Anguman Laray Panaon

AGAYLAN magayagay inpambilay ed kadaanan ya Israel diad silong na maglorian uley nen matoor ya Arin Solomon! Panaon iman na kareenan, inkaaligwas, tan liket. Legan na panaon a sitotoor a sinuportaan nen Solomon so tuan panagdayew, daakan a binendisyonan nen Jehova so nasyon. Diad kinen Solomon, aliwa lambengat a baleg a kayamanan so inter na Dios noagta ontan met “[sakey a] makabat tan makatalos a puso” pian makapanguley si Solomon ed inkatunong tan aro. (1 Arari 3:12) Kuan na Biblia: “Amin iray ar-ari ed dalin inanap da so arapan nen Salomon, pian denglen da so kakabatan to, ya inyan na Dios ed puso to.”​—2 Awaran 9:23.

Diad saray totoo, si Jehova so angiter na kaligenan, kareenan, tan daakan a maabig iran bengatla. Ibabaga na Salitay Dios: “Say Juda tan say Israel sikara so dakel a singa say buer ya wala ed gilig na dayat dia ed karakel a mangakan tan maniinum tan manliliket.” Namparan diad literal tan piguratibo, saray totoo so “[nantultuloy a nanayam] a matalek, balang sakey a too ed silongan na uvasan to tan higos to, . . . ed saray amin ya agew nen Salomon.”​—1 Arari 4:20, 25.

Anguman laray panaon. Say bilay natan so duman tuloy manlapud saraman a maliket ya agew. Aliwan singa nen panaon nen Solomon, say baleg a problema natan et say inkaduka. Anggan diad saray mayaman a nasyon et wala so inkaduka. Alimbawa, namparan diad Estados Unidos tan diad grupoy Europeanon nasyones, ngalngali 15 porsiento ed totoo so walad inkaduka, inkuan na United Nations Development Program.

Nipaakar ed sankagloboan a litrato, say The State of the World’s Children 1994, sakey a report na UNICEF (United Nations Children’s Fund), so makakaimano a say kakalima na populasyon na mundo so manbibilay ed sigpot ya inkaduka, ya ompapalalon “magmamaliw a mairap tan desperado” so panagbilay na karaklan ed saray duka.

Diad arum a bansa, say biglaan ya ibibili na sasaliwen so lalon mamapairap ed duruka. Kuan na sakey a misis ed sakey a dalin ed Aprika: “Walay bengatlan nanengneng mo ed tindaan, tan ikuan mo, ‘Sige, onsempet ak ni tan mangalay kuartan isaliw ed satan.’ Sika so pinmawil kayari sakey oras pian ibaga lambengat ed sikan agmo nasaliw lapud inyatagey na presyo. Anto so gawaen na sakey? Talagan makapakapuy.”

Sananey nin bii diman so angikuan: ‘Pian nabilay, lilingwanan miray arum niran pankaukolan. Say panpelengan mi et say pananap na tagano.’

Unong ed Nasyones Unidas, say arapen so makapaermen. Alimbawa, kakalkulaen na UNICEF a no say kaplesan ya iyaatagey na populasyon so mantultuloy, say bilang na dukan totoo ed sankamundoan so ondakel na mamipat “ed loob na sakey a panat na bilay.”

Ingen, anggaman ed onuuges a kipapasey kabibilay tan ed sosyal, saray ariripen na Dios so walaan na rason pian magmaliw a positibo. Anggaman sikaray manbibilay ed limog na saramay manmoria’d arapen tekep na ompapalalon kaandiay ilalo, maniilalo so ariripen na Dios ed arapen tekep na gayaga tan talek. Say ontumbok ya artikulo so mangusisa ed saray rason no akin.

[Picture Credit Line ed pahina 3]

De Grunne/Sipa Press