Anggaman Maneermen, Sikatayoy Ag-andian na Ilalo

“Ag mi labay komon ya onpasen kayo ya andi amta, agagi, no nipaakar ed saray naugip; pian ag kayo onermen, onong na singa saray arum, ya angapo so ilalo ra.”​—1 TESALONICA 4:13.

1. Anto so maparanay a naeeksperiensia na katooan?

INATEYAN ka ta la na sakey ya inad-aro? Antokaman so edad, maslak ed sikatayo so akasagmak na ermen lapud impatey na sakey a kanayon odino kaaro. Nayarin saman et sakey a laki odino bai, ateng, kapareha, odino sakey ya anak. Say itatatken, pansakit, tan saray aksidenti so maparanay a sengegan na ipapatey. Say krimen, karawalan, tan bakal so mangaarum ed sinagem tan ermen. Tinaon diad interon mundo, sakey a promedyo na masulok a 50 milyon a totoo so ompapatey. Say promedyo ed inagew-agew nen 1993 so 140,250. Say deral na patey so mangaapekta ed kakaaro tan kapamilya, tan ansakit a tuloy so liknaay pakaandi.

2. Antoy ompatnag ya aliwan normal nipaakar ed ipapatey na ananak?

² Agta naabagey tayoray ateng ed California, E.U.A., a naandian na anak a malukon ed biglaan ya inka-aksidenti ed luluganan? Diad sakey a momento, inatey so alenleneg ya anak da tan say lukon to a magmaliw komon a sankaunaan ya apo ra. Say asawa na biktima so naandian na kapareha tan say panguloan komon ya ilalak ton laki odino bii. Singano aliwan natural parad atateng a manirap ed ipatey na sakey ya anak, balanglan satan so ugaw ni odino mas matatken. Aliwan normal parad ananak a naunaan day atateng dan ompatey. Labay tayon amin so manbilay. Sirin, say ipapatey so talagan sakey a kabusol.​—1 Corinto 15:26.

Linmoob so Ipapatey ed Atooan a Pamilya

3. Panon a nayarin angapekta ed si Adan tan Eva so impatey nen Abel?

³ Say kasalanan tan ipapatey so nanari la ed loob na anem libon taon ed awaran na too, nanlapulad impanrebeldi na inmunan atateng tayo, si Adan tan Eva. (Roma 5:14; 6:12, 23) Ag-ibabaga na Biblia ed sikatayo no panoy inkiwas da sanen pinatey so anak dan Abel na agi ton Cain. Diad pigaran rason, maseguron saman so makapasinagem ya eksperiensia parad sikara. Nia, diad sankaunaan a pankanawnawa, nipaarap ira ed kapetegan na ipapatey, ya impatnag na lupa na dilin anak da. Anengneng da so bunga na impanrebeldi ra tan say nantultuloy a lingon panangusar day kawayangan. Pinili met nen Cain so sankaunaan a panagpatey ed dilin agi to, anggaman ed saray pasakbay a nanlapud Dios. Amta tayo a si Eva so naapektoan a tuloy ed impatey nen Abel lapud sanen inyanak to si Set, inkuanto: “Say Dios initdan toak na sananey ya ilalak ya onsalat ed Abel a pinatey nen Cain.”​—Genesis 4:3-8, 25.

4. Akin ya agnayarin magmaliw a sakey a ligligwa so mito nipaakar ed ag-ompatey a kamarerwa kapatey nen Abel?

⁴ Anengneng met na inmunan atateng tayo so kapetegan na sentensyay Dios ed sikara​—a no sikaray manrebeldi tan magmaliw a matunganga, sikaray “[seguradon] ompatey.” Anggaman ed tila nen Satanas, singano agni natitibukel so mito nipaakar ed ag-ipapatey na kamarerwa, kanian sikaray agmakagamor na ligliwa manlapud saya. Inkuan na Dios ed si Adan: ‘Sika so ompawil ed dalin, ta sikato so angalaan ed sika. Lapud sika et dabok tan dia ed dabok so pawilan mo.’ Agto sinaglawi arapen a kiwawala bilang ag-ompatey a kamarerwa diad tawen, impierno, Limbo, purgatoryo, odino inerman ni. (Genesis 2:17; 3:4, 5, 19) Bilang kakamarerwan mabilay a nankasalanan, diad kaunoran et si Adan tan si Eva so ompatey tan ontunda la’d kiwawala. Si Arin Solomon so apuyanan a mangisulat: “Saray mabilay amta ra a sikara ompatey ira; balet saray inaatey agda amta so bengatla, ag ira met nawalaan la na tumang; ta say pakanonot ed sikara alingoanan. No panon so aro ra, ontan so gula ra tan siblet da, atawtaw ya abayag la; andian ira la na betang lawas dia ed angan anto ya agawa ed leksab na banwa.”​—Eclesiastes 9:5, 6.

5. Anto so tuan ilalo parad inaatey?

⁵ Agaylan tua iraman a salita! Peteg, siopa kasi makanonot ni ed inmuunan atateng ed apalabas lan duan lasus odino talon lasus a taon? Mabetbet ya anggan saray lubok da so agla kabat odino abayag lan pinaulyanan. Kasin kabaliksan na satan ya anggapo lay ilalo parad inatey iran inad-aro tayo? Andi, aliwa met ya ontan. Onia so inkuan nen Marta ed si Jesus nipaakar ed inatey ya agi to, si Lazaro: “Amtak ya onoli ed bilay sano kioli ed kaonoran ya agew.” (Juan 11:24) Sisiaen na saray Hebreo a paolien na Dios so inaatey ed arapen a panaon. Ingen, satan so ag-angamper ed sikaran panermenay inkaandi na sakey ya inad-aro.​—Job 14:13.

Saray Matoor a Nanermen

6, 7. Panoy inkiwas di Abraham tan Jacob nipaakar ed ipapatey?

⁶ Ngalngali apat a libon taon lay apalabas, sanen inatey so asawa nen Abraham a si Sara, “linmad man si Abraham a nanermen ed Sara, tan ninangisan to.” Satan a matoor ya aripen na Dios so angipanengneng na aralem a liknaan to lapud inkaandi inad-aro tan matoor ya asawa to. Anggaman sikatoy sakey a lakin mapekder tan masebeg, agto imbaing so panermen to diad pannangis.​—Genesis 14:11-16; 23:1, 2.

⁷ Mipadpara so agawa ed si Jacob. Sanen sikato so apalikdo ed panisian pinatey na atap ya ayep so ilalak ton si Jose, panon so inkiwas to? Nabasa tayo ed Genesis 37:34, 35: “Et si Jacob pinilatpilat to so kawes to, tan angitapitapi magasal a lupot ed saray olpo to, tan naninatey ed si anak to ed amayamay ya agew. Et amin a lalaki ya anak to tan bibii ya anak inmalagey ira a manligliwa ed sikato; balet agto ginabay so paligliwa; tan inkuan to, Ta onlasor ak naani ed Sheol ed kinen ana’ko a manin-inatey. Et si ama to ninangisan to.” On, natural lambengat ed too so pangibalikas na ermen sano inateyay inad-aro.

8. Panon so mabetbet a pangibabalikas na saray Hebreo ed panermen da?

⁸ Nayarin isipen na arum a no ipareng ed moderno odino lokal iran kustombre et alablabas tan dramatikoy inkiwas nen Jacob. Balet sikato so nambilay ed duman panaon tan kultura. Say inpanermen to​—sanen nankawes na telan-sako—​so sankaunaan ya impanaglawi na Biblia ed sayan agamil. Anggaman ontan, singa adeskribe diad Hebreon Kasulatan, nibalikas met so pandageyem ed panamegley na panagugol, paney-ey, tan iyuyurong ed saray dapol. Malinew a maabuloy so Hebreos ed saray tuan panangipatnag na ermen da.a​—Ezequiel 27:30-32; Amos 8:10.

Panermen ed Panaon nen Jesus

9, 10. (a) Panon so inkiwas nen Jesus diad impatey nen Lazaro? (b) Anto so labay ya ibaga ed sikatayo na inkiwas nen Jesus no nipaakar ed sikato?

⁹ Anto met so nibaga tayo ed saray inmunan babangatan nen Jesus? Alimbawa, sanen inatey si Lazaro, nandageyeman na agagi ton si Marta tan Maria so impatey to tekep na saray lua tan pannangis. Panoy inkiwas na ayadyarin toon si Jesus sanen sikatoy sinmabi diman? Onia so kuan na salaysay nen Juan: “Si Maria ed satan, sanen akasabi ed kawalaan nen Jesus, tan sikato’y anengneng to, dinmakmomo ed saray sali to, a kuan to ed sikato, Katawan, no wadia ka komon, say agik ag inatey. Kanian nen anengneng nen Jesus a sikato so mannangis, tan saray Judios met ya akila ed sikato a mannangis, nan-ingel si Jesus ed espiritu tan agonigon. Tan inkuan to, Iner so anginan yo ed sikato? Sikara kuan da ed sikato, Katawan, gala tan nengneng mo. Si Jesus nannangis.”​—Juan 11:32-35.

¹⁰ “Si Jesus nannangis.” Saratan a pigaran salita so mangipapatnag a tuloy nipaakar ed inkatoo nen Jesus, ed panangabagey to, ed liknaan to. Anggaman sigpot a kabat to so nipaakar ed ilalon kioli, “nannangis si Jesus.” (Juan 11:35, King James Version) Intultuloy na salaysay diad impangikuan a saray manbabantay so nankomenton: “Nengneng yo, agay la so inpangararo to ed [si Lazaro]!” Maseguro, no si Jesus ya ayadyarin too et nannangis ed inkaandi na sakey a kaaro, aliwan kababaing no say sakey natan et mandageyem tan onakis.​—Juan 11:36.

Anto so Ilalo Parad Inaatey?

11. (a) Anto so naaralan tayo manlapud saray alimbawa ed Biblia a manasaglawi ed panagdageyem? (b) Akin ya agtayo maneermen a singa paneermen na saramay andian na ilalo?

¹¹ Anto so naaralan tayo manlapud sarayan alimbawa ed Biblia? A natural ed too a manermen tan agtayo nepeg ya ibaing so pangipatnag na ermen tayo. Anggaman mamapalemew so ilalon kioli, say sakit na linawa lapud impatey na sakey ya inad-aro so nalilikna tayo ni. Saray taon, anganko dekada ni ingen, na maapit a relasyon tan panuulop so bigla tan makapasinagem ya anampot. Tua, agtayo maneermen a singa ed paneermen na saramay andiay ilalo odino singa saramay walaan na palso iran ilalo. (1 Tesalonica 4:13) Ontan met, agtayo papalikdoen na antokaman iran mito a say too et walaan na ag-ompatey a kamarerwa odino mantultuloy ed kiwawala diad panamegley na reinkarnasyon. Kabat tayo a si Jehova so angisipan na ‘balon katawenan tan balon dalin a panayaman na inkatunong.’ (2 Pedro 3:13) “Punasen [na Dios] so amin a lua ed kamataan [tayo]; tan andi gapo la naani ipatey; tan angapo la naani onnangis o dageyem, o ot-ot. Ta saray ona a bengatla sikara so linmabas la.”​—Apocalipsis 21:4.

12. Panon ya imbalikas nen Pablo so pananisia to ed kioli?

¹² Anto so walan ilalo parad saramay inatey la?b Apuyanan so Kristianon managsulat a si Pablo pian ikdan to itayo na ligliwa tan ilalo sanen insulat to: “Say kaonoran a kabusol ya naekal naani say patey.” (1 Corinto 15:26) Onia so kuan na The New English Bible: “Say kaunoran a kabusol a naekal et say ipapatey.” Akin ya ontanlan maseguro si Pablo ed satan? Lapud sikatoy akumberti tan imbangat na sakey a nibangon manlapud inaatey, si Jesu-Kristo. (Gawa 9:3-19) Satan met so rason no akin a nibalikas nen Pablo: “Lapu’d too [si Adan] so sinabian na patey, lapu ed too [si Jesus] met so sinabian na kioli ed bilay na saray inaatey. Lapud kinen Adan so pateyan na amin, ontan met diad kinen Cristo onoli’ra ed bilay.”​—1 Corinto 15:21, 22.

13. Panon so inkiwas na saray akaimaton ed kioli nen Lazaro?

¹³ Say bangat nen Jesus so mangiiter ed sikatayo na baleg a ligliwa tan ilalo parad arapen. Alimbawa, anto ta so ginawa to ed kipapasen nen Lazaro? Linma’d lubok a ditan et apatiran agew lan wadman so bangkay nen Lazaro. Sikatoy angibalikas na pikakasi, “tan sanen nikuan irayan bengatla, inmingal na maksil a voces, ‘Lazaro, paway ka!’ Say toon inatey so pinmaway ya apotipotay sali-sali tan lima-lima na panagbalkot, tan say lupa to so abalkot na abel. Inkuan nen Jesus ed sikara: ‘Okbaran yo, tan paulian yo.’ Kasin naisip yo so inkabigla tan gayaga na kalupaan di Marta tan Maria? Maseguron alay inkakelawan na kakaabay sanen anengneng da iyan milagro! Agpankelawan a dakel ya akanengneng so angagamil na pananisia ed si Jesus. Anggaman ontan, “nankakasakey so [relihyoson kakabusol to] ya ipapatey.”​—Juan 11:41-53, NW.

14. Panangipatnag na anto so impamaoli ed si Lazaro?

¹⁴ Ginawa nen Jesus itan ya agnalingwanan a panamaoli ed arap na dakel ya akaimaton. Saman so sakey a panangipatnag na panamaoli ed arapen ya impasakbay to ed asasakbay ya okasyon, sanen inkuanto: “Ag kayo mankelaw ed saya, ta onsabi horas, ya amin so saray wala ed saray lobok narengel da so voces to [na Anak na Dios]. Et onpaway ira; saray nangawa na maong, nipaakar ed kioli ed bilay; bang saray nangawa na mauges, dia met ed kioli ed bilay ed kaokom.”​—Juan 5:28, 29.

15. Anto so walan ebidensya di Pablo tan Ananias nipaakar ed inkioli nen Jesus?

¹⁵ Singa asaglawi la, anisia si apostol Pablo ed kioli. Diad anton letnegan? Sikato so datin alay inkauges a Saulo, manamasegsegang ed saray Kristiano. Say ngaran tan reputasyon to so anginatnat na takot ed limog na saray mananisia. Diad tua et agta sikatoy angabobon ed impantupak anggad ipapatey na Kristianon martir a si Esteban? (Gawa 8:1; 9:1, 2, 26) Ingen, diad dalan a mamaarap ed Damasco, atalosan nen Pablo sanen sikatoy temporaryon pinagmaliw a bulag nen apaolin Kristo. Nadngel nen Saulo so sakey a boses a nankuan ed sikato: “Saulo, Saulo, akin et uusilan mo ak? Et inkuan to: Siopa ka, Katawan? Et kuan to: Siak si Jesus ya uusilan mo.” Insan saman lanlamang ya apaolin Kristo so angiganggan ed si Ananias, a manaayam ed Damasco, ya onla’d abung a panpipikasian nen Saulo pian ipawil so pakanengneng to. Kanian, manlapud dilin eksperiensia et parehon si Saulo tan Ananias so awalaan na dakel a rason a manisia ed kioli.​—Gawa 9:4, 5, 10-12.

16, 17. (a) Panoy pikabat tayo ya ag-anisia si Pablo ed Griegon ideya na nisipor ya ag-ipapatey na kamarerway too? (b) Anto so iiter na Biblian pihon ilalo? (Hebreos 6:17-20)

¹⁶ Imanoen no panon a si Saulo, ya apostol Pablo, so inmebat sanen, bilang apasegsegang a Kristiano et inawit ed arap nen Gobernador Felix. Nabasa tayo ed Gawa 24:15: “Wala so ilalok ed Dios, . . . ya wala naani kioli ed bilay na saray matunong tan ag matunong.” Mapatnag, ya ag-anisia si Pablo ed paganon Griegon ideya ed nisipor ya ag-ipapatey na kamarerway too, a niganan dalanay mitolohikon biek a bilay odino mundo na inaatey. Sinisia tan imbangat to so pananisia ed kioli. Parad arum et mankabaliksan itan na anggapoy-ipapatey a bilay bilang espiritun pinalsa ed tawen a kaiba nen Kristo tan parad karaklan et onoli ed bilay ed sakey ya ayadyarin dalin.​—Lucas 23:43; 1 Corinto 15:20-22, 53, 54; Apocalipsis 7:4, 9, 17; 14:1, 3.

¹⁷ Diad ontan et say Biblia so mangiiter ed sikatayo na sakey a malinew a sipan tan pihon ilalo a diad panamegley na kioli, napinengnengan lamet na dakel iray inad-aro ra dia ed dalin balet diad silong na duman tuloy iran kipapasen.​—2 Pedro 3:13; Apocalipsis 21:1-4.

Praktikal a Tulong Parad Saray Maneermen

18. (a) Anton makatulong ya uusaren so nipaway diad “Maridios a Takot” iran Kumbension? (Nengnengen so kahon.) (b) Antoran tepet so kaukolan a naebatan?

¹⁸ Natan et walaan tayo na saray pakanodnonotan tan panermen tayo. Anto so nagawaan tayo pian nasungdoan iyan mairap a panaon na pandageyem? Anto so nagawaan na arum pian natulongan da iramay maneermen? Nilikud ed saya, anto so nagawaan tayo pian natulongan iramay masimoon ya andian na antokaman ya ilalo tan maneermen met a naabet tayo ed lawak a ministeryo tayo? Tan antoran kaaruman a ligliwa so panggagayagaan tayo manlapud Biblia nipaakar ed inad-aro tayon maitlek a nanaugip ed patey? Say ontumbok ya artikulo so mangiter na pigaran suhestion.

[Saray paimano ed leksab]

Kasin Naebatan Yo?

◻ Akin a nibaga a say ipapatey et sakey a kabusol?

◻ Panon ya impatnag na ariripen na Dios so ermen da diad panaon na Biblia?

◻ Anto so ilalo parad saray inad-aron inatey?

◻ Anton basiyan so walad si Pablo pian manisia ed kioli?

[Kahon ed pahina 8, 9]

Praktikal a Tulong Parad Saray Maneermen

Diad “Maridios a Takot” iran Kumbension legay 1994-95, inyabawag na Watch Tower Society so kipaway na balon brosyur ya apauloan na Sano Naandi’d-bilay so Pinabli Yo. Sayan makapaseseg a palapagan so dinisenyo pian ligliwaey totoo manlapud amin a bansa tan lenguahe. Singa naamtaan yo la, ipaparungtal to so simplin salaysay na Biblia nipaakar ed ipapatey tan ed kipapasen na saray inatey. Nagkalalo la’d amin, ipapabitar to so sipan na Dios, diad panamegley nen Kristo Jesus, nipaakar ed kioli’d bilay diad alinisan a paraison dalin. Talagan makapaligliwa iya parad saray mandageyem. Kanian, saya so nepeg a magmaliw a sakey a makatulong ya uusaren parad Kristianon ministeryo tan manepeg ya onkana pian managdag na interes, a mansumpal ed dakel niran panangiyaral na Biblia. Saray tepet parad panagaral so maalwar ya impasen ed saray kahon ed bandad sampot na kada seksion pian mainomay a narepaso iray punton siningbat a kaibay masimoon, mandageyem a too.

[Litrato ed pahina 8]

Sanen inatey si Lazaro, nannangis si Jesus

[Litrato ed pahina 9]

Imbangon nen Jesus si Lazaro manlapud inaatey

[Picture Credit Line ed pahina 7]

First Mourning, nen W. Bouguereau, orihinal a glass plate ed Photo-Drama of Creation, nen 1914