Anto so Mamapakiwas ed Sikayon Manlingkor ed Dios?

“Sika aroen mo [si Jehova, NW] a Dios mo ed amin a pusom, tan ed amin a kamarerwam, tan ed amin a nonot mo, tan ed amin a biskeg mo.”​—MARCOS 12:30.

1, 2. Antoran makapaliket a bengatla so nasusumpal a misiglaotan ed kimey a panagpulong?

SAY tuan balor na sakey a luluganan so agnadetermina diad itsura to lambengat. Nayarin parakepen na pintura so pinagkapaway to, tan say marakep a disenyo to so nayarin mangingganyo ed posiblin manaliw; balet lalon importanti niray bengatlan agnanengneng a tampol​—say makina a mamapaandar ed luluganan, pati amin niran aparaton mamapakurang ed satan.

² Mipadpara itan ed panaglingkor na sakey a Kristiano ed Dios. Saray Tasi nen Jehova so daakan ed maridios iran gawa. Kada taon, masulok a sakey a bilyon ya oras so uusaren da ed panangipulong na maong a balita na Panariay Dios. Sakey ni, minilyon a panangiyaral na Biblia so nikokondukta, tan saramay nababautismoan so walaay bilang a nilasus nilibo. No sikayo so sakey a manangiyabawag ed maong a balita, walaan kayo na betang​—anggan singano melmelag—​ed sarayan makapaliket ya istatistika. Tan makapanseguro kayo a “say Dios [so] aliwan ag matonong pian nalingoanan to so gawa yo tan say aro ya inpanengneng yo ed ngaran to.”​—Hebreos 6:10.

3. Nilikud ed saray gawa, anton makanan bengatla so nepeg a panpagaan na Kristianos, tan akin?

³ Anggaman ontan, say tuan balor na panaglingkor tayo​—diad interamenti odino bilang indibidual—​so agnasusukat diad saray numero lambengat. Unong ya imbaga ed si Samuel, “say too onnengneng ed mapaway a nengneng, balet si Jehova onnengneng ed puso.” (1 Samuel 16:7) On, say importanti ed Dios et no anto itayo ed akindalem. Tua, kaukolan iray gawa. Paparakepen na maridios iran gawa so bangat nen Jehova tan manasagyat ed saray posiblin babangatan. (Mateo 5:14-16; Tito 2:10; 2 Pedro 3:11) Ingen, saray kimey tayo so agmangipaparungtal ed amin a gawa tayo. Say apaolin Jesus so walaay rason a manpaga nipaakar ed kongregasyon ed Efeso​—anggaman maabig so rekord da ed maong iran gawa. “Siak amtak so saray gawam,” imbaga to’d sikara. “Balet wala so isumpak ed sika, ta inkaindan mo so akauna ya arom.”​—Apocalipsis 2:1-4.

4. (a) Diad anton paraan a say panaglingkor tayo ed Dios so nayarin magmaliw a singa sakey a ritual a dadagdagen na liknaay responsabilidad? (b) Akin et wala so pankaukolan ed dilin-panagsuri?

⁴ Walay kapeligroan. Diad sakey a panat na panaon, say panaglingkor tayo ed Dios so nayarin magmaliw a singa sakey a ritual a nadadagdag na liknaan na responsabilidad. Onia so impaneskribe na sakey a Kristianon bii: “Ompapaway ak, onaatendi ed saray miting, manaaral, manpipikasi​—balet gagawaen ko iratan ya amin ed paraan ya automatiko, ya anggapoy antokaman a naliliknak.” Siempre, nepeg a nakomendaay ariripen na Dios sano isesekar day inkasikara anggaman ed liknaan dan sikaray ‘impelag’ odino ‘pinaabeba.’ (2 Corinto 4:9, NW; 7:6, NW) Anggaman kuan, sano say Kristianon rutina tayo so ag-onaaligwas, kaukolan tayon takilingen so loob na makina, a singa panangibaga. Anggan say sankaabigan iran luluganan so mankakaukolan na regular a panangasikaso; ontan met, amin a Kristiano so nakakaukolan a manggawa na regular a dilin-panagsuri. (2 Corinto 13:5) Nanenengneng na arum iray gawa tayo, balet agda natetebek no antoy mamapakiwas ed sikatayo. Kanian, nepeg ya ikunsidera na balang sakey ed sikatayo so tepet a: ‘Anto so mamapakiwas ed siak pian manlingkor ed Dios?’

Saray Babeng ed Manepeg a Motibasyon

5. Anton ganggan so inkuan nen Jesus a manuna ed amin?

⁵ Sanen tinepetan no dinan ed saray ganggan ya initer ed Israel so manuna ed amin, inaon nen Jesus so ganggan a mangiyaapasakey na imano, ya aliwan diad akinpaway ya itsura, noagta ed akindalem a motibo: “Sika aroen mo [si Jehova, NW] a Dios mo ed amin a pusom, tan ed amin a kamarerwam, tan ed amin a nonot mo, tan ed amin a biskeg mo.” (Marcos 12:28-30) Diad ontan et impabidbir nen Jesus no anto so nepeg a managdag ed sikatayo ed panaglingkor ed Dios​—say aro.

6, 7. (a) Diad anton dalan a sisisilib ya inataki nen Satanas so sirkulo na pamilya, tan akin? (2 Corinto 2:11) (b) Panon a say binalegan so makaapekto ed awawey na sakey nipaakar ed madibinon autoridad?

⁶ Labay nen Satanas ya amperen so abilidad tayon mamayubo ed makanan kualidad na aro. Pian nagawaan iyan kalat, say sakey a paraan ya uusaren to et say panataki ed sirkulo na pamilya. Akin? Lapud dia natitibukel so sankaunaan tan magnayon iran kanonotan tayo nipaakar ed aro. Kabat a tuloy nen Satanas so Biblikon prinsipyo a say naaralan tayo diad inka-ugaw et walaay kablian ed inka-adulto. (Uliran 22:6) Sisisilib ton sasalien a pikeweten so ideya tayo ed aro diad masakbay ya edad. Bilang “say dios na saya’n [sistemay bengabengatla],” naiimano nen Satanas a nasusumpal iray gagala to sano dakel so napapabaleg ed saray ayaman ya anggapoy aroan noagta pasen-na-kolkolan, sanok, tan maabuson panagsalita.​—2 Corinto 4:4; Efeso 4:31, 32; 6:4, paimano’d-leksab diad Ingles; Colosas 3:21.

⁷ Sinaglawi na libron Making Your Family Life Happy a say paraan na panamenben na sakey ya ama ed betang to bilang ateng so “nawalaan na magnayon ya epekto ed awawey na ilalak to nipaakar ed autoridad diad kaunoran, nampara ed too tan ed Dios.”a Onia so aaksobien na sakey a Kristianon laki, a binmaleg ed panangontrol na masebeg ya ama to: “Parad say siak, mainomay so itulok ed si Jehova; mas mairap [balet] so pangaro ed sikato.” Siempre, makana so katutulok, ta diad imaton na Dios et “say panangonor sikato so magmaong nen say bagat.” (1 Samuel 15:22) Balet anto so makatulong ed sikatayo pian onkiwas ya aliwan lapu lambengat ed katutulok tan mamayubo na aro parad si Jehova bilang say manamakiwas a puersa ed panagdayew tayo?

‘Say Aro nen Cristo so Manadagdag ed Sikatayo’

8, 9. Panon a nasagyat na dondon bagat nen Jesus so panangaro tayo ed si Jehova?

⁸ Say sankaabigan a panamasagyat ed pamayubo na sigpot-puson aro parad si Jehova et say apresasyon parad dondon bagat nen Jesu-Kristo. “Dia ed saya nipatnag so aro na Dios ed sikatayo, a say Dios inbaki to ed mundo so Anak ton bugbugtong, pian manbilay itayo ed panamegley to.” (1 Juan 4:9) Bektan natalosan tan naapresya tayo itan, sayan kiwas na aro so manasagyat met na aro. “Aroen tayo ta [si Jehova] so angaro ed sikatayo ya inmuna.”​—1 Juan 4:19.

⁹ Sibubulos ya inawat nen Jesus so asainmin ton manlingkor bilang Manangilaban na too. “Dia ed saya abirbir tayo so aro; ta sikato inter to so bilay to nisesengeg ed sikatayo.” (1 Juan 3:16; Juan 15:13) Say dilin-manangisakripisyon aro nen Jesus so kaukolan a mamakiwas ed sikatayon mangapresya. Diad pangiyilustra: Ipasen pan sikayo so insalba manlapud pakalener. Kasin basta onsempet kayo la, manpamaga, tan lingwanan labat la itan? Siempre andi! Makalikna kayo na otang a linawa ed toon angisalba ed sikayo. Sakey ni, otang yo’d satan a too so bilay yo. Agta nagkalalo ni so otang tayo ed si Jehova a Dios tan ed si Jesu-Kristo? No anggapoy dondon, balang sakey ed sikatayo so nalener, a singa panangibaga, ed kasalanan tan ipapatey. Imbes, lapud sayan baleg a kiwas na aro, walaan tayo na iilaloan, say panbilay ya ando lan ando ed paraison dalin.​—Roma 5:12, 18; 1 Pedro 2:24.

10. (a) Panon tayon niyaplika ed sikatayon dili so dondon? (b) Panon tayon dadagdagen na aro ed Kristo?

¹⁰ Dalepdepen so dondon. Iyaplika itan ed sarili, a singa ginawa nen Pablo: “Say bilay a panbibilayan ko natan ed laman, panbibilayan ko lapu ed pananisia, say pananisia a wala ed Anak na Dios, a sikato so angaro ed siak, tan inter to so inkasikaton dili lapu’d siak.” (Galacia 2:20) Say ontan a panagdalepdep so mamadalang na impapuson motibasyon, lapud insulat nen Pablo ed saray taga Corinto: “Say aro nen Cristo [dagdagen, NW] to kami; ta . . . sikato so inatey lapud amin, pian saray manbilay ag ira manbilay komon na andokdokey ed sikaran dili, no ag dia ed saman so inatey lapu ed sikara tan inmolin binmilay lamet.” (2 Corinto 5:14, 15) Kuan na The Jerusalem Bible a say aro nen Kristo so “managdag ed sikami.” Sano morekdeken tayo so aro nen Kristo, satan so managdag ed sikatayo, sikatayoy lalon napakiwas, nadagdag ni ingen. Satan so manetenyeg ed kapusoan tayo tan mamakiwas ed sikatayo. Singa say patalos nen J. B. Phillips diad arum a balikas et “say mogmon subok na saray kiwas tayo et say aro nen Kristo.” Antokaman niran tipo na motibasyon so agmamawala na magnayon iran bunga diad sikatayo, a singa nipanengneng na alimbawa na saray Pariseo.

‘Alwaray Lebadura na Pariseos’

11. Deskribien so awawey na saray Pariseo nipaakar ed relihyoso iran gawa.

¹¹ Binaliwala na saray Pariseo so panagdayew ed Dios. Imbes ya idanet so panangaro ed Dios, indanet dan saray gawa so pananukatan na espiritualidad. Lapud alabas a panagpaga ra’d detalyado iran totontonen, singano ra matunong ed akinpaway, balet diad akindalem et sikaray “napno pokepokel na saray totoo ya inaatey, tan amin a karutakan.”​—Mateo 23:27.

12. Kayarin pinaabig nen Jesus so sakey a laki, panon ya impanengneng na saray Pariseo so inkaawet na kapusoan da?

¹² Diad sakey ya inkagawa et siaabagey a pinaabig nen Jesus so sakey a lakin amagaan so lima to. Agaylan maseguron maliket iyan laki diad impakaeksperiensiay tampolan ya impakatambal ya andi-duaruwan amairap a tuloy ed sikato diad pisikal tan emosyonal a paraan! Ingen, ag-akiliket iray Pariseo ed sikato. Imbes, nantataloan da so sakey a punto​—salanti, say intulong nen Jesus ed agew na Sabaton. Lapud alabas a kapagaan da’d teknikal a panangikabaliksan ed Ganggan, sigpot ya asaew na saray Pariseo so peteg a kabaliksan na Ganggan. Agpankelawan a si Jesus so ‘naermenan ed kaawetay puso ra’! (Marcos 3:1-5) Sakey ni, pinasakbayan toray babangatan to: “Aluaran yo tan paliisan yo so levadura na saray Fariseos tan Saduceos.” (Mateo 16:6) Saray kiwas tan awawey da so niwawalwal diad Biblia parad kagunggunaan tayo.

13. Anton leksion so naaralan tayo manlapud alimbawa na Pariseos?

¹³ Ibabangat itayo na alimbawa na saray Pariseo a kaukolan tayon nawalaay makatunongan a panmoria ed saray gawa. On, makana iray gawa, ta “say pananisia ya andi gawa inatey.” (Santiago 2:26) Anggaman ontan, say ag-ayadyarin totoo so walaan na tendensyan manhusga ed gagawaen na arum imbes ed no anto ira. No maminsan, nahusga tayo ni ingen so inkasikatayo ed onian dalan. Nayarin alablabas so panangidanet tayo ed kaimportantian na saray gawa, a singano saraya labat so basiyan na espiritualidad tayo. Nayarin nalingwanan tayo so kaimportantian na panagsuri ed saray motibo tayo. (Ipareng so 2 Corinto 5:12.) Nayarin sikatayo so magmaliw a mapeget ed saray totontonen a ‘sapiten so ageyet, et bikleren so camello,’ a tutuloken so letra na ganggan balet ta susumlangen so gagala to.​—Mateo 23:24.

14. Panon a singa agmalinis a kopa odino plato iray Pariseo?

¹⁴ Say ag-atalosan na saray Pariseo et no kasin talagan aaroen na sakey a too si Jehova, natural a tumbokan na saray maridios a gawa. Onaagus so espiritualidad manlapud loob a papaway. Binaat a tuloy nen Jesus iray Pariseo lapud lingon kaisipan da nipaakar ed saya, ya inkuanton: “Kasi kayo la, ya escribas tan Fariseos, a mansimpisimpitan! ta urasan yo’y paway na [kopa tan plato, NW], say dalem da balet napno na kasibaan tan inkalablabas. Sika Fariseo a bulag, urasan mo ni ya unonay dalem na [kopa tan plato, NW], pian say paway to et nalinisan met.”​—Mateo 23:25, 26.

15. Mangisitas na saray alimbawa a labas ni nen say akinpaway so nenengnengen nen Jesus.

¹⁵ Say paway na sakey a kopa, plato, odino anggan say sakey a paalagey so agmangipaparungtal ed amin a bengatla. Nikelawan a tuloy iray babangatan nen Jesus ed karakpan na templo ed Jerusalem, a tinawag nen Jesus a “sakey a balaong na matatakew” makasengeg ed nagagawa ed loob. (Marcos 11:17; 13:1) No antoy tua ed templo et satan met so tua ed minilyon a mankuan a Kristiano, a singa ipapanengneng na rekord na Kakristianoan. Inkuan nen Jesus ya ukomen toray pigaran nanggawa na “makapakelaw ira’n gawa” ed ngaran to bilang “managgawa na kaugsan.” (Mateo 7:22, 23) Diad pidumaan a tuloy, onia so inkuanto nipaakar ed sakey a baló a nankontribusyon na ngalngali andiay kantidad a kuarta diad templo: “Sayan duka ya bii a baló angipelag na dakdakel nen saray amin a manpepelag ed panangisimpenan na kayamanan . . . Sikato balet dia ed inka-okolan to inpelag to ya amin so wala ed sikato, salanti amin a panbilay to.” (Marcos 12:41-44) Kasin mansumlangan a panangukom? Andin balot. Diad namparan situasyon et insindag nen Jesus so panmoria nen Jehova. (Juan 8:16) Anengneng toray motibo ed beneg na saray gawa tan angukom unong ed satan.

“Balang Sakey Unong ed Dilin Abilidad To”

16. Akin ya agtayo kaukolan a lawas ya ikumpara so nagagawaan tayo ed nagagawaan na arum a Kristiano?

¹⁶ No susto iray motibo tayo, agkaukolan so naynay a panangikumpara. Alimbawa, anggapoy pankaabigan ed panbanikel a pilaslasan pian usaren so parehon oras ya uusaren na arum a Kristiano ed ministeryo odino pian naparaan so nagagawaan na sakey diad panagpulong. Inkuan nen Jesus ya aroen si Jehova ed interon puso, nonot, kamarerwa, tan biskeg yo​—aliwan say arum. Nanduruma iray abilidad, biskeg, tan kipapasen na balang sakey. No iyabuloy na situasyon yo, pakiwasen kayo na aro a mangusar na dakel a panaon diad ministeryo​—anganko et anggan say pagmaliw a sigpot-panaon a ministron pioneer. Balet, no sikayoy mipupuligesgesan ed sakey a beblay, say panaon ya uusaren yo’d ministeryo so nayarin dagdaiset nen say kaliktan yo. Agnadidismaya. Say inkamatoor ed Dios so agnasusukat ed kinarakel na oras. Lapud puro iran motibo yo, nawalaan kayo na rason a manggayaga. Insulat nen Pablo: “Kanian balang sakey patnagen to komon so gawa ton dili, et dia ed ontan wala naani sirin so like’to nipaakar ed sikato.”​—Galacia 6:4.

17. Diad dili iran salita yo, isalaysay ed antikey so parabolo na saray talento.

¹⁷ Kunsideraen pay parabolo nen Jesus nipaakar ed saray talento, a singa nikurit ed Mateo 25:14-30, NW. Pinatawag na sakey a lakin ngalngali lan manbaroy ed sananey a dalin iray aripen to tan inmatalek to ed sikaray kaykayarian to. “Inter toy limaran talento ed sakey, duaran talento ed sananey, tan sakey a talento ed sananey ni; ed balang sakey unong ed dilin abilidad to.” Sanen sinmabi katawan pian mikuentaan ed ariripen to, anto so aromog to? Say aripen ya inikdan na limaran talento so akagamor ni limaran talento. Mipadpara, say aripen ya inikdan na duaran talento so akagamor na duara nin talento. Say aripen ya inikdan na sakey a talento so angikotkot ed satan tan anggapoy ginawa to pian parakeley kayamanan na katawan to. Anto so impanmoria na katawan ed situasyon?

18, 19. (a) Akin ya ag-inkumpara na katawan so aripen ya inikdan na duaran talento ed aripen ya inikdan na limaran talento? (b) Anto so ibabangat ed sikatayo na parabolo na saray talento nipaakar ed panangomenda tan panangikumpara? (c) Akin a mauges so impangukom ed komatlon aripen?

¹⁸ Ununa, kunsideraen tayo pa imay aripen ya inikdan na limara tan samay inikdan na duaran talento. Diad balang sakey ed sarayan aripen et inkuan na katawan: “Maabig a gawa, maong tan napanmatalkan ya aripen!” Kasin nibaga to iya ed aripen a walaay limaran talento no saya et akagamor lambengat na duara? Maseguron andi! Diad biek a dapag, agto imbaga ed aripen ya akagamor na duaran talento: ‘Akin ya agka akagamor na limara? Ay, nengneng mo so kaparam ya aripen tan say agamoran to parad say siak!’ Andi, say maabagey a katawan, ya angilitrato ed si Jesus, so ag-angikumpara. Impabtang toray talento “ed balang sakey unong ed dilin abilidad to,” tan agto inilaloan so nagkalalo ni nen say niiter na balang sakey. Say duaran aripen so angawat na mansimbangan a komendasyon, ta namparan sikaray sigpot-kamarerwan nankimey parad katawan da. Amin tayo so makaaral manlapud saya.

¹⁹ Siempre, say komatlon aripen so agkinomendaan. Diad tua, sikatoy imbasileng ed paway diad kabilungetan. Diad impakaawat na sakey lambengat a talento et ag-inilaloan a say nagamoran to et singa samay agamoran na aripen a walaay limaran talento. Sikato balet so ag-anggan nanggunaet! Diad kaunoran et mauges so panangukom ed sikato lapud say awawey na puso to et “marelmeng tan mangiras” ya angipatnag na kakulangay panangaro parad katawan to.

20. Panon a momoriaen nen Jehova iray limitasyon tayo?

²⁰ Iilaloan nen Jehova a balang sakey ed sikatayo so mangaro ed sikato tekep na interon biskeg, ingen agaylan makapasagyat ed puso a “sikato kabat to so inkagawa tayo; sikato nanodnonotan to a sapok itayo”! (Salmo 103:14) Kuan na Uliran 21:2 a “simbangen [nen Jehova] so saray puso”​—aliwan say istatistika. Natatalosan to so antokaman iran limitasyon ya anggapoy nagawaan tayo, balanglan saraya et diad pinansyal, pisikal, emosyonal, odino arum ni. (Isaias 63:9) Ontan met, iilaloan ton sigpot tayon usaren ya amin a walad sikatayo​—panaon, impluensya, kuarkuarta. Si Jehova so ayadyari, balet sano midedeneng ed ag-ayadyari iran managdayew to, agto kekerewen so inkanaspot. Sikato so makatunongan ed saray pidedeneng to tan realistiko ed saray iilaloan to.

21. No papakiwasen itayo na aro ed panaglingkor ed Dios, antoray maong a resultan ontumbok?

²¹ Say panangaro ed si Jehova tekep na interon puso, kamarerwa, kanonotan, tan biskeg so “dakdakel nen saray amin a lapag ya panangaro ya poolan tan saray bagat.” (Marcos 12:33) No papakiwasen itayo na aro, sirin, gawaen tayoy anggaay nayarian tayo diad panaglingkor ed Dios. Insulat nen Pedro a no saray maridios a kualidad, pati say aro, so “kien yo so sarayan bengatla, tan daakan ira, ag da kayo paulian a manmenengmeneng tan ag onbunga ed pikakabat ed Katawan tayo a Jesu-Cristo.”​—2 Pedro 1:8.

[Paimano ed leksab]

Diad Panrepaso

◻ Anto so nepeg a manamakiwas a puersa ed panaglingkor tayo ed Dios?

◻ Panon a say aro nen Kristo so manadagdag ed sikatayon manlingkor ed si Jehova?

◻ Anton alabas a kapagaan na saray Pariseo so nepeg tayon paliisan?

◻ kin ya agmakabat so pantultuloy a pangipareng ed panaglingkor tayo ed samay panaglingkor na sananey a Kristiano?

[Saray litrato ed pahina 16]

Nandurumay abilidad, biskeg, tan kipapasen na balang indibidual