Say Simban Anguman ed Mundo

“Bendito iman so onladia ed ngaran nen Jehova!”​—MATEO 21:9.

1. Anton duaran nandumaan a grupo so naapektoan na saray ebento nen apalabas ya Agosto?

“TALORAN MAKAPAGONIGON A TULOY IRAN AGEW SO NANPAMAYEGMEG ED MUNDO.” Sanen Agosto 1991, saray paulo ed balita a singa saya so angidanet ed katuaan a say mundo so niiyan ed baleg a gutgutan ed pigaran agew lambengat. On, say manangikaput iran agew na Agosto so makatantandan tuloy aliwa lambengat ed mundo noagta ontan met ed grupon angibagaan nen Jesus: “Ag-ira kabiangan na mundo.” Sayan grupo so akabatan natan a Tastasi nen Jehova.​—Juan 17:14.

2, 3. (a) Panon a nipabitar so kawayangan ed Zagreb anggaman ed ngalngalin ibetag na bakal? (b) Panon a say mabiskeg a pananisia so agunggunaan ed Odessa?

² Say sankaunaan ya implanon internasyonal a kumbension na Tastasi nen Jehova ed Yugoslavia so niyeskedyul ed Agosto 16 ya anggad 18. No nagawa, atan so sankaunaan met a baleg a kumbension na totoo nen Jehova ed nasyon a walad tambib na guerra-sibil. Saray lokal a Tastasi, a pati saray boluntaryon nanlapud kabangibang iran dalin so nankimey a duay bulan diad impangapiger a sigpot ed HASK Gradanski soccer estadium ed Zagreb. Atan so linablinab, a matukotukoy a pasen parad “Manangaro ed Maridios a Kawayangan” a Kumbension. Nilibulibon internasyonal iran delegado so nanplanon onatendi, a pati 600 a nanlapud Estados Unidos. Legan a ngalngalin ombetag so guerra-sibil, binmuyak so salitan: “Agbalot onsabi iray Amerikano.” Balet sikaray sinmabi, a kaiba daray delegadon nanlapud dakel a daldalin. Inilaloan a 10,000 so onatendi, balet 14,684 so walad estadium ed unor ya agew! Amin so mayamyaman ya abendisyonan lapud ‘agda pinaulian so panmomoyong dan mankakasakey.’​—Hebreos 10:25.

³ Legan na taloran agew a tinumbokan na kumbension ed Zagreb, sakey a sinmaew ya iyaalsa so agawa ed Soviet Union. Kaplesan a saray manangaro na maridios a kawayangan so mangagawa na unor a panagparaan parad kumbension da’d Odessa ed Ukraine. Kasin nagawa so kumbension? Tekep na mabiskeg a pananisia ginawa na agagi iray unor a detalye diad sigpot ya impangapiger ed estadium, tan mansasbi iray delegado. A singa diad panamegley na milagro, say iyaalsa so angangga. Say makapaliket a kumbension so agawa ed Agosto 24, 25, ya inatendian na 12,115 tan 1,943​—16 porsiento ed pantok a bilang na inmatendi​—so abautismoan! Sarayan balon Tastasi, pati saray abayag lan manamemben na katooran, so nangayagan sikaray niwala’d sayan kumbension tekep na sigpot a talek ed si Jehova.​—Uliran 3:5, 6.

4. Anton padron ya inletneg nen Jesus so tutumboken na saray Tasi ed Mamabukig a Europa?

⁴ Tutumboken na sarayan matoor a Tastasi so padron ya inletneg na Ehemplo tayo, si Jesu-Kristo. Agton balot niliwatan iray piestan inganggan nen Jehova, anggan sanen sikato so anapen na saray Judios a pateyen. Diad intatdang to ed Jerusalem parad kaunoran a Paskua to, saraya so akaalagey ed liber na templo, a nantepet: “Anto so isisip yo? Ya ag kasi onladia ed piesta?” (Juan 11:56) Balet sikato so linma! Saya so angiparaan na dalan parad sakey a simban amantok ed impanguman na kurang na awaran na too. Kasin narepaso tayo natan so pigaran manunan-liwawa na atan a simba​—Nisan 8 ya anggad 14 ed Judion kalendaryo?

Nisan 8

5. Anto so kabkabat nen Jesus diad impanbaroy ton amaarap ed Betania nen Nisan 8, 33 K.P.?

⁵ Diad sayan agew si Jesus tan saray babangatan to so sinmabi ed Betania. Dia, si Jesus so mansiansian anem labi ed abung na inadaro ton kaaro a si Lazaro, a diad apalabas et pinaoli to ed inaatey. Say Betania so asingger ed Jerusalem. Maamot a pinasakbayan la nen Jesus iray babangatan to: “Nia! Ontatdang itayo ed Jerusalem, et niyawat naani so Anak na too ed saray manunan saserdote tan eskribas, tan sikatoy dusaen da naani ed ipapatey, tan iyawat da naani ed saray Hentiles pian ludlureyen tan leweten tan ipasak da, et diad komatlon agew sikato so napaoli.” (Mateo 20:18, 19) Sigpot a kabat nen Jesus a sikato la natan so onarap ed makapaotot iran subok. Anggaman ontan, legan a manasingger itan a panaon na pinal a subok, ginawa to so amin a gunaet ton serbian iray agagi to. Komon ta walaan itayo lawas na sayan “kalakal . . . a wala met ed si Kristo Jesus.”​—Filipos 2:1-5; 1 Juan 3:16.

Nisan 9

6. Diad labi na Nisan 9, anto so ginawa nen Maria, tan anto so inkuan nen Jesus ed si Judas?

⁶ Tinumbokan na kaselek na agew, unong a ginmapo so Nisan 9, nangayaga si Jesus ya angan ed abung na datin akating a si Simon. Diad sayan pasen a kinalboan nen Marta ya agi nen Lazaro so ulo tan sali nen Jesus na mablin pabalingit a larak tan sipapaabeban pinunasan toray sali to ed panamegley na buek to. Sanen sinmumlang si Judas, inkuan nen Jesus: “Paulian mo, pian saya so pakanodnonotan to ed agew na ponpon ko.” Diad impakadngel a dakel ed saray Judios so oonla ed Betania tan anisia ed si Jesus, sikato tan si Lazaro so nankukumplotan na saray manunan saserdote a pateyen.​—Juan 12:1-7.

7. Diad kabuasan na Nisan 9, panon ya apagalangan so ngaran nen Jehova, tan anto so impasakbay nen Jesus?

⁷ Kabkabuasan, si Jesus so nanpikal a mamaarap ed Jerusalem. Saray katooan so pinmaway a mangabet ed sikato, a mangipapayapay na saray sanga na palma tan mangibebelyaw: “Kilalaban, ipikasi mika! Bendito so onladia ed ngaran nen Jehova, salanti say Ari na Israel!” Sirin sinumpal nen Jesus so propesiya ed Zacarias 9:9 diad inlugan ed sakey ya asno ed syudad. Sanen akaasingger ed Jerusalem, atan so ninangisan to, ya impasakbay ton paliberan itan na saray Romano a tekep na saray duyok tan sigpot a deralen da​—sakey a propesiyan walaan na makapakigtot a kasumpalan 37 taon ed saginonor. (Saya met so mangipatnag na desyang ed Kakristianoan, a nanapostatan singa say kadaanan a Jerusalem.) Si Jesus so aglabay na saray Judion manuley a bilang ari ra. Diad sanok inkelyaw da: “Nia! Say mundo so tinmumbok ed sikato.”​—Juan 12:13, 19.

Nisan 10

8. Diad Nisan 10, panon nen Jesus ya impanengneng so aralem a respeto ed panagpikasian ya abung nen Jehova, tan anto so tinmumbok?

⁸ Dinalaw lamet nen Jesus so templo. Diad komaduan pankanawnawa, pinatakyas toray maagum a managtagilako tan managsalat na kuarta. Komersyalismo​—“say aro ed kuarta”​—so agnepeg ya ontalona ed panagpikasian ya abung nen Jehova! (1 Timoteo 6:9, 10) Si Jesus so asingger lan ompatey. Sinalita to so panagtanem na bukel diad pangiyilustra ed saya. Say datin bukel so inatey, balet ta sinmimit pian mamawala na sanga a manbunga na daakan a trigo. Mipadpara, say ipatey nen Jesus so mansumpal ed andi-anggaan a bilay parad dakerakel ya angagamil na pananisia ed sikato. Agonigon ed manasingger ya ipatey to, impikasi nen Jesus a say ngaran nen Ama to so nigloria komon. Diad ebat, say boses na Dios a nanlapud tawen so maksil a nadngel na amin a presente: “Namparan pinagloriak itan tan pagloriaen ko lamet.”​—Juan 12:27, 28.

Nisan 11​—Sakey ya Agew na Kimey

9. (a) Asasakbay ed agew na Nisan 11, panon nen Jesus ya inusar iray ilustrasyon diad impangondena ed saray apostatan Judios? (b) Mitunosan ed parabol nen Jesus, siopa so akabalang na baleg a pankanawnawa?

⁹ Si Jesus tan saray babangatan to so tinmainan lamet ed Betania parad sigpot ya agew na kimey. Inusar nen Jesus so taloran ilustrasyon pian ipanengneng no akin ya akondena so apostatan Judio. Insamba to so andi-bungan kiew na higos, tan say amagaan a kipapasen to so mangiretrato ed andi-pananisia, andi-bungan Judion nasyon. Diad inloob ed templo, deniskribe to no panon a saray andi-kanan managbayubo na ubasan so diad kaunoran et amatey ni ingen ed anak tan mananawir na katawan​—a mangiretrato ed impangikaindan na saray Judios na talek da’d si Jehova, a mamantok itan ed pamatey da’d si Jesus. Deniskribe to so bansal ya inyuksoy na sakey ya ari​—si Jehova​—a saray binagaan ton bisita (saray Judios) so sinisiblet a nambaraan pian ag-onatendi. Kanian niiter so imbitasyon ed saray taga-paway​—saray Hentiles​—ya arum et kinmiwas. Balet say toon naromogan ya andian na kawes a pibabansal so nibantak ed paway. Irepresenta toray palson Kristianos ed Kakristianoan. Dakel iran Judios ed agew nen Jesus so naimbitaan “balet daiset so apili” pian nakaiba na 144,000 iran atatakan a manawir na mangatatawen a Panarian.​—Mateo 22:14; Apocalipsis 7:4.

10-12. (a) Akin a binaat nen Jesus so Judion klero, tan anton alablabas a panagbalaw so impaarap to ed saraman a mansimpisipitan? (b) Panon a say panangukom so diad kaunoran et nidapo ed apostatan Judio?

¹⁰ Inanap na mansimpisimpitan a Judion klero so pankanawnawan pangerel ed si Jesus, balet inebatan to so dakel a manamalikdon tepetepet da tan binaat tora ed imaton na totoo. O, saraman a manangipulisay a relihyoson Judios! Agaylan prangka so impamaat nen Jesus ed sikara! Kinaliktan da so inkaprominente, manangibiig iran aysing, tan mapangta iran titulo, a singa say “Rabbi” tan “Ama,” a mipadparad karaklan iran klero ed agew tayo. Imbaga nen Jesus so totontonen: “Siopaman a mangitandoro ed inkasikato so napaabeba naani, tan siopaman a mangipaabeba ed inkasikato so nitandoro naani.”​—Mateo 23:12.

¹¹ Saraman a relihyoson papangulo so alablabas a binalaw nen Jesus. Aminpiton danay ya inyabawag to: “Kasi kayo la!” sikara so tinawag ton bulag a manangitonton tan mansimpisimpitan. Tan kada panaon et inter to so mabitar a rason ed impangondena. Sasaraan da so lolooban a mamaarap ed Panarian na katawenan. Sanen pinatitan da so sakey a proselita, sikato so mamidduan niiyan ed Gehenna, a nagkalalon nigana la ed kadederal lapud imbeneg ya alablabas a kasalanan odino inkapanatiko. “Saray makulangkulang tan bulag!” inyabawag nen Jesus, lapud inyapasakey na saray Pariseos so imano ra ed pilak na templo imbes a say pamasiansia na puron panagdayew diman. Inkaindan da so inkahustisya, panangasi, tan katooran diad pangiiter da na sinaol a kakaplon yerbabuena, anis, tan komino, balet pinaulian da so ambelat iran pamaakaran na Ganggan. Say naugalian a panaguras so agbalot mangekal ed akindalem a karumsisan da​—mogmon say puson alinisan ed panamegley na pananisia ed manasingger a bagat nen Jesus so makagawa ed saya. Say akindalem a pansimpisimpitan tan inkaatiw da so misuniyan ed dinanman a “pinaputi” ed paway.​—Mateo 23:13-29.

¹² On, talagan pakaskasi iray Pariseos, peteg ya “ananak na saramay amatey ed saray propetas” nensaman! Uuleg, sikara so poli na saray tadioko, nigana ed Gehenna, lapud aliwan si Jesus lambengat so pateyen da noagta pati saray imbaki to. Saya so panangukom a nidapo ed “sayan kailalakan.” Diad kasumpalan, say Jerusalem so sigpot ya aderal 37 taon ed saginonor.​—Mateo 23:30-36.

13. Saray balikas nen Jesus ed saray kontribusyon ed templo so nipatnag ed antoran kipapasen natan?

¹³ Sakbay a tinmainan ed templo, kinomendaan nen Jesus so sakey a dukan balo ya angipelag na duaran maravilis ed tokdol​—“amin a pantaganon walad sikato.” Peteg a kasuniyan ed maagum iran mayaman, a mangipepelag lambengat na saray sulok da! Singa saman a dukan balo, saray Tasi nen Jehova natan so mabulos a mangisakripisyo na panaon, biskeg, tan kayarian pian suportaan tan palaknaben so sankamundoan a kimey na Panarian. Agaylan duma ed saramay imoral iran ebanghelisador ed TV a kakatkatan daray pulok da tan mamapalaknab na personal a kayamanan!​—Lucas 20:45–21:4.

Legan a Manasingger so Nisan 11

14. Anton kaermenan so imbalikas nen Jesus, tan panon ton inebatan so kaaruman a tepet na saray babangatan to?

¹⁴ Ninangisan nen Jesus so Jerusalem tan saray totoo to tan inyabawag to: “Agyo ak la naani nanengneng manlapud natan anggad pangikuan yo, ‘Mapalar iman so onladia ed ngaran nen Jehova!’” (Mateo 23:37-39) Diad saginonor, sanen sikaray walad Palandey na saray Olivo, saray maapit a babangatan nen Jesus so angitepet ed saya, tan diad ebat deniskribe to so tandan mangipabidbir ed kiwawala to ed pakayari ed Panarian tan say anggaan na marelmeng a sistema na bengabengatla nen Satanas.​—Mateo 24:1–25:46; Marcos 13:1-37; Lucas 21:5-36.

15. Anton tanda so inter nen Jesus nipaakar ed kiwawala to ed panangukom, tan nanlapulad kapigan so kasusumpal na saya?

¹⁵ Diad impanukoy ed panangukom nen Jehova ya asingger lan ondapo ed templo, impanengneng nen Jesus ya iyaanino na saya so arapen a makadesyang iran ebento ed anggaan na interon sistema na bengabengatla. Atan a panaon na kiwawala to so tandaan na ibetag na bakal ed agnaparaan a laknab, tekep na saray eras, yegyeg, tan salot, a pati karuksaan tan karelmengan. Agaylan saya so tua ed koma-20 siglon mundo tayo nanlapulad 1914!

16, 17. Antoran nagawgawa ed mundo so deniskribe nen Jesus, tan panon so nepeg ya ikiwas na saray Kristianos ed propesiya?

¹⁶ Nadampot so sakey a pantok ed “baleg a kairapan ya agnin balot agawa nanlapulad gapo na mundo anggad natan, andi, nisay nagawa lamet.” Lapud saya so makadesyang a singa say Delap ed agew nen Noe, ipapasakbay nen Jesus so sumpad kikutep ed minumundo iran gegemtan. “Sirin, manlikas kayo lapud agyo amta so agew ya isabi na Katawan.” Agaylan maliket itayo a say Katawan so anuro na alanaan a “matoor tan makabat ya aripen” a mangipaknol na pasakbay tan mangitarya na daakan ya espiritual a tagano parad sayan agew na kiwawala to​!​—Mateo 24:21, 42, 45-47.

¹⁷ Diad koma-20 siglo tayo, anengneng tayo “ed dalin so irap na saray nasyones, ya agda amta so pawayan da . . . bangta napunaw iray totoo ed takot tan egagel ed saray bengatlan onsabi ed panaayaman a dalin.” Balet ibaga nen Jesus ed sikatayo: “No sarayan bengatla so onggapon nagawa, tangay kayo tan itangwa yo so saray ulo yo, lapud say kilalaban yo so asingger la.” Tan papasakbayan to itayo: “Manlikas kayo ed inkasikayo ompan napano iray puso yo ed inkasiba tan panagbuanges tan kapagaan ed bilay, tan tampol ya onsabi ed sikayo itan ya agew a singa patit.” Dia lambengat ed pansiansian aliing a makatalindeg itayon naabobonan ed arap nen Jesus, “say Anak na too,” diad kiwawala to.​—Lucas 21:25-28, 34-36.

18. Anton panamaseseg so naagwat tayo ed ilustrasyon na samploran mamarikit tan ed saray talento?

¹⁸ Diad impanampot to ed onsianon panangipasakbay na modernon-agew iran ebento, iter nen Jesus so taloran ilustrasyon. Ununa, diad parabolo na samploran mamarikit, indanet to lamet so pankaukolan ed “pansiansian manbantay.” Insan, diad ilustrasyon na ariripen tan saray talento, impanengneng ton say inkakuli so natumangan diad kaimbitaan ya ‘onloob ed gayaga na Katawan.’ Saray alanaan a Kristianos ya iyaanino na sarayan parabolo, a pati arum a karnero so makagamor na baleg a panamaseseg ed sarayan malinew a deskripsyon.​—Mateo 25:1-30.

19, 20. Anton makapaliket a modernon-agew a siglaotan so niparungtal diad ilustrasyon nen Jesus ed karnero tan saray kanding?

¹⁹ Say komatlon ilustrasyon so manutukoy ed kiwawala nen Jesus ed pakayari Panarian kasabi to pian onyurong ed maglorian mangatatawen a trono to. Atan so panaon na pangukom ed saray nasyones tan pangibiig na saray totoo ed duaran grupo, say sakey a tugyopen na mauyamon malakarneron totoo tan say sananey, saray masugnar a kinmanding. Say karnero so manggawa na kaaruman iran gunaet pian ipanengneng da so inkasikaran mananuporta ed saray agagi na Ari​—say nakekeraan iran alanaan ed dalin diad sayan panaon na anggaan na mundo. Sarayan karnero so natumangan na bilay, bangta saray andian-na-panamablin kanding so onla ed andi-anggaan a kadederal.​—Mateo 25:31-46.

²⁰ Agaylan makapakelaw a siglaotan so nanengneng tayo ed baetan na arum a karnero tan saray agagi na Ari diad sayan anggaan na sistema na bengabengatla! Anggaman say alanaan a nakdaan so anakbat na responsabilidad ed kimey diad gapo na kiwawala na Ari, say nilaksalaksan maseseg ya arum a karnero so manitibukel natan na 99.8 porsienton ariripen na Dios ed dalin. (Juan 10:16) Tan impanengneng da met so inkasikaran mabulos a sungdoan so ‘eras, inkapgaan, kalakseban, sakit, tan kipangaw’ a bilang kakaiba na manamemben-katooran iran alanaan.a

Nisan 12

21. Anto so inmaligwas nen Nisan 12, tan panon?

²¹ Say getman pamatey ed si Jesus so inmaligwas. Dinalaw nen Judas iray manunaan a saserdote ed templo, ya akipaknan itapat to si Jesus kasalat na 30 pirason pilak. Saya met so nipropesiya.​—Zacarias 11:12.

Nisan 13

22. Anton panagparaan so ginawa nen Nisan 13?

²² Si Jesus a tinmilak ed Betania, nayarin pian manpikasi tan mandalepdep, so angibaki ed saray babangatan to ed Jerusalem pian anapen so ontan a “Polano.” Diad abung na sayan too, ed maawang a silir ed tagey et imparaan da so Paskua. (Mateo 26:17-19) Kaselek na agew nen Nisan 13, sikara so kaiba nen Jesus diman parad makatantandan selebrasyon ed amin ya awaran. Anto natan so manaalagar ed Nisan 14?

[Saray paimano ed leksab]

Panon so Pansegek Yo?

◻ Anton panagparawes tan panangawat so inter na arum ed si Jesus legan na Nisan 8 ya anggad 10?

◻ Panon nen Jesus ya inwalwal so mansimpisimpitan a klero nen Nisan 11?

◻ Anton baleg a propesiya so inter nen Jesus, tan panon itan a nasusumpal natan?

◻ Panon so impamantok na saray ebento nen Nisan 12 tan 13?

[Litrato ed pahina 21]

Kinomendaan nen Jesus so dukan balo ya angiter na duaran maravilis​—alenleneg a kayarian to