Tutulongan Mo ta so Anak Mo Pian si Jehova so Pilien?

“ALIKNAK a say panagaral na Biblia so talagan makapasawa tan makapakesaw. Sisisekreto, denisidik ed pusok a siak so agmagmaliw a sakey ed Tastasi nen Jehova sano ombaleg ak,” imbaga na sakey a kalangweran a laki. Anggaman iilaloan a maslak ed ananak na Kristianon ayaman diad kaunoran et ondapag ed si Jehova, saray kalangweran a singa sikato so nayarin ondalan ed mairap a panaon ed panpili ed si Jehova bilang Dios da.

No maminsan et agsegurado iray ateng no panon dan epektibon niwanwan iray anak da. Sikaray dinmalan ed panangusisa ed inkasikara a singa aminsan ya imbaga na mapagan ama: “Ibagak so tua a walaray panaon sano onnengneng ak ed saray lupa na ilalak kon nanaugip, a walaray lua na inkadismaya ed kamataan da ni, tan inisip kon panon to la no nagmaliw ak a mapaulyan.” Saray duaran ilalak to so binmaleg tan pinili ra so panlingkor ed si Jehova.

Ingen walaray tobonbalon angitalirak ed si Jehova tan tinaynan da so Kristianon kongregasyon ya amaarap ed mundo nen Satanas. Kanian panon sirin ya ontatalona iray ateng ed itulong ed ananak da a pilien si Jehova? Pian ebatan itan a tepet, amtaen tayon unona no akin a walaray pigaran tobonbalon tinaynan da si Jehova anta labalabay na atateng dan sikaray mansiansia ed sikato.

No Akin a Tinaynan na Arum a Tobonbalo si Jehova

Sakey ed saray kaslakan a sengegan et say bengatla a talagan agbalot akabatan na pigaran tobonbalo si Jehova tan saray dalan to. Anggaman onaatendi ed saray Kristianon miting manlapud inkaugaw, gagawaen da iman ya anggapoy interes, tan anggapo so talagan panaanap ed si Jehova. (Isaias 55:6; Gawa 17:27) Say ugaw a lakin asalambit ed tagey so onsasawa ed saray Kristianon miting lapud agto atalosan no antoy ibabaga na saray espiker ed plataporma.

Saray bini na katuaan so nitatanem ed arum ya ugugaw, balet ta aabuloyan dan natukso so kapusoan da ed ompapatnag a maligen, materyalistikon istiloy kabibilay ed mundo nen Satanas. Say arum so agmakatalona ed mabiskeg a tuloy a pilalek a milimog tan mangalig ed saray kaedaran da.​—1 Awaran 28:9; Lucas 8:12-14; 1 Corinto 15:33.

Anggaman ontan, diad sankamundoan et dakel ya ananak ed saray Kristianon ayaman so nampili ya ontalindeg ed dapag nen Jehova. Kasin wala so naaralan manlapud saray epektibon kiwas a ginawa na atateng da?

Onggapon Masakbay

Say sakey ya importantin tombok ed itulong ed ananak mo a pilien si Jehova et say igapon masakbay. Diad kaslakan a kaso, saray impresyon a naawat tan leksion a naaralan legan a say puso so anlemek ni tan maawat so manbayag ed legay-bilay. (Uliran 22:6) Kanian onggapon masakbay a mangibaga ed ananak mo nipaakar ed kaabigan, aro tan say inkamakapakelkelaw nen Jehova, a panbanikelan a pabiskegen so kapusoan da ed aro ed si Jehova tan panamabli ed ginawa nen Jehova parad sikara. Pian nagawaan iya, dakel ya atateng so sitatalonan manguusar ed inkadaakan na saray artikulo nipaakar ed saray palsa nen Jehova a naromog ed saray palapagan na Watchtower Society.

Say katutulok tan respeto parad si Jehova tan say dayew to so pigara ed saray kualidad a nepeg ya ibangat a masasakbay ed bilay. Makapaliket so pakaimano ed saray Kristianon miting ed ananak ya agni manaaral legan a panggugunaetan dan mangala na simpli iran nota tan anapen iray teksto ed dili ran Biblia odino onla ed banyo a kaiba na saray ateng da pian mandilamos na ambetel a danum sano sikaray mantemeg. Saraya so simplin bengatla, balet agaylan importanti iratan diad pangipasepsep ed kanonotan na kalangweran ni a kaukolan a mangipanengneng na respeto tan katutulok ed si Jehova!

Kaukolan met ya igapon masakbay iray seryoson personal a panagbangat ed Biblia. Sanen saray anak dan lalaki so mantaon na duara, sakey a sanasawa so ginmapon mangibasa ed sikara na libron Listening to the Great Teacher.a Saginonor, sanen saray lalaki so onggapon maneskuela, sikaray ombangon a masabkay tan manbasa a kinabuasan a kaibay ina ra ed saray libron My Book of Bible Stories tan Makapambilay Kayo na Ando lan Ando ed Paraiso diad Dalin.* Saya so tumbokan na sakey a diskusyon na inagew-agew a teksto ya ikokondukta na ama sakbay na almusal. Saray sagpot na atateng so daakan ya atumangan sanen saray anak da so agano nin nampili ed panlingkor ed si Jehova, ya isimbolo so dedikasyon da diad bautismo ed danum diad taon a 10 tan 11.

Anonotan na sakey a maabig a kalangweran a laki a manlilingkor ed sangan opisina na Watch Tower Society diad Hapon a sanen sikato so wala nid kalangweran, say ina to so tinmulong ed sikato a mamayubo na siglaotan ed si Jehova diad iyurong ed abay to diad labi, a tulongan ton manpikasi. Agton balot nalingwanan so leksion ya imbangat ed sikato​—inerman so nila odino antokaman so ginawa to, si Jehova so lawas maapit tan akaparaan ya ontulong.

Naaralan na matalona iran ateng a bidbiren iray mauges ya ikiling nisesengeg ed atawir ya ag-inkayadyari na ananak da, tan saray ateng so onggapon masakbay pian tulongan iray anak dan nakorihe iraya. (Uliran 22:15) Saray inklinasyon ed inkasiblet, inka-bangar, kinon, masyadon kritiko ed arum, so nepeg a pidenengan a masasakbay. No andi, saratan a bini so ombaleg diad panrebelde sumpad Dios tan saray dalan to ed saginonor. Alimbawa, saray ateng a walaay maong a getma balet ta alabas a mapagusto so mabetbet a mangiyaabuloy ed ananak dan nawalaan na dilin-nisentron awawey. Sarayan anak et aromog dan mairap so panrespeto balangla ed atateng da odino ed si Jehova, a magmaliw ya ‘andi-pisasalamat’ ya asalambit ed Biblia. (Uliran 29:21, NW) Diad biek a dapag, saray anak ya inikdan na kimey ed abung tan binangatan a magmaliw ya alerto ed saray pankaukolan na arum so magmaliw a lalon misadsalamat ed saray ateng da tan ed si Jehova.

Sananey a makana et say pangigago ed masakbay a pangiletneg na saray teokratikon kalat a makatunongan a nadampot na sakey ya anak. No saya so agginawan masakbay tan mantultuloy, arum so nayarin mamano ed kanonotan tan puso to na duma iran kalat. Say panbasa na Biblia manlapud gapo anggad sampot, a personal ya aralen so sakey ed saray palapagan na Watchtower Society, a mibiang ed Eskuelaan na Teokratikon Ministeryo, a magmaliw a manangiyabawag na maong a balita, tan say pampabautismo so nepeg ya ilaktip ed sarayan kalat.

Nanonotan ni nen Takafumi a si ina to so angiyugali ed sikaton mangibasa na Panag-Bantayan tan Awake! iran magasin diad pamalesa na simplin tepetepet tan pangitilak ed saratan diad lamisaan ed kusina parad sikato a naromog kasabin manlapud eskuelaan. Nanonotan ni nen Yuri a say piulop ed saray pioneerb ed pigaran agew a manlingkor ed pasen a baleg so pankaukolan ed saray Kristianon ministro, ompaway a kaiba ra diad ministeryo, pakanengneng ed sikaran manluto na mananam a putahe, tan pakaimaton ed gayaga tan seseg da so angimpluensyan tuloy ed pilalek ton manlingkor ed si Jehova ed parehon paraan. Nanonotan ni na dakel a tobonbalo iray ateng dan maparanay a mangitatagar ed sikaran ompasyar ed Bethel, bilang tawag ed hedkuarter tan saray sanga na Watch Tower Society, a ditan et naimatonan daray arum a kalangweran a sililiket a manlilingkor ed si Jehova. Dakel ed saramay binmisita bilang ugugaw so natan et manlilingkor ed saray Bethel ed interon mundo.

Ikdan na Panaon Iray Anak Mo

Say karakel tan kualidad na panaon ya uusaren mo ed ananak mo so maseguron walaan na direktan impluensya no kasin pilien da so panlingkor ed si Jehova odino andi. Sikaray maples a makatebek no kaunongan a panaon tan panagparaan so usaren mo ed panagaral na Biblian ikokonduktam ed sikara. No agmo natandaan so tinundaan mo ed imbeneg a panagaral odino kansilaen so panagaral lapud ankekelag iran rason, ipapanengneng mo a say panagaral so aliwan importanti. Anggaman ontan, sano nanengneng da a saray ateng so mansakripisyo parad panagaral, iparaan itan a maong tan mangikondukta na regular a panagaral anggan antoray onlesan pakasbelan, sakey ya interamentin duman mensahe so nipapanengneng. Anggaman ag kakaukolanen, arum ya ina so mangawes ed ananak da na kawes a pareho met sano sikaray onatendi ed miting odino mangikondukta na panagaral na Biblia ed sakey a kaabay. Say nitatarok ya impresyon et say panagdayew ed si Jehova so importanti.

Baleg a panaon tan sagpot so nakaukolan ta pian napangayagaan so edukasyon ed Biblia na saray anak mo, a sabien iray puso ra. Saray ankelag ya anak so nagkalautlan nasagyat sano nanengneng iray bengatlan naaralan a niakto ed arap da. Alimbawa, sakey ya ama tinmulong ed saray anak to a mangideskribe ed kioli diad impangiyakto ed salaysay na Biblia ed kioli nen Lazaro. Sikato so linma ed closet tan pinmaway bilang apaolin Lazaro.​—Juan 11:17-44.

Legan a nararateng na ananak so inka-adulto, nagkalautlan kaukolan so panaon tan abilidad ed pideneng ed saray emosyon, panduaruwa, tan kapagaan a kidungetan da. Say pangipanaon na maaro tan makatebek ya atateng ed sayan panaon so importantin tuloy no saray anak so mamayubo na panagmatalek ed si Jehova. Sakey a matalonan ama na apatiran anak so angisalaysay a sano say anak to so nidunget ed nanduruman problema, sikato so mansukimat tan isingbat ed sikara iray mitukoyan a materyal ed saray palapagan na Watchtower ed inagew-agew anggad saraman a problema so sigpot a natalonaan.

Sakey ya okupadon ina na duaran anak so akaimano a say marikit to so naynay a manbubukbukor tan kulang na gayaga ed teokratikon aktibidades. Kanian say ina so determinadon akasempet la sakbay na isempet na anak manlapud eskuelaan kada ngarem, a mitongtong ed marikit legan ya oniinum na tsa. Diad panamegley na maapit a pitongtongan na ina tan marikit, naawat na bii so tulong a nakakaukolan to. Natan, diad impangraduar ed haiskul, sikato so akiulop ed ina to diad payunir a serbisyo.​—Uliran 20:5.

Maong a Pililimog tan Alimbawa

Niyarum ed pangiiter na panaon da, saray ateng so nepeg a mangitarok na mabunigas a pililimog ed saray anak da. Kuan na sakey ya proverbio ed Biblia: “Miolop ka ed saray makabat a totoo, et sika naani makabat; balet say kaiba na saray maatiw manlikna na segsegang.”​—Uliran 13:20.

Dakel a matalonan atateng so mamidbir ed katuaan na satan a proverbio. Sakey ya ama na apatira so nankuan: “Sano isipen ko so apalabas, isipen kon say malaknab a kakaaro na anak ko ed katuaan so akatulong ya amakiwas ed sikaran manlingkor ed si Jehova. Pinaseseg koran mikaaro ed arum diad kongregasyon ontan met ed sikami ta pian nabayuboan iraman a pikaaro.” Sakey a Kristianon matatken a manlilingkor ed Bethel ed dakel lan taon so akanonot: “Sanen siak so malangwer ni, sikami so nanayam ed melag ya abung, balet satan so lawas niyopresi bilang panpundoan na manangasikaso na sirkito. Niarum ni, saray special pioneer diad kongregasyon mi so naynay a mipangdem ed sikami. Sikaray manames ed abung mi tan akilimog ed sikami. Diad impakadngel ed saray eksperiensia ra tan impakanengneng ed gayaga ra, satan so akatulong ed siak ya amayubo na apresasyon parad sigpot-panaon a serbisyo.

Say maong a pililimog so ontutulong ed saramay ondadalan ed kairapan. Sakey ya inan walaay anak a laki ya akasagmak na magulon panaon so aningbat ed problema a kaibay managbiahen manangasikaso na Tastasi nen Jehova. Inrekomenda to so ipaway a kaibay anak ton laki ed lawak a serbisyo. “No gawaen mo itan, say espiritual to tan arum nira so onaligwas,” kuan na manangasikaso. Ibabaga na ina: “Diad kongregasyon wala so sakey ya oksuyan a labin panagtasi, tan dakel a maneeskuelan ugugaw, pigaran maedad lan regular pioneer, tan anggan sakey a matatken so mibiang ed satan. Diad inmuna satan so sakey a pipupuligesgesan ya ipilan regular so anak kon laki, balet ag-abayag saya so anguman, legan a sikato so lawas onsabi’d ayaman a maimis tan apaseseg na mabunigas a pililimog. Legan a sikato so haiskul, sikato so nampabautismo tan nanlingkor bilang auxiliary pioneer ed kada bulan, tan sanen nangraduar, sikato so nagmaliw a regular pioneer.” Say mabunigas a pililimog ya atekepan na panggawa na linawa nen Jehova so mangitarok na maabig a pansumpalan.

Nayarin anggapo iray lokal a kalangweran a mabunigas a makaimpluensya ed anak mo, balet say paulit-ulit a pakakaimano na saray tobonbalo a pilien so panlingkor ed si Jehova so nisisiglaot ed saray alimbawa na atateng da. Dakel a tobonbalo so nandinayew ed saray ateng da tan malabay a mangalig ed sikara. Natandaan ni nen Yuri so inkamaparawes nen ina to tan no panon ton aasikasoey arum, a tatawagan ira ed telepono tan manluluto parad saray mansasakit. Si Tatsuo, a membro na pamilyan walaay apatiran anak a lalaki, amin da so binmaleg tan manlilingkor ed si Jehova, so nankuan: “Si Nanay so agmakapangiyaral ed sikamin regular ta si Tatay so sakey ya agmananisia tan sikato so makaabet na dakel ya isusumpa manlapud kakanayon. Balet diad impakaimano na talindeg to parad katuaan tan gayaga to ed panaglingkor ed si Jehova so akaimpluensya na baleg ed siak. Sikato met so mabulos a mitongtong anggad palbangon pian tulongan kami’d saray problema mi.” Saray inaateng a salita na kakabatan so walaan na pakayari sano nasuportaan na saray matoor a salita. Si Yoichiro so nankuan nipaakar ed atateng to: “Anggapoy nanonotan kon sikaray nansalita na negatibo nipaakar ed arum diad kongregasyon; nisay inabuloyan da kamin matalabutob nipaakar ed lingo na arum.”​—Lucas 6:40-42.

Say Gayaga ed Pakanengneng ed Ananak a Mampili ed si Jehova

Anggapo so simplin pormula ed tulong ed ananak mo a pilien si Jehova. Dakel so panaon a panpaga. Balet say mapagan aman asalambit ed asasakbay so nankuan: “Bilang atateng, sikami so lawas nanggunaet a mansalitan sitotoor ya ontumbok ed saray suhestion ed nanengneng ya organisasyon nen Jehova. Saya so baleg a tulong ed panalona ed saray problema.” Saray sagpot da so tinmalona.

On, say panggawa na anggaay nayarian mo ed itumbok ed panangiwanwan na Biblia, panbangat ed ananak mo na maong iran rason parad pangaro ed si Jehova, a suportaan na matoor ya alimbawam tan masimoon iran sagpot ya ontulong, sika met diad kaunoran so makaromog ed saray sagpot mo a matalona. Narengelan moray salita a singa samay imbaga ed saginonor na ugaw a lakin datin determinadon agmalabay a magmaliw ed sakey ed Tastasi nen Jehova. Kayari matalonan intulong na ina to ed saray mairap a taon to, inkuanto: “Maliket’ak a sikatoy agbalot sinmuko!‘​—Galacia 6:9.

[Saray paimano ed leksab]

[Litrato ed pahina 30]

Kasin nanonotan moray maliket a memorya ed impamabaleg mo ed anak mo?