Tatalonaan na Aro so Agmanepeg a Panimon
“Say aro aliwan maimon.”—1 CORINTO 13:4, NW.
1, 2. (a) Anto so imbaga nen Jesus ed saray babangatan to nipaakar ed aro? (b) Posibli ta so pagmaliw a namparan maaro tan maimon, tan akin ya ontan so ebat yo?
SAY aro so pakabidbiran a marka na tuan Inkakristiano. “Lapu ed saya amin a too nabirbiran da’ya sikayo ray babangatan ko, no wala so aro yo ed sakey tan sakey,” inkuan nen Jesu-Kristo. (Juan 13:35) Si apostol Pablo so pinuyanan a mangisalaysay no panon so nepeg a pangapekta na aro ed saray Kristianon siglaotan. Nilikud ed arum niran bengatla, insulat to: “Say aro aliwan maimon.”—1 Corinto 13:4, NW.
2 Sanen insulat nen Pablo iratan a salita, tutukoyen to ed saman so agmanepeg a panimon. Tano andi et agto komon nibaga ed satan lanlamang a kongregasyon: ‘Siimonak ed sikayo tekep na maridios ya imon.’ (2 Corinto 11:2) Say ‘maridios ya imon’ to so aliing lapud lalakin walaay makaderal ya impluensya ed kongregasyon. Saya so amakiwas ed si Pablo a mansulat na komaduan apuyanan a sulat a mankarga na maaron konseho ed saray Kristianon taga Corinto.—2 Corinto 11:3-5.
Panimon ed Limog na Kristianos
3. Panon ya atibukel ed limog na saray Kristianon taga Corinto so probleman nipaakar ed panimon?
3 Diad inmunan sulat to ed saray taga Corinto, kinaukolan nen Pablo ya arapen so probleman mangaamper ed maabig ya ulopan na sarayan balon Kristiano. Ipapaatagey da so pigaran lalaki, a nagmaliw ya ‘atagey a linawa diad pankaabigan to ya onsumpa ed sakey.’ Saya so angipaarap ed inkaapag-apag ed loob na kongregasyon, a balang sakey so mangibabagan: “Siak kien ak nen Pablo,” “[Balet] siak kien ak nen Apolos,” “[Balet] siak kien ak nen Cefas.” (1 Corinto 1:12; 4:6) Diad silong na panangiwanwan na masanton espiritu, ayarian nen apostol Pablo ya amtaey lamot na problema. Saray taga Corinto so onkikiwas a singa ed silalaman-impannonot a totoo, aliwan singa “saray totoo a maespiritu.” Kanian, insulat nen Pablo: “Ta mangaraldalin kayo ni. Ta legan ya wala ed sikayo so saray imun tan siblangan, ag kayo ta mangaraldalin tan manaakar ed inkaugali na totoo?”—1 Corinto 3:1-3.
4. Anton ilustrasyon so inusar nen Pablo pian tulongan iray agagi a makarateng ed dugan panmoria ed balang sakey, tan anton leksion so naaralan tayo manlapud saya?
4 Tinulongan nen Pablo iray taga Corinto a talosan so suston panmoria ed intelehensya tan abilidad na nanduruman totoo ed kongregasyon. Intepet to: “Siopa so mangawa ed sika ta pian miduma ka ed arum? Tan anto so wala ed sika ya ag mo naawat? Et no inawat mo akin et manpaspasirayew ka a singa ag mo naawat?” (1 Corinto 4:7) Diad 1 Corinto kapitulo 12, insalaysay nen Pablo a saramay kabiangan na kongregasyon so singa ed nanduruma iran kabiangan na laman na too, a singa say lima, say mata, tan say layag. Impabitar to a ginawa na Dios iray kabiangan na laman diad paraan a makapanaasikasoan. Insulat met nen Pablo: “[No] sakey a kabiangan so napagalangan, amin da’y kabiangan mililiket ira ed sikato.” (1 Corinto 12:26) Nepeg ya iyaplika na amin ya aripen na Dios natan iyan prinsipyo diad siglaotan da ed balang sinansakey. Imbes a panimonan so arum a too lapud asaimin odino agawgawaan to diad serbisyo ed Dios, nepeg tayoy migayaga ed satan a too.
5. Anto so nipaparungtal ed Santiago 4:5, tan panon ya ipapabitar na Kasulatan so katuaan na sarayan salita?
5 Bidbiren, mas mainomay itan ya ibaga nen say panggawa. Ipapanonot ed sikatayo na managsulat na Biblia a si Santiago a “say tendensyan onibeg” so walad balang makasalanan a too. (Santiago 4:5, NW) Agawa so sankaunaan ya impatey na too lapud impauleyan si Cain na agmanepeg a panimon to. Pinasegsegang na saray Pilisteo si Isaac lapud inibegan day iyaaligwas to. Nanimonan nen Raquel so pagmamaliw a maanak na atsi to. Angimonan na ilalak a lalaki nen Jacob so pabor a nipanengneng ed yugtan ya agi ran si Jose. Mapatnag a nanimonan nen Miriam so aliwan-Israelitan ayro to. Siiibeg a nannononong ira di Kore, Datan, tan Abiram sumpad si Moises tan Aaron. Nanimonan nen Arin Saul iray itatalona nen David ed militar. Anggapoy duaruwa a say panimon so sakey met a sengegan na aminpigan impansasangsangan na babangatan nen Jesus no siopa so sankabalgan ed sikara. Say katuaan to et anggapoy ag-ayadyarin toon sigpot a bulos ed makasalanan a “tendensyan onibeg.”—Genesis 4:4-8; 26:14; 30:1; 37:11; Numeros 12:1, 2; 16:1-3; Salmo 106:16; 1 Samuel 18:7-9; Mateo 20:21, 24; Marcos 9:33, 34; Lucas 22:24.
Diad Kongregasyon
6. Panon a nakontrol na saray mamatatken so tendensyan onibeg?
6 Kaukolan a manbantay iray Kristiano sumpad ibeg tan agmanepeg a panimon. Lalaktipen iya na saray ulop na mamatatken ya apabtangan pian mangasikaso’d saray kongregasyon na totoo na Dios. No say sakey a matatken et walay kaabebaan na nonot, agto panambisyonan a palumbasay arum. Diad biek a dapag, no say sakey a matatken so walaan na matalonggaring iran abilidad bilang organisador, odino mapublikon espiker, migayagay arum ed saya, a moriaen itan bilang sakey a bendisyon ed kongregasyon. (Roma 12:15, 16) Nayarin maabig so iyaaligwas na sakey ya agi, a mamapaneknek ed pamapawala na saray bunga na espirituy Dios ed bilay to. Diad pangonsidera ed saray kualipikasyon to, nepeg a magmaliw a maalwar iray mamatatken ya agpapabalegen so pigaran ankekelag a lingo pian ikatunongan so agpangirekomenda ed sikato bilang ministeryal ya aripen odino sakey a matatken. Satan so mangipatnag na inkaandi aro tan inkamakatunongan.
7. Anton problema so nayarin natibukel sano say sakey a Kristiano so makaawat na pigaran teokratikon asainmin?
7 No say sakey so akaawat na teokratikon asainmin odino espiritual a bendisyon, say arum ed kongregasyon so kaukolan a manbantay sumpad ibeg. Alimbawa, ompan say sakey a makayarin agin bii so mas mabetbet a nausar nen say arum a mangiter na saray demostrasyon ed saray Kristianon miting. Nayarin saya so mamalesa na panimon ed biang na pigaran agagin bibii. Nayarin ontan met a problema so niwala’d baetan nen Euodias tan Sintique ed kongregasyon na Filipos. Saratan a bibii ed kaplesan a panaon so nayarin mankakaukolan na mapangasin panamaseseg manlapud mamatatken pian magmaliw a mapaabeba tan magmaliw a ‘manpaparay nonot ed Katawan.’—Filipos 2:2, 3; 4:2, 3.
8. Say panimon so mangitonton ed antoran makasalanan a gawa?
8 Nayarin walay amta na sakey a Kristiano nipaakar ed apalabas ya impakalukso na sakey a natan et panggagayagaan toray pribilihyo ed loob na kongregasyon. (Santiago 3:2) Lapud panimon, nayarin wadtan so tukson itongtong itan ed arum tan suppiaten so asaimin na saman a sakey ed kongregasyon. Saya so agmitunosan ed aro, a “dakel so sakuban to’n kasalanan.” (1 Pedro 4:8) Say walaay imon iran tongtongan so maneral ed kareenan na sakey a kongregasyon. “No wala so ampait ya imon yo tan panangibiig ed puspuso yo,” pasakbay nen babangatan a si Santiago, “ag kayo manpasirayew tan ag ki mantila ya onsumpa ed katuaan. Sayan kakabatan aliwan sikato so onleksab a manlapu ed tagey, noag ingen dinaralin, inaayep, dinidiablo.”—Santiago 3:14, 15.
Diad Pamilya Yo
9. Panon a nakontrol na saray sanasawa so liknaan na panimon?
9 Dakel a panamaley so onsasaew lapud agmanepeg a panimon. Aliwan aro so pangipanengneng na agpanagmatalek ed sakey ya asawa. (1 Corinto 13:7) Diad biek a dapag, nayarin ag-mililikas so sakey ya asawa ed liknaay panimon na asawa to. Alimbawa, ompan panimonan na sakey ya asawan bii so imano ya iiter na asawa to ed arum ya agagin bibii. Odino say asawan laki et nayarin panimonan toy kabaleg na panaon ya uusaren na asawa to ed sakey a mankaukolan a kanayon. Lapud abaingan ed ontan a liknaan, ompan saray sanasawa so mandeen la tan ipanengneng so inkadismaya ra diad saray dalan a mamauges ed problema. Imbes, say maimon ya asawa so kaukolan a mitalosan tan magmaliw a matua nipaakar ed liknaan to. Say asawa to met so kaukolan a magmaliw a makatalos tan paseguroan to lamet so aro to’d sikato. (Efeso 5:28, 29) Nayarin kaukolan dan dua a pakepaen so liknaay panimon diad ipaliis ed saray situasyon a mamalesa ed satan. No maminsan et kaukolan a tulongan na sakey a Kristianon manangasikaso so asawa to a talosan a sikatoy manguusar na limitado, matukoy ya imano ed agagin bibii pian nasumpal so responsabilidad to bilang sakey a pastol ed pulok na Dios. (Isaias 32:2) Siempre, say sakey a matatken so kaukolan a manalwar ed pangiter na antokaman a makatunongan a sengegan parad panimon. Kakaukolanen na saya so pagmaliw ya asimbang, a seguroen a makapanguusar na panaon pian pabiskegen to so dilin relasyon da bilang sanasawa.—1 Timoteo 3:5; 5:1, 2.
10. Panon a natulongan na atateng iray anak da a natalonaay liknaan na panimon?
10 Nepeg met a tulongan na atateng so ananak da a talosan so ideya na agmanepeg a panimon. Mabebet a nalalanor so ananak ed saray ebatan a mansumpal ed kolkolan. Naynay a say lamot na satan et say panimon. Lapud say pankaukolan na balang anak et nanduruma, agnayarin pare-parehoy pideneng ed ananak. Sakey ni, kaukolan a talosan na ananak a balang sakey ed sikara so walaan na nanduruman maong a kualidad tan kakapuyan. No say sakey ya anak so naynay a papasesegen a magmaliw a maabig a singa met ed arum, nayarin saya so mamalesay ibeg na sakey tan kinon met ed arum. Kanian, nepeg ya ipasal na atateng so ananak da a sukaten so iyaaligwas da diad pangonsidera ed saray alimbawa ed Salitay Dios, aliwan diad panamegley na panlalaslasay sakey tan sakey. Oniay ibabaga na Biblia: “Ag itayo komon mapaagum ed maapan dayew, a pasanoken so sakey tan sakey, a mansisibletan so sakey tan sakey.” Imbes, “balang sakey patnagen to komon so gawa ton dili, et dia ed ontan wala naani sirin so like’to nipaakar ed [inkasikaton dili, tan aliwan say panangipareng ed sananey a too].” (Galacia 5:26; 6:4) Nagkalalo ed amin, kaukolan a tulongan na Kristianon atateng iray anak dia ed panamegley na regular a panagaral ed Biblia, ya ipapabitar so maong tan mauges iran alimbawan wala’d Salita na Dios.—2 Timoteo 3:15.
Saray Alimbawa na Pananalonay Panimon
11. Panon a si Moises so sakey a maabig ya alimbawa na iyaarap ed panimon?
11 Aliwan singa saray maagap ed pakayarin pangulo na sayan mundo, “si laki a Moises sikato nen saman so maoyamon toloy ed saray amin a lalaki ya wala ed tapew na dalin.” (Numeros 12:3) Sanen nagmaliw a makapabelat la’d si Moises so panangidaulo ed saray Israelita, pinakurang nen Jehova so espiritu To ed 70 niran Israelita, a pinakayari iran ontulong ed si Moises. Sanen duara ed sarayan lalaki so kinmiwas a singa ra propeta, nilikna nen Josue a saya so lingon mangipaliis ed panangidaulo nen Moises. Labay nen Josue a pugeran irayan lalaki, balet sipapaabeban inkatunongan nen Moises: “Mangimon ka ta’n onkana ed siak? Oyla komon ya amin a katooan nen Jehova manprofeta ra a sikato so makasengeg na pangyan nen Jehova na Espiritu to ed sikara!” (Numeros 11:29) On, panliketan nen Moises sano makaawat na pribilihyo ed serbisyo so arum. Agto nanimonan a kinaliktay gloria parad inkasikaton dili.
12. Anto so amakayari ed si Jonatan a naarawian so liknaan na panimon?
12 Sakey a maabig ya alimbawa ed no panon ya ontatalonay aro ed posiblin agmanepeg a panimon so intarok nen Jonatan, say anak na Israelitan Ari a si Saul. Si Jonatan ed saman so onsublay a manawir na trono na ama to, balet pinili nen Jehova si David, say anak nen Jesse, pian sikatoy magmaliw ya ontumbok ya ari. Dakel a walad kipapasen nen Jonatan so angimon komon ed si David, a momoriaen a karibal. Balet, say aro nen Jonatan parad si David so angamper ed sikato a patalonaan ed ontan a liknaan. Diad impakaamta’d impatey nen Jonatan, nikuan nen David: “Maermen ak nipaakar ed sika, agik a Jonatan, makapaliket ka a toloy nen saman ed siak. Say arom ed siak sikato nen saman so makapakelaw, a talonaan to so aro na saray bibii.”—2 Samuel 1:26.
Saray Sankatalonggaringan ya Alimbawa
13. Siopa so sankaabigan ya alimbawa no nipaakar ed imon, tan akin?
13 Si Jehova a Dios so sankatalonggaringan ya alimbawa na sakey ya analona ed manepeg ya imon. Sigpot a kontrolado to itan a liknaan. Antokaman a makapanyarin panangipatnag na madibinon imon so lawas mitunosan ed aro, inkahustisya, tan kakabatan na Dios.—Isaias 42:13, 14.
14. Anton alimbawa so impanengneng nen Jesus a misuniyan ed kinen Satanas?
14 Say komaduan matalonggaring ya alimbawa na sakey a mangipapanengneng na impanalona ed liknaay panimon et say inad-aron Anak na Dios, si Jesu-Kristo. “Bangta sikato’y wala ed ereng na Dios,” si Jesus so “ag-angikonsidera ed panagsamsam, salanti, a sikatoy magmaliw a kaparehas na Dios.” (Filipos 2:6, NW) Agaylan pidumaan ed kurang ya inala na maambisyon ya anghel a nagmaliw a Satanas a Diablo! Singa say “ari na Babilonia,” siiimon a pinilalek nen Satanas a “[mipara ed] say Sankatagyan” diad pangileletneg to’d inkasikato bilang sakey a dios a karibal ya onsumpa ed si Jehova. (Isaias 14:4, 14; 2 Corinto 4:4) Sinali ni ingen nen Satanas ya ingganyoen si Jesus ya ‘ondakmomo tan [sikatoy] igalang.’ (Mateo 4:9) Balet anggapoy makasuwawi ed si Jesus manlapud mapaabeban kurang na panagpasakup to ed inkasoberano nen Jehova. Miduma ed si Satanas, “nilokpos [nen Jesus] so inkasikato, ya inala to so ereng na sakey ya aripen, ya agawa’n kaolibay na saray totoo. Tan bangta aromog a singa nengneng na sakey a too, nanpaabeba a nagmaliw a matolok ya anga’d say ipapatey, on, say ipapatey ed [panamairapan a palitek, NW].” Nitandoro nen Jesus so kanepegan na Ama ton manuley, a sigpot ya intalirak so kurang na Diablo a kinon tan panimon. Lapud inkamatoor nen Jesus, “say Dios met sankatageyan so inpangidayew to ed sikato, tan inter to ed sikato so ngaran ya analonggaring ed amiamin a ngaran; a dia ed ngaran a Jesus so talimokoran na amin a pueg, na saray wala ed tawen, tan wala ed dalin tan wala ed dalem na dalin, tan pian ganagana a dila nepeg da a patuaen ya si Jesu-Cristo sikato so Katawan, a kadayewan na Dios Ama.”—Filipos 2:7-11.
Pananalona ed Panimon Yo
15. Akin a nepeg tayon magmaliw a maalwar a pugeran so liknaan na panimon?
15 Aliwan singa say Dios tan si Kristo, saray Kristiano so ag-ayadyari. Lapud makasalanan, no maminsan et sikaray pakikiwasen na makasalanan a panimon. Kanian, imbes ya abuloyay panimon a mamakiwas ed sikatayon mamalaw ed sakey a kapananisian nipaakar ed pigaran ankelag ya impakalukso odino inisip a lingo, importantin dalepdepen tayo irayan impuyan a salita: “Agka manpetek ya alabas; agmo met gawaen so inkasika ya alabas a makabat. Akin ta a bagbagen mo so inkasika?”—Eclesiastes 7:16.
16. Anton maabig a simbawa nipaakar ed imon so nitarok ed sakey ya apalabas ya isyu na sayan magasin?
16 Nipaakar ed teman imon, oniay pasakbay na The Watch Tower na Marso 15, 1911: “Bangta nepeg tayoy magmaliw a lalon maseseg, talagan maimon parad gagala na Katawan, ingen nepeg tayon seguroen ya aliwan sakey a personal a pamaakaran so pibabali; tan nepeg a nonoten no sikatayoy ‘mibabali’ odino andi. No ontan, nepeg tayo met a konsideraen no kasin manepeg parad mamatatken ya arapen itan tan no kasin obligasyon tayoy onasingger ed mamatatken. Nepeg tayon amin a nawalaan na aralem ya imon parad gagala tan kimey na Katawan, balet ta manalwar a maong ya aliwan nengneng iman na agmarakep . . . diad arum a salita, nepeg tayon seguroen ya aliwan imon iman parad arum, noagta imon parad arum, parad intereses tan pankaabiganan to.”—1 Pedro 4:15.
17. Panon tayon naamper so makasalanan iran gawa na panimon?
17 Bilang Kristianos, panon tayon naarawian so kinon, panimon, tan ibeg? Say solusyon so mandependi ed pangiyabuloy a bulos so agos na masanton espiritu na Dios ed bilay tayo. Alimbawa, kaukolan tayon ipikasi espiritu na Dios tan tulong to pian nipatnag so maong iran bunga to. (Lucas 11:13) Kaukolan tayoy onatendi ed Kristiano iran miting, a lulukasan diad panamegley na pikakasi tan walaay espiritu tan bendisyon na Dios ed saraya. Niarum ni, kaukolan tayon aralen so Biblia, ya impuyan na Dios. (2 Timoteo 3:16) Tan kaukolan tayo so mibiang ed panangipulong na Panarian a gawaen itan tekep na pakayari na masanton espiritu nen Jehova. (Gawa 1:8) Say panulong ed kaparan Kristiano ya imemedmer na pigaran mauges ya eksperiensia so sananey nin dalan na panpasakop ed maong ya impluensya na espiritu na Dios. (Isaias 57:15; 1 Juan 3:15-17) Say siseseseg a pananumpal ed amin na sarayan Kristianon obligasyon so ontulong a manprotekta ed sikatayo manlapud makasalanan ya agagamil na panimon, ta ibabagay Salita na Dios: “Manakar kayo ya onong ed Espiritu, tan ag yo oonoren so saray kaalakan na laman.”—Galacia 5:16.
18. Akin ya agtayo lawas a mipuligesgesan sumpad agmanepeg a liknaan na panimon?
18 Say aro so manunan nilista ed saray bunga na masanton espiritu na Dios. (Galacia 5:22, 23) Say pangagamil na aro so ontulong ed sikatayon mangontrol ed makasalanan iran tendensya natan. Balet komusta met ed arapen? Minilyon ya ariripen nen Jehova so walaan na ilalon bilay diad onsasabin mangaraldalin a Paraiso, a ditan et makapanilalo ra a niyatagey a mamaarap ed inkayadyari na too. Diad satan a balon mundo, say aro so niwala tan anggapo la so natalonaan na agmanepeg a liknaay panimon, ta “say pinalsa a dili niliktar ed inkaaripen na kabolokan ya onloob ed kawayangan na gloria na saray anak na Dios.”—Roma 8:21.
Saray Punton Dalepdepen
◻ Anton ilustrasyon so inusar nen Pablo pian amperen so panimon?
◻ Panon a nayarin deralen na panimon so kareenan na say kongregasyon?
◻ Panon a nipasal na atateng iray anak da a natalonaay panimon?
◻ Panon tayon naarawian so makasalanan iran gawa na panimon?
[Litrato ed pahina 16]
Ag-abuloyan a deralen na imon so kareenan na sakey a kongregasyon
[Litrato ed pahina 17]
Nipasal na atateng iray anak da a natalonaan so liknaan na panimon