Panagdispelosip​—Sakey Ta’n Maaron Probisyon?

“SANTO, santo, santo, so Katawan [Jehova, NW] a Dios, say Makapanyarin amin.” (Apocalipsis 4:8) Mitukoyan ed satan a deskripsyon, si Jehova so Lapuan na masanto iran estandarte. Saraya so nidalatdat ed “saray masanto a Sulsulat,” tan saray Kristiano so obligadon ontumbok ed sarayan totontonen. On, nepeg ya arawian da so antokaman a marutak ed imaton nen Jehova.​—2 Timoteo 3:15; Isaias 52:11.

Malinew ya igaganggan na Biblia: “No ag ingen, unong a say anawag ed sikayo et masantos, masantos kayo met komon ed ganaganay panagbilay, Ta nisulat ya: Masantos kayo komon ta masantos ak.” (1 Pedro 1:15, 16) Nanlapulad inkiwala na Kristianon kongregasyon 19 siglo lay apalabas, akipuligesgesan iray tuan Kristiano pian naprotektaan manlapud espiritual tan moral a karutakan.​—Judas 3.

No Akin a Kaukolan so Proteksion

Nidudunget so amin ya aripen na Dios ed angat a panamasiansian malinis ed moral tan espiritual. Diad satan a gagala, nepeg a resistiay taloran mabiskeg a kakabusol​—si Satanas, say mundo to, tan say inklinasyon na makasalanan a laman tayo. (Roma 5:12; 2 Corinto 2:11; 1 Juan 5:19) Tuksoen kayo na mundo nen Satanas pian magmaliw ya imoral, sagyaten to kayon ontumbok ed saray dalan to, tan mangiyopresi’d sikayo na materyal a kayamanan, inkabantog, posisyon, inkaprominenti, tan pakayari. Balet saramay determinadon manggegemtan na tuan panagdayew so manreresisti ed antokaman ya iyoopresi nen Satanas tan mansiasiansian “andi mancha to ed mundo.” Akin? Lapud labay day mansiansia ed silong na maprotekta tan maaron panagtalima na malinis ya organisasyon nen Jehova.​—Santiago 1:27; 1 Juan 2:15-17.

Mangitatarok si Jehova na tulong parad siopaman a membro na Kristianon kongregasyon a naplag ed saray pananukso nen Satanas lapud kakapuyan na too. Saray kualipikadon mamatatken ed espiritual so tinuro pian protektaay kongregasyon tan simamaaron ontutulong ed saray nankasalanan pian magbabawi ed saray kasalanan da tan manggawa na nakakaukolan a pananguman parad kipawil ed gendat. Siopaman a Kristiano a nalalanor ed gawan-mauges so nepeg a siaanos a tulongan pian magbabawi tan manguman ed saray dalan to.​—Galacia 6:1, 2; Santiago 5:13-16.

No Panon a Maaro so Panagdispelosip

Say bautismadon ariripen nen Jehova a sigagalan manutumbok ed marelmeng a kurang tan agmalabay a manguman so nepeg a moriaen bilang agmagbabawi tan sirin agmatukoy ed Kristianon pantutuyaw. (Ipareng so 1 Juan 2:19.) Saratan a totoo so agnaabuloyan a mansiansia ed malinis a Kristianon kongregasyon tan diad ontan et nadutakan itan. Sikaray nepeg ya ekalen.

Say pagmamaliw a matukoy ed panangekal ed saray manaagamil ed panaggaway marelmeng so niyilustra ed onggendan a situasyon: Lapud idarakel na panangataki tan marawal iran krimen sumpad saray estudyante, inadapta na pigaran eskuelaan so patakaran a “kerew a legay-bilay a kasuspendi na saray estudyanten manguusar odino mamapagyaw a mangusar na armas,” report na The Globe and Mail, sakey a peryodiko ed Toronto, Canada. Say panangekal so gagawaen pian protektaan iray estudyanten malabay a nagunggunaan manlapud edukasyonal a programa ya agniwawalwal ed marawal iran gawa.

Akin et maaro so pangekal ed kongregasyon na agmagbabawin managgaway-mauges? Say panggawa na ontan so panangibalikas na panangaro ed si Jehova tan ed saray dalan to. (Salmo 97:10) Ipapanengneng na onian kiwas so panangaro ed saray manguusil ed sakey a matunong a kurang lapud mangekal iya ed sakey ed limog a manangitarok na mauges ya impluensya ed sikara. Proprotektaan met na saya so kalinisan na kongregasyon. (1 Corinto 5:1-13) No abuloyan a mansiansia ed kongregasyon so seryoson imoralidad odino espiritual ya inkadutak, narutakan iya tan agla matukoy parad panangisaklang na sagradon serbisyo ed si Jehova, a masanto. Sakey ni, say inka-ekal na managgaway-mauges so makatulong ed sikato a namoriay inkaseryoso na matungangan kurang to, magbabawi, tan manggawa na nakakaukolan a pananguman tan diad ontan et naaksobi lamet ed loob na kongregasyon.

Say Epekto ed Arum

Sano say sakey a membro na kongregasyon so akagawa na sakey a seryoson kasalanan, a singa say pikakalugoran, agto papaliketey puso nen Jehova. (Uliran 27:11) Siopaman a Kristianon nipasubo ed seksual ya imoralidad so maseguron agmaniisip ed singa impanisip nen Jose sanen sinali nen asawa nen Potipar a tuksoen pian miakdol ed sikato. Say ebat nen Jose et: “Panon sirin so pakayarik a mangawa ed saya ya abalbaleg a kabaglan tan kasalanan ya onsumpa ed Dios?” (Genesis 39:6-12) Nirespeto nen Jose iray masanton estandarte nen Jehova tan inbatikan toy makapatukson situasyon. Diad biek a dapag, say sakey a mikakalugoran so singa kulang na magenap ya aro ed Dios pian napugeran manlapud pamenek ed silalaman a pilalek to.​—Galacia 5:19-21.

Say sakey a bautisadon onsusumlang ed saray ganggan na Dios et agto panpapagaan so deral tan ot-ot ya itarok to ed mananisian kakanayon to. Say emosyonal ya epekto so mas ni nen say nasungdoan da. Sanen nalmoan ton imoral so anak ton laki, tagleey na sakey a Kristianon bii: “Dagdaiset ya agagi, no wala bilang, so makatalos no kaunongay impakasakitan mi tan asakitay linawa . . . Sikami sigpot a maermen.” Say reputasyon na interon pamilya so nayarin napanduaruwaan. Say depresyon tan sakey a sukat na impankasalanan so nayarin mamairap ed saray matoor a membro na pamilya. Diad ontan et mangitatarok na sakit na linawa so marelmeng a kurang na managgaway-mauges.

Maaron Tulong Parad Saray Membro na Pamilya

Kaukolan a tandaan na matoor iran Kristianon membro na pamilya na nakal iran indibidual a say panagdispelosip so parehon maaro tan manprotekta. Ginaway anggaay nayarian ed amin a posiblin paraan pian natulongan so managgaway mauges. Balet no apaneknekan a sikatoy matunganga ed Dios tan bangar ya agmagbabawi, say kongregasyon so kaukolan a protektaan tan anggapoy napanpilian noagta say ikiwas unong ed igaganggan na Salitay Dios: “Paekal yo sirin so mauges a to-o ed pegle’yo.” (1 Corinto 5:13) Singa ed inkuan na sakey a Tasi, “diad panagdispelosip et nalalanor so katooran ed si Jehova.”

Sano say sakey a membro na pamilya so adispelosip, say ot-ot so nasasagmak na Kristianon kakanayon. Matukoy lambengat sirin a gawaey anggaay nayarian na mamatatken pian ligliwaen ira ed espiritualidad. (1 Tesalonica 5:14) Saray mamatatken so nayarin mangipikasi ed sikara tan kaiba ra. Mabetbet a nayarin dalawen irayan matoor a Kristiano pian itongtong iray Makasulatan a kaisipan. Nepeg ya anamoten so amin a pankanawnawa na saray pastol na kasimpukokan pian pabiskegey espiritualidad na sarayan pinabli sakbay tan kayari na Kristiano iran miting. Nayarin mangiter na kaaruman a panamaseseg so piulop ed sikara ed lawak a ministeryo. (Roma 1:11, 12) Nakaukolan ya ipanengneng na saray pastol so panangaro tan panangimano ed matoor ya ariripen nen Jehova.​—1 Tesalonica 2:7, 8.

Aliwan rason so makasalanan a kurang na sakey a too pian ibaliwalay siopaman ed pamilya to a mansiasiansian matoor ed si Jehova. Impulisay na Dios so marelmeng ya Ari na Israel a si Saul, balet ag-inabuloyan nen David a saya so mangamper ed personal a panangaro to ed anak a laki nen Saul a si Jonathan. Diad tua, inmelet so bedber na impankaaro nen David tan Jonatan. (1 Samuel 15:22, 23; 18:1-3; 20:41) Kanian amin ed kongregasyon so makanepegan a magmaliw a masuporta tan maaro ed Kristianos a saray kanayon da so nankasalanan sumpad si Jehova.

Agaylan inkaandi panangaro itan no ibaliwala odino magmaliw ya agmapangasi ed ontan iran matoor a totoo! Saray matoor a membro na pamilya so nikadkaduman mankaukolay panamaseseg. Nayarin nalikna ra a sikaray begte-begtew tan naromog a mairap so kipapasen da. Anganko ta nipanabang yo met ed sikaray makapaalagey iran punto ed espiritual odino makapaseseg ya eksperiensia ed sikara diad pantelepono. No bilang ta say adispelosip so akaebat, basta lambengat kereway pitongtong ed Kristianon kanayon. Nayarian mo met ya imbitaan iray matoor a membro ed ontan a sankaabungan diad sakey a sosyal a pantitipon odino mangan ed ayaman yo. No bilang ta naabet yo ira diad pititindaan, usaren iyan so pankanawnawa parad pigaran makapaalagey a piiba. Tandaan, saray matoor a Kristiano a walaay adispelosip a kakanayon so kabiangan ni na malinis ya organisasyon nen Jehova. Mainomay dan isian so inkasikara tan nadismaya. No ontan, manaliston mangipanengneng na kaabigan tan aro parad sikara. Mantultuloy a manggawa na maong ‘ed amin, nagkalalo’d saray kaamong ed pananisia.’​—Galacia 6:10.

Apresyaen so Probisyon nen Jehova

Agaylan baleg a pisasalamat tayo a mangipapanengneng si Jehova a Dios na matamoy a panagmalasakit ed balang sakey ed sankamundoan a pamilya na saray managdayew. Diad panamegley na organisasyon to a simamaaron itatarok to so oksuyan na panangasisti ed sikatayon manakar ed arap to ed sakey a matunong a paraan. Anggano say sakey a membro na pamilya so sigagagalan mankasalanan tan kaukolan ya ekalen manlapud kongregasyon, walay paraan pian makapawil no talagan magbabawi. Saya so nilitrato ed onggendan ya alimbawa:

Nanggunaetan na mamatatken a tulongan so sakey a toon tawagen tayo lan Anna, balet sikatoy binmaling ed panagsigarilyo, panagbuanges, tan druga. Sikatoy agnagbabawi tan agnansiansia ed kongregayson. Anggaman ontan, ag-abayag et ginmapon anap-anapen ni nen Anna so maaron panuulopan ed malinis a kongregasyon nen Jehova tan sikatoy nampikasi ed sikato parad tulong. Inaksobi to ya agto sigpot ya inapresya no kaunongay panagtalima na mamatatken ed saray nababalang. Ginmapo lamet ya onatendi si Anna ed saray miting, tan saya so angitonton ed pagbabawi. Kayari na saman, sikatoy inawat lamet ed maaro tan maprotektan kongregasyon. Lamet si Anna so mangiyaalibansa ed atagey ya estandarte nen Jehova ed moralidad. Sikatoy misalsalamat ed aron impanengneng na mamatatken tan inkuan met: “Agyo naisip no kaunongay intulong na saray Kristianon palapagan ed siak. Talagan sasapotan nen Jehova iray pankaukolan tayo.”

On, mangitatarok so Dios na dalan ed pakapawil na saramay adispelosip manlapud kongregasyon balet nagbabawi ed saginonor. Anengneng tayo met ya anggan say panagdispelosip a mismo so sakey a maaron probisyon. Balet agaylan maabig no naarawian iyan maermen ya eksperiensia, diad lawas panumbok ed saray matunong a dalan na masanton Dios tayo! Komon ta sikatayoy misalsalamat ed pribilihyon pangigagalang ed si Jehova bilang sakey a kabiangan na malinis, maaro, tan maprotektan organisasyon to!

[Litrato ed pahina 26]

Kasin mangipapanengneng ka na aro ed matoor a kakanayon na saray nakal manlapud kongregasyon?