Nitarok Iray Balon Pinalsa!

AMINSAN et imbaga nen makabat ya Arin Solomon: “Angapo so balo a bengatla ed leksab na banwa.” (Eclesiastes 1:9) Tua itan ed pisikal a mundon panbibilayan tayo, balet komusta so baleg a pasen na espiritual a palsa nen Jehova? Peteg, a diad satan a pasen, say babaleg nen si Solomon a sankabalgan a nambilay ed dalin so nagmaliw a matalonggaring a balon pinalsa. Panon ya agawa iya?

Diad taon 29 na Komon a Panaon tayo, say ayadyarin too, si Jesus et inparungtal to so inkasikaton bautismoan nen Juan ed Ilog Jordan. “Et si Jesus, sanen abinyagan la, tinmatdang a tampol a nanlapu ed danum; et nia, alukasan so saray tawen ed sikato, et anengneng to so Espiritu na Dios ya onleleksab a singa sakey a malapati, tan oonla ed sikato; Tan nia, sakey a voces a nanlapu ed saray katawenan a kuan to, Saya so Ana’ko ya inararok; napaliketak ya maong ed sikato.” (Mateo 3:16, 17) Kanian, say toon Kristo Jesus so say inmuna ed balon pinalsa, ya alanaan a manggaway linawa na Dios. Diad saginonor, ed basiyan na masakripisyon impatey to, si Jesus so nagmaliw a Manamegley na balon sipanan ed baetan na Dios tan ed pinilin grupo na totoo. Balang sakey ed saraya so magmamaliw a “sakey a balo’n pinalsa,” nilanaay espiritu na Dios ed mangatatawen ya ilalo, tekep na ilalon miuley ed si Jesus diad mangatatawen a Panarian to.​—2 Corinto 5:17; 1 Timoteo 2:5, 6; Hebreos 9:15.

Diad loob na saray siglo, sarayan alanaan, tinagibi-ed-espiritun Kristianos so natutugyop a mikasakey ed Kristo bilang say tuan Kristianon kongregasyon, a sikaton mismo et balon pinalsa. Tinawag itan na Dios manlapud sayan mundo parad sakey a gagala, unong a sasalitaen nen apostol Pedro: “Bangbalet sikayo so apili a kapolian, peteg ya inkasacerdote, masantos a nacion, sakey a baley na Dios a dilin kayarian to, ya mangibelyaw na karlangan na saman so angekal ed sikayo ed kabilungtan, ta tinawag to kayo ed makapakelaw a silew to.” (1 Pedro 2:9) Singa si Kristo Jesus, say sankaunaan a balon pinalsa na Dios, sayan tinmunbok a balon pinalsa so walaan na manunan obligasyon ya ipulong so maong a balita. (Lucas 4:18, 19) Balang sinansakey ed saray membro to, a diad kaunoran et manbilang na 144,000 so nepeg ya “ikawes [da] . . . so too a balo, a sikato so pinalsay Dios ed loob na kaptekan tan matuan kasantosan.” (Efeso 4:24; Apocalipsis 14:1, 3) Kaukolanen na saya a bayuboan day “bunga na Espiritu,” ya adeskribe ed Galacia 5:22, 23, tan sitotoor a mangasikaso ed inkamayordomo ra.​—1 Corinto 4:2; 9:16.

Anto so nipaakar ed sayan balon pinalsa diad modernon panaon? Diad taon 1914, unong ya ipapanengneng na panag-orasan na Biblia, saray salita na Apocalipsis 11:15 so asumpal: “Saray nanarian na mundo agawa ran nanarian na Katawan [Jehova] tayo, tan si Cristo to: tan manari ed ando lan ando.” Say ununan kiwas nen Kristo bilang balobalon nitronon Ari et say pangibasileng ed si Satanas tan ed demonikon angheles to manlapud tawen diad kaliber-liber na dalin. Angitarok iya na “kasi lara so dalin,” diad porma na inmunan guerra mundial tan saray katekep ton gonigon.​—Apocalipsis 12:9, 12, 17.

Kinmana met iya bilang paimano ed saray nakekeraan a balon pinalsa diad dalin a sikaray nepeg a mibiang ed panumpal na propesiya nen Jesus: “Tan saya ya evangelio [maong a balita, NW] na panarian nipulong naani ed sankamundoan ya onkanan pamintuaan ed saray amin a naciones; et saman la onsabi angaan.” Anto itan ya “angaan”? Ituloy nen Jesus ya isalaysay: “Ta wala naani baleg ya irap ed satan, ya angapo so ontan a nanlapu’d gapo na mundo ya anga ed natan, angapo, angapo la naani. Et no ag apatikeyan iratan ya agew, angapo komon naani laman ya nilaban: balet nisengeg ed saray pinili napatikeyan so saratan ya agew.”​—Mateo 24:3-14, 21, 22.

Pinakiwas na espiritu nen Jehova iraman ya alanaan na balon pinalsa to a magmaliw ya okupado ed sankalaknaban a kampanyay panagpulong a nagawa diad sayan dalin. Manlapud pigaran libo nen 1919, say bilang na sarayan maseet a manangiyabawag na Panarian so dinmaak ed ngalngali 50,000 ed kapegleyan na 1930’s. Unong a nipropesiya, “dia ed ami dalin pinmaway so tanol da, Tan saray salita ra anga ed saray sampot na mundo.”​—Roma 10:18.

Kasin saray nakekeraan ed balon pinalsa lambengat so natugyop parad kilalaban? Andi, ta imbaga na propesiyan saray anghel na Dios so mamokpok ed saray dagem na baleg a kairapan ya anggad kakumpleto na panagtipon aliwa lambengat ed sarayan nigana-ed-tawen ya espiritual iran Israelita noagta ontan met ed arum ni, “sakey a baleg ya olop, a sikato so ag nayari a bilangen na too a nanlapu ed balang nacion tan amin na saray kailalakan, tan binaleybaley, tan salita.” Anto so niganaan da? Siempre, sikaray ompaway ya agnasugatan “nanlapu ed baleg ya irap” pian pangayagaan so andi-anggaan a bilay diad paraison dalin!​—Apocalipsis 7:1-4, 9, 14.

Makapalikliket, sayan baleg ya ulop, ya atugyop ed 229 daldalin, so biglan binmaleg ed ngalngalin 4,500,000 aktibon Tastasi. Dakel ni so onsasabi, unong ya inpanengneng na inmatendin 11,431,171 ed Memoryal na impatey nen Jesus nen Abril 17 ed katantaon. Diad amin na sarayan nilaksalaksa, 8,683 labat, a mankuan a kabiangan na saray nakekeraan ed dalin na balon pinalsa, so akibiang ed saray emblema na Memoryal. Saraman so kabiangan na sayan melag a grupo so agbalot makakasumpal natan ed sayan baleg a panagpulong a kimey diad inkasikaran dili. Saray nilaksan manutugyop na baleg ya ulop so benebenek a mikikimey natan ed sikara diad pananumpal ed kimey. (Sofonias 3:9) Niarum ni, saray nipasal-a-maong iran membro na baleg ya ulop so manggagawa natan na administratibo tan arum a responsablen kimey a kaibay alanaan a Mananguley ya Ulop na espiritual ya Israel, unong a say aliwan-Israelitan Netineo so akikimey ed saray saserdote diad impangapiger ed saray bakor na Jerusalem.​—Nehemias 3:22-26.

Panamalsa na “Saray Balo a Tawen tan Balo a Dalin”

Agaylan gayaga so katekep na sayan pananugyop! Satan so unong ed imbaga nen Jehova a nagawa: “Nia, mamalsa ak na saray balo a tawen tan balo a dalin; ta saray inmuna a bengatla ag ira la nanonotan, ag ira la onla ed nonot. Balet mangayaga tan manliket kayo ed ando lan ando ed saman a palsaen ko; ta nia, palsaen ko so Jerusalem a sakey a panliketan, tan say ombaley ed sikato a sakey a liket. Et manliket ak naani ed Jerusalem, tan gayaga naani ed baley ko; et ag la narengelan angan kapigan ed sikato so voces na nangis tan say voces na panakis.” (Isaias 65:17-19) Saray balo a tawen ed panamalsa nen Jehova so diad kaunoran et tugyopen nen Kristo Jesus tan say 144,000 apaolin membro na balon pinalsa a walan sinaliw manlapud limog na katooan ed apalabas lan 19 iran siglo. Satan so nagkalalon mas magloria nen dinanman a mangaraldalin a gobiernon nanuley ed literal a Jerusalem, anggan ed saman so agew nen Solomon. Ilalaktip na satan so Balon Jerusalem, sakey a mangatatawen a syudad, ya adeskribe ed sigpot a mansiayap a dakep to diad Apocalipsis kapitulo 21.

Say Balon Jerusalem so espiritual a nobya nen Kristo, say 144,000 ya alanaan iran patumbok to, ya akiulop ed Nobyo ra diad tawen kayari ipatey tan espiritual a kioli ra. Sikaray ireretrato ed Apocalipsis 21:1-4 “ya inmepas a nanlapu ed tawen dia ed Dios,” salanti, say uusaren to ed pangidirihe na saray bendisyon ed katooan dia ed dalin. Diad sayan dalan a nasusumpal so propesiya: “Nia, so tabernaculo na Dios wala ed saray totoo, tan sikato so manayam naani ed sikara, tan sikara naani baley to, tan say Dios met lanlamang so wala naani ed sikara tan Dios da: Tan punasen to so amin a lua ed kamataan da; tan andi gapo la naani ipatey; tan angapo la naani onnangis o dageyem, o ot-ot: ta saray ona a bengatla sikara so linmabas la.”

Agaylay pisalamat tayo ed impamalsay Dios ed satan a balon katawenan! Aliwan singa say temporaryo, abulok iran pananguley ya abayag lan mamapairap ed katooan, sayan ginogobiernon areglo na Dios so magmaliw a permanenti. Say balon pinalsa tan say espiritual ya anak da, say baleg ya ulop, so mangayaga ed kaaruman a sipan na Dios: “Ta singa saray balo a tawen tan say balo a dalin, a gawaen ko naani, mansiansia ra naani ed arapan ko, kuan nen Jehova, ontan naani so pansiansia na saray bini yo tan ngaran yo.”​—Isaias 66:22.

“Say balo a dalin” so ginmapo ed sayan anak na saray alanaan a balon pinalsa. Satan so balo, matakot-ed-Dios a sosyedad na katooan ed dalin. Say gulaan, krimen, karawalan, inkabulok, tan imoralidad ed atooan a sosyedad natan so maseguron mangidadanet ed pankaukolan na kumpleton pansalat parad sakey a balon sosyedad na dalin, a nipapakurang ed silong na panangiwanwan na mabunlok a balon katawenan. Satan so gagala nen Jehova. Unong a sikatoy amalsa na balon katawenan, kanian sikato so mamapalsa na balon dalin diad panitipon ed baleg ya ulop bilang say sentro na mareen a balon mundon sosyedad. Sayan sosyedad labat so nisalba “manlapu ed baleg ya irap.”—Apocalipsis 7:14, NW.

Anto so nailaloan tayo kayari na baleg ya irap? Diad impitongtong ed apostoles to, saray unaan ed saramay manugyop na balon katawenan a manguley ed balon dalin, insipan nen Jesus: “Tua kuan ko’d sikayo, a sikayo’n tinmombok ed siak, dia ed balo a panamalsa sano say Anak na too onyorong naani ed trono na gloria to, sikayo onyorong kayo met naani ed labindua’n trono.” (Mateo 19:28) Amin a 144,000 ed sayan Balon Jerusalem so miulop ed si Jesus diad pangukom ed katooan. Insan salatan na aro so kasibletan tan gula bilang say basiyan a kipaalageyan na atooan a sosyedad. Saray problema ed tribu, rasa, tan nasyonalidad so naekal. Say kioli manlapud ipapatey so kalkalnan mangitarok lamet ed saray inadaro. Say matoor a katooan diad binilyon so magmaliw a baleg, nankakasakey a pamilya, a nitandoro ed andi-anggaan a bilay diad agawan paraison dalin.

Saya so nagkalalo nen say sakey a Utopia (ayadyari tan maliket a sosyedad) odino sakey a Shangri-la (pasen na inkayadyari). Satan so magmaliw a permanentin pinalsa​—“unong ed sipan to alagden tayo so saray tawen a balo tan dalin a balo, a sikara so pana-ayaman na katunongan.” (2 Pedro 3:13) Seguradon saya so sakey a makapakelkelaw a panilalo, sakey ya engranden sipan na samay angikuan: “Nia, siak gawaen ko a balo so saray amin a bengatla, Tan kuan to ed siak: Isulat mo; ta saraya a salita sikara so matoor tan matua.”​—Apocalipsis 21:5.