Mangayaga ed Engranden Manamalsa Tayo
“Mangayaga so Israel ed nangawa ed sikato: mansayaksak so saray anak na Sion ed Ari ra.”—SALMO 149:2.
1. Anggaman walaray kelyaw na “diad kaunoran et kawayangan,” anton peteg so kipapasen na katooan?
SAY mundo natan so gogonigonen na “kairapan.” Satan so balikas ya inusar nen Jesus ed propesiya to nipaakar ed “konklusyon na sistema na bengabengatla,” say makadesyang a panaon a ginmapo ed inmunan guerra mundial nen 1914. (Mateo 24:3-8, NW) Say kabilungetan labat so nanenengneng na dakel a pulitiko. Anggaman walaray kelyaw na “diad kaunoran et kawayangan” diad Mamabukig a Europa, sinegek na datin presidente ed saman a pasen so kipapasen sanen inkuanto: “Say biglan idaraak na populasyon tan greenhouse effect, saray lungaw ed ozone tan AIDS, say pamapagyaw na nuklear a terorismo tan say biglan ibabaleg na baetay mayaman ed amianen tan duka ed abalaten, say kapeligroay eras, say idadaiset na biosphere (panaayaman na too) tan saray mineral a kayamanan na dalin, say ilalaknab na sosyedad a saray ideya tan awawey to so momoldien na nipapakurang iran programay telebisyon tan say sesga na saray bakal ed rehyon—amin na saraya, pati ed saray nilibon arum a sengegan so mangirerepresenta na inheneral a pansesgay katooan.” Anggapo so pakayari na toon makapangekal ed sayan sesga na anggapoy-ilalon desyang.—Jeremias 10:23.
2. Siopa so walaan na permanentin solusyon ed saray problema na katooan, tan anton kundang so inala to la?
2 Anggaman ontan, makapangayaga itayo a say Engranden Manamalsa tayo so walaan na permanentin solusyon. Diad propesiya nen Jesus isisiglaot [to] so “konklusyon na sistema na bengabengatla” ed agnanengneng a “kiwawala” to. (Mateo 24:3, 37-39, NW) Pian napalsa so “saray tawen a balo,” inpasen nen Jehova si Jesus ed trono to bilang Mesianikon Ari, say mapropetikon ebidensyan mangipapanengneng a saya so maawaran ya ebenton agawa ed katawenan nen taon 1914.a (2 Pedro 3:13) Bilang kaiban manuley na Soberanon Katawan a Jehova, si Jesus so niganggan lan mangukom ed nasyones tan mangibiig ed mauyamo, malakarneron totoo ed dalin manlapud saray masugnar a malakanding. “Saray [agmaridios a] kanding” so tatandaan parad “dusa ya andi angaan [a kapegpeg, NW]” tan “saray carnero” parad andi-anggaan a bilay diad mangaraldalin a pasen na Panarian.—Mateo 25:31-34, 46.
3. Anton rason so walad saray tuan Kristiano diad pangayaga?
3 Say nakdaan na espiritual ya Israel ed dalin, a kaulop natan na baleg ya ulop na sarayan matulok a karnero, so walaan na sigpot a katunongan a mangayaga ed si Jehova, say Ari ed andi-anggaan, legan ya itatarok toray engranden gagala to ed kapantokan diad panamegley na Panarian na Anak to. Nikuan da: “Siak manliket ak naani balbaleg ed Jehova, say kamarerwak mangayaga naani ed Dios ko; ta sikato kinawesan toak ed saray kawes na kilalaban . . . Ta singa say dalin ipaway to so saray bosilak to tan singa say tanamanan patoboen to so saray bengatla a nitanem ed sikato, ontan so pamatobo na Katawan a Jehova ed inkatunong tan panangigalang ed arapan na saray amin a nacion.” (Isaias 61:10, 11) Sayan “pamatobo” so napapaneknekan diad nilaksalaksan natutugyop natan manlapud nasyones pian mankanta na dayew ed si Jehova.
‘Gagawaen a Magano’
4, 5. (a) Panon a nipasakbay so panutugyop na totoo na Dios? (b) Anton matalonggaring ya indaak so anengneng legan na 1992 serbisyon taon?
4 Ondaraak so panutugyop legan a manasingger so anggaan na sistema nen Satanas. Iyaabawag na Engranden Manamalsa tayo: “Saray ombaley mo met matunong ira ya amin naani . . . , say sanga na pantanaman ko, say gawa na saray limak, pian napagayagak. Say daiset magmaliw naani a sanlibo, et say melag magmaliw naani a mabiskeg a nacion: Siak, si Jehova, sikato naani gawaen ko a magano ed panaon to.” (Isaias 60:21, 22) Sayan pamapapeles so makapakelkelaw a nipaparungtal ed 1992 Report ed Serbisyon Taon na Tastasi nen Jehova ed Sankamundoan, ya impalapag ed pahina 12 ya anggad 15 na sayan magasin.
5 Matalonggaring ed sayan report et say balon pantok a 4,472,787 manangiyabawag ed Panarian, sakey a 193,967 indaak—4.5 porsienton masulok nen katantaon. Say pantok a 301,002 ya abautismoan legan na 1992 so mangipaparungtal met ed katuaan a dakel iray mangaawat ed katuaan na Biblia. Agaylay pangayaga tayo a diad sayan “sakey ya agew na udiem tan kabilungtan, . . . sakey a baley a baleg tan mabiskeg,” a singa ulop na saray duron so mangipapalaknab na pantasi ed Panarian ya “anga ed kasampotan na dalin”! (Joel 2:2, 25; Gawa 1:8) Manlapud ambetel ya Alaska—a ditan say eroplano na Watch Tower Society so nanggaway masulok a 50 inbisita ed maniebe iran teritorya—ed ampetang iran desierto na Mali tan Burkina Faso tan saray ataytayak ya isla na Micronesia, onsisindag iray ariripen nen Jehova bilang “silew na saray Gentil, pian makapagmaliw ka a pangilaban ko anga ed sampot na dalin.”—Isaias 49:6.
6, 7. Anton ag-iilaloan iran pananguman so atasian ed agano niran taon, tan panon so inkiwas na ariripen nen Jehova ed satan?
6 Si Jehova so singa sakey a salimbengan tan mabiskeg ya ilang diad panalimbeng tan panustine ed totoo to. Diad dakel a pasen na dalin, saray Tasi nen Jehova so kaukolan a mansungdo ed saray dekada na maruksan panamairap tan panamasegsegang. (Salmo 37:39, 40; 61:3, 4) Balet diad agano ni, kuanmono sakey a milagro ta saray panameget tan pakasbel so nakal ed arum a 21 daldalin, kanian natan et nayarian la na totoo na Dios a sibubulos ya iyabawag a say Engranden Manamalsa tayo et inletneg to la si Kristo bilang Ari ed sankadalinan.—Salmo 2:6-12.
7 Kasin uusaren a maong na saray totoo nen Jehova so balon-aromog a kawayangan da? Imanoen ed tsart iray indaak ed Bulgaria, Romania, tan say datin Sobyet Union ed Mamabukig a Europa tan ed Angola, Benin, tan Mozambique ed Aprika. Diad Zaire, met et ekstraordinaryo so ilalaknab to. Tekep na gayaga ed kapusoan da, saray nibulos ya agagi tayo so oneebat ed tawag: “O misalsalamat kayo ed Jehova; ta sikato et maong . . . , Dia ed saman so bokod toy mangawa na ankakabaleg a pankelkelawan; ta say panangasi [maaron-kaabigan, NW] to manando lawas.” (Salmo 136:1, 4) Sarayan pisasalamat so ibabalikas diad maseseg a serbisyon panutugyop na arum a malakarneron totoo ed dapag na Panarian.
8. Panon a saray balon managdayew ed si Jehova so “ontekyab a singa lurem” ed Mamabukig a Europa? diad Aprika?
8 Legan na imbeneg a tiagew ed Europa, saray kumbension na totoo nen Jehova ya agawa ed datin Komunistan daldalin so awalaan na makapakelkelaw iran inmatendi. Nagkalalon makapakelaw et saray bilang na abautismoan ed saraman a daldalin. Mipadpara, diad Togo, Aprika, say pananebel so inekal nen Disyembre 10, 1991. Diad tinmunbok a bulan agawa so nasyonal kumbension. No ipareng ed binulan a promedyo a 6,443 manangipalapag ed lawak, saray inmatendi ed sayan kumbension so sinmabi ed 25,467, tekep na 556 ya abautismoan—8.6 porsiento ed bilang na saray manangipalapag. Unong a dedeskribien na Isaias 60:8, saray balon managdayew ed si Jehova so “ontekyab a singa lurem, tan singa ra malapati ed saray dorongawen da” diad saray kongregasyon na totoo nen Jehova.
9. Antoran probisyon so nagagawa ta pian saray Kristiano ed agano nin walaay kawayangan iran bansa so ‘makapangan tan napenek’?
9 Say inkaeras ed espiritual a tagano diad Mamabukig a Europa tan Aprika so napapakepa met. Saray paktorya na Watch Tower Society ed Alemanya, Italya, tan Abalaten ya Aprika so mangipapawit na nantutumbokan a trak a napnoy literatura, diad dakel iran lenguahe, diad saray bansan naeerasan ed espiritual. Nen inmuna, dakel ed Tastasi et kaukolan a panpapasaan day nausar-a-maong iran magasin, balet makakaawat lara natan na daakan ya espiritual a tagano. Mangagayaga ran mibiang ed pananumpal na propesiya: “Et mangan kayo naani na daakan tan napesel kayo naani, et igalgalang yo naani so ngaran nen Jehova a Dios yo, a sikato so nangawa na makapakelaw ed sikayo; et say baley ko ag la naani nibabaing angan kapigan.”—Joel 2:26.
Pangasikaso ed Kaaruman ya Ilalaknab
10. Nisesengeg ed baleg a bilang na inmatendi ed Memoryal, anton imbitasyon so nioopresi ed amin ya interesado?
10 Makapakelaw a peteg so sankamundoan a bilang na inmatendi ed Memoryal na impatey nen Jesus, 11,431,171, sakey a 781,013 indaak, odino 73 porsienton masulok nen katantaon. Naabrasa kayon amin a balo ni! Agaylan marakep no amin ed saratan a balo nin interesadon totoo so mangayaga ed gungguna na panangiyaral na Biblia na sakey ed Tastasi nen Jehova! (Nengnengen so Isaias 48:17.) Ipapanengneng ed Report na Serbisyon Taon a 4,278,127 ed sarayan iyaaralan so nikokonduktan binulan, sakey a maabig a 8.4-porsienton indaak. Anggaman ontan, dakel ni so makagungguna ed sayan serbisyo. Maliket iray Tasi nen Jehova a maparanay ya ondalaw ed saray interesado pian mangikondukta na libren panangiyaral na Bibla ed ayaman, sirin tutulongan irayan ontalindeg a malet ed dalan a mamaarap ed andi-anggaan a bilay. (Juan 3:16, 36) Akin ya agkerewen so ontan a panagaral? Tan tandaan, say sakey ya ampetang a panangabrasa so lawas manaalagar ed sikayo diad Kingdom Hall!—Salmo 122:1; Roma 15:7.
11, 12. (a) Antoran problema so naaabet ed arum a daldalin? (b) Diad anton dalan a sakey a “pamparpara” so nagagawa ed baetan na mas mayaman tan mas dukan daldalin?
11 Saramay kongregasyon a walaay maabig iran Kingdom Hall so mayamyaman a nabebendisyonan. Say situasyon so duma ed daldalin a saray matoor a Tasi so mansusungdo ed dakel a taon diad leksab na pananebel, a masekreton mantitipon ed ankelag iran grupo. Diad pigara ed saratan a pasen, sikaralay bulos, balet pigpigaray Kingdom Hall. Alimbawa, diad sakey a bansa ed Aprika, diad 93 iran kongregasyon et wala labat so taloran Kingdom Hall. Kanian saray miting so gendagendat a nagagawa ed maawang a bakante iran lote. Sakey a kongregasyon na 150 so walaan na anggad 450 regular ya onaatendi ed sarayan miting.
12 Diad Mamabukig a Europa mabetbet a mairap so panaliw na kayarian odino panpaalagey, balet walaray nagagawan pigaran aligwas. Say impangidedika na sakey a marakep a balon pasilidad na sanga so niyeskedyul nen Nobyembre 28, 1992, diad Polandia. Saray mabunlok a kontribusyon parad sankamundoan a kimey na saray Tasi nen Jehova so uusaren diad pamaalagey ed saray hall tan arum iran pasilidad. Kanian, sakey a “pampapara” so nagagawa ta say inkabunlok na agagin angiter manlapud “kadaakan” da ed materyal so ontutulong ed pangitatarok na espiritual iran pankaukolan na kongregasyon ed dukan daldalin.—2 Corinto 8:13, 14.
Sakey Bilyon ya Oras!
13. Pigaran oras so inusar ed panagpulong tan panagbangat ed 1992, tan siopay akansagpot so nisisindag ed sayan bilang?
13 Anto so gawaen yo ed sakey bilyon ya oras? Sarag ya usaren na amin a makadampot ed andi-anggaan a bilay so kinarakel na satan ya oras, tan nagkakalo ni, diad mabunga, makapenek a serbisyo ed si Jehova. Balet isipen pan pankakasakeyen so kinarakel na satan ya oras ed sakey taon! Ontan so agawaan na totoo nen Jehova legan na 1992. Panaaruman iray indibidual a report na amin a manangipalapag na Panarian, naromog tayo so balon pantok na 1,024,910,434 oras ya inusar ed sankaabigan a dalan—panagdayew ed Engranden Manamalsa tayo, “panagbangat . . . dia ed lapag tan kabkaabungan.” (Gawa 20:20, NW) Diad promedyo, 4,289,737 Tastasi so nanrereport ed kada bulan. Sikaray manlalapu ed nanduruman kipapasen na panagbilay. Arum so limitado ed niiter dan panaon ed kimey na Panarian. Lalaktipen na sarayay ulo na pamilyan nepeg a mangitarok parad sankaabungan da; matatatken; tan dakel a walaay problema ed bunigas; ontan met ed ugugaw a maneeskuela ni. Ingen, say report ya agawaan na balang sakey so makanan panangisindag na panangaro ed si Jehova.—Ipareng so Lucas 21:2-4.
14. Panon a saray katayatdang so ‘makakanonot ed Engranden Manamalsa ra’?
14 Sakey a malangwer nin kailalakan so ombabaleg diad serbisyo ed si Jehova, tan makapaliket a karaklan ed saraya so mangiyaaplika ed saray salita nen Solomon ed Eclesiastes 12:1: “Nonoten mo met so Manamalsam dia ed saray agew na inkaugaw mo.” Idedeboto day inkasikara ed kimey ed eskuelaan da, ontan met ed pangipapasal ed sikara na debotadon atateng ed espiritual iran pamaakaran. Alay liket so pakanengneng ed baleg a bilang na katayatdang ya inmalagey ed agano niran kumbension, ya itatalaga da so inkasikara parad bautismo. Sakey met a gayaga so pakaamta a dakel, diad panaaral na arum a trabaho odino dunong et praktikal a manpaparaan parad panagpayunir kayari pangraduar da ed haiskul. Kanian, sikaray makapanuporta ed inkasikara, unong a tunggal paminsan a ginawa nen apostol Pablo diad panaggaway tolda.—Gawa 18:1-4.
15, 16. Panon a saray payunir tan arum a sigpot-panaon ya ariripen so tinmulong ed inyaligwas na kimey ed Panarian, tan anton bendisyon so nangayagaan na arum ed sikara?
15 Agaylan baleg a tulong so gagawaen na saray payunir tan arum ed sigpot-panaon ya ariripen diad iyaligwas na kimey na Panarian! Saray ranko na saray payunir so dinmaak ed pantok a 931,521 ed apalabas a taon. Legan a saraya so inagew-agew a manpupulong ed kabkaabungan tan mangikokondukta na saray panangiyaral na Biblia ed saray ayaman na totoo, sikaray magmamaliw ya epektibon maong diad pangisasalaysay dan mismo na saray Kasulatan. Niarum ni, dakel so kinmualipika ya onatendi ed duaran-simban Eskuelaan na Payunir a Serbisyo, ya ontutulong ed sikaran mamayubo na babaleg ya abilidad tan liket ed panggaway kimey na Dios.
16 Balang sakey ed sarayan matoor a payunir so makapipakna ed saray salita ed Isaias 50:4: “Si Katawan a Jehova initer to ed siak so dila na saray abangatan, pian naamtaan ko komon no panon so pamabiskeg ed saray naksawan ed panamegley na saray salita.” Dakel iray indibidual natan a nakekesawan ed abulok a mundon walad liber da balet narerepreskoan diad panamegley na salitan sinalita na matoor iran payunir tayo.—Ipareng so Uliran 15:23; Ezequiel 9:4.
Sakey a Baleg a Programay Panagpaalagey
17. Niarum ni ed espiritual a panagpaalagey, anton materyal a panagpaalagey so natatasian ed agano niran taon?
17 Say sankamundoan ya espiritual ya iyaaligwas na Tastasi nen Jehova so mankakaukolan met na materyal ya ibubulaslas. Say panangilaknab na saray panag-imprintaan, opisina, ayaman a Bethel tan konstruksion na saray Kingdom Hall tan Assembly Hall so magmaliw a kapilitan. Kanian kakaukolanen so Tastasi nen Jehova a magmaliw iran managpaalagey ed pisikal a dalan. Mipadparan panagpaalagey so agawa ed agew nen Arin Solomon. Impaalagey nen Solomon so templo parad panagdayew ed si Jehova unong ed “aliling na saban na templo . . . ya wala ed sikato ed panamegley na Espiritu,” a saya so walan intarok nen Jehova ed ama ton Arin David. (1 Awaran 28:11, 12) Kanian, aglambengat pinabiskeg nen Solomon iray dumerengel to diad panamegley na agnabayaran iran salita na kakabatan noagta ontan met ya angidirihe na ekselentin materyal a panagpaalagey ya agbalot adampot na sekular a mundo.—1 Arari 6:1; 9:15, 17-19.
18, 19. (a) Anton maples ya onaaligwas iran panagpaalagey a proyekto so nagagawa ed organisasyon nen Jehova? (b) Panon a nipapatnag so espiritu nen Jehova diad materyal tan ontan met ed espiritual a panagpaalagey?
18 Natan, saray Tasi nen Jehova so agmangipapaalagey diad madibinon impuyan iran arkitekton plano, balet talagan walaan ira na espirituy Dios. A singa ed saray agew na Israel, saya so mamabayubo ed sikaran mangipaalagey diad dalan a mamakelaw ed totooy mundo. (Zacarias 4:6) Antiktikey so panaon. Andi-abalan nakakaukolan iray Kingdom Hall tan arum niran bilding. Diad arum iran bansa, say quickly-built iran Kingdom Hall so kaslakan. Alimbawa, diad apalabas a 10 taon, irereport na Canada so 306 hall, a balang sakey et impaalagey ed kulang a duaran agew. Lapud maples ya ilalaknab na sankamundoan a kimey nen Jehova, sakey a dagup na 43 balo iran bilding na sanga odino panamabaleg na saray sanga so kaplesan a kokonstraken odino niplaplano. Niarum ni, sakey a 30-gradon panayaman a bilding a panpundoan na ngalngalin sanlibo iran boluntaryo ed Bethel so asingger lan nakumpleto ed Brooklyn. Ontan met ed Estado na Nueva York, diad Patterson, say konstruksion na Bible educational center, say sankabalgan a proyekton gagawaen na Watch Tower Society so makakauna ed eskedyul to.
19 Sarayan proyekto so onaabante tekep na kaabigan tan kalidad na kimey a mamakelaw ed makabat iran kompanya ed kontruksion na mundo. Akin? Lapud baleg a kontribusyon ya inter na dedikadon Tastasi nen Jehova. Say espiritu to so mamabayubo ed sikara aliwa lambengat ed pangitarok na materyal a suporta noag ontan met ed sigpot-puson pangiter na panaon tan biskeg da. Saray pasen na konstruksion so napno na nipasal-a-maong iran debotadon kumikimey. Anggapo iray panag-welga, tan anggapoy pantayamtayam ed trabaho. Itatarok na espiritu nen Jehova so panamayubo, unong a binayuboan toray managpaalagey na tabernakulo ed panaon nen Moises tan saramay nankonstrak ed templo ed saray agew nen Solomon. Say espiritualidad so matalonggaring a kalidad a kakaukolanen ed sarayan kumikimey.—Ipareng so Exodo 35:30-35; 36:1-3; 39:42, 43; 1 Arari 6:11-14.
20. (a) Diad anton laknab a say maong a balita so nepeg a nipulong ni? (b) Anton abendisyonan ya ilalo so manaalagar parad totoo nen Jehova?
20 Intuloy nen Solomon so programa to ed panagpaalagey kayarin kinumpleto so templo. (2 Awaran 8:1-6) Diad anton kalaknab ni a say modernon-agew a panagtasi so onnatnat—tekep na pankaukolan na konstruksion na saray hall tan arum iran pasilidad—agtayo amta. Anggaman ontan, kabat tayo a sano sayan maong a balita na Panarian so nipulong la ed laknab ya angigangganan nen Jehova, insan say anggaan, say “baleg ya irap” so onsabi. (Mateo 24:14, 21) Diad dalin ya agla naderal na maagum a totoo, say areglo nen Jehova a “saray balo a tawen tan balo a dalin” so mangitarok na dakel iran bendisyon ed katooan. Komon ta sikatayon amin so ‘mangayaga tan manliket kayo ed ando lan ando ed saman a palsaen ko’ ya iiter ya amin so dayew ed Engranden Manamalsa tayo!—Isaias 65:17-19, 21, 25.
[Paimano ed leksab]
a Nengnengen so “Let Your Kingdom Come,” inpalapag na Watchtower Bible and Tract Society of New York, Inc., pahina 105-16, 186-9.
Kasin Nisalaysay Yo?
◻ Antoran rason so walad sikatayo a mangayaga ed Engranden Manamalsa tayo?
◻ Antoran indaak so nireport legan na 1992 serbisyon taon?
◻ Diad saray bansa a datin asebelan so panagtasi, antoran mayaman a bendisyon so nirereport?
◻ Panon a saray tobonbalo tan payunir so tinmulong ed indaak ed organisasyon nen Jehova?
◻ Panon a saray totoo nen Jehova so okupado ed materyal tan ontan met ed espiritual a panagpaalagey iran kimey?
[Kahon ed pahina 17]
Nen katantaon masulok a sakey bilyon ya oras so nausar ed panagpulong tan panagbangat a kimey
[Tsart ed pahina 12-15]
1992 SERBISYON TAON A REPORT NA SARAY TASI NEN JEHOVA ED SANKAMUNDOAN
(Nengnengen so tomo)
[Litrato ed pahina 10]
Saray nilasus nilibon kandidato ed bautismo nen katantaon so mangidedemostra ed panamendisyon nen Jehova ed panagpulong tan panagbangat a kimey
[Litrato ed pahina 16]
Baleg a bilang na kalangweran so ‘mannononot ed Engranden Manamalsa ra’