Tastasi nen Jehova ed Interon Mundo​—Say Republika na Pilipinas

SAY 7,083 aliwan patar a tropiko iran isla a manutugyop ed Republika na Pilipinas so atagey a kabiangan a ngalngali nipaaralem a kapalandeyan.a Tan say 62,000,000 a manaayam ed Pilipinas et labalabay da a pantongtongan so antokaman a tema. Say resulta na sayan makaaron ugali so sakey a mabungan lawak para’d panagtasi na Panarian.

Panagtasi ed Eskuelaan

Diad isla na Masbate, sakey a kalangweran a biin haiskul so akapantasi ed maestra tan saray kaklase to legan na sakey a quiz ya eebatan na tua odino tila. Isasalaysay to:

“Say balikas so, ‘No inaro ak na Dios, agto ak ikdan na saray problema odino abuloyan toak a manirap.’ Sanen tseken na maestrak iray papel mi, aromog ton amin ed kaklasek so inmebat na tua nilikud ed siak. Inabuloyan ak na maestra pian isalaysay ed klase no akin ya inebatan ko iman na tila. Inkuanko ya aliwan say Dios so angiter ed sikatayo na saray problema, anggaman aabuloyan toray panamairap tan subsubok ed sikatayo. Diad impangusar ko na Biblia, a naynay kon aawiten ed eskuelaan, inkatunongan ko ed klase iray salita na 1 Juan 4:8, ‘say Dios sikato so aro.’ Kayari impangisalaysay ko, akumbinsi so maestrak, pinatok toy lamisaan to, tan kuanto: ‘Susto si Marilou.’ Siak lambengat so akala na dugan ebat ed sayan tepet tan akaawat na sankatageyan a grado.”

Say Mensahe na Panarian so Walad Inerman

Legan a mankakabkaabungan ed sananey a parte na Pilipinas, sakey a regular pioneer a bii (sigpot-panoan a manangiyabawag na maong a balita) so akapiabet ed sakey ya ina na taloran ankekelag ya anak. Angipanengneng so bii na baleg ya interes ed mensahe na Panarian, tan saya so amainomay ed pangigapo na sakey a panagaral na Biblia ed sikato. Anggaman ag-aliketan so asawa to lapud panaaral to na Biblia, nagkalautla manlapu’d saray Tasi nen Jehova, say panagaral so nantultuloy.

Inyalis na laki so pamilya to ed sananey a syudad, diad pannononot ya agla nituloy na asawa to so pilimog ed saray Tasi. Anggaman ontan, ag-abayag et aromog iyan bii, tan intuloy to so panagaral na Biblia. Siempre, say asawa to so mansyodot. Awit-awit to so sanok to ed pantratrabahoan to, a nibalikas to so liknaan to ed sakey a sukin laki a manpapaapiger na luluganan to ed sikato. Ag-amta na laki a sayan suki so sakey ed saray Tasi nen Jehova.

Insalaysay na Tasi a makagunggunan tuloy para’d interon pamilya no say asawa to so mantultuloy ed panagaral to ed Biblia. Niyaplika toray prinsipyo ed Biblia mismo diad ayaman. Nisuheri met a nagunggunaan mismo so asawan laki ed pikakabat nipaakar ed Panarian na Dios.

Anto so resulta na sayan diskusyon? Say asawa na laki so awalaan na nagkalalon kawayangan a manaral ed Biblia, tan deniside na saman a laki ya ipawil so pamilya to ed datin panaayaman da. Diman et say asawan bii so inmaligwas ed espiritual anggad punton sikatoy nagmaliw ya agbautismadon manangipalapag na Panarian. Say asawa to so inmabuloy a paiyaralan na Biblia, tan say interon pamilya so ginmapon onatendi ed saray Kristianon miting.

[Paimano ed leksab]

[Kahon ed pahina 8]

SAY KIPAPASEN NA BANSA

1993 Serbisyon Taon

PANTOK A BILANG NA MANTATASI: 116,576

RATIO: 1 a Tasi kada 549

INMATENDI ED MEMORYAL: 357,388

PROMEDYON MANANGIPALAPAG A PAYUNIR: 22,705

PROMEDYON PANANGIYARAL NA BIBLIA: 94,370

BILANG NA ABAUTISMOAN: 7,559

BILANG NA SARAY KONGREGASYON: 3,332

SANGAN OPISINA: MANILA

[Litrato ed pahina 9]

Say panagtasi ed tindaan so mangitatarok na maabig iran resulta

[Litrato ed pahina 9]

Sangan opisina na Watchtower Society diad Manila