Agamilen a Sikakabat so Kristianon Kawayangan Yo
“Magmaliw a bulos a totoo, tan ingen bembenan so kawayangan yo . . . a bilang ariripen na Dios.”—1 PEDRO 2:16.
1. Anton kawayangan so imbalang nen Adan, tan diad anton kawayangan so pangipawilan nen Jehova ed katooan?
SANEN nankasalanan so inmunan ateng tayo ed tanamanan na Eden, say maglorian tawir so imbalang da parad ananak da—say kawayangan ed kasalanan tan inkabulok. Bilang nansumpalan, amin tayo so niyanak ya ariripen na inkabulok tan ipapatey. Ingen, makapaliket ta ingagala nen Jehova ya ipawil so matoor a totoo diad makapakelaw a kawayangan. Natan, saray maptek-impanpuso so maseeseet a manaalagar ed “kipatnag na ananak na Dios,” a mansumpal itan ed “kibulos [da] manlapud inkaaripen ed inkabulok tan nawalaan na maglorian kawayangan na ananak na Dios.”—Roma 8:19-21.
‘Alanaan a Mangipulong’
2, 3. (a) Sioparay “ananak na Dios”? (b) Anton makapakelaw a talindeg so pangagayagaan da, a mangitarok na anton responsabilidad?
2 Siopa irayan “ananak na Dios”? Sikara so alanaan-ed-espiritun agagi nen Jesus a miuley ed sikato ed mangatatawen a Panarian. Say ununa ed saraya so pinmatnag legan na inmunan siglo K.P. Inawat da so manangibulos a katuaan ya imbangat nen Jesus, tan manlapud Pentecostes 33 K.P., et akibiang ira ed saray maglorian pribelihyo a sinalambit nen Pedro sanen sikato so nansulat ed sikara: “Sikayo so ‘apilin kapolian, maarin inkasaserdote, sakey a masanton nasyon, sakey a baley parad nikabkabiig a kayarian.’”—1 Pedro 2:9a; Juan 8:32.
3 Pagmaliw a nikabkabiig a kayarian na Dios—agaylan makapakelaw a bendisyon! Tan pangagayagaan na modernon-agew a nakdaan na sarayan alanaan ya ananak na Dios so namparan abendisyonan a talindeg ed Dios. Balet tekep na ontan a nipaatagey a pribelihyo et onlesa iray responsabilidad. Impaimano nen Pedro so sakey ed saraya sanen inkuanto: “‘Nepeg yon iyabawag ed arawi iray karlangan’ na samay angipaway ed sikayo ed kabilungetan a mamaarap ed makapakelaw a liwawa to.”—1 Pedro 2:9b.
4. Panon na alanaan iran Kristianos a sinumpal so responsabilidad a nanlapud Kristianon kawayangan da?
4 Kasin sinumpal na alanaan iran Kristianos iyan responsabilidad ya iyabawag ed arawi iray karlangan na Dios? On. Mapropetikon manasalambit ed alanaan nanlapulad 1919, inkuan nen Isaias: “Say espiritu na Soberanon Katawan a Jehova so wala ed siak, ta si Jehova nilanaan toak a mangipulong na maong a balita ed saray mauyamo. Imbaki toak a mamedber ed puso a maermen, pian mangiyabawag na kawayangan ed saramay dinakep tan say pangilukas ed kamataan na anggan saray pinangaw; pian iyabawag so taon na abig-linawa ed biang nen Jehova tan say agew na panangibales ed biang na Dios tayo.” (Isaias 61:1, 2) Natan, say alanaan a nakdaan, a manutumbok ed ehemplo nen Jesus, a manunan aplikaan na sayan kasulatan, so maseseg a mangiyaabawag na maong a balita na kawayangan ed saray arum.—Mateo 4:23-25; Lucas 4:14-21.
5, 6. (a) Anto so nansumpalan na maseseg a panagpulong na alanaan iran Kristianos? (b) Antoran pribelihyo tan responsabilidad so pangagayagaan na saramay walad baleg ya ulop?
5 Bilang resulta na entusiastikon panagpulong da, sakey a baleg ya ulop na arum a karnero so pinmatnag ed eksena na mundo diad sarayan saginonor iran agew. Sikara so pinmaway manlapud amin a nasyones pian miulop ed alanaan diad panlingkor ed si Jehova, tan saraya met so imbulos na katuaan. (Zacarias 8:23; Juan 10:16) Singa si Abraham sikara so niyabawag a matunong ed letnegan na pananisia tan linmoob ed maapit a siglaotan ed si Jehova a Dios. Tan singa si Rahab say inkiyabawag dan matunong so angidasig ed sikara parad kililiktar—diad kipapasen da et kililiktar ed Armagedon. (Santiago 2:23-25; Apocalipsis 16:14, 16) Ingen saratan a nipaatagey a pribelihyo so mankaukolan met na responsabilidad ya ibaga ed arum so nipaakar ed gloria na Dios. Kanian sikara so anengneng nen Juan a mapublikon mangidadayew ed si Jehova, “a mankelyaw ed maksil a boses, a kuanda: ‘Say kilalaban so utang tayo ed Dios, ya akayurong ed trono, tan ed Kordero.’”—Apocalipsis 7:9, 10, 14.
6 Katantaon say baleg ya ulop a manbilang natan na masulok ya apatiran laksa, a kaiba na melag a natitilak ya ulop na alanaan iran Kristianos, so angusar na ngalngalin sakey bilyon ya oras diad pangiyaabawag ed arawi na saray karlangan nen Jehova. Saya so sankaabigan a pakausar ed espiritual a kawayangan da.
“Igalang so Ari”
7, 8. Anton responsabilidad ed sekular ya autoridad so kakaukolanen na Kristianon kawayangan, tan nisengeg ed saya, anton lingon awawey so nepeg tayon paliisan?
7 Say Kristianon kawayangan tayo so mankaukolan na arum nin responsabilidad. Indanet nen Pedro ed arum sanen insulat to: “Igalang so amin a nengneng na totoo, arowen so interon impanaagi, takotan so Dios, igalang so ari.” (1 Pedro 2:17) Anto so lalanoren na balikas ya “igalang so ari”?
8 Say “ari” so mangilalaman ed sekular iran manuley. Natan, say espiritu na agpanagrespeto ed autoridad so niwala ed mundo, tan magmainomay iyan mangapekta ed saray Kristianos. Say sakey a Kristiano so onkelaw ni ingen no akin a nakaukolan ton igalang so “ari,” anta “say interon mundo so mandukdukol ed pakayari na marelmeng.” (1 Juan 5:19) Nisengeg ed sarayan balikas, nayarin liknaen ton bulos ya onsumlang ed agkumbinienten ganggan tan agmanbayar na saray buis no nayarian ton paliisan. Balet sumpa iya ed imbalikas nen Jesus a ganggan ya “iter . . . ed si Caesar so kien nen Caesar.” Diad tua, atan so ‘panangusar ed kawayangan to a bilang sanib ed kaugsan.’—Mateo 22:21; 1 Pedro 2:16.
9. Anto so duaran maabig a rason diad pagmaliw a matulok ed sekular ya autoridad?
9 Saray Kristianos so obligadon nawalaan na galang ed autoridad tan pauleyan ed atan—anggamano saya so diad relatibon pamaakaran. (Gawa 5:29) Akin? Diad 1 Pedro 2:14, 15, indanet nen Pedro so taloran rason sanen inkuanton saray gobernador so “imbaki na [Dios] a mangidapo na dusa ed saray managgaway-kaugsan balet mangidayew ed saray managgawa na maong.” Say takot ed dusa so magenap lan rason diad itulok ed autoridad. Agaylan kabandayan so kamulta odino kapriso na sakey ed saray Tasi nen Jehova lapu ed panangataki, panagtakew, odino arum nin krimen! Isipen pa so agaylan panliket na arum diad pangiyabawag na ontan a bengatla! Diad biek a dapag, legan a bayuboan tayo so maabig a pakatongtongan diad katutulok ed sibil, naawat tayo so dayew manlapud maong iran administrador. Nayarin naikdan itayo na nagkalalon kawayangan diad panggawa na kimey tayon mangipulong na maong a balita. Niarum ni, ‘diad panggawa na maong aamperen tayo so andi-kabaliksan a tongtong na agmakatunongan a totoo.’ (1 Pedro 2:15b) Saya so komaduan rason diad itulok ed autoridad.—Roma 13:3.
10. Anto so sankabiskegan a rason diad itulok ed sekular ya autoridad?
10 Balet wala so mabibiskeg a rason. Saray autoridad so niwala diad panangiyabuloy nen Jehova. Unong ya ikuan nen Pedro, saray mapulitikan manuley so “imbaki nen” Jehova, tan “linawa na Dios” a saray Kristianos so mansiansian pauleyan ed sikara. (1 Pedro 2:15a) Mipadpara, ikuan nen apostol Pablo: “Saray walan autoridad so akatalindeg diad relatibon kipapasen da ed Dios.” Kanian, say nipasal-ed-Biblian konsiensia tayo so mamakiwas ed sikatayon ontulok ed saray autoridad. No agtayo pauleyan so inkasikatayo ed sikara, sikatayo so “onsusumpa ed oksuyan na Dios.” (Roma 13:1, 2, 5) Siopa ed sikatayo so mabulos a malabay ya onsumpa ed oksuyan na Dios? Agaylan agsuston panangusar na Kristianon kawayangan itan!
‘Nawalaan na Aro ed Saray Agagi’
11, 12. (a) Anton responsabilidad ed saray kapananisiaan so onlesa ed Kristianon kawayangan tayo? (b) Siopa so nagkalautlan manepeg ed maaron konsiderasyon tayo, tan akin?
11 Inkuan met nen Pedro a say Kristiano so nepeg a “nawalaan na aro ed interon impanaagi.” (1 Pedro 2:17) Sakey lamet iyan responsabilidad ya onlesa ed Kristianon kawayangan. Kaslakan ed sikatayo so kabiangan na kongregasyon. Diad tua, amin tayo so kabiangan na internasyonal a panlilimog, odino organisasyon, na saray agagi. Say pangipanengneng na aro ed saraya so makabat a panangusar ed kawayangan tayo.—Juan 15:12, 13.
12 Pinili nen apostol Pablo so sakey a grupo na Kristianos a nagkalautlan makanepegan na panangaro tayo. Inkuanto: “Ontulok kayo ed saramay mangipapangulo ed sikayo tan pasakup kayo, ta babantayan daray kamarerwa yo unong a sikaray mangiter naani na pipalinewan; pian saya so gawaen dan sigagayaga aliwan sieermen, ta saya so agmakapaabig ed sikayo.” (Hebreos 13:17) Saramay mangipapangulo ed kongregasyon et saray mamatatken. Tua, sarayan lalaki so ag-ayadyari. Anggaman ontan, sikara so aturo diad panangiwanwan na Mananguley ya Ulop. Sikaray mangipapangulo diad ehemplo tan tekep na inkamakunsidera, tan apabtangan ira pian bantayan iray kamarerwa tayo. Agaylan ambelat ya asainmin! (Hebreos 13:7) Makapaliket, maslak a kongregasyon so walaan na maabig, mikokooperan espiritu, tan sakey a gayaga parad mamatatken so pikimey ed sikara. Mas mairap sano aglabay na saray indibidual so mikoopera. Siansian gawaen na matatken so kimey to, balet unong ya ikuan nen Pablo, gawaen ton “sieermen.” Siempre, agtayo labay a paermenen iray mamatatken! Labay tayon naromog da so gayaga ed kimey da ta pian napaseseg da itayo.
13. Antoray arum a dalan a makapikoopera itayo ed mamatatken?
13 Antoray arum a paraan a makapikoopera itayo ed mamatatken? Sakey et diad itulong a pangasikaso tan panlinis ed Kingdom Hall. Sakey ni et diad pikoopera ed kimey na idadalaw ed maniinagem tan itulong ed agmakayari. Niarum ni, panseetan tayo so mansiansian mabiskeg ed espiritual, pian agmagmaliw a pabelat. Sakey ya importanten lawak na pikokoopera et diad pamasiansia na moral tan espiritual a kalinisan na kongregasyon, namparan diad dilin kondukta tayo tan diad pangireport ed saray kaso na seryoson kasalanan a nipaimano ed sikatayo.
14. Panon so nepeg a pikoopera tayo ed panagdisiplina a ginawa na mamatatken?
14 No maminsan, pian mansiansian malinis so kongregasyon, nakaukolan a dispelosipen na mamatatken so sakey ya agmagbabawin managgaway-mauges. (1 Corinto 5:1-5) Saya so manalimbeng ed kongregasyon. Nayarin ontulong met itan ed managgaway-mauges. Mabetbet, say ontan a disiplina so akapangitarok ed managkasalanan ed pagbabawi. Anggaman kuan, anto no samay adispelo et sakey a maapit a kaaro odino kanayon? No bilang ta say indibidual et ama odino ina tayo odino anak tayon laki o bii. Kasin anggaman ontan et respetoen tayo so kiwas a ginawa na mamatatken? Tua, nayarin mairap itan. Balet agaylan panangabuso ed kawayangan tayo a suppiaten so desisyon na mamatatken tan mantultuloy ed espiritual a pilimog ed sakey ya apaneknekan a marutak ya impluensya ed kongregasyon! (2 Juan 10, 11) Saray totoo nen Jehova ed inkalapagan so nakomendaan lapud paraan na pikokoopera ra ed ontan iran pamaakaran. Bilang nansumpalan, say organisasyon nen Jehova so mansiasiansian andi-tilol ed sayan marutak a mundo.—Santiago 1:27.
15. No say sakey et akagawa na seryoson kasalanan, anto so tampol a nepeg ton gawaen?
15 Anto no akagawa itayo na seryoson kasalanan? Deniskribe nen Arin David iramay abobonan nen Jehova sanen inkuanto: “Siopa so ontatdang ed palandey nen Jehova, tan siopa so onalagey ed masanton pasen to? Say walaan na malinis a limalima tan maralus ed puso, ya ag-angitandoro ed kamarerwak diad sigpot ya inkaandi-kakanaan, nisay nansamba na panamalikdo.” (Salmo 24:3, 4) No diad arum a rason et ag-itayo la ‘malinis ed limalima tayo tan maralus ed puso,’ nepeg tayo so onkiwas a tampol. Say maandon bilay tayo so wala ed kaatapan.
16, 17. Akin a say sakey ya akagawa na saray seryoson kasalanan so agnepeg a manalin manresolbi ed pamaakaran diad inkasikaton-dili?
16 Arum so atukson mangiyamot ed saray seryoson kasalanan, a nayarin mankatunongan: ‘Nankumpisar ak la ed si Jehova tan nagbabawi. Kanian akin ya ilanor niray mamatatken?’ Say managgaway-mauges so nayarin nabaingan odino antakot ed nayarin gawaen na mamatatken. Anggaman ontan, nepeg ton tandaan ya anggaman si Jehova lambengat so makapanlinis ed sikatayo ed kasalanan, ginawa To iray mamatatken a manunan responsable parad kalinisan na kongregasyon. (Salmo 51:2) Wadtan iran manambal, diad “kapetek na saray sasantos.” (Efeso 4:12) Say ag-iyasingger ed sikara sano nakaukolan tayo so espiritual a tulong so mipadparad ag-ipanon ed sakey a doktor sano mansasakit itayo.
17 Aromog na arum ya analin amemben a bukor ed saray pamaakaran a diad saginonor iran bulan o taotaon, say konsiensia ra so siansian mangugonigon a tuloy ed sikara. Mauguges ni, arum ya angiyamot na seryoson lingo so naplag ingen ed kasalanan diad komadua tan komatlon danay. Sanen diad kaunoran et naimano na mamatatken so pamaakaran, atan so sakey a kaso na naulit-ulit lan gawan-mauges. Agaylan magmaong a tuloy so itumbok ed konseho nen Santiago! Insulat to: “Wala ta so maniinagem ed sikayo? Patawag toray mamatatken ed kongregasyon, tan sikato so ipikasi ra komon, a puyokan da na larak ed ngaran nen Jehova.” (Santiago 5:14) Ompanon ed mamatatken legan a panaon ni na panagtambal. No pabayagen tayo, sikatayo so nayarin onawet ed kurang na kasalanan.—Eclesiastes 3:3; Isaias 32:1, 2.
Indengan tan Panagligliwaan
18, 19. Akin a maapabor a nankomento so sakey a pari nipaakar ed saray Tasi nen Jehova?
18 Limaran taon ed apalabas, diad sakey a magasin na simbaan, sakey a Katolikon pari ed Italya so nankomento nipaakar ed saray Tasi nen Jehova.a Inkuanto: “Parad siak, labay koray Tasi nen Jehova; prangkan aksobien ko itan. . . . Saramay kabat ko so ayadyari ed walna ra, mabinta . . . [tan] makapasagyat a tuloy. Kapigan tayo natalosan a say katuaan et mankaukolan na makapaliket a presentasyon? A saramay mangiyaabawag na katuaan so agnakaukolan a masuyat, maansit, bangol, mapaulian?”
19 Unong ed sarayan balikas, say pari so asagyat, nagkalautla, diad paraan na panangawes tan panangipresenta na saray Tasi ed inkasikara. Mabitar, saramay nabet to so tinmalineng ed simbawan inter na “matoor tan makabat ya aripen” diad apalabas iran taon. (Mateo 24:45) Ikuan na Biblia a say kawes na bibii so nepeg a ‘mauksoy tan masimpit.’ (1 Timoteo 2:9) Diad sayan panaon na kagegeba ed moral, atan a simbawa so nakaukolan met ed saray lalaki. Agta makatunongan a nepeg ya ipresenta na saray manangilaman na Panarian na Dios so inkasikara a desente ed saray taga-paway?
20. Akin a say sakey a Kristiano so nepeg a sililiing ed panangawes to diad amin a panaon?
20 Arum so mipakna a diad saray miting tan ed lawak a serbisyo et nepeg da so maalwar ed panangawes da, balet nayarin liknaen dan saray prinsipyo na Biblia so ag-onaplika ed arum a panaon. Anggaman kuan, kasin wala ta so panaon ya ontunda itayo a magmaliw a manangilaman na Panarian na Dios? Tua, nanduruma iray sirkumstansya. No sikatayo so ontulong a mangipaalagey na Kingdom Hall, mangawes itayo a duma sano onatendi itayo ed miting ed atan lanlamang a Kingdom Hall. Sano andi itayo ed trabaho, nayarin mangawes itayo ed mas mainawan panangawes. Balet kapiganman a nanengneng itayo na arum, nepeg a lawas mauksoy tan masimpit so panangawes tayo.
21, 22. Panon itayon asalimbengan sumpad makaderal a panagligliwaan, tan panon so nepeg a panmoria tayo ed simbawa diad saratan a pamaakaran?
21 Sananey nin lawak a naimanon tuloy et say panagligliwaan. Saray totoo—nagkalautla ed kalangweran—so mankaukolan na panagligliwaan. Aliwan kasalanan o panagdarak na panaon so pangiskedyul na painawa parad pamilya. Anggan si Jesus so angimbita ed saray babangatan to a “manpainawan magano.” (Marcos 6:31) Balet manalwar a say panagligliwaan so agmangipaarap ed espiritual a karutakan. Manbibilay itayo ed mundo a ditan say panagligliwaan so mangitatandoro ed seksual ya imoralidad, graben karawalan, kebbiew, tan espiritismo. (2 Timoteo 3:3; Apocalipsis 22:15) Say matoor tan makabat ya aripen so alerto ed ontan iran kaatapan tan lawas mamapasakbay ed sikatayo sumpad saratan. Kasin liknaen yon sarayan panonot et sakey ya isusumpa ed kawayangan yo? Odino maliket kayo a say organisasyon nen Jehova so mangaasikason tuloy ed sikayo pian lawas ipaimano ed sikayo iratan a kaatapan?—Salmo 19:7; 119:95.
22 Agbalot lilingwanan ya anggaman say kawayangan tayo et manlapud si Jehova, sikatayo so responsable ed no panon so pangusar tayo ed atan. No ipulisay tayo so maabig a konseho tan manggaway agsuston desisyon, agtayo natetel so siopaman. Ikuan nen apostol Pablo: “Balang sakey ed sikatayo so mipalinewan a mismo ed Dios.”—Roma 14:12; Hebreos 4:13.
Alagden Tekep na Ilalo so Kawayangan na Ananak na Dios
23. (a) Antoran bendisyon nipaakar ed kawayangan so pangagayagaan tayo natan? (b) Antoran bendisyon so sigugunaet ya aalagaren tayo?
23 Sikatayo so peteg ya abenditon totoo. Sikatayo so bulos ed palson relihyon tan panag-anito. Salamat ed dondon bagat, ta makaasingger itayo ed si Jehova a tekep na malinis a konsiensia, diad espiritual a dalan et bulos manlapud inkaaripen ed kasalanan tan patey. Tan asingger lan onsabi so “kipatnag na ananak na Dios.” Diad Armagedon, saray agagi nen Jesus ed mangatatawen a gloria ra so nipatnag ed totoo a bilang saray managderal ed kakabusol nen Jehova. (Roma 8:19; 2 Tesalonica 1:6-8; Apocalipsis 2:26, 27) Kayari to, sarayan ananak na Dios so nipatnag bilang saray paralanan parad saray bendisyon ya onagus a manlapud trono na Dios a mamaarap ed katooan. (Apocalipsis 22:1-5) Diad kaunoran, sayan kipatnag na ananak na Dios so mansumpal ed kabendisyonan na matoor a katooan tekep na maglorian kawayangan na ananak na Dios. Kasin pitamitam yo itan a panaon? Sirin usaren a sikakabat so Kristianon kawayangan yo. Paaripen ed Dios natan, tan napangayagaan yo itan a makapakelaw a kawayangan ed andi-anggaan!
[Paimano ed leksab]
a Sayan komendasyon so binabawi na pari ed saginonor, angangko ta nisilong ed panangidesdes.
Kahon parad Repaso
◻ Panon na alanaan tan arum a karnero ya ingloria si Jehova?
◻ Akin a nepeg ya igalang na saray Kristianos so sekular ya autoridad?
◻ Diad antoran dalan so pakapikoopera na sakey a Kristiano ed saray mamatatken?
◻ Nipaakar ed panangawes, akin a saray Tasi nen Jehova so matalona a bilang duma manlapud dakel ed mundo?
◻ Anto so nepeg tayon paliisan no nipaakar ed panagligliwaan?