Sikayo so Mabli ed Imaton na Dios!

“Aroen ta ka ed maando a panangaro. Kanian lapu ed maaro ya abig na linawa inyasinger ta ka.”​—JEREMIAS 31:3.

1. Panon a say awawey nen Jesus ed kabanyakan a totoo ed agew to so duma manlapud saray Pariseo?

NAIMANO ra iya ed saray mata to. Sayan too, si Jesus, so andian na kiparaan ed saray relihyoson pangulo ra; sikatoy angimalasakit. Inabagey torayan totoo lapud “maermen tan abuybuyak ira, a singa saray carnero ya angapoy pastol da.” (Mateo 9:36) Saray relihyoson pangulo ra so nepeg komon a nagmaliw a maaron pastol a mangilalaman ed sakey a maaro, mapangasin Dios. Imbes, agda inkabkabilangan so kabanyakan a totoo a singa managgulo lambengat​—tan naayew!a (Juan 7:47-49; ipareng so Ezequiel 34:4.) Malinew, say ontan a pikewet, agmakasulatan a panmoria so duman tuloy ed panmoria nen Jehova ed totoo to. Imbaga to ed nasyon ton Israel: “Aroen ta ka ed maando a panangaro.”​—Jeremias 31:3.

2. Panon a sinalin kumbinsien na taloran kaiba nen Job a sikatoy andi-kana ed imaton na Dios?

² Anggaman ontan, maseguron aliwan saray Pariseo so inmunan analin mangumbinsi ed inad-aro iran karnero nen Jehova a sikaray andi-kana. Kunsideraen pay alimbawa nen Job. Parad si Jehova sikato so matunong tan anggapoy pakabalawan, balet impatnag na taloran “managligliwa” a si Job so sakey ya imoral, marelmeng ya apostatan ompatey ya andiay antokaman a pakasoysoyan ed kiwawala to. Impilit dan agpablien na Dios so antokaman ya inkatunong ed biang nen Job, lapud anggapoy talek na Dios anggan ed dilin angheles to tan minoria toy tawen a mismon agmalinis!​—Job 1:8; 4:18; 15:15, 16; 18:17-19; 22:3.

3.Antoran paraan so uusaren natan nen Satanas pian salien a kumbinsien so totoo a sikaray andi-kana tan agnaaro?

³ Natan, uusaren ni nen Satanas iyan ‘masilib a gawa’ ed gunaet a pangumbinsin saray totoo so ag-inaro tan andi-kana. (Efeso 6:11, paimanod leksab, NW) Tua, mabetbet ton papalikdoen so totoo diad panamegley na pamapaloor ed kaapaan tan kinon da. (2 Corinto 11:3) Balet panliketan to met so panaeg ed dilin-respeto na saray maletey. Nagkalautlan tuloy iya ed sarayan maatap a “kaonoran iran agew.” Dakel natan so ombabaleg diad saray pamilyan “anggapo so aro ra a nianakan”; dakel so kaukolan a mideneng ya inagew-agew ed saramay maruksa, masiblet, tan benger. (2 Timoteo 3:1-5) Saray taon na mauges a tratamento, rasismo, gulaan, odino panangabuso so nayarin mangumbinsi ed saratan a sikaray andi-kana tan agnaaro. Insulat na sakey a laki: “Agko aliknan siak so angaro tan naaro na siopaman. Mairap parad siak so panisian say Dios et talagan manatalima ed siak.”

4, 5. (a) Akin a say ideyan personal ya inkaandi-kana so misuniyan ed Kasulatan? (b) Antoy sakey a mapeligron pansumpalan na panisian anggapoy kakanaay amin a sagpot tayo?

⁴ Say ideyan personal ya inkaandi-kana so ontatalos ed puso na katuaay Salitay Dios, say bangat ed dondon. (Juan 3:16) No say Dios so manbayar na ontanlan baleg a kantidad​—say mablin bilay na dilin Anak to—​pian isaliwan to itayo na pankanawnawan manbilay ya ando lan ando, maseguron inararo To itayo; maseguron sikatayoy mabli ed imaton To!

⁵ Nagkalalo, agaylan makapadismaya so panisip a sikatayoy agmakapaliket ed Dios, ya amin iray sagpot tayo et andi-kana! (Ipareng so Uliran 24:10.) Diad sayan negatibon panmoria, anggan saray makagunggunan panamaseseg, a ginagalan lalon ontulong ed sikatayo’d serbisyo tayo ed Dios no posibli et singano panangondena parad arum. Singano mangikekelyaw ed dilin akindalem a kumbiskyon tayo ya antokaman a gawaen tayo et agmagenap.

6. Anto so sankaabigan a pangontra ed panisip na alabas ya inkanegatibo nipaakar ed sarili tayo?

⁶ No nalilikas yo iratan a negatibon liknaan, agkayo nagogonigon. Dakel ed sikatayo so alabas a kritiko ed inkasikatayo a tunggal paminsan. Tan tandaan, say Salitay Dios so denisinyo parad “pakasimbawaan” tan parad “mamagbag na saray malet a fortalezas.” (2 Timoteo 3:16; 2 Corinto 10:4) Insulat nen apostol Juan: “Dia ed saya nabirbir tayo a kien itayo na tua, tan saray kapusoan tayo apaletan ira ed arap to. Ta no say kapusoan tayo et puoten to itayo, babaleg so Dios nen say puso tayo, tan kaba’to so amin a bengatla.” (1 Juan 3:19, 20) Sirin, kunsideraen tayo paray taloran paraan ya ibabangat na Biblia ed sikatayo a sikatayoy mabli ed si Jehova.

Papablien Kayo nen Jehova

7. Panon a binangatan nen Jesus so amin a Kristiano nipaakar ed kablian da ed imaton na Dios?

⁷ Ununa, direktan ibabangat na Biblia a balang sakey ed sikatayo et walaan na personal a kablian ed imaton na Dios. Inkuan nen Jesus: “Agta nalako so limara’n anuyaw ed duara a kuarta? Et angan sakey ed sikara ag nalingoanan dia ed arap na Dios. Angan saray buek na oloyo abilang ira’n amin. Agkayo antakot; mamabli kayo nen saray dakel ya anuyaw.” (Lucas 12:6, 7) Diad saraman a panaon, say anuyaw so sankamoraan ed saray manok ya ilalako bilang tagano, balet anggapoy anggan sakey ed sikara ya agnaimano na Manamalsa to. Kanian, mangileletneg na basiyan parad sakey ya abalbaleg a pandumaan: No nipaakar ed totoo​—a mablin tuloy, nagkalalon tuloy—​amta na Dios so kada detalye. A singano ultimon saray buek ed kauloan tayo so sansasakey ya abilang!

8. Akin a realistikon isipen a nayarian nen Jehova a bilangen so buek ed kauloan tayo?

⁸ Abilang iray buek? No panduaruwaan yo so ag-inkarealistiko na sayan ilustrasyon nen Jesus, kunsideraen: Natandaan na Dios iray matoor ya ariripen to a sarag toran paolien​—a palsaen-lamet ira ed amin a detalye, pati saray komplikadon genetic code tan amin na taon a memorya tan saray eksperiensia ra. Say panbilang ed buek tayo (a say kaslakan ya ulo et tutuboan na ngalngali 100,000) so simpli lambengat a kimey no ipareng!​—Lucas 20:37, 38.

Anto so Nanenengneng nen Jehova ed Sikatayo?

9. (a) Antoray pigaran kualidad a papablien nen Jehova? (b) Akin ya isipen yon saratan a kualidad so mabli ed sikato?

⁹ Komadua, ibabangat ed sikatayo na Biblia no antoy papablien nen Jehova ed sikatayo. Diad simplin salita, panliliketan toray positibon kualidad tan saray sagpot tayo. Imbaga met nen Arin David ed anak ton Solomon: “Ta si Jehova osisaen to so saray amin a puso, tan natalosan to so saray amin a panisip na saray nonot.” (1 Awaran 28:9) Legan ya aanapen na Dios ed binilyon a kapusoan na totoo a walad sayan marawal, apusek-na-gulan mundo​—agaylay panliket to sano makaromog na puson mangaaro ed kareenan, katuaan, tan inkatunong! (Ipareng so Juan 1:47; 1 Pedro 3:4.) Anto so nagawa sano makaromog so Dios na sakey a puson napno na aro ed sikato, a mankaliktan a manaral nipaakar ed sikato tan manginabang ed satan a pikakabat ed arum? Diad Malaquias 3:16, ibabaga ed sikatayo nen Jehova a sikatoy ontatalineng ed saray mangipapaamta ed arum nipaakar ed sikato tan walaan ni ingen na “libro a pakanodnonotan” parad amin na saramay “tinmakot ed Jehova, tan saray nannonot ed ngaran to.” Saratan a kualidad so mabli ed sikato!

10, 11. (a) Panon a say arum et onkiling a kesayan day ebidensyan papablien nen Jehova iray maong a kualidad da? (b) Panon a say alimbawa nen Abias so mangipapanengneng a papablien nen Jehova iray maong a kualidad ed amin a kipapasen?

¹⁰ Anggaman ontan, say dilin-manangondenan puso so nayarin manresisti ed ontan ya ebidensya na kablian tayo ed imaton na Dios. Nayarin mapilit ton iyesaes, ‘Balet dakel ni ditan so mas uliran ed saratan a kualidad nen say siak. Agaylan maseguron nadismaya si Jehova sano ikumpara toak ed sikara!’ Agmangikukumpara si Jehova, nisay sikato so sakey a mapeget, walaay inggetget iran estandarte. (Galacia 6:4) Sikatoy walaay makdem a pakayarin makabasa ed kapusoan, tan papablien toray maabig a kualidad ed amin a kipapasen.

¹¹ Alimbawa, sanen impakseb nen Jehova a pateyen so interon apostatan dinastiya nen Arin Jeroboam, inekal a singano “dutak,” inganggan To a sakey lambengat ed saray ilalak a lalaki na ari, si Abias, so ikdan na sakey a mapagalang a ponpon. Akin? “Lapu’d dia ed sikato aromog so arum a maong a bengatla nipaakar ed Jehova, a Dios na Israel.” (1 Arari 14:10, 13) Kabaliksan ta na saya a si Abias so matoor a managdayew nen Jehova? Aliwa met ya ontan, ta sikatoy inatey, a singa met ed arum niran marelmeng a sankaabungan to. (Deuteronomio 24:16) Siansia, pinabli ni nen Jehova so “arum a bengatla” ya anengneng to ed puso nen Abias tan kinmiwas unong ed satan. Onia so kuan na Matthew Henry’s Commentary on the Whole Bible: “No wala man so pigaran bengatlan maabig met, satan so naromog: Say Dios a manaanap ed saya so makanengneng ed saya, anggan satan so melag a tuloy, tan panliketan to itan.” Tan aglilingwanan, a no makaromog so Dios na anggan melag a sukat na maabig a kualidad ed sikayo, napabaleg to iya legan a panbabanikelan yoy manlingkor ed sikato a sitotoor.

12, 13. (a) Panon ya ipapanengneng na Salmo 139:3 a papablien nen Jehova iray sagpot tayo? (b) Diad anton pantalos a nibagan tataepan nen Jehova so aktibidades tayo?

¹² Papablien nen Jehova iray sagpot tayo diad mipadparan paraan. Diad Salmo 139:1-3, nabasa tayo: “O Jehova, sika sinokayan moak, et akabatan moak. Sika antam so kayoyorong ko tan say kakaalagey ko; sika natalosan mo so nonot ko ya wala ni ed arawi. Sika sokayan mo so basbas ko tan say kadodokol ko, tan kabat mo so saray amin a kagagawak.” Kanian amta nen Jehova so amin a gagawaen tayo. Balet nagkalalo ni nen say basta pakaamta to lambengat. Diad Hebreo, say balikas a “kabat mo so saray amin a kagagawak” so nayari met a mankabaliksan ya “aalwaran [a singa kayaman] so amin a dalan ko” odino “papablien mon amin iray dalan ko.” (Ipareng so Mateo 6:19, 20.) Anggaman ontan, panon a papablien nen Jehova iray dalan tayo anta sikatayoy ag-ayadyari tan makasalanan?

¹³ Makapainteres, unong ed pigaran iskolar, sanen insulat nen David a “sokayan” nen Jehova so impanbaroy to tan saray panaon na panpainawa, say literal a kabaliksan ed Hebreo et “taepan.” Sakey a reperensyan palapagan so nankuan: “Saya so mankabaliksan . . . ya ibiig so amin a taep, tan ititilak so amin a bukel​—pian natipon so amin a makana. Kanian dia et kabaliksan ton say Dios, a singa panangibaga, so nantaep ed sikato. . . . Insabuyag ton amin so taep, odino amin ya apa, tan anengneng so atilak a sikatoy tua tan makana.” Say dilin-manangondenan puso so nayarin mantaep ed saray gawa tayo ed sunin paraan, ya anggapoy panangasin mamabalaw lapud apalabas iran lingo tayo tan mamapaandi ed saray maong ya agawaan tayo. Balet peperdonaen nen Jehova iray kasalanan tayo no sisisimoon tayon magbabawi tan panbanikelan tayon ag-uliten iray impakalukso tayo. (Salmo 103:10-14; Gawa 3:19) Ibibiig tan tatandaan toray maong a gawa tayo. Diad tua, mantultuloy ton tatandaan iratan legan a mansiasiansia itayon matoor ed sikato. Moriaen ton agmakatunongan so pangilingwan ed saraya, tan sikatoy agbalot agmatunong!​—Hebreos 6:10.

14. Anto so mangipapanengneng a papablien nen Jehova so aktibidad tayo diad Kristianon ministeryo?

¹⁴ Antoray pigaran maong a gawan papablien na Dios? Talagan antokaman a bengatla a gagawaen tayo bilang panangalig ed Anak to, si Jesu-Kristo. (1 Pedro 2:21) Sirin, maseguron say sakey ya importantin tuloy a kimey et say panangilaknab na maong a balita na Panariay Dios. Diad Roma 10:15, nabasa tayo: “Alay karakpan na saray sali na saray mangitarok na saray magayaga a balita na saray maong a bengatla!” Bangta agtayo gendagendat ya isipen ya “alay karakpan” na ordinaryon salisali tayo, say salitan inusar dia nen Pablo so mipadpara’d samay inusar ed patalos na Greek Septuagint pian deskribien si Rebeca, Raquel, tan Jose​—sikaran talo so kabat ed kalimgasan da. (Genesis 26:7; 29:17; 39:6) Kanian say pagmamaliw tayon okupado ed serbisyo ed Dios tayo, si Jehova, so marakep a tuloy tan mabli ed imaton to.​—Mateo 24:14; 28:19, 20.

15, 16. Akin a papablien nen Jehova so panagsungdo tayo, tan panon ya indanet na saray salita nen Arin David ed Salmo 56:8 iyan katuaan?

¹⁵ Say sakey nin kualidad a papablien na Dios et say panagsungdo tayo. (Mateo 24:13) Tandaan, a labay nen Satanas ya ikaindan yo si Jehova. Diad kada agew a pansiasiansia yon matoor ed si Jehova et sananey lamet ya agew ya intulong yon mangebat ed saray panamalaw nen Satanas. (Uliran 27:11) No maminsan et say panagsungdo so mairap a tuloy. Saray problema ed bunigas, kairapan ed pinansyal, emosyonal a gonigon, tan arum niran makasbel so makapanggawa ed kada agew ya onlabas a subok. Say panagsungdo ed arap na saratan a subok so nagkalautlan mabli ed si Jehova. Satan so rason no akin a kinerew nen Arin David ed si Jehova ya isimpen iray lua to ed sakey a piguratibon “botilya,” a sitatalek ya ontetepet, “Angapo ta’ ra ed librom?” (Salmo 56:8) On, ipapasen nen Jehova a mabli tan tatandaan ton amin iray lua tan kairapan a sinungdoan tayo diad pamapasiansia tayo’d katooran ed sikato. Saratan met so mabli ed imaton to.

¹⁶ Nisesengeg ed mas maabig iran kualidad tayo tan saray sagpot tayo, malinlinew sirin a si Jehova so makakaromog ed balang sakey ed sikatayo na dakel a bengatlan pablien! Anggan panon lay panatrato na mundo nen Satanas ed sikatayo, ipapasen itayo nen Jehova a mabli tan kabiangay “pilpilaleken iran bengatla na amin a nasyon.”​—Aggeo 2:7, NW.

No Antoy Agawaan La nen Jehova Pian Idemostray Aro To

17. Akin a say dondon bagat nen Kristo et nepeg a mangumbinsi ed sikatayo ya inaro itayo nen Jehova tan si Jesus bilang indibidual?

¹⁷ Komatlo, dakel so nagagawaan nen Jehova pian paneknekay aro to ed sikatayo. Maseguron say dondon bagat nen Kristo so sanka-epektiboan ya ebat ed satanikon katilaan a sikatayoy andi-kana odino agnaaro. Agtayon balot lilingwanan a say ansakit ya ipapatey ya asagmak nen Jesus ed panamairapan a palitek tan say babaleg nin sakit a sinungdoan nen Jehova ed impakanengneng ed inad-aron Anak to diad patey so prueba na aro ra’d sikatayo. Niarum ni, satan ya aro so onaaplika ed sikatayo a personal. Ontan so panmoria nen apostol Pablo, ta insulat to: “[Say] Anak na Dios: a sikato so angaro ed siak, tan inter to so inkasikaton dili lapu’d siak.”​—Galacia 2:20.

18. Diad anton pantalos ya iyaasingger itayo nen Jehova ed si Kristo?

¹⁸ Papaneknekan nen Jehova so aro to ed sikatayo diad panamegley na panutulong ed balang sakey ed sikatayo ya anamoten iray gungguna na bagat nen Kristo. Inkuan nen Jesus diad Juan 6:44: “Angapo so too a makadago ed siak, likod say Ama ya angibaki ed siak sikato so yasinger to.” Diad panamegley na kimey a panagpulong, ya akarateng ed balang sakey ed sikatayo, tan diad panamegley na masanton espiritu to, ya uusaren nen Jehova pian tulongan itayon natalosan tan iyaplika iray espiritual a katuaan anggaman ed saray limitasyon tan agtayo inkayadyari, personal ya iyaasingger itayo nen Jehova ed Anak to tan say ilalo na maandon bilay. Kanian nibaga nen Jehova ed sikatayo so singa imbaga to ed Israel: “Aroen ta ka ed maando a panangaro. Kanian lapu ed maaro ya abig na linawa inyasinger ta ka.”​—Jeremias 31:3.

19. Akin a say pribilihyo na pikakasi so nepeg a mangumbinsi ed sikatayo nipaakar ed personal a panangaro nen Jehova ed sikatayo?

¹⁹ Anggaman ontan, anganko et diad pribilihyo na pikakasi ya alikna tayo so aro nen Jehova diad sankamaapitan a paraan. Iimbitaan to so balang sakey ed sikatayon ‘mikasi ya andi tonda’ ed sikato. (1 Tesalonica 5:17) Sikatoy ontatalineng! Sikato ni ingen so atawag a “Dumerengel na pikakasi.” (Salmo 65:2, NW) Agto imamatalek iyan betang ed siopaman nin too, anggan ed dilin Anak to. Isipen pa lambengat: Papasesegen itayo na Manamalsa na talba ya onasingger ed sikato diad pikakasi, tekep na kawayangan ed panagsalita. Saray ey-ey yo so nayari ni ingen a mamakiwas ed si Jehova a gawaen so agto komon gawaen.​—Hebreos 4:16; Santiago 5:16; nengnengen so Isaias 38:1-16.

20. Akin a say aro na Dios parad sikatayo so agbaraan parad dilin-kaimportantian odino egotismo ed biang tayo?

²⁰ Anggapoy asimbang a Kristiano a mangibaraan ed ontan ya ebidensya na aro tan panamabli na Dios pian ipasey inkasikato bilang mas importanti nen say kanepegan to. Insulat nen Pablo: “Lapu ed gracia a niiter ed siak, kuan ko sirin ed balang sakey a too ed sikayo, ya ag to nonoten so inkasikaton dili ya atagtagey nen say kanepegan a nonoten; no ag ingen nonoten to ed kaabebaan na linawa, onong ed sukat na pananisia a say Dios inotob to ed sakey tan sakey.” (Roma 12:3) Kanian legan a nadadangdang itayo ed petang na aro na mangatatawen ya Ama tayo, komon ta magmaliw itayon asimbang ed kanonotan tan tandaan a say maaron-panangasi na Dios et agkanepegan.​—Ipareng so Lucas 17:10.

21. Anton satanikon katilaan so nepeg ya itultuloy tayon resistian, tan anton madibinon katuaan so nepeg tayon umamengen?

²¹ Gawaen tayoy anggaay nayarian tayo unong ed pakayari tayon resistian so amin ya ideyan iyaalibansa nen Satanas ed sayan manpapanabos a daan a mundo. Lalaktipen na satan so pangipulisay ed panisip a sikatayoy andi-kana odino agnaaro. No say bilay ed sayan sistema so mangibabangat ed sika pian moriaen moy inkasika bilang sakey a babeng a makapadismayan tuloy ed kipatnag na baleg ya aro na Dios, odino saray maong a kimey mo et melag a tuloy ed pakaimano to, odino saray kasalanan mo so dakel a tuloy pian nasakbongay impatey na mablin Anak to, sika so nababangatan na sakey a katilaan. Ipulisay iratan a katilaan tekep na amin a panggula a kanepegan da! Lawas tayon nodnonoten iray impuyan a salita nen apostol Pablo ed Roma 8:38, 39: “Ta sisiaen ko a peteg, ya angan say patey, angan say bilay, angan saray angeles, angan saray arari, angan saray wala ed kaplesan, angan saray wala ed arapen, angan saray pakayari, angan say katagey, angan say kaaralman, angan siopa a pinalsa, ag da itayo nisian ed aro na Dios, ya wala ed Cristo Jesus a Katawan tayo.”

[Paimano ed leksab]

Anto so Padesir Yo?

◻ Akin a panggugunaetan nen Satanas a kumbinsien itayo a sikatayoy andi-kana tan agnaaro?

◻ Panon ya imbangat nen Jesus a papablien nen Jehova so balang sakey ed sikatayo?

◻ Panon tayon naamtaan a tutumangan nen Jehova so maong a kualidades tayo?

◻ Panon tayon makapanseguro a papablien nen Jehova iray sagpot tayo?

◻ Panon a napapaneknekan nen Jehova so aro to parad sikatayo bilang indibidual?

[Litrato ed pahina 13]

Naiimano tan natatandaan nen Jehova ya amin iramay mannononot ed ngaran to