Tastasi nen Jehova ed Interon Mundo—Puerto Rico
DIAD baetan na Dayat Caribeano tan Kadayatay Atlantiko et wadtan so mayaman tan tropikon isla na Puerto Rico. Ibabaga nen Christopher Columbus a satan et teritorya na Espanya nen 1493 tan tinawag itan a San Juan Bautista bilang pakanodnonotan ed Juan a Managbautismo. Say sankabalegan a syudad to et abayag lan tinawag a Puerto Rico, odino diad Ingles et “Rich Port.” Ag-abayag, inyaplika iyan ngaran ed interon isla, bangta say syudad so tinawag a San Juan.
Napapaneknekan a say Puerto Rico et sakey a mayaman a doongan ed dakel a pamaakaran. Dakel a balitok so nisakay manlapud dia ed akadkaunan taon na uley na saray Kastila. Say isla natan so mangilalako’d biek taew na unas, kape, plantano, tan saray prutas a citrus, anggaman saray industriya ed panagpawalay produkto tan saray serbisyo so panlalapuan na baleg a kabiangay ekonomya natan. Anggaman ontan, napapaneknekan a say Puerto Rico et mayaman a doongan ed nagkalalon importantin pantalos.
Say maong a balita na Panarian na Dios so ginmapon nipulong dia ed saray taon 1930. Natan, wala so masulok a 25,000 a manangipalapag na maong a balita diad Puerto Rico. Nen 1993 et saray komikimey ed sayan sanga na Watch Tower Society so dinmaak manlapud 23 ya anggad masulok a 100. Sayan indaak so kaukolan ta pian naasikaso na sanga so panangipatalos na literaturay Biblia diad lenguahen Español, a nagawan saratan a palapagan so naala na ag-onkulang a 350,000,000 a totoon mansasalitay-Español ed sankamundoan.
Balon Lawak
Inreport met na sangan opisina: “Sakey a balon lawak so alukasan ed Puerto Rico lapud nansagpotan min nipasabi mensahe na Panarian ed saray emel. Sakey ya agin bii so angisalaysay ed onggendan ya eksperiensia: “Siak so mankikimey a kaiba iray emel tan binmisita’d sakey ya inan walaay duaran ankelag ya anak. Sanen naamtaan ton sakey ak a Tasi, tampol toak ya impulisay lapud say masiken to ya emel met so agmalabay ed saray Tasi nen Jehova.
“‘Pigaran bulan ed saginonor, say parehon bii so binmisita ed sakey a kaaron iyaaralay Biblia na saray Tasi. Sikatoy akibiang tan nangayagaan ton tuloy itan. Binisitak lamet so bii, tan inulit ton aglabay na masiken to iray Tasi. Anggaman ontan, labay ton natalosan so Biblia tan onsasawa la ed simbaan lapud anggapoy nibabangat da. Sikami ginmapon nanaral, diad impangusar na sakey a tract. Sakey ya agew et imbaga to’d siak ya ompawil ed Sabado lapud wadtan ed satan so asawa to. “Balet agto kami labay, agta ontan?” intepet ko. Inyebat to: “Labay ton amtaen no anto iyan talaga.”
“‘Kaimbuasan et sikaran dua so ontotoktok ed puertak! Lapud dakel a tuloy so tepet na asawa to, inimbitaan kora ed saray miting tayo parad saray emel. Akauna ni ingen nen say siak a sinmabi tan agto sinaew iray miting nanlapulad saman. Sikatoy manpupulong ed arum niran emel, akaatendi la’d asamblea, tan maniilalo ed pakabautismoan.’”
Intuloy na report na sanga: “Diad pandistriton kumbension mi ed sayan taon, say interon programa so imparungtal ed sign language, kanian dakel ya emel so wadman a kaibay pamilya ra. Agawa so sakey ya makapa-emosyonal a bekta diad pinal a paliwawa sanen sinaglawi na ispeker so nagagawan kimey ed limog na saray emel tan nankuan a ngalngali 70 so presenti. Wala so maksil a tipak, balet, singa imbaga na ispeker, agnarengel itan na saray emel. Kanian, sanen kinerew ed saray emel ya onnengneng ed saray dumerengel, inulit na ispeker so tepet a, ‘Kasin maliket kayon napilimogan iray agagi tayon emel?’ tan kinerew ed saray dumerengel a mantipak—diad pangiwagwag na duaran lima ra. Sakey a marakep a nenengnengen so pakanengneng ed 11,000 ya agagin mantitipak diad impangiwagwag na kalimaan da. Alay liket na agagi tayon emel tan alikna ran sikaray kabiangan na sakey a baleg ya impanaagi. Dakel so akalua lapud gayaga.”
Legan a mibibiang so Tastasi nen Jehova ed kimey na panagani ed Puerto Rico, agpanduaruwaan a satan so mantultuloy a magmaliw a mayaman a doongan. Saray “carnero” na Dios, a tatawagen ton “saray mabli [panpipilalekan, NW] a bengatla na saray amin a nacion,” so mantultuloy ya onsabi ta pian say abung nen Jehova so napano na gloria.—Juan 10:16; Aggeo 2:7.
[Kahon ed pahina 9]
SAY KIPAPASEN NA BANSA
1994 Serbisyon Taon
PANTOK A BILANG NA MANTATASI: 25,428
RESYO: 1 a Tasi kada 139
INMATENDI ED MEMORYAL: 60,252
PROMEDYON MANANGIPALAPAG A PAYUNIR: 2,329
PROMEDYON PANANGIYARAL NA BIBLIA: 19,012
BILANG NA ABAUTISMOAN: 919
BILANG NA SARAY KONGREGASYON: 312
SANGAN OPISINA: GUAYNABO