Say Biblia​—Sakey a Libron Nepeg a Basaen

MAGMAINOMAY a naupotan na superlatibon porma na adjectives tan adverbs sano totongtongen na sakey so nipaakar ed Biblia. Saya so sankalaknaban a nibubunog a libro ed interon awaran. Say Biblia so sankadaanan, sankaraklan ed patalos, sankamabetbet ya aaonen, sankamaimpluensya, tan sankarerespetoen a libro. Angangko et saya so kaslakan a pansusuppiatan. Tan maseguron saya so libron akaliktar ed sankaraklan a panangisebel, panamool, tan marawal a pananumpa. Anggaman kuan, makapaermen a wala so sakey a superlatibo ya agla nayarin onaplika ed Biblia. Saya so aliwa lan sankalaknaban a libron nababasa ed mundo.

Bangta saray totoo so nayarin walaan na Biblia ed abung, liknaen na dakel a sikaray kupadon tuloy diad aktual a panbasa ed satan. Say panagbasa so aminsan a bantog a panpalabas-na-panaon. Balet, maslak natan et lablabayen da so pangusar ed libren oras da diad panbantay na telebisyon odino diad panggawa na sananey a bengatla. Saraman so manbabasa ni so manlabay na anlemew tan mainomay a basaen. Say panbasa ed Biblia so mankakaukolan na panangiyapasakey na nonot, tan maslak a totoo so agla tanton mangiyaapasakey na nonot ed babasaen da.

Ingen, say Biblia so ag-akaliktar pian paulyanan lambengat ed saray simpenan na libro tayo. Walara so maabig a rason no akin a nepeg tayon basaen. Konsideraen so pigaran katuaan nipaakar ed satan.

Agpankelawan a Satan so Akapansiansia!

Say terminon “Biblia” so nanlapud Griegon salita a bi·bliʹa, a kabaliksan to’y “ankelag iran libro.” Saya so mangipapanonot ed sikatayo a say Biblia et tugyopen na dakel a libro​—arum so agtanton melag! Saratan so nisulat ed loob na sanlibo tan anem a lasus a taon la. Bangta saray managsulat et lalaki, sikara’y pinuyanan na atagtagey a Lapuan. Inkuan na sakey a managsulat ed Biblia: “Anggapo so profecia a nanlapu ed linawa na too, no ag saray totoo nansalita ra a nanlapu ed Dios, diad inpanenieg ed sikara na Espiritu Santo.” (2 Pedro 1:21) Say katuaan ed Makasulatan a propesiya so tua met ed arum a kabiangan na Biblia. Sarayan madibinon apuyanan ya “ankelag iran libro” so napno na atagey iran kanonotan nen Jehova a Dios. (Isaias 55:9) Agpankelawan a say Biblia so ontanlan akapanbayag!

Para’d ariripen na Dios, say Biblia so lawas sankaimportantian a libro. Sikara so mipakna ed si apostol Pablo, a sikaton mismo so sakey ed saray managsulat ed Biblia. Inkuanto: “Amin a Sulat ya inpuyan na Dios sikato met so maabig a pakaaralan.” (2 Timoteo 3:16) Kanian, say Biblia so basiyan na pananisia na saray Tasi nen Jehova natan. Saya so basiyan na saray doktrina ra tan manguuley ed kondukta ra. Sigpot-puso ran irerekomenda ed amin a manbasa na pigaran kabiangan na Salita na Dios ed kada agew tan sipapablin dalepdepen iray karga to.​—Salmo 1:1-3.

Say Niyugalin Panagbasa ed Biblia

Say niyugalin panagbasa ed saray Kasulatan so akagungguna ed apalabas iran panaon. Saray arari ed Israel so ginanggan a manggawa na dili ran insulat-na-lima a kopya na Ganggan​—a natan et sakey ya importantin kabiangan na Biblia—​tan inagew-agew dan basaen itan bilang manangipanonot ed linawa na Dios para’d sikara. (Deuteronomio 17:18-20) Say isaew ed panggawa ed saya et sengegan na inkagba na dakel ya arari.

Say kablian na panagaral ed Kasulatan so niyilustra ed kipapasen nen masiken lan propeta Daniel. Lapud personal a panagaral to ed saray kabiangan na Biblia a niwala ed agew to, si Daniel, legan ya adakep ed Babilonia, so akayarin ‘anebek ed panamegley na saray libro’ a say importantin propesiya ya inkurit nen Jeremias so pagani-gani lan nasumpal.​—Daniel 9:2, NW.

Diad panaon na inkianak nen Jesus, say “matunong tan magalang” a lakin si Simeon so sitatalek a maniilalon makanengneng ed sakey a magmaliw a Kristo, odino Mesias. Nisipan ed si Simeon a sikato so ag-ompatey sakbay a nanengneng so Kristo. Say palikna to ed Propesiya nen Isaias sanen sankaakwal to so ugaw a si Jesus so mangipapanengneng a si Simeon so sakey ya atentibon managbasa na saray libro na Biblia a nisulat la ed agew to.​—Lucas 2:25-32, NW; Isaias 42:6.

Sanen nampulong si Juan a Managbautismo, “saray totoo so maniilalo” ed Mesias. Anto so ipapanengneng na saya? Isusuheri na satan a dakel ed limog na saray Judio so pamilyar ed Mesianiko iran propesiya a nikurit ed Kasulatan. (Lucas 3:15, NW) Saya so makapainteres, lapud diad saraman ya agew saray libro so agni naala. Saray kopya na saray libro na Biblia so maalwar a ginawa ed panamegley na lima, tan lapud ginawa ed panamegley na lima, saratan so mabli tan mairap a naala. Panon a nagmaliw a pamilyar iray totoo ed saray karga to?

Maslak, diad panamegley na mapublikon panagbasa. Alimbawa, inggangan nen Moises a diad aturon panaon, say interon Ganggan ya inter na Dios so nepeg a nibasa ed nantitipon ya Israelitas. (Deuteronomio 31:10-13) Nen inmunan siglo K.P., say mapublikon panagbasa ed saray libro na Biblia so malaknab. Onia so inkuan nen babangatan a Santiago: “Si Moises, nanlapu ed saray daan a kapulian, wala ed binaleybaley so mangipulong ed sikato, a nabasbasa ed saray sinagoga ed balang Sabaton.”​—Gawa 15:21.

Natan, mainomay la so pakaala na dilin kopya na Biblia. Anggan panon et arum ed sarayan “ankelag a libro” so naala ed saray lenguahe na 98 a porsiento na papulasyon na mundo. Kanian, makapaermen a dakel so aliwan interesado ed panaral ed no anto so ibabaga na Biblia ed sikara. Nayarin saya so sientipikon panaon, balet say Salita na Dios, say Biblia, so siansian matalonan “maabig a pakaaralan.” Saya so mangiiter na maabig a simbawa nipaakar ed moralidad, siglaotan na totoo, tan dakel ni ran tema. Nagkalo ni, say Biblia so mangiyoopresi na mogmon seguradon ilalo para’d sakey a maligen ya arapen.

Basaen a Maparanay

Ginawa na saray Tasi nen Jehova a manunan kabiangan na kimey da so pangipaseseg ed regular a panagbasa na Biblia. Diad mabakat a letra ed factory building diad sankamundoan a hedkuarter da ed Brooklyn, New York, nanengneng so onian panangipaseseg: “READ GOD’S WORD THE HOLY BIBLE DAILY.” Minilyon ya ondadalan so makakanengneng ed sarayan salita, tan iilaloan a dakel so manutumbok ed saraya.

Diad masulok a 73,000 a kongregasyon na Tastasi nen Jehova ed sankamundoan, saray sesyon na Eskuelaan na Teokratikon Ministeryo so sinimban gagawaen. Kabiangan na kurso et say mapublikon panagbasa ed pinilin kabiangan na Biblia. Amin ya onaatendi so walaan met na asainmin a basaen so pigaran kapitulo na Biblia a sinimba diad dilin ayaman da. Saraman so mibabansag ed sayan eskedyul so diad kaunoran et makabasa ed interon Biblia.

Sayan oksuyan so mitukoyan ed sakey ed saray libron-panaralan ya uusaren ed sayan eskuelaan. Ibabaga na Theocratic Ministry School Guidebook: “Say personal ya eskedyul yo so nepeg a mangisakop ed panaon para’d panagbasa na Biblia a mismo. Wala so baleg a kablian ed panbasa ed satan ya intero. . . . Anggaman ontan, say kalat yo ed panagbasa so nepeg ya agbasta pangobre ed materyal, noagta pian naala so interon punto-de-bista na satan tekep na gagalan natandaan. Mangigana na panaon pian dalepdepen so ibabaga na satan.”

Say arum a palapagan a pinawala na saray Tasi nen Jehova so mamapaseseg met ed panbasa na Biblia. Alimbawa, say kaiba na sayan magasin, say Awake!, et pinmatnag so onian panamaseseg para’d saray kalangweran: “Kasin abasam la . . . so interon Biblia? On, say Biblia so makapal a libro, balet akin ya agmo apagen so panbasa ed satan ed ankelag a kabiangan? . . . Saray ‘makabat’ a taga Berea so ‘maalwar ya angusisa ed Kasulatan ya inagew-agew.’ (Gawa 17:11, NW) No tumboken yo so inagew-agew a panbasa a 15 minuto lambengat kada agew . . . , nakumpleto yon basaen so Biblia ed loob na sakey taon.” On, liknaen na saray Tasi nen Jehova a say modernon-agew iran Kristiano so nepeg a mikabisadon tuloy ed Kasulatan, a singa saray ariripen na Dios nen inmunan panaon.

Diad pannonot ed saya, saray Tasi so mangipapalapag na sakey a bersyon ed koma-20 siglo ed mapublikon panagbasa ed Biblia. Diad pigaran lenguahe, sikara so nanggawa na saray cassette recording na panagbasa a mangokobre ed interon Biblia. Para’d dakel saya so apaneknekan a maabig a tulong diad pananalona ed pigaran babeng ed panagbasa ed Biblia. Arum so ondedengel ed sarayan recording legan a mankikimey ed abung, manmamaneho ed kotse ra, odino manggagawa na dakel nin arum a bengatla. Say iyurong tan mareen ya idengel ed panagbasa na sakey a kabiangan na Biblia legan a tutumboken ed dilin kopya yo et sakey a makapaliket ya eksperiensia.

No agyo ni babasaen so Biblia ya inagew-agew, akin ya agyo iyugali so panggawa ed satan? Agkaukolan na saya so dakel a panaon ed kada agew, balet saray gungguna so baleg, lapud say panangiyaplika ed Kasulatan so manggawad sikayon onkiwas a sikakabat tan panggayagaan so makagungguna ed espiritual a bilay. Sikayo met so makakiwas a mitukoyan ed sayan ganggan ya abayag lan niiter ed pangulo na Israelita a si Josue: “Sayan libro na gangan ag onarawi ed sangim, no ag ingen sikato so omamengen mo ed agew tan labi, pian naimatonan mo a gawaen so unong na amin a nisulat ed sikato: ta dia ed ontan nagawam so dalan mo a maaliguas, tan dia ed ontan maong so kasumpalan mo.”​—Josue 1:8.

Saray pahina na Biblia so mangiparungtal na maaron gagala nen Jehova para’d matulok a katooan. Say suston pikakabat ed apuyanan a Salita to so mansumpal ed tuan liket tan ilalo ed maandon bilay ed Paraiso diad sakey a makapakelaw a balon mundo na agmangangga iran bendisyon. (Lucas 23:43; 2 Pedro 3:13) Komon ta anamoten yo so pankanawnawan manbasa tan manaral ed Biblia tan panggunaetan a dampoten iyan makapakelaw a bilay.