Say Kiwawala na Mesias tan say Uley To

“Sayan Jesus ya inawat ed tawen a nanlapud sikayo so ompawil ed parehon nengneng a singa impakanengneng yo ed sikato ya onsesegep ed tawen.”​—GAWA 1:11.

1, 2. (a) Panon a saray duaran anghel so nanligliwa ed apostoles nen Jesus sanen sikato so sinmegep ed tawen? (b) Antoran tepet so onlesa diad panilalo ed ipawil nen Kristo?

LABINSAKEY a lalaki so nanalagey ed mamabukig ya alosadsar na Palandey Olivo, ya akatangwa ed tawen. Agano ni si Jesu-Kristo so nipaatagey ed limog da, say porma to so ombuburagas ya anggad sinaniban la na lurem. Diad saray taon ya impilimog da ed sikato, anengneng na sarayan lalaki so daakan a prueban inter nen Jesus a sikato so say Mesias; sikara ni ingey akapanbayag ya anggad makapasinagem ya impatey to tan say makapalikliket ya inkioli to. Natan et sikatoy anggapo la.

² Duaran anghel so biglan inmapireng tan nansalita na sarayan makaligliwan salita: “Lalaki a taga-Galilea, akin ya akaalagey kayon akatangwa ed tawen? Sayan Jesus ya inawat ed tawen a nanlapud sikayo so ompawil ed parehon nengneng a singa impakanengneng yo ed sikato ya onsesegep ed tawen.” (Gawa 1:11) Agaylan makapaseguro​—say isegep nen Jesus ed tawen et agto kabaliksan a sikato lay agmibabali ed dalin tan katooan! Diad kasuniyan, si Jesus so ompawil. Agpanduaruwaan a sarayan salita so amano na ilalo ed saray apostol. Nilaksalaksa ed totoo natan so angipabtang met na baleg ya importansya ed sipan ya ompawil si Kristo. Salitaen na arum itan bilang say “Komaduan Isasabi” odino “Adbiyento.” Anggaman ontan, ompatnag a maslak so nawewetwet nipaakar ed tuan kabaliksan na ipawil nen Kristo. Diad anton dalan ya ompawil si Kristo? Kapigan? Tan panon a mangapekta iya natan ed saray bilay tayo?

Say Nengneng na Ipawil nen Kristo

3. Anto so sisiaen na dakel a totoo nipaakar ed ipawil nen Kristo?

³ Unong ed libron An Evangelical Christology, “say komaduan isasabi odino ipawil nen Kristo (parousia) so pangiletneg na panarian na Dios, diad kaunoran, parungtalan, tan ed andi-geter.” Malaklaknab a sinisia a say ipawil nen Kristo so parungtalan a nanengneng, literal a nanengneng na balang sakey ed planeta. Pian pekderan iyan ideya, ituro na dakel so Apocalipsis 1:7, a nabasa: “Nia! Sikato so onsabi ed saray lurem, tan amin a mata so makanengneng ed sikato, tan saraman so anugat ed sikato.” Balet kasin literal so pangikabaliksan ed sayan bersikulo?

4, 5. (a) Panon tayon amta a say Apocalipsis 1:7 so agnipakabaliksan ed literal a pantalos? (b) Panon a saray mismon salita nen Jesus so mamekder ed sayan pakatalos?

⁴ Tandaan, say libron Apocalipsis so niparungtal “ed saray tanda.” (Apocalipsis 1:1) Sirin, sayan balikas so simboliko; kanian, panon a nanengneng na “saraman so anugat ed sikato” so ipawil nen Kristo? Sikara lay inatey a ngalngalin 20 siglo! Niarum ni, inkuan na angheles a si Kristo so ompawil “ed parehon nengneng” a singa ed insipot to. Bueno, panon so inyalis to? Kasin banbantayan na nilaksalaksa? Andi, pigara labat iran matoor so akanengneng ed ebento. Tan sanen nansalita iray anghel ed sikara, kasin literal a banbantayan na saray apostol so pamapaarap nen Kristo ed tawen? Andi, sakey a lurem so nansanib ed si Jesus ed pakanengneng da. Agmanbayag kayari to, sikato la so linmoob ed espiritun katawenan bilang sakey ya espiritun pinalsa, agnanengneng na atooan iran mata. (1 Corinto 15:50) Kanian, anengneng labat na saray apostol so gapo na impanbaroy nen Jesus; agda nabantayan so kasampotan to, say ipawil to ed mangatatawen a presensya nen Ama to, si Jehova. Natebek da lambengat iya diad panamegley na saray mata na pananisia ra.​—Juan 20:17.

⁵ Ibabangat na Biblia ya ompawil si Jesus ed mipadparan tuloy a paraan. Inkuan a mismo nen Jesus sakbay a tuloy na impatey to: “Agmanbayag ed say mundo agto ak la nanengneng.” (Juan 14:19) Inkuanto met a “say panarian na Dios so ag-onsabin walaan na mabitabitar a pakaimanoan.” (Lucas 17:20) Diad anton pantalos, sirin, a ‘balang mata so makanengneng ed sikato’? Pian naebatan, nakaukolan ya ununan walaan itayo na malinew a pakatalos ed salitan inusar nen Jesus tan saray patumbok to no nipaakar ed ipawil to.

6. (a) Akin a saray salita a singa say “ipawil,” “idateng,” “adbiyento,” tan “isasabi” so agmagenap iran patalos ed Griegon salitan pa·rou·siʹa? (b) Anto so mangipanengneng a say pa·rou·siʹa, odino “kiwawala,” so mas manbayag nen dinanman ya agmanbayag ya ebento?

⁶ Say katuaan et nagkalalo ni so gawaen nen Kristo nen say “ipawil” labat. Atan a salita, a singa say “isasabi,” “idateng,” odino “adbiyento,” so mangipatnag na sakey ya ebento diad antikey a bekta na panaon. Balet say Griegon salita ya inusar nen Jesus tan saray patumbok to et walaan na nagkalalon kabaliksan. Say salita so pa·rou·siʹa, literal a mankabaliksan a sakey a “niwala” dino sakey a “kiwawala.” Maslak iran eskolar so mikasakey ya aglabat isiglaot na sayan salita so idateng noagta ontan met ed onggendan a kiwawala​—a singa ed ibisita na maarin opisyal. Sayan kiwawala so aliwan maganganon ebento; atan so sakey ya espesyal a panaon, tinandaan a peryodo na panaon. Diad Mateo 24:37-39, inkuan nen Jesus a “say kiwawala [pa·rou·siʹa] na Anak na too” so singa “saray agew nen Noe” a nansumpal ed say Delap. Si Noe so mamapaalagey na biung tan mamapasakbay ed marelmeng ed loob na saray dekada sakbay na insabi Delap tan niyanep to so abulok a sistema na mundo. Kanian, ontan met a say agnanengneng a kiwawala nen Kristo so manbayag ed sakey a peryodo na pigaran dekada sakbay a mansumpal met itan ed sakey a baleg a kadederal.

7. (a) Anto so mamaneknek a say pa·rou·siʹa so agnanengneng na atooan iran mata? (b) Panon tan kapigan a saray manedeskriben kasulatan ed ipawil nen Kristo bilang nanengneng na “kada mata” et nasumpal?

⁷ Andi-duaruwa, say pa·rou·siʹa so agnanengneng na atooan iran mata. No ontan komon, akin ya inusar nen Jesus so malaglaem a panaon, unong a nanengneng tayo la, ya iikdan toray patumbok to na sakey a tanda pian ontulong ed sikaran manebek ed sayan kiwawala?a Anggaman ontan, sano onsabi si Kristo pian deralen so sistema na mundo nen Satanas, say katuaan na kiwawala to so mabitar a nipatnag ed amin. Diad saman a “kada mata so makanengneng ed sikato.” Anggan saray kabusol nen Jesus so makatebek, diad kataktakot da, a say uley nen Kristo so peteg.​—Nengnengen so Mateo 24:30; 2 Tesalonica 2:8; Apocalipsis 1:5, 6.

Kapigan Itan Onggapo?

8. Anton ebento so mananda ed gapoan na kiwawala nen Kristo, tan iner iya agawa?

⁸ Say kiwawala na Mesias so onggapo tekep na sakey ya ebenton manumpal ed naulit-ulit a tema na Mesianiko iran propesiya. Sikato so abalangetan bilang Ari diad tawen. (2 Samuel 7:12-16; Isaias 9:6, 7; Ezequiel 21:26, 27) Impanengneng a mismo nen Jesus a say kiwawala to so nisiglaot ed inkaari to. Diad pigaran ilustrasyon, inyaliling to so inkasikato ed sakey a katawan a tinaynan to so sankaabungan tan ariripen to, a nambaroy na andukey a panaon ed “arawin dalin” a diman awaten to so “maarin pakayari.” Inter to so ontan ya ilustrasyon bilang kabiangan na ebat to ed tepet na saray apostol to no kapigan so igapo na pa·rou·siʹa to; angiter na sananey lapud “sikara so maniisip a say panarian na Dios so ompatnag a tampol.” (Lucas 19:11, 12, 15; Mateo 24:3; 25:14, 19) Kanian legan na impanbilay to ed dalin bilang too, say koronasyon to so mabayag nin tuloy, a nagawa ed “arawin dalin” diad tawen. Kapigan a nagawa itan?

9, 10. Anto so walan ebidensya a si Kristo so kaplesan a manuuley diad tawen, tan kapigan to inggapo so uley to?

⁹ Sanen saray babangatan nen Jesus so tinmepet ed sikato: “Anto so tanda na kiwawalam tan ed konklusyon na sistema na bengabengatla?” Inmebat si Jesus diad impangiter ed sikara na detalyadon deskripsyon na atan ya arapen a panaon. (Mateo, kapitulo 24; Marcos, kapitulo 13; Lucas, kapitulo 21; nengnengen met so 2 Timoteo 3:1-5; Apocalipsis, kapitulo 6.) Sayan tanda so misimbangan ed sakey a detalyadon retrato na magonigon a panaon. Panaon a tinandaan na internasyonal iran bakal, ondaraak a krimen, onkukusbon bilay na pamilya, saray epidemyan sakit, eraeras, tan yegyegyeg​—aliwan bilang lokal iran problema noagta bilang englobo iran krisis. Kasin kabkabat a tuloy iya? Kada ilalabas na agew so mamekder a say koma-20 siglo so matukotukoy ed deskripsyon nen Jesus.

¹⁰ Mipakna iray manag-awaran a say 1914 so makatantandan panaon ed awaran na too, pivotal a taon a kayari to et dakel ed sarayan problema so ginmapon agnakontrol, ombabaleg ed sankagloboan a laknab. On, saray aktual ya ebento ed mundo diad kasumpalan na propesiya ed Biblia so mangituron amin ed 1914 bilang say taon sanen ginmapon manuley si Jesus bilang Ari ed tawen. Niarum ni, itarok na sakey a propesiya ed Daniel kapitulo 4 so kronolohikon ebidensya a mangipanengneng ed sikatayo ed parehon taon​—1914​—​bilang panaon sanen say aturon Ari nen Jehova so ginmapo ed uley to.b

Akin a Panaon na Saray Gonigon?

11, 12. (a) Akin a mairap parad arum so panisia a si Kristo so manuuley la natan ed tawen? (b) Panon tayon niyilustra so agawa kayari inkabalangetan nen Jesus bilang Ari?

¹¹ Anggaman ontan, arum so manumameng, ‘Akin a say mundo so ontanlan magonigon no manuuley la so Mesias ed tawen? Kasin say uley to so ag-epektibo?’ Nayarin ontulong so sakey ya ilustrasyon. Sakey a bansa so uuleyan na mauges a presidente. Sikato so angiletneg na abulok a sisteman walaan na mamabanlong ya impluensyan onlaknab ed amin a sukong na dalin. Balet agawa so sakey ya eleksyon; analo so sakey a maabig a too. Natan anto so nagawa? A singa kaso ed arum iran demokratikon dalin, sakey a peryodo na pansalat a pigaran bulan so nagawa sakbay a say balon presidente so naaguraan. Panon so ikiwas na sarayan duaran totoo legan na atan a peryodo? Kasin say maabig a too so tamtampol a mangataki tan mangekal ed amin iray kaugsan a ginawa na tinumbokan to ed interon bansa? Imbes, agta arapen to nin ununa so kabiseran syudad, a mangiletneg na balon kabinete tan mangiter na pasakbay ed dati iran pikewet a kaulop tan kaiba na presidente? Diad ontan, sano sikato la so onsabi ed sigpot a pakauley, sikato so makapangikurang ed malinis, makanepegan a pakayari. No nipaakar ed abulok a presidente, agta anamoten to so natitilak ya antikey a panaon pian alaen manlapud dalin so amin ya agmanepeg iran gunggunan nayarian ton laen sakbay na iyandi na pakayari to?

¹² Diad tua, satan so mipadpara ed pa·rou·siʹa nen Kristo. Ipanengneng na Apocalipsis 12:7-12 a sanen si Kristo so agawan Ari diad tawen, say inmunan imbasileng to si Satanas tan saray demonyo to manlapud tawen, sirin lilinisan so pasen na gobierno To. Diad impanirap ed sayan abayaglan aalagden ya inkatalo, panon so ikiwas nen Satanas legan na “antikey a peryodo na panaon” sakbay ya agamilen nen Kristo so sigpot a pakauley to dia ed dalin? Singa samay abulok a presidente, panggunaetan ton alaen ya amin so bengatla a sarag to manlapud sayan daan a sistema. Agto interesado ed kuarta; noagta sikato so interesadon nawalaan na saray patumbok. Labay ton pabenegen ed anggaay nayarian to so dakdakel a totoo manlapud si Jehova tan say manuuley ya Ari To.

13. Panon so pangipanengneng na Kasulatan a say gapoan na uley nen Kristo so magonigon a panaon dia ed dalin?

¹³ Agpankelawan, sirin, a say gapo na uley na Mesias et kabaliksan to so panaon a “kasi la so dalin.” (Apocalipsis 12:12) Mipadpara, ipanengneng na Salmo 110:1, 2, 6 a say Mesias so onggapon manguley ‘diad leet na kakabusol to.’ Diad saginonor lambengat a sigpot a mekmeken to “iray nasyon,” a pati ed amin a nengneng na abulok a sistema nen Satanas, ed inkaandi!

Sano say Mesias so Manuley ed Dalin

14. Anto so nayarian a gawaen na Mesias kayari ton deralen so mauges a sistema na bengabengatla nen Satanas?

¹⁴ Kayari ton deralen so sistema nen Satanas tan amin a manusuporta ed atan, say Mesianikon Ari, si Jesu-Kristo, so diad kaunoran et niwalad kipapasen a manumpal ed makapakelaw iran propesiya ed Biblia a manedeskribe ed Milenyon Uley to. Ontulong ed sikatayon manmoria so Isaias 11:1-10 no anton nengneng na manuley so Mesias. Ibabaga ed sikatayo na Isa 11 bersikulo 2 a sikato so nawalaan na “say espiritu nen Jehova . . . , say espiritu na kakabatan tan pakatalos, say espiritu na pananimbawa tan pakapanyari.”

15. Anto so gagala na ‘espiritu na pakapanyari’ diad Mesianikon uley?

¹⁵ Kunsideraen pa so gagala na ‘say espiritu na pakapanyari’ ed uley nen Jesus. Sanen sikato so wadia ed dalin, sikato so walaan na sukat na pakapanyarin nanlapud si Jehova, ya akapanggawa ed sikaton manggawa na saray milagro. Tan impanengneng to so impapuson pilalek a tulongan so totoo, ya angikuan, “Labay ko.” (Mateo 8:3) Balet saray milagro to ed saraman ya agew so paunan panangipanengneng labat ed gawaen to sano manuley ed tawen. Gawaen nen Jesus iray milagro ed sankagloboan a laknab! Saray mansasakit, bulag, telek, umel, tan piley a totoo so natambal ed amin a panaon. (Isaias 35:5, 6) Say daakan a tagano, a dugarugay kibunog, et panganggaen to so eras diad ando lan ando. (Salmo 72:16) Komusta iramay agnabilang a nilaksalaksan walad saray lubok ya aliketan so Dios a mannodnonot ed sikara? Say “pakapanyari” nen Jesus so mangitekep ed pakayari a mamaoli ed sikara, ya ikdan so balang sakey na pankanawnawan manbilay ya ando lan ando diad Paraiso! (Juan 5:28, 29) Ingen, anggaman ed amin na sayan pakapanyari, say Mesianikon Ari so lawas mauyamon tuloy. Naromog to so “gayaga . . . diad takot ed si Jehova.”​—Isaias 11:3.

16. Anton nengneng na Ukom so pagmaliwan na Mesianikon Ari, tan panon a duma itan ed rekord na atooan ya uko-ukom?

¹⁶ Sayan Ari so magmaliw a naspot met ya Ukom. Sikato so “agmangukom unong ed pakanengneng lambengat na saray mata to, agmet mamaat unong ed pakadngel lambengat na saray layag to.” Siopan atooan ya ukom so nadeskribe ed ontan a dalan, balanglan ed apalabas odino kaplesan? Anggan say makabat a tuloy ya ukom a too so makapangukom labat ed nanengneng tan narengelan to, diad pangusar ed antokaman a kakabatan odino pakatalos a walad sikato. Kanian, saray ukom tan hurado na sayan daan a mundo so nauleyan odino nagutgut na makapalikdon katunongan, saray pankunkunwari ed kuarto na korte, odino mansusumlangan ya ebidensya. Mabetbet a say mayaman tan makapanyari lambengat so makasarag na epektibon depensa, diad tua et sasaliwen to so inkahustisya. Aliwan ontan ed silong na Mesianikon Ukom! Nabasa toray puso. Anggapo so makapaliis ed imano to. Say inkahustisya, ya atimplaan na aro tan panangasi, so agnailako. Atan so lawas ontalona.​—Isaias 11:3-5.

Panon a Nalanor Kayo ed Uley To

17, 18. (a) Anton masnag a retrato na arapen na katooan so nipanengneng ed Isaias 11:6-9? (b) Diad siopa a manunan niyaplika iyan propesiya, tan akin ya ontan? (c) Panon a sayan propesiya so walaan na literal a pansumpalan?

¹⁷ Natalosan, say uley na Mesias so walaan na baleg ya impluensya ed saray uuleyan to. Manguman itan ed totoo. Ipanengneng na Isaias 11:6-9 no panon kalaknab iratan a pananguman. Sayan propesiya so mangipanengneng na makatenyeg liknaan a retrato na saray mapeligro, mangasiban ayayep​—saray uso, lobo, leopardo, leon, tadyuko​—​diad limog na maamon ayayep tan anggan saray ugugaw. Balet saray mangasiba so aliwa lan mapeligro! Akin? Onebat so Isa 11 bersikulo 9: “Ag-ira naani mamaunong odino mamagbag ed masanton palandey ko; ta maseguron say dalin so napano na pikakabat ed si Jehova unong a sakbongan na saray danum so dayat.”

¹⁸ Siempre, say “pikakabat ed si Jehova” so andian na epekto ed literal ya ayayep; kanian sarayan bersikulo so manunan onaplika ed totoo. Say uley na Mesias so mangipapakurang na sankagloboan a programa na edukasyon, ya ibabangat iray totoo nipaakar ed si Jehova tan ed saray dalan to, ya ibabangat so amin a tratoen to so kapara ton too a tekep na aro, respeto, tan dignidad. Diad onsasabin Paraiso, mamilagron italindeg na Mesias so katooan ed inkayadyari ed pisikal tan moral. Say mangasiba, inaayep iran kagagawa a mandudutak ed ag-ayadyarin too so naandi. Diad literal a pantalos, diad kaunoran say katooan met so onsabi a mikareenan ed ayayep!​—Ipareng so Genesis 1:28.

19. Panon a say uley na Mesias so mangaapekta ed saray bilay na totoo diad sarayan kaunoran iran agew?

¹⁹ Anggaman ontan, tandaan a say Mesias so manuuley la natan. Anggan natan et saray uuleyan na Panarian to so manaaral a manbilay a nankakasakey ed deen, diad panusumpal ed Isaias 11:6-9 diad sakey a pantalos. Nagkalalo ni, diad ngalngali 80 taon, si Jesus so manusumpal la ed Isaias 11:10: “Nagawa dia ed satan ya agew a niwala so lamot nen Jesse a manalalagey bilang tanda ed totoo. Diad sikato et anggan saray nasyon so manupapet, tan say panagpainawaan to so magmaliw a magaygayaga.” Saray totoo ed balang nasyon so ondadapag ed Mesias. Akin? Lapud nanlapulad inggapo ton nanuley, sikato so “manalalagey bilang tanda.” Sikato so mangipapakabat ed kiwawala to ed sankamundoan diad panamegley na malaknab ya edukasyonal a programan adeskribe ed tagey. Diad tua, impasakbay nen Jesus a say sankagloboan a panagpulong a kimey so sakey a matalonggaring a tanda na kiwawala to sakbay na anggaan na sayan daan a sistema.​—Mateo 24:14.

20. Anton awawey so nepeg a paliisan na amin ya uuleyan na Mesianikon uley, tan akin?

²⁰ Kanian say kiwawala nen Kristo ed Maarin pakayari so aliwan maamot, teoritikon pamaakaran, tema lambengat na matudion debate ed limog na saray teologo. Say uley to so mangapekta tan manguman ed saray bilay dia ed dalin, a singa impasakbay nen Isaias a pagmaliwan to. Si Jesus so mangidadaulo na nilaksalaksan uuleyan parad Panarian to manlapud sayan abulok a sistema na mundo. Kasin sakey kayo ya uuleyan? Sirin manlingkor tekep na sigpot a ligsa tan gayaga a kanepegan na Manuley tayo! Iyabuloy ya ontan, magmainomay so ikesaw, pian miulop ed manleglemew ya eyag na mundo: “Iner so kawalaan na sayan sipan na kiwawala to?” (2 Pedro 3:4) Balet unong ya inkuan a mismo nen Jesus, “saman so mansungdo anggad kasampotan sikato so nilaban.”​—Mateo 24:13.

21. Panon tayon amin a napadaak so apresasyon tayo parad Mesianikon ilalo?

²¹ Kada ilalabas na agew so mamaasingger ed sikatayo ed baleg ya agew sano iwanwan nen Jehova so Anak Ton mangipatnag ed kiwawala to ed sankamundoan. Agyon balot pabilungeten so ilalo yo ed satan ya agew. Dalepdepen so Inkamesias nen Jesus tan ed kalidades to bilang manuuley ya Ari. Nonoten met a maong, so nipaakar ed si Jehova a Dios, say autor tan manangidaulo ed baleg a Mesianikon ilalon nidatak ed Biblia. Leleg a gawaen yo itan, andi duaruwan nagkalalon nalikna yo so liknaan nen apostol Pablo sanen insulat to: “O say kaaralman na saray kayamanan tan kakabatan tan pikakabat na Dios!”​—Roma 11:33.

[Saray paimano ed leksab]

Panon so Pangebat Yo?

◻ Diad anton nengneng ya ompawil si Kristo?

◻ Panon tayon amta a say pa·rou·siʹa nen Kristo so agnanengneng tan mansiansia ed ag-antikey a peryodo na panaon?

◻ Kapigan so inggapo na kiwawala nen Kristo, tan panon tayon amta iya?

◻ Anton nengneng na mangatatawen a Manuley so say Mesias?

◻ Diad antoran dalan a say uley nen Kristo so mangaapekta ed saray bilay na uuleyan to?

[Litrato ed pahina 15]

Say ilalon ompawil si Jesus so makabaliksan a tuloy ed saray matoor ya apostol to

[Litrato ed pahina 17]

Diad panuley ed tawen, si Jesus so manggawa na saray milagro ed sankagloboan a laknab

[Credit Line]

Dalin: Based on NASA photo