Kasin Idayew Mo si Jehova?

“UNONG ed ngaran mo, O Dios, ontan met so dayew mo anga ed saray sampot na dalin.” Saraya so salitan nanlapud sakey a mapropetikon kanta na ilalak a lalaki nen Kore. (Salmo 48:10) Natan, sakey a makapanyarin koro na minilyon a Tastasi nen Jehova so mangidadayew ed Dios tan mangipapakabat ed ngaran to diad panamegley na panangipulong na maong a balitay Panarian to. Diad panggagawa’d saya ed 232 a daldalin tan pulpulo na dayat tan ed masulok a 300 iran lenguahe, sikaray literal a makakarateng “anga ed saray sampot na dalin.”

Anto so manadagdag ed totoo manlapud nanduruman kultura, sosyal, tan lenguahe pian idayew si Jehova? Say sakey a manunan rason et say panamabli ra ed suston pikakabat ed Salitay Dios, say Biblia. Inbulos ira na espiritual a katuaan manlapud saray anito tan manlapud mangaaripen iran relihyoson sisisiaen a singa say andi-anggaan a panamairap. (Juan 8:32) Ontulong met ed sikara so katuaan a mangapresya ed makapakelkelaw a kualidades na Dios, a singa say aro, pakayari, kakabatan, tan inkahustisyan tinekepan na panangasi. Say pakatalos ed impangitarok na Dios ed bogbogtong ya Anak to, si Jesu-Kristo, bilang dondon bagat parad katooan so mamakiwas ed maptek a totoo pian idayew tan lingkoran si Jehova.

Unong ed libro na Biblia ya Apocalipsis, onia so ikekelyaw na sakey a mangatatawen a koro: “Sika so manepeg, Katawan [Jehova, NW] mi tan Dios mi, a mangawat na gloria tan dayew tan pakayari: ta sika pinalsam so lapag a bengatla, tan lapu ed linawam wala ra tan sikara so apalsa.” (Apocalipsis 4:11) Say ontan a panangidayew so aliwan resulta lambengat na pakakaliknay obligasyon. Imbes, manlalapu itan ed panangigalang ed si Jehova.

Idayew so Dios Diad Panamegley na Pangiyabawag ed Maong a Balita

Diad pangidayew ed si Jehova, aaligen na sakey a too so maabig a tuloy ya alimbawa nen Jesu-Kristo, say manunan manangidayew ed Dios. Lalaktipen na itumbok ed bakat nen Jesus so pibibiang ed kimey a panangipulong na maong a balitay Panarian na Dios. (Mateo 4:17, 23; 24:14) Sayan kimey a panagpulong so magmamaliw a sankabalgan a sankamundoan a gunaet diad pangidayew ed si Jehova.

Ontanlan importanti iyan panagpulong a kimey a malinlinew ya insiglaot iya na Biblia ed kilalaban. Onia so nabasa ed Roma 10:13-15: “Ta, Siopaman ya ontawag ed ngaran na Katawan [Jehova, NW], nilaban. Panon sirin so panawag da ed saman so ag da sinisia? Tan panon so panisia ra ed ag da nadngelan? Tan panon so pakadngel da no angapo so manangipulong? Tan panon so panpulong da no ag ira inbaki? Onong na nisulat; Alay karakpan na saray sali na saray mangitarok na saray magayaga a balita na saray maong a bengatla!”

Nen katantaon lambengat, angitalaga iray Tasi nen Jehova na masulok a sakey bilyon ya oras ed panagpulong a kimey. Tan agaylan maabig iray resulta na sayan panagdayew ed Dios! Ag-onkulang a 314,000 so akiulop ed koro na saray manangidayew diad impangisimbolo na dedikasyon da ed si Jehova diad panamegley na bautismo ed danum.

Ingen, anto so nibaga ed 12,288,917 ya inmatendi ed 1994 a Memoryal na impatey nen Kristo? Diad limog da et wala so masulok a 7,000,000 ya agni mandadayew ed si Jehova bilang managpulong na maong a balita. Balet say kiwawala ra ed sayan importantin okasyon so diad kaunoran et mansumpal ed pakaarum na minilyon ni ed koro na saray manangidayew. Anto so nagawaan pian tulongan irayan interesado a magmaliw a manangidayew ed si Jehova?

Walan Tulong

Dakel ya interesadon totoo so nayarin walaay pilalek a mandayew ed si Jehova balet liknaen dan agda naabot iray kakaukolanen. Marakep no nonoten daray salita na salmista: “Itangay ko so matamatak ed saray palpalandey. Iner so panlapuan na tulong ko? Say tulong ko onsabi a manlapu ed Jehova, a sikato so nangawa na tawen tan dalin.” (Salmo 121:1, 2) Malinew, inengneng na salmista iray mata to ed kapalandeyan na Jerusalem, a kawalaan na templo nen Jehova tan say mangaraldalin a trono na teokratikon gobierno. Manlapud saya et makanepegan tayon nibaga a say tulong a kaukolan pian mangidayew ed Dios tan mangiyabawag ed mensahe na Panarian so manlalapu lambengat ed si Jehova tan say organisasyon to.​—Salmo 3:4; Daniel 6:10.

Natan, saramay manpipilalek a mangidayew ed si Jehova so makapanilalo ed maaron tulong manlapud mangaraldalin ya organisasyon to. Alimbawa, ontutulong iray Tasi nen Jehova diad panamegley na panangikondukta na libren panagaral na Biblia diad ayaman ed interesadon totoo. Nagkalalo ni so lalaktipen na sayan programan panagbangat nen say pakaamta lambengat ed saray doktrina na Biblia. Ontutulong iya ed estudyanten mangapresya ed naaralan to tan say organisasyon ya uusaren nen Jehova.

Mitunosan ed saya, sasalien na Tasin mangikokondukta na panagaral na Biblia a seguroen a saray balon aromogan a katuaan so aglambengat nipasepsep ed kanonotan noagta ontan met ed puso. Tan agkaukolan ya ontunda so managbangat a mangipanengneng ed iyaaralan no panon ya uusaren nen Jehova so organisasyon To pian sumpalen so gagala To ed dalin. Say brosyur a Saray Tasi nen Jehova​—Nankakasakey a Manggagawa ed Linawa na Dios diad Sankamundoan tan say videotape a Jehovah’s Witnesses​—The Organization Behind the Name so mabetbet a napaneknekan a makakatulong ed panumpal ed saya.

Walaan met na importantin betang iray Kristianon miting ed itulong ed prospektibo iran manangidayew ed si Jehova. Diad kagapo lambengat na panagaral na Biblia, nayarin imbitaan so iyaaralan ya onatendi ed saray Kristianon miting. Onsabi panaon et naaralan to so kaimportantian na regular ya iyaatendi tan say pibibiang ed amin a miting ed kongregasyon. (Hebreos 10:24, 25) Saray manangasikaso so makapangitarok na tulong parad saray kapananisiaan tan prospektibon managdayew ed si Jehova diad panamegley na panparaan na saray miting a makapabiskeg ed espiritual tan praktikal.

Tulongan Iray Ugugaw a Mandayew ed si Jehova

Kaiba iray ugugaw ed dakel a magmaliw a manangipalapag na maong a balita ed asingger ya arapen. Nagkalautlan saray ama so walaan na Makasulatan a responsabilidad ed pamabaleg ed ananak da ed “disiplina tan manametek-kanonotan nen Jehova.” (Efeso 6:4, NW) Sano sustoy impangipasal na maridios ya atateng, anggan ugugaw ni et makapanbayubo na pilalek a mandayew ed si Jehova.

Sakey ya ugaw a bii ed Argentina so aminpigan inmasingger ed saray matatken ed kongregasyon ed pigaran bulan, ya onkekerew na tulong da ta pian sikatoy onkualipika bilang manangipalapag na Panarian. Ag-abayag, nanpaknaan iray ateng tan mamatatken ya abuloyan dan magmaliw a sakey ya agbautismadon manangipalapag. Sikatoy epektibo lan mangipaparungtal ed mensahe Panarian ed saray unabong. Anggaman sayan ugaw a bii so mantaon lambengat na limara tan agni marunong a manbasa, nipatlep to so kawalaan na pigaran teksto ed Biblia. Kayari pakaromog na sakey a kasulatan, kerewen to’d unabong a basaen itan, tan insan iter toy salaysay.

Malinew a parehon saray matatken tan atateng so walaan na baleg a nagawaan ed pamaseseg tan itulong ed saray onaaligwas ed pagmaliw a managdayew nen Jehova.​—Uliran 3:27.

Sakey a Magnayon a Siglaotan ed si Jehova

Balet, komusta met no sikan mismo so mililimog la ed saray Tasi nen Jehova ed pigara lan panaon balet agni mibibiang ed panagpulong a kimey da? Maabig so pangitepet mo’d inkasika na saray onggendan a tepet, ‘Sisiaen ko ta’n nalmoan ko lay katuaan tan si Jehova so mogmon tuan Dios? Kumbinsido ak ta a say Panarian na Dios lambengat so solusyon ed saray problema na katooan? Intalirak ko ta lan amin so palson relihyon tan minumundon abangonan tan agagamil a kainglit nen Jehova? Siak ta so walaan na aralem ya aro ed Dios tan parad matunong iran kakaukolanen to?’ (Salmo 97:10) No simamatuan naebatan mo na on irayan tepet, anto so mangaamper ed sikan mangidayew ed si Jehova?​—Ipareng so Gawa 8:36.

Nagkalalo so lalanoren na pandayew ed si Jehova nen say pangipulong lambengat na maong a balita. No agamoran moy suston pikakabat, walaan na tuan pananisia, tan itutukoy moy bilay mo ed saray madibinon kakaukolanen, kaukolan mon pekderan so personal a siglaotan mo’d Dios. Panon? Diad panamegley na dedikasyon ed sikato diad pikakasi tan insan say kabautismo ed danum bilang simbolo na saya. Say andi-anggaan a bilay so walad kaatapan. No ontan, onkiwas la natan ed simbawa nen Jesus: “Onloob kayo ed mainget a pinto: ta maawang so pinto, tan malapar so dalan, ya mamaarap ed kaderalan, et dakel so saray onloob diman. Ta mainget so pinto, tan makisir so dalan, ya mamaarap ed bilay, et daiset so saray makaromog ed sikato.”​—Mateo 7:13, 14.

Lapud manasingger la so kaderal a sigpot na kaplesan a sistema na bengabengatla, aliwan saya so panaon pian magmaliw a masuyat. Mangala na apuraan a kundang a mamaarap ed magnayon a siglaotan ed si Jehova. On, natan la so panaon ya onkiwas a positibo ed tepet a, Kasin idayew mo si Jehova?