Daakan a Mameperdona si Jehova
“Say marelmeng paulian to komon so dalan to, tan say too ya aliwa a maptek so saray kanonotan to; et ompawil komon ed Jehova, . . . et sikato so perdonaen to naani ed daakan.”—ISAIAS 55:7.
1. Diad anto a nabebendisyonan iray mangaawat na panamerdona nen Jehova natan?
PERDONAEN nen Jehova iray magbabawin managgaway-mauges tan natan et mamagayaga ed nonot da diad sakey ya espiritual a paraiso. Onia lapud nakakapet darayan kakaukolanen: “Anapen yo si Jehova natan ta naromog yo ni; ontawag kayo ed sikato natan ta asinger ni: Say marelmeng paulian to komon so dalan to, tan say too ya aliwa a maptek so saray kanonotan to; et ompawil komon ed Jehova, et sikato naani kasian to; tan ed Dios tayo, ta sikato perdonaen to naani ed daakan.”—Isaias 55:6, 7.
2. (a) Anto so kabaliksan na “anapen si Jehova” tan ‘ipawil ed sikato,’ unong ya asaglawi ed Isaias 55:6, 7? (b) Akin a saray Judion adakep ed Babilonia so kaukolan ya ompawil ed si Jehova, tan anto so agawa ed arum ed sikara?
2 Pian “anapen si Jehova” tan ontawag ed sikato diad paraan ya awaten to, kaukolan ya ikaindan na marelmeng a too so mauges a dalan to tan antokaman a kanonotan a pamasakit ed arum. Say pankaukolan na ‘ipawil ed si Jehova’ so mangipapanengneng ya inmarawi ed Dios so managgaway mauges, a dati et walaan na maapit a siglaotan ed sikato. Ontan so agawa ed saray manaayam ed Juda, a say ag-inkamatoor ed Dios so diad kaunoran et angipaarap ed inkadakep da ed Babilonia. Saray Judion adakep so kaukolan ya ompawil ed si Jehova diad panamegley na pagbabawi ed mauges iran gawa a nansumpal ed inkakautibo ra ed Babilonia tan say nipasakbay a 70-taon a sinagem ed dilin baley da. Nen 537 K.K.P., saman a dalin so nanayaman lamet na matakot-ed-Dios a nakdaan iran Judio a nibulos manlapud Babilonia diad panamegley na ginogobiernon ganggan. (Esdras 1:1-8; Daniel 9:1-4) Ontanlan engrande iray epekto na saman a panangipawil a say dalin na Juda so impareng ed Paraison Eden.—Ezequiel 36:33-36.
3. Panon a say nakdaan ya espiritual ya Israel so walaan na eksperiensian singa ed matakot-ed-Dios iran adakep a pinmawil ed Juda?
3 Saray espiritual ya Israelita so walaan na mipadparan eksperiensia na matakot-ed-Dios iran Judio a pinmawil ed Juda kayari inkadakep ed Babilonia. (Galacia 6:16) Say nakdaan na espiritual ya Israel so nanggawa na pigaran pananguman ed dalan tan ed kanonotan da kayarin tuloy na Guerra Mundial I. Tinandaan na taon 1919 so impangangga na inkadakep da manlapud sigpot a pabor na Dios ed pasen na Babilonia a Baleg, say sankamundoan ya imperyo na palson relihyon. Lapud sikaray nagbabawi ed saray kasalanan dan manasaglawi ed takot ed too tan intunda ed serbisyo ed si Jehova, inbulos tora manlapud Babilonia a Baleg, inpawil tora ed makanepegan ya espiritual a kipapasen da, tan sikaray intuloy [ton] inusar a mangipulong na mensahe na Panarian. Sakey ya espiritual a paraiso so inmaligwas ed limog na totoo na Dios nanlapulad saman, diad kirayewan na masanton ngaran to. (Isaias 55:8-13) Sirin, diad kadaanan a tipo tan diad modernon antitipo et walaan tayo na malinew ya ebidensya a saray bendisyon so tumbokan na madibinon panamerdona tan peteg a daakan a mamerdona si Jehova ed saray managbabawi.
4. Anton takot so wala ed arum ya ariripen nen Jehova?
4 Saray kaplesan-agew ya ariripen nen Jehova so makapanmatalek sirin ed panamerdona to. Ingen, arum ed sikara so andian na ilalo ed apalabas a lingolingo ra, tan saray liknaan na impankasalanan so ngalngalin manalona ed sikara. Agda ipapasen so inkasikaran makana a manayam diad espiritual a paraiso. Diad tua, arum so natatakot a sikaray akagawa na agnaperdonan kasalanan tan agbalot makaawat na panamerdona nen Jehova. Kasin nagawa itan?
Arum Iran Kasalanan ya Agnaperdona
5. Akin a nibaga ya arum iran kasalanan so agnaperdona?
5 Saray arum a kasalanan so agnaperdona. Inkuan nen Jesu-Kristo: “Balang kasalanan tan panayew naperdona ed saray totoo; balet say panayew sumpa ed Espiritu agnaperdona naani.” (Mateo 12:31) Kanian, say pangayew sumpad masanton espiritu na Dios, odino ed aktibon puersa, so agnaperdona. Inpaimano nen apostol Pablo so ontan a kasalanan sanen insulat to: “Ta [imposibli, NW] ed saray asilewan la . . . Et sinmian ira, ag nayari ya omanen lamet pian magbabawi’ra; bangta inpasak da lamet nipaakar ed sikaran dili so Anak na Dios, tan bangta sikato so pinabaingan da ed arap na kapalapagan.”—Hebreos 6:4-6.
6. Anto so manetermina no kasin say kasalanan so naperdona odino andi?
6 Say Dios labat so makaamta no say sakey a too so akapanggawa na agnaperdonan kasalanan. Anggaman ontan, impaliwawa nen Pablo iyan pamaakaran sanen insulat to: “No sigagagalan agamilen tayo so kasalanan kayari impangawat na suston pikakabat ed katuaan, anggapo la so atilak ya antokaman a bagat parad saray kasalanan, noagta peteg a wala so makapataktakot a panilalo ed kaukom.” (Hebreos 10:26, 27, NW) Say toon sigagagala so onkikiwas a walaan na getma, odino “bangar tan mabetbet a mamapaawet ed dilin-linawa [to].” (Webster’s New Collegiate Dictionary) Siopaman a sigagagala tan bangar a mantultuloy a mangagamil na kasalanan kayari impakaamta to na katuaan so andian na kaperdona. Kanian, aliwan say kabaleg na kasalanan a mismo noagta say kipapasen na puso, say kalaknab na impangigagala a nalalanor, so mangapekta no kasin say kasalanan so naperdona odino andi. Diad biek a dapag, anto so nayarin kaso sano say nankasalanan a Kristiano so nadidisturbon tuloy nipaakar ed gawan-mauges? Angangko say manunan kapagaan to so mangipanengneng a diad tua et sikato so agnanggawa na sakey ya agnaperdonan kasalanan.
Agnaperdona Iray Kasalanan Da
7. Akin a nibaga tayo ya arum ed relihyoson sumusumpa nen Jesus so nanggawa na agnaperdonan kasalanan?
7 Arum a relihyoson papangulon Judio a sinmumpa ed si Jesus so nanggawa na sigagala, tan sirin agnaperdonan, kasalanan. Anggaman anengneng da so kurang na masanton espiritu na Dios diad panamegley nen Jesus unong a nanggawa na maong tan angipanengneng na saray milagro, saraman a klerigo so angibagan say pakayari to so nanlapud Beelzebub, odino si Satanas a Diablo. Sikaray nankasalanan a sikakabat a tuloy ed agniburin panangipakurang na espiritu na Dios. Kanian, sikaray akagawa na agnaperdonan kasalanan, ta inkuan nen Jesus: “Siopaman balet a mansalita na sumpa ed Espiritu Santo, sikato’y ag naperdona ed sikato, angan dia’d saya a bilay, angan dia ed bilay ya onsabi.”—Mateo 12:22-32.
8. Akin a say kasalanan nen Judas Iscariote so agnaperdona?
8 Say kasalanan nen Judas Iscariote so agnaperdona met. Say impangitapat to ed si Jesus so ginagala, ginetman kapantokan a kurang na pansimpisimpitan tan ag-inkamatua. Alimbawa, sanen anengneng nen Judas a kakalboan nen Maria si Jesus na mablin larak, intepet to: “Akin et ag inlako so saya’n unguento ed talonlasus a denarios, tan inter ed saray duruka?” Inyarum nen apostol Juan: “Bang saya inkuan to [Judas], aliwan lapud panangimaton to ed duruka; noag lapu’d sikato’y matakew, tan lapu’d wala ed sikato so supot inala to so inpepelag diman.” Agnambayag kayari to, intapat nen Judas si Jesus ed 30 pirason pilak. (Juan 12:1-6; Mateo 26:6-16) Tua, si Judas so sisisimoon a nagbabawi tan nanbitkel. (Mateo 27:1-5) Balet sikato so agpinerdona, lapud say ginetma, say nantultuloy a sinisiblet a kurang to tan manamalikdon kiwas to so angipanengneng ed kasalanan to sumpa ed masanton espiritu. Agaylan matukoy a si Judas so tinawag nen Jesus ya “anak na kadederal”!—Juan 17:12; Marcos 3:29; 14:21.
Aperdona Iray Kasalanan Da
9. Akin a pinerdona na Dios iray kasalanan nen David no nipaakar ed si Batsheba?
9 Saray ginagalan kasalanan so direktan misuniyan ed saray lingo na saramay pinerdona na Dios. Alaen ya alimbawa si Arin David na Israel. Sikato so akikalugoran ed si Batsheba, say asawa nen Urias, tan diad kaunoran et impamaneobra to ed si Joab so ipatey nen Urias ed bakal. (2 Samuel 11:1-27) Akin ya impanengneng na Dios so panangasi ed si David? Manuna lapud sipan ed Panarian tan ontan met lapud dilin inkamapangasi nen David tan ed puron panagbabawi to.—1 Samuel 24:4-7; 2 Samuel 7:12; 12:13.
10. Anggaman si Pedro so seryoson nankasalanan, akin a sikatoy pinerdona na Dios?
10 Kunsideraen met si apostol Pedro. Sikatoy seryoson nankasalanan diad naolit-olit ya impangiburi ed si Jesus. Akin a si Pedro so pinerdona na Dios? Aliwan singa si Judas Iscariote, si Pedro so matua ed serbisyo ed Dios tan ed Kristo. Say kasalanan na sayan apostol so nisesengeg ed silalaman a kakapuyan, tan sikato so peteg a nagbabawi tan “nanangis na sankapaitan.”—Mateo 26:69-75.
11. Panon yon depinaen so “pagbabawi,” tan anto so nepeg a gawaen na sakey a too no sikato so peteg a magbabawi?
11 Ipapanengneng na saray akaunan alimbawa ya anggan say sakey a toon seryoson mankasalanan so makagamor na panamerdona nen Jehova a Dios. Balet anton awawey so nakakaukolan ta pian naperdona? Say tuan panagbabawi so importante ta pian perdonaen na Dios so nankasalanan a Kristiano. Say kabaliksan na pagbabawi et “ibeneg manlapud kasalanan lapud panermen ed apalabas iran gawan-mauges” odino “manermen odino mansinayang nisesengeg ed ginawa to odino ed agto agawaan.” (Webster’s Third New International Dictionary) Say tuan magbabawin too so mangipanengneng na panermen ed antokaman ya pakabalawan, ermen, odino saray probleman intarok na kasalanan to ed ngaran tan organisasyon nen Jehova. Say magbabawin managgaway mauges so mamawala met na misimbangan a bunga, mankikimey ed bengatlan mitukoyan ed panagbabawi. (Mateo 3:8; Gawa 26:20) Alimbawa, no sinaul to so siopaman, sikato so manggawa na makatunongan iran kundang pian ipawil so sinaul to. (Lucas 19:8) Satan a magbabawin Kristiano so walaan na mabiskeg a Makasulatan iran rason a manmatalek a si Jehova et daakan a mamerdona. Anto iraya?
Saray Rason a Makapanmatalek ed Panamerdona na Dios
12. Diad anton basiyan ya ipanengneng na Salmo 25:11 a say magbabawin too so makapanpikasi parad panamerdona?
12 Say magbabawin managgaway-mauges so sitatalek a manpikasi parad panamerdona diad letnegan na ngaran nen Jehova. Akikasi si David: “Nisengeg ed ngaran mo, O Jehova, perdonam so kasulitan ko, ta abalbaleg.” (Salmo 25:11) Say ontan a pikakasi, tekep na pagbabawi ed antokaman a kabalawan a nitatarok na managgaway mauges ed ngaran na Dios, so nepeg met ya onkana bilang babeng ed baleg a kasalanan diad arapen.
13. Anto so betang na pikakasi ed madibinon panamerdona?
13 Eebatan nen Jehova a Dios iray impapuson pikakasi na saray nankasalanan balet magbabawin ariripen to. Alimbawa, agginagalan inkaindan nen Jehova si David, a nampikasi manlapud puso kayari impakamoria ed kabalgan na saray kasalanan to a nipaakar ed si Batsheba. Diad tua, saray salita nen David ed Salmo 51 so mangibabalikas ed liknaan na dakel a paneyey. Sikato so akikasi: “Kasian moak komon, O Dios, a unong na maaro ya abig-na-linawam, unong na kinaraklan na malamoy a panangasim, bural mo so saray impakasumpak. Urasan moak a maong ed kasulitan ko, tan linisan moak ed kasalanan ko. Saray bagbagat ed Dios saray maralit ya espiritu: say sakey a puso a maralit tan mansisibkel, agmo la balbalwen, O Dios.”—Salmo 51:1, 2, 17.
14. Panon so pangitarok na Kasulatan na panamaseguro a say Dios so mamerdona ed saramay mangaagamil na pananisia ed dondon bagat nen Jesus?
14 Perdonaen na Dios iramay mangaagamil na pananisia ed dondon bagat nen Jesus. Insulat nen apostol Pablo: “Dia ed sikato so kawalaan na karundun tayo ed panamegley na dala to, say pakapaandian na saray kasalanan tayo.” (Efeso 1:7) Tekep na mipadparan kabaliksan, insulat nen apostol Juan: “Ana’kora ya ankekelag, saraya’n bengatla insulat ko ed sikayo pian ag kayo mankasalanan. Tan no wala so toon mankasalanan, wala so apireng tayo ya onarap ed Ama, si Jesu-Cristo a matunong; Tan sikato so manamaandi kasalanan tayo, tan aliwa lambengat ed saray kasalanan tayo, no ag met kasalanan na lapag a mundo.”—1 Juan 2:1, 2.
15. Pian mantultuloy a mangayaga ed panangasi na Dios, anto so nepeg a gawaen na magbabawin managkasalanan?
15 Say panangasi nen Jehova so mangiiter ed sakey a magbabawin managgaway mauges na letnegan na panmatalek a sikatoy naperdona. Inkuan nen Nehemias: “Dios ka a mamerdona, mapalangkap tan mapangasi, matantan a manpasnok, tan daakan ed kaabigan na linawa (maaron kaabigan, NW).” (Nehemias 9:17; ipareng so Exodo 34:6, 7.) Siempre, pian mantultuloy a pangayagaan so madibinon panangasi, nepeg a pambanikelan na managkasalanan a tumboken so ganggan na Dios. Unong ya ikuan na salmista, “say matamoy a panangasim so onsabi ed siak, pian makapanbilay ak; ta say gangan mo sikato so kawalaan na linawak. Abalbaleg ira so matamoy a panangasim, O Jehova: pabilay moak ya unong ed saray pananontonan mo.”—Salmo 119:77, 156.
16. Anton ligliwa so wala diad katuaan a kukunsideraen nen Jehova so makasalanan a kipapasen tayo?
16 Say katuaan a kunsideraen nen Jehova so makasalanan a kipapasen tayo so mangiter met ed magbabawin managgaway mauges na ligliwa tan rason pian manpikasi a tekep na talek a sikatoy perdonaen na Dios. (Salmo 51:5; Roma 5:12) Say salmistan David so angiter na makaligliwan panamaseguro sanen inyabawag to: “Agto [Jehova a Dios] ginawa ed sikatayo so unong na kanepegan na saray kasalanan tayo, nisay intomang to ed sikatayo so kanepegan na saray kasulitan tayo. Ta unong a say tawen et atagey nen say dalin, ontan so kabaleg na maaron abig na linawa to ya onkana ed saraman so ontakot ed sikato. Unong na kaarawi’ letakan a manlapu ed seslekan, ontan so kaarawi angibantakan to ed saray inpakasumpa tayo ya inekal to ed sikatayo. Unong a say sake’ ya ama abageyen to so saray anak to, ontan met nen Jehova abageyen to so saray ontakot ed sikato, Ta sikato kabat to so inkagawa tayo; sikato nanodnonot to a sapok itayo.” (Salmo 103:10-14) On, say mangatatawen ya Ama tayo so nagkalalon mapangasi tan maabagey nen say atooan ya ateng.
17. Anto so isisiglaot na apalabas a rekord na matoor a serbisyo na sakey ed Dios no nipaakar ed panamerdona?
17 Say magbabawin managkasalanan so makapanpikasi parad panamerdona tekep na talek ya ag-ikaindan nen Jehova so apalabas a rekord to ed matoor a serbisyo. Si Nehemias so ag-kinmerew na panamerdona parad kasalanan to, balet peteg ya inkuanto: “Nonoten moak, O Dios ko nipaakar ed maong.” (Nehemias 13:31) Say sakey a magbabawin Kristiano so makaromog na ligliwa ed saray salitan: “Say Dios aliwan ag matonong pian nalingoanan to so gawa yo tan say aro ya inpanengneng yo ed ngaran to.”—Hebreos 6:10.
Tulong Manlapud Saray Mamasiken
18. Anto so nepeg a gawaen no say kasalanan na sakey a Kristiano so manggawa ed sikaton walaay sakit ed espiritual?
18 Anto no liknaen na sakey a Kristiano a sikatoy agmakanepegan a mansiansia ed espiritual a paraiso odino agmakapanpikasi lapud say kasalanan to so nanggawa ed sikaton mansasakit ed espiritual? “Patawag to so saray mamasiken na Iglesia [kongregasyon, NW]; tan sikato so ipikasira komon, a poyokan da na larak ed ngaran na Katawan [Jehova, NW],” insulat nen Santiago. “Et say pikakasi’ pananisia ilaban to so agmakayari, tan say Katawan [Jehova, NW] bangonen to; tan no nankasalanan napaandi’ra ed sikato.” On, saray mamatatken ed kongregasyon so epektibon tuloy a manpikasin kaibay magbabawin kapananisia diad ilalon pangipawil ed sikato ed espiritual a bunigas.—Santiago 5:14-16.
19. No say sakey a too so adispelosip, anto so nepeg a gawaen to pian naperdona tan nipawil?
19 Anggano dinespelosip na hudisyal a komite so agmagbabawin managkasalanan, agto kabaliksan a sikato so akagawa na agnaperdonan kasalanan. Anggaman ontan, pian naperdona tan nipawil, nepeg a sikatoy sipapaabeban ontumbok ed saray ganggan na Dios, mamawala na saray bungan makanepegan ed pagbabawi, tan onasingger ed mamatatken parad kipawil. Kayarin dinespelosip ed kongregasyon so milalawanan ed kadaanan a Corinto, insulat nen Pablo: “Masarag la ed ontan a too so satan a dusa ya inpasen day dakdakel ed sikayo; Manwarin ontan nepeg yo komon a perdonaen tan ligliwaen yo, ag la piga no sayan too nalener ed alabas ya ermen to. Kanian pikasik ed sikayo ya paeleten yo’y aro yo ed sikato.”—2 Corinto 2:6-8; 1 Corinto 5:1-13.
Mangiiter so Dios na Biskeg
20, 21. Anto so nayarin ontulong ed sakey a toon manasagmak na kapagaan nipaakar ed ompan impakagawa na agnaperdonan kasalanan?
20 No saratan a bengatla a singa say inkamasakit odino panaburido so sengegan na kapagaan ed inpakagawa na agnaperdonan kasalanan, say magenap a panpainawa tan ugip so nayarin makatulong. Anggaman ontan, nagkalautlan nepeg yon tandaan iray salita nen Pedro: “Imatalek yo ya amin ed sikato so kapagaan yo; ta sikato asikasoen to kayo.” Tan agyon balot aabuloyan si Satanas a manismaya ed sikatayo, tan intuloy nen Pedro: “Mandangka kayo, manbantay kayo; ta say kabusol yo, say diablo, wala ed kaliberliber yo ya singa omoang a leon a mananap na buagen to: A sikato so sumpaen yo na mabiskeg a pananisia yo, amta yo a peteg ta saratan a kairapan nagawa met ira ed utel na agagi yo ya wala ed mundo. Tan say Dios na amin a gracia, . . . sikato’n dili, payadyarien, paleten, pabiskegen to kayo komon.”—1 Pedro 5:6-10.
21 Kanian no sikayo so magbabawi balet natatakot ompan akapankasalanan kayo na agnaperdonan kasalanan, tandaan a saray dalan na Dios so makabat, maptek, tan maaro. Sirin, manpikasi ed sikato tekep na pananisia. Mantultuloy a mangala na espiritual a tagano ya itatarok to ed panamegley na “matoor tan makabat ya aripen.” (Mateo 24:45-47) Milimog ed saray kapananisiaan tan mibiang a maparanay ed Kristianon ministeryo. Saya so mamabiskeg ed pananisia yo tan mangibulos ed sikayo manlapud antokaman a takot a say Dios et nayarin ag-amerdona ed kasalanan yo.
Antoray Ebat Yo?
◻ Anto so walan prueba a si Jehova so ‘daakan a mameperdona’?
◻ Anton kasalanan so anggapoy panamerdona?
◻ Diad silong na antoran kipapasen a saray kasalanan na sakey so naperdona?
◻ Akin a makapanmatalek iray magbabawin managgaway mauges ed panamerdona na Dios?
◻ Anton tulong so wala parad magbabawi iran managgaway-mauges?
[Litrato ed pahina 21]
Amta yo no akin a si David tan si Pedro so aperdona balet si Judas Iscariote so ag-aperdona?
[Litrato ed pahina 23]
Say tulong na mamatatken ed kongregasyon so makagawa na baleg pian natulongan so espiritualidad na sakey a Kristiano