Pantitipon a Kaiba Iramay Walaay Takot ed Dios

“SARAY totoo ed inerman so manpipilalek na kawayangan manlapud takot​—takot ed karawalan, takot ed agpakaempleyo, tan takot ed graben sakit. Ontan met so panpipilalekan tayo. . . . Akin, sirin, a sisingbaten tayo no panon a bayuboan so takot?” Satan a makapaintrigan tepet so pinalesa na keynote speaker ed kada “Maridios a Takot” a Distriton Kumbension a ginmapo nen Hunyo 1994.

Saray minilyon ya inmatendi​—inmuna ed Amianen ya Amerika, insan diad saginonor et diad Europa, Sentral tan Abalaten ya Amerika, Aprika, Asia, tan pulpulo na dayat—​so magunaet a makaaral no panon a bayuboan so ontan a takot. Akin? Lapud say pinanabang tayo ed saray bendisyon ya itatarya nen Jehova a Dios parad totoo to so mandedependi ed pakawalaan tayo na maridios a takot. Nantitipon iray kumbensionista pian naaralan so nipaakar ed maridios a takot, tan legan na taloy-agew a programa, dakel so naaralan da nipaakar ed sayan importantin Kristianon kualidad.

‘Takotan so Dios tan Unoren Iray Ganggan To’

Satan so tema na inmunan agew na kumbension, a nibase’d Eclesiastes 12:13. Anto so kabaliksan na itakot ed Dios? Diad sankaunaan a parti na programa, insalaysay na tserman na kumbension a napatnagan ed maridios a takot so galang tan aralem a respeto parad si Jehova ontan met ed mabunigas a takot ed pamaermen ed sikato. Say ontan a maridios a takot so agmauges; mabunigas tan manepeg itan.

Panon tayon gugunggunaan na sayan mabunigas a takot? Say onggendan a paliwawa, “Ag-onkapuy tan Ag-ontunda,” so angisalaysay a say maridios a takot so mamayubo ed sikatayon unoren iray ganggan na Dios tekep na gayaga. Nitekep ed aro ed Dios tan ed kaabay, pabiskegen itayo ed espiritual na ontan a maridios a takot. On, say maridios a takot so makatulong ed sikatayon napaliisan so itantan ed babatiken parad andi-anggaan a bilay.

Say tinmumbok ed programa et saray interbion angipresenta na mabilay ya ebidensyan nayari itayon tulongan na maridios a takot. Insalaysay na saramay ininterbio no panon a say mapagalang a takot ed Dios so akaimpluensya ed sikara pian mantultuloy ed ministeryo anggaman ed andiay-interes, agpananginunang, odino panamasegsegang tan tinmulong ed sikaran mansungdo anggan diad arap ni ingen na mairap tan personal iran subok.

Balet, akin a say arum a totoo et walaay maridios a takot bangta say arum et andian na saya? Diad paliwawan “Panamayubo tan Pakagungguna Manlapud Maridios a Takot,” insalaysay na keynote speaker a diad Jeremias 32:37-39 et insipan nen Jehova ya ikdan To na puson matakot-ed-Dios iray totoo To. Itatanem nen Jehova so maridios a takot ed kapusoan tayo. Panon? Diad panamegley na masanton espiritu to tan say apuyanan a Salita to, say Biblia. Anggaman ontan, malinew a kaukolan a masimoon tayon panggunaetan ya aralen so Salitay Dios tan sigpot ya anamoten so daakan iran espiritual a probisyon a gagawaen to. Lalaktipen na saraya so kumbension tayo tan saray miting ed kongregasyon ya ontutulong ed sikatayo pian naaralan so ontakot ed sikato.

Nilukasan so programa ed ngarem diad panamegley na panonot a manmatalek ed si Jehova tan ed Salita to. Saya so tinumbokan na sakey a diskusyon ed saray manunan paraan no panon a nepeg a naapektoan na Panarian so bilay tayo bilang Kristianos.

Insan tinmumbok so ununa ed taloran simposyum a niparungtal ed kumbension. “Pakikiwasen Itayo na Maridios a Takot Pian Ontulok ed Madibino Iran Kakaukolanen,” so tema na sayan simposyum, a niyapasakey ed imano na pamilya. Say onggendan et alimbawa na Makasulatan​—tan praktikal—​a simbawan niiter:

□ Parad kaasawaan a lalaki: Say maridios a takot so nepeg a mamakiwas ed sakey a lakin aroen so asawa to a singa ed dilin laman to. (Efeso 5:28, 29) Agsigagalan sakitan na sakey a laki so dilin laman to, pabaingan so inkasikato ed arap na kakaaro to, odino italabutob iray dilin kakulangan to. Kanian, ontan met sirin so nepeg a pantrato to ed asawa to tekep na panamagalang tan respeto ya ipapaarap to’d inkasikato.

□ Parad kaasawaan a bibii: Say maridios a takot nen Jesus so amakiwas ed sikaton ‘lawas mamaliket ed Dios.’ (Juan 8:29) Saya so maabig ya awawey ya aligen na asawan bibii ed pidedeneng ed kaasawaan da.

□ Parad atateng: Saray Kristianon atateng so makapangipanengneng na maridios a takot diad panamegley na seryoson panumpal ed saray responsabilidad da bilang atateng, a momoriaen iray anak da bilang sakey a tawir manlapud si Jehova. (Salmo 127:3) Say panamabaleg ed ananak da pian magmaliw a tuan Kristianos so nepeg a manunan kalat na atateng.

□ Parad ananak: Bibilinen nen Jehova iray anak ya ontulok ed ‘kaatatengan da dia ed Katawan.’ (Efeso 6:1) Kanian, say itulok ed atateng da so itulok ed Dios.

Say manangisaran paliwawa ed saman ya agew so akatenyeg na emosyon, ta siningbat toray aralem a liknaan a nasasali tayon amin sano inatey so sakey ya inad-aro. Anggaman ontan, ngalngali diad kapegleyan na paliwawa et niwalay surpresa. Sinagyat na ispeker iray dumerengel diad panamegley na impangipaway ed balon brosyur a Sano Naandi’d-bilay so Pinabli Yo. Dakel so sinaglawi na sayan 32-pahina, makolor a palapagan a makatulong ed saray maneermen pian natalosan tan napidenengan iray liknaan tan emosyon ya onlelesa lapud impatey na inad-aro. Agawa ta la ya agmo amta no antoy ibagam ed sakey ya inateyan? Sisingbaten na sakey a seksion na sayan brosyur no panon tayon natulongan iray naeermenan. Legan a tatalinengen so espiker, dakel ed saray dumerengel so maniisip ed siopaman a nayarin minabang ed sayan balon brosyur.

‘Tukoyan na Sagradon Serbisyo Tekep na Maridios a Takot tan Giwgiw’

Satan so tema na komaduan agew, nibase’d Hebreos 12:28. Imparungtal ed programa ed kabuasan so komaduan simposyum, “Saray Kongregasyon a Manaakar diad Takot ed si Jehova.” Say inmunan parti so nipaakar ed iyaatendi ed saray miting. Say kiwawala tayo ed saray miting so mangidedemostra na respeto tayo parad Dios tan saray espiritual a probisyon to. Diad iyaatendi, ipapanengneng tayo a walaan tayoy takot ed ngaran to tan magunaet a manumbok ed linawa to. (Hebreos 10:24, 25) Insalaysay na komaduan espiker a pian say kongregasyon bilang interamenti et makaakar tekep na takot ed si Jehova, nepeg a gawaen na balang sinansakey so betang to diad pamasiansia na maabig a kondukta. Siningbat na pinal ya espiker so nipaakar ed pribilihyo tan obligasyon a walad amin a Kristiano​—say andi-tundan panangiyabawag ed maong a balita. Panon kabayag itayon mantultuloy a manpulong? Anggad pangibaga nen Jehova a susto la.​—Isaias 6:11.

“Say Gayaga ed si Jehova so Sakurong Tayo” so tema na tinmumbok a paliwawa, a kinobrian ed saray aaralen ya artikulo ed sayan magasin. (Nehemias 8:10) Akin a magayaga so totoo nen Jehova? Indatak na espiker so pigaran rason. Sakey ya importantin tuloy a rason et say maapit a siglaotan ed Dios so manggagawa ed sikatayon sankagayagaan a totoo ed dalin. Isipen pa, pinanonotan na espiker iray kumbensionista, walaan itayo na pribilihyo a napibilang ed totoon iyaasingger nen Jehova ed si Jesu-Kristo. (Juan 6:44) Agaylan mabiskeg a rason pian mangayaga!

Say pabitar ed kada kumbension et say bautismo, tan ontan met ed “Maridios a Takot” iran Kumbension. Diad paliwawan “Dedikasyon tan Bautismo diad Takot ed si Jehova,” insalaysay na espiker a walay apatiran kabiangan na personal ya obligasyon na amin a bautismado: (1) Nepeg ya aralen tayo so Salitay Dios ed tulong na saray palapagan ya ontulong ed sikatayon natalosan tan niyaplika itan; (2) nepeg itayon manpikasi; (3) nepeg itayon milimog ed saray kapananisiaan diad saray miting ed kongregasyon; tan (4) nepeg itayon mantasi ed ngaran tan Panarian nen Jehova.

Ginmapo so programa parad Sabado na ngarem ed sakey a manamaseguron teman “Totoon Agpapaulyanan nen Jehova.” Talomplo tan liman siglo so apalabas, sanen nidunget ed mairap a panaon so nasyon na Israel, angiter si Jehova na garantiya diad panamegley nen Moises, a kuanto: “Si Jehova a Dios mo . . . ag naani onkulang ed sika, ni say manpaulian ed sika.” (Deuteronomio 31:6) Pinaneknekan nen Jehova iyan garantiya diad impanalimbeng ed saray Israelita sanen linmoob ira ed Insipan a Dalin tan nanayam diman. Natan, sano nidudunget ed saray mairap a subok, sikatayo met so sigpot a makapanmatalek a si Jehova so agbalot mamaulyan ed sikatayo, basta mansiansia itayon maapit ed sikato tan tumboken so simbawa ed Salita to.

Panon kayon naliketan ed panagbasa ed Biblia? Diad paliwawan “Basaen so Salita na Dios, say Masanton Biblia, ya Inagew-agew,” insuheri na espiker so panbasan tekep na mausisan kanonotan tan manamalesan tepetepet a singa saraya: Anto so ibabangat na sayan salaysay ed siak nipaakar ed saray kualidad tan paraan nen Jehova? Panon kon nagkalalon magmaliw a singa si Jehova ed sarayan pamaakaran? Sakey a makapaliket tan makapenek ya eksperiensia so panagbasa na Biblia ed onian paraan.

Tinmumbok ya impaarap so imano ed komatlon simposyum na programa, “Saray Probisyon Pian Tulongan Iramay Ontatakot ed si Jehova.” Anggaman nayarin agnanggawa na saray milagro si Jehova nisesengeg ed ariripen to natan, maseguron sikatoy ontutulong ed saramay ontatakot ed sikato. (2 Pedro 2:9) Kinunsidera na sayan simposyum so apatiran probisyon a manlalapud si Jehova pian ontulong ed sikatayo ed sarayan mairap a panaon: (1) Diad panamegley na espiritu to, mangiiter na pakayari ed sikatayo si Jehova pian nasumpal tayoray kimey a labas nen dilin biskeg tayo. (2) Diad panamegley na Salita to, itatarokan to itayo na simbawa tan panangiwanwan. (3) Diad panamegley na dondon, iikdan to itayo na sakey a malinis a konsiensia. (4) Diad panamegley na organisasyon to, pati mamatatken, mangitatarya ed sikatayo na panangidirehi tan proteksyon. (Lucas 11:13; Efeso 1:7; 2 Timoteo 3:16; Hebreos 13:17) Diad panamegley na sigpot a panangamot ed sarayan probisyon, sikatayoy makapansungdo tan sirin et nagamoran so abobon nen Jehova.

Say pinal a paliwawa ed Sabado na ngarem so apuloan na “Asingger la so Makapataktakot ya Agew nen Jehova,” nibased propesiya nen Malaquias. Walaray makapataktakot ya agew ed apalabas ya awaran, a singa say impangidapo na panangukom ed Jerusalem nen 70 K.P. Balet say sankamakapataktakotan ya agew a nasagmak na too et say onsasabin agew nen Jehova sano nitarok so “panamales ed saray ag mikabat ed Dios, tan dia ed saray ag ontolok ed evangelio na Katawan tayon Jesus.” (2 Tesalonica 1:6-8) Panon kaasingger itan? Inkuan na espiker: “Asingger lay anggaan! Kabat nen Jehova so agew tan oras na satan. Agto umanen so panag-orasan to. Sikatayoy napapaimanoan pian siaanos a mansungdo.”

Mairap a panisiaan a say duaran agew so linmabas. Anto kasi itarok na pinal ya agew?

“Takotan Yo so Dios, tan Iter Yo ed Sikato so Gloria”

Say tema na komatlon agew so nibased Apocalipsis 14:7. Diad programa’d kabuasan, impabitar na mantutumbokan iran paliwawa so pigara ed saray doktrinal a bangat a mangibibiig ed saray Tasi nen Jehova manlapud amin nin relihyoson organisasyon.

Diad paliwawan “Wala so Kioli na Saray Matunong,” say espiker so amalesa na makapainteres a tepet: “Legan na satan a panaon na sanlibon-taon ya Agew na Panangukom, kapigan a saramay inatey a matoor ed sarayan pinal a taon na sistemay bengabengatla nen Satanas et napaoli?” Say ebat? “Ag-ibabaga na Biblia,” so salaysay na espiker. “Anggaman ontan, agmakatunongan a saramay inatey ed panaon tayo so napaolin mas masasakbay pian mibiang ed baleg ya ulop a niliktar ed Armagedon ed sakey a malaknab ya edukasyonal a kimey a nagawa ed interon Panangukom ya Agew? On, peteg!” Wala ta’ray makaliktar? Maseguron wala. Saray bangat tan alimbawa a mamaseguro ed sikatayo ed saya so malinew a nisalaysay ed onggendan a paliwawa, “Nisalban Mabilay ed Panaon na Baleg a Kairapan.”

Abayag lan atalosan na Tastasi nen Jehova ya ipapabitar na Biblia so duaran ilalo​—andi-anggaan a bilay ed dalin parad minilyon tan imortal a bilay ed tawen parad limitadon bilang a miuley ed Kristo ed Panarian to. Satan a mangatatawen ya ilalo so sisingbaten ed paliwawan “Agkayo Antakot, Daiset a Papastolan.” (Lucas 12:32) Nisesengeg ed kaplesan a kipapasen na mundo natan, nepeg ya andi-takot so melag a pulok; balang sakey ed sikara so nepeg a mansungdo anggad anggaan. (Lucas 21:19) “Say kaandi takot da,” inkuan na espiker, “so onkakanan panamaseseg ed saramay baleg ya ulop. Sikara met so nepeg a mamayubo na awawey na kaandi-takot legan ya iilaloan da so kililiktar legan na sankabalgan a panaon na gonigon ed dalin ed kapiganman.”

Diad konklusyon na programa ed kabuasan, saramay presenti so akaimaton tekep na ligsa ed drama ed Biblia a Saray Panpilian ya Akaarap ed Sikayo. Nen panaon nen Josue, tan ontan met ed kinen propeta Elias, saray Israelita so kaukolan a mandeside. Kaukolan iran manpili. Inkuan nen Elias: “Panon so kabayag yo ya onla a manpawilpawil ed saray mankadua a kanonotan? No si Jehova sikato so Dios, ontombok kayo ed sikato, balet no si Baal, sirin ontombok kayo ed sikato.” (1 Arari 18:21) Say katooan met natan so kaukolan a mandeside. Aliwan saya so panaon na panduaruwa. Anto so nepeg a pilien? Saman so singa pinili nen Josue ed inmuna. Inkuanto: “Nipaakar ed siak tan say abung ko, manlinkor kami ed Jehova.”​—Josue 24:15.

Singa bigla-bigla et Simba la na ngarem tan panaon la parad mapublikon diskurson apauloan na “No Akin a Takotan so Tuan Dios Natan.” Diad Apocalipsis 14:6, 7, napapaseseg so amin a katooan: “Takotan yo so Dios, tan iter yo ed sikato so gloria.” Akin a walay pankaganatan a takotan so Dios natan? Lapud, singa ibabaga na kasulatan, “say horas na pangokom to sinmabi la.” Diad panamegley na Anak to, a natan et nitrono la bilang Ari ed mangatatawen a Panarian na Dios, panganggaen nen Jehova so kaplesan a marutak, rebelyoson sistema na bengabengatla. Insalaysay na espiker a saya lambengat so paraan pian mangitarok na kainawaan ed saray ontatakot ed Dios tan ontan met pian niliktar tan nipreserba so mangaraldalin ya ayaman tayo. Lapud saraya so kaunoran ya agew na sayan sistema na bengabengatla, kaukolan ya ontakot ed tuan Dios natan!

Kayari sumaryo na leksion ed Panag-Bantayan parad saman a simba, linmad entablado so unor ya espiker. Bilang resulta na programa ed kumbension, say maridios a takot so awalaan na nagkalalon malaknab a kabaliksan parad saray kombensyonista, salaysay to. Indanet toray dakel a gungguna parad saramay ontatakot ed Dios. Inyanunsyo na espiker so panangipaway ed balon video​—United by Divine Teaching. Ipapabitar to so nikadkaduma iran aspekto na “Madibinon Panangibagat” ya Internasyonal iran Kumbension ya agawa nen 1993-94. Legan a mansumpasumpal lay paliwawa, dakel so agmakapaliis ed panumameng, ‘Anto kasi nailaloan tayo ed ontumbok a taon?’ Talaranan tayo so taloy-agew iran distriton kumbension ed dakel a lugar.

Bilang konklusyon, tinukoy na espiker so Malaquias 3:16, a kuanto: “Saman la saray tinmakot ed Jehova nansasalita ra ed sakey tan sakey; et si Jehova tinmalineng, tan dinmengel, et sakey a libro a pakanodnonotan so sinulatan ed arap to, nipaakar ed saray tinmakot ed Jehova, tan saray nannonot ed ngaran to.” Saray kumbensyonista so nagsi-sempet tekep na malinew a determinasyon a nodnonoten so ngaran nen Jehova tan lingkoran tekep na maridios a takot.

[Litrato ed pahina 24]

Kaukolan a mantultuloy a mangipatnag na maridios a takot iray kandidato ed bautismo

[Litrato ed pahina 25]

Sinagyat na draman “Saray Panpilian ya Akaarap ed Sikayo” iray dumerengel ed pankaukolan na pagmaliw a desidido nipaakar ed panaglingkor ed si Jehova

[Litrato ed pahina 26]

Aliketan iray kumbensyonista ya awaten so balon brosyur a “Sano Naandi’d-bilay so Pinabli Yo”