nisay bengabengatlan wala ed kaplesan nisay saray bengatlan onsabi nisay saray pakayari nisay kaatagey nisay kaaralman nisay siopaman a pinalsa et makapangisian ed sikatayo ed aro na Dios a wala ed Kristo Jesus a Katawan tayo.”—Roma 8:35-39.
3. Anto lambengat so nayarin sengegan na iyarawi nen Jesus tan Ama to ed sikatayo?
3 Ontan kabiskeg so aro nen Jehova a Dios tan si Jesus ed sikayo. Wala lambengat so sakey a bengatlan mamatunda ed sikara ed pangaro ed sikayo, atan so dilin ingagalan pangipulisay yo ed aro ra diad agpanggawa no antoy kekerewen da. Aminsan insalaysay na propeta na Dios ed sakey ya arin taga-Judea: “Si Jehova so wala ed sika; leleg a wala ka ed sikato et no sikato so anapen mo, sikato so naromog mo, balet no sikato so ikaindan mo sika so ikaindan to.” (2 Awaran 15:2) Siopa ed sikatayo so malabay ya ombeneg manlapud ontan a marakep, maabagey iran kaaro a singa si Jehova a Dios tan say Anak to, si Jesu-Kristo?
Manepeg a Kiwas ed Panangaro nen Jesus
4, 5. (a) Panon a say aro nen Jesus so mangapekta ed relasyon tayo ed kaparan totoo? (b) Diad siopa ni a nasagyat tayon mangaro lapud aro nen Jesus ed sikatayo?
4 Panon kayon personal a nalalanor ed baleg a tuloy a panangaro nen Jesus parad sikayo? Panon so nepeg yon pagmaliwan? Bueno, impanengneng nen Jesus no panon a say impangidemostra to na aro so nepeg a mangapekta ed saray relasyon tayo ed kaparan totoo. Kayari sipapaabeban impanlingkor ed saray apostoles to diad impanguras na sali-sali ra, inkuan nen Jesus: “Ta inletneg ko ed sikayo so pangaligan, pian gawaen yo met so singa ginawak ed sikayo.” Inyarum to: “Itdan ta kayo na balon ganggan, a manaarowan so sakey tan sakey ed sikayo, salanti unong na impangarok ed sikayo, pian manaarowan met so sakey tan sakey ed sikayo.” (Juan 13:15, 34) Akaaral iray babangatan to, tan sikaray apakiwas a manggunaet a gawaen so unong na ginawa to. Insulat nen apostol Juan: “Dia ed saya abirbir tayo so aro, ta sikato inter to so bilay to nisesengeg ed sikatayo; tan nepeg tayo met ya italaga so bilay tayo nisesengeg ed saray agagi tayo.”—1 Juan 3:16.
5 Siansia, nasaew tayo so gagala na bilay tan ministeryo nen Jesus no atenyeg itayo na alimbawa to diad pangaro lambengat tan panlingkor ed saray interes na kaparan totoo. Agta say aro nen Jesus parad sikatayo so mamakiwas ed sikatayon mangaro met ed sikato tan nagkalautla ed Ama to, ya angibangat ed sikato na amin a bengatlan kabat to? Kasin onkiwas kayo ed aro nen Kristo tan manlingkor ed Ama to unong a ginawa to?—Efeso 5:1, 2; 1 Pedro 1:8, 9.
6. Panon a naapekta si Pablo diad panangaro nen Jesus ed sikato?
6 Kunsideraen so kipapasen nen Saulo, a diad saginonor et atawag a bilang Pablo. Dakel a panaon ed apalabas sikato so amasegsegang ed si Jesus, “ya angibesngaw na gagaem tan pamatey ed saray babangatan.” (Gawa 9:1-5; Mateo 25:37-40) Sanen peteg ya akabatan nen Pablo si Jesus, sikato so misalsalamat diad impakaawat na panamerdona a sikato so aglabat mabulos a manirap ed biang nen Jesus noagta sikato so akatarya met ya ompatey parad sikato. “Nipasak ak a kaiba nen Kristo,” insulat to. “Aliwa lan siak so mabilay . . . Peteg, say bilay a panbibilayan ko natan ed laman panbibilayan ko lapu ed pananisia a wala ed Anak na Dios, a sikato so angaro ed siak tan inter to so inkasikaton dili lapud siak.”—Galacia 2:20.
7. Anto so nepeg ya isagyat na aro nen Jesus ed sikatayo a gawaen?
7 Agaylan makapalagyat a puersa ed saray bilay tayo so nepeg a pagmaliwan na aro nen Jesus ed sikatayo! “Say aro nen Kristo pasooten to kami,” insulat nen Pablo ed saray taga-Corinto, ‘ya agmanbilay parad sikamin dili, noag dia ed saman so inatey nisesengeg ed sikatayo tan inmolin binmilay.’ (2 Corinto 5:14, 15) Peteg, say pisasalamat ed impangiter nen Jesus na bilay to ed biang tayo so nepeg a mamayubo ed sikatayon manggawa ed antokaman a kerewen to. Diad sayan dalan lambengat a napaneknekan tayon sikato so peteg ya inaro tayo. “No inaro yoak, sumpal yoray ganggan ko,” inkuan nen Jesus. “Say walaan na saray ganggan ko tan manumpal ed saratan, atan a sakey so mangaro ed siak.”—Juan 14:15, 21; ipareng so 1 Juan 2:3-5.
8. Panon a say aro nen Jesus so angapekta ed saray bilay na dakel iran managgaway kasalanan?
8 Diad impakaaral ed saray ganggan nen Jesus, saray milalawanan, mikakalugoran, homoseksual, managtakew, managbuanges, tan managpatobo ed kadaanan a Corinto so kinmiwas ed panangaro nen Jesus diad itunda ed saratan ya ag-agamil. Insulat nen Pablo ed sikara: “Naurasan kayo la, . . . niyabawag kayo lan matunong ed ngaran na Katawan tayo a Jesu-Kristo.” (1 Corinto 6:9-11) Mipadpara, say aro nen Jesus so nanlagyat ed dakel natan a manggawa na makatantandan pananguman ed saray bilay da. “Say tuan pananalo ed Inkakristiano so nanengneng ed impanggawa na maabig a totoo ed saraman so mankuan a manusumpal ed saray doktrina to,” insulat nen manag-awaran a si John Lord. “Walaan tayo na pantasi ed andi-kasalanan iran bilay da, ed andi-kabalawan iran moral da, ed maong a pibabaley da, tan ed saray Kristianon pikakasi ra.” Agaylan duma so ginawa na bangabangat nen Jesus!
9. Anto so nalalanor ed italineng ed si Jesus?
9 Maseguro, anggapo so panagaral a nagawa na siopaman natan a nagkalalon importanti nen say bilay tan ministeryo nen Jesu-Kristo. “Onnengneng a maapit ed . . . si Jesus,” insimbawa nen Pablo. “Peteg, motekteken [itan].” (Hebreos 12:2, 3) Legan na transpigurasyon nen Jesus, inganggan a mismo na Dios nipaakar ed Anak to: “Ontalineng ed sikato.” (Mateo 17:5) Anggaman kuan, nepeg ya idanet, a say italineng ed si Jesus et mangilaktip na nagkalalo ni nen say simplen italineng ed ibabaga to. Kabaliksan to so pangimano ed bilibilin to, on, say pangalig ed sikato diad panggawa na ginawa to ed dalan ya inpanggawa to ed atan. Onkikiwas itayo ed aro nen Jesus diad pangiyadapta ed sikato a bilang modelo tayo, diad itumbok a maapit ed saray bakat to.
Anto so Labay nen Jesus a Gawaen Tayo
10. Siopa so impasal nen Jesus tan diad anton gagala?
10 Say kimey nen Jesus a nanlapud Dios et say pangipulong na nipaakar ed Panarian nen Ama to, tan sikato so angipasal ed saray patumbok ton manggawa na parehon kimey. “Onla tayo ed anggan iner a pasen,” kuanto ed saray inmunan babangatan to, “pian manpulong ak met diman, ta linma ak dia lapud sayan gagala.” (Marcos 1:38; Lucas 4:43) Saginonor, kayari na malaklaknab ya impangipasal ed 12 apostoles, binilin nen Jesus ira: “Tan no onla kayo, manpulong, a kuan yo, ‘Say panarian na katawenan asingger la.’” (Mateo 10:7) Pigaran bulan ed saginonor, kayari impangipasal na arum nin 70, imbaki tora tekep na ganggan a: “Mantutuloy ya ibaga ed sikaran, ‘Inmasingger ed sikayo so panarian na Dios.’” (Lucas 10:9) Natalosan, a labay nen Jesus a saray patumbok to so magmaliw iran managpulong tan managbangat.
11. (a) Diad anton dalan a saray babangatan nen Jesus so manggawa na babaleg iran kimey nen say ginawa to? (b) Anto so agawa ed saray babangatan kayari impatey nen Jesus?
11 Intuloy nen Jesus ya impasal iray babangatan to ed sayan kimey. Legan na kaunoran a labi sakbay na ipatey to, pinaseseg tora ed sarayan salita: “Saman so mangagamil na pananisia ed siak, aman met so manggawa na saray kimey a ginawak; tan sikato so manggawa na saray kimey a babaleg nen saraya.” (Juan 14:12) Saray kimey na papatumbok to so magmaliw a babaleg nen say ginawa to lapud diad ministeryo ra et sabien da so dakel nin totoo ed lalon malalaknab a pasen tan ed andukdukey a panaon. Ingen, kayari impamatey ed si Jesus, saray babangatan to so atalawan. Sikara so nanamotamot tan ag-angituloy ed kimey ya angipasalan to ed sikaran gawaen. Arum so pinmawil ni ingen ed panagsigay. Anggaman ontan, diad agnalingwanan a dalan, indanet to ed sarayan pito tan ontan met ed amin iran patumbok to no anto so labay ton pagawa ed sikara.
12. (a) Anton milagro so ginawa nen Jesus ed Dayat na Galilea? (b) Mapatnag, anto so labay ya ibaga nen Jesus sanen tinepetan to si Pedro no kasin Sikato so inaro ton “nagkalalo ni nen saraya”?
12 Nankinon too si Jesus tan pinmatnag diad Dayat na Galilea. Saray pitoran apostoles so nanbaluto balet sanlabin anggapo so asigay da. Kinmelyaw si Jesus ed pangdel: “Ipelag yo so iket ed nikawanan na paraw et makaromog kayo.” Sanen say iket so mamilagron napno na sira a ngalngalin napilat, atalosan na saraman so walad paraw a si Jesus iman so walad pangdel, tan nanapurasta ran linma ed panaalagaran to. Kayari toran pinarungoan na almusal, nayarin sankanengneng nen Jesus so dakel ya asigay da, so tinmepet ed si Pedro: “Simon ya anak nen Juan, kasin inaro moak a nagkalalo nen saraya?” (Juan 21:1-15) Andiduaruwan labay nen Jesus ya ibagan, Kasin mas makana ed sika so negosyon panagsigay nen say panagpulong a kimey ya angiparaanan ko ed sikan gawaen mo?
13. Panon a mabisbiskeg ya indanet nen Jesus ed saray patumbok to so dalan a nepeg dan ikiwas ed aro to?
13 Inmebat si Pedro: “On, Katawan, amtam ya inaro ta ka.” Inmebat si Jesus: “Pakan moray karnerok.” Diad piddua tinmepet si Jesus: “Simon ya anak nen Juan, kasin inaro moak?” Lamet inmebat si Pedro, andiduaruwan diad mas mabiskeg a konbiksyon: “On, Katawan, amtam ya inaro ta ka.” Lamet inganggan nen Jesus: “Pastolan mo’y melag a pulok ko.” Diad pitlo tinmepet si Jesus: “Simon ya anak nen Juan, kasin inaro moak?” Diad sayan bekta si Pedro so tuan naermenan. Pigaran agew labat ed apalabas, sikato so amitlon danay ya angitapat ed pikabat ed si Jesus, kanian nayarin inisip ton ompan panduaruwaan nen Jesus so katooran to. Kanian, diad komatlon danay, inmebat si Pedro, palagi diad mikakasin tonada: “Katawan, sika amtam ya ami’ bengabengatla; kabat mon inaro taka.” Simplin inmebat si Jesus: “Pakan mo so melag a karnerok.” (Juan 21:15-17) Kasin wala so antokaman a panduaruwa ed no anto so labay nen Jesus a pagawa ed si Pedro tan saray kakaiba to? Agaylan mabisbiskeg so impangidanet to ed sikara—tan ontan met ed siopaman a magmaliw a babangatan to natan—a no sikato so inaro ra, mibiang ira ed panaggaway-babangatan a kimey!
14. Diad arum iran kipapasen, panon ya impanengneng nen Jesus so dalan ed saray babangatan to ed nepeg dan ikiwas ed aro to?
14 Pigaran agew kayari na tongtongan ed saman a pangdel, inmapireng si Jesus ed sakey a palandey ed Galilea tan amilin ed sakey a maliket a kumbension na ngalngali 500 a papatumbok: “Onla kayo sirin a manggawa na babangatan ed amin a nasyones . . . a bangatan iran mangunor ed amin a bengabengatlan inganggan ko ed sikayo.” (Mateo 28:19, 20; 1 Corinto 15:6) Isipen pa itan! Lalaki, bibii, ugugaw amin so akaawat na parehon kimey. Siansia ed saginonor, sakbay a tuloy na itokotok ed tawen, imbaga nen Jesus ed saray babangatan to: “Sikayo so magmaliw a tastasik . . . ed kasampotan na dalin.” (Gawa 1:8) Kayari na amin na sayan simbawa, agpankelawan a si Pedro, diad saginonor iran taon, inkuanto: “Inganggan [nen Jesus] ed sikami a manpulong ed totoo tan mangiter na nagnap a pantasi.”—Gawa 10:42.
15. Diad anto ya anggapo so panduaruwa?
15 Anggapo so panduaruwa ed no panon so nepeg tayon ikiwas ed aro nen Jesus. Unong ya imbaga to ed saray apostoles to: “No sumpalen yoray ganggan ko, mansiansia kayo ed arok . . . Sikayo so kakaarok no gawaen yo so inganggan ko ed sikayo.” (Juan 15:10-14) Say tepet so, Kasin ipanengneng yo so panamabli ed aro nen Jesus diad itulok ed ganggan ton mibiang ed panaggaway-babangatan a kimey? Tua, saya so agmainomay parad sikayo nisesengeg ed nambabangil iran rason. Balet atan met so agmainomay parad si Jesus. Kunsideraen iray pansalat ya alanor ed sikato.
Tumboken so Alimbawa nen Jesus
16. Anton makapakelaw ya alimbawa so intarok nen Jesus?
16 Say bogbogtong ya Anak na Dios so nangayaga ed manunan kipapasen ed mangatatawen a glorian atagtagey ed amin na saray angheles. Sikaton peteg so mayaman! Ingen sibubulos ton nilokpos so inkasikato, niyanak bilang membro na sakey a dukan pamilya, tan binmaleg ya apaliberan na sakit, ompapatey a katooan. Ginawa to iya nisesengeg ed sikatayo, unong ya insalaysay nen apostol Pablo: “Amta yo so agkanepegan a panangasi na Katawan tayon Jesu-Kristo, ya anggaman sikato so mayaman et nagmaliw a duka nisesengeg ed sikatayo, pian sikayo lapu ed kadukaan to et onyaman.” (2 Corinto 8:9; Filipos 2:5-8) Agaylan ehemplo! Agaylan sakey a demostrasyon na aro! Anggapo so akapangiter na nagkalalo odino mas nanirap ed biang na saray arum. Tan anggapo anggan sakey so akapanggawan posibli parad saray arum pian mangayaga ed babaleg iran kayamanan, on, andi-anggaan a bilay ed inkayadyari!
17. Anton kurso so niletneg ed arap tayo, tan anto so pansumpalan ed itumbok ed atan?
17 Natumbok tayo so ehemplo nen Jesus tan makagungguna met ed saray arum. Naulit-olit, pinaseseg nen Jesus iray totoo a magmaliw a patumbok to. (Marcos 2:14; Lucas 9:59; 18:22) Diad tua, insulat nen Pedro: “Ta sayan kurang so akatawagan yo, lapud anggan si Kristo et nanirap parad sikayo, diad impangitilak to na panuliranan pian tumboken yon maapit iray bakat to.” (1 Pedro 2:21) Kasin onkiwas kayo ed aro nen Kristo diad laknab a manirap ta pian lingkoran so Ama to a singa ginawa to? Agaylan makagungguna itan a kurang parad saray arum! On, diad itumbok ed ehemplo nen Jesus, diad nagnap ya impangiyaplika ed naawat ton bangabangat ed Ama to, “nilaban yo so inkasikayo tan saraman so ontalineng ed sikayo.”—1 Timoteo 4:16.
18. (a) Anton alimbawa so inletneg nen Jesus nipaakar ed awawey to ed totoo? (b) Panon so inkiwas na totoo ed personalidad nen Jesus?
18 Pian nagkalalon natulongan so totoo, nepeg tayo met a manlikna nipaakar ed sikara diad dalan a ginawa nen Jesus. Inkuan na sakey a propesiya nipaakar ed sikato: “Sikato ilagak to so makabos tan naokolan.” (Salmo 72:13) Saray patumbok to so makaimano a si Jesus et “angaro” ed saramay akitongtongan to tan sikaton peteg so malabay ya ontulong ed sikara. (Marcos 1:40-42; 10:21) “Et sanen anengneng toray dakerakel a totoo,” ikuan na Biblia, “inabagey tora, lapud sikara so maermen tan abuybuyak a singa karneron andian na pastol.” (Mateo 9:36) Anggan saray managkasalanan et akalikna ed aro to tan sinmingger ed sikato. Diad tonada na boses to, kiwas, tan dalan na panagbangat, sikara so komportable. Bilang nansumpalan, anggan saray minudmoran managsinggil na buis tan balangkantis so nananap ed sikato.—Mateo 9:9-13; Lucas 7:36-38; 19:1-10.
19. Panon nen Pablo ya inalig si Jesus, tan anto so resulta ed panggawa tayo met na ontan?
19 Saray inmunan-siglon babangatan nen Jesus so angalig ed maaron ehemplo to. Nansulat si Pablo ed pigaran nanlingkoran to: “Sikami so nagmaliw a mauyamo ed leet yo, a singa sakey a sigsiwa a managano na dilin anak to . . . A singa sakey ya ama ed saray dilin anak to, sikami so mantultuloy a manimbawa ed balang sakey ed sikayo, tan manligliwa tan mantatasi ed sikayo.” (1 Tesalonica 2:7-11) Kasin nalikna yo so parehon puron panangasikaso ed saraman so walad teritorya yo a liknaen na maaron atateng ed inadaron ananak da? Say pangidemostra na ontan a panangasikaso ed tonada na boses yo, say itsura’y lupa yo, tan saray kiwas yo et manggawan makapaay-ayat so mensahe na Panarian ed saray malakarnero.
20, 21. Anto iray pigaran modernon-agew iran nengneng na totoon anumbok ed alimbawa na aro nen Jesus?
20 Sakey ya ambetel ya agew ed Espanya, duaran Tastasi so akaabet na sakey ya akulaw ya akatakarang a say abung to et ambetebetel lapud andian la na isunglor. Sikato so manaalagar ed anak ton lakin onsempet manlapud trabaho pian manbelang. Saray tasi so nanbelang na kiew, tan sikara met so angitilak na pigaran magasin a basaen to. Sanen pinmawil so anak ton laki, sikato so asagyat ed maaron panangasikaso na saray Tasi ed ina to a binasa to so literatura, ginmapon nanaral na Biblia, abautismoan, tan agnambayag et linmoob ed payunir a ministeryo.
21 Diad Australia sakey a laki tan say asawa to so angipaliwawan andian ira na kuartan managano ed pamilya ra diad ondadalaw a Tastasi. Inmalis so sanasawan Tasi tan analiw na saray de-lata, pati kendi parad saray ugugaw. Saray ateng so akanangis, a kuandan sikara so agonigon a tuloy a manpaplano ran manbitkel. Sikaran dua so ginmapon nanaral na Biblia, tan agano ni say asawan bii so abautismoan. Sakey a bii ed Estados Unidos a sumpad saray Tasi nen Jehova so angireport kayari impakaabet to ed sakey: “Agko nanonotan so nantongtongan mi, balet say nanonotan ko et say impanengneng ton panangasi ed siak, tan agaylan sikato so maparawes tan mapaabeba. Peteg ya aliknak so kinaasinger ed sikato bilang sakey a persona. Papablien ko so pikakaarok ed sikato anggad natan.”
22. Kayari panusisa ed bilay nen Jesus, anto so konklusyon tayo nipaakar ed sikato?
22 Sano onkiwas itayo ed panangaro nen Jesus diad panggawa ed kimey a ginawa to diad dalan ya impanggawa to ed atan, agaylan makapakelaw iran bendisyon so pangayagaan tayo! Say inkabaleg nen Jesus so mabitar tan matalona. Sikatayo so napakiwas a mangiyaniweng ed saray salita na Romanon gobernador a Pontio Pilato: “Nia! Say too!” On, peteg, “Say too,” say sankabalgan a toon nambilay.—Juan 19:5.
Panon so Pangebat Yo?
◻ Panon kabaleg so aro nen Jesus?
◻ Siopa so nepeg tayon arowen nisesengeg ed aro nen Jesus, tan anto so nepeg ya isagyat na aro to ed sikatayon gawaen?
◻ Anton kimey so labay nen Jesus a gawaen tayo?
◻ Panon a mayaman si Jesus, tan akin a sikato so nagmaliw a duka?
◻ Panon tayon aligen si Jesus ed dalan na impanlingkor to ed saray totoo?
[Litrato ed pahina 15]
Inletneg nen Jesus so padron ed pangipanengneng na aro
[Litrato ed pahina 17]
Mabiskeg ya inyilustra nen Jesus no panon so nepeg a pangipatnag na aro ed sikato